Jiowa, Ach ‘Leenien Op Lon Fansoun Riaffou’

“Amanauen chon pwung a popu seni Jiowa; i ar we leenien op lon fansoun riaffou.”​—KÖLFEL 37:39, NW.

1, 2. (a) Met Jises a ioteki fan asengesin noun kewe chon kaeo? (b) Ifa letipen Kot ngeni noun kewe aramas?

 JIOWA a tekia me pochokkul seni meinisin. A nom ren i manamanen an epwe tumunu ir kewe mi tuppwol le fel ngeni i lon sokkun lapalap meinisin, minne chok filian. A tongeni pwal mwo nge aimulo noun kewe aramas seni lusun chon fonufan me anomuur lon eu leeni mi nukunukoch me kinamwe. Iwe nge, a iei ussun an Jises iotek ngeni Seman we lon lang ussun noun kewe chon kaeo: “Usap tingor pwe kopwe angei ir seni fonufan, nge kopwe chok amwochu ir seni ewe mi ingau.”​—Jon 17:15.

² Filien Jiowa pwe esap angeikich “seni fonufan.” Nge iei letipan, pwe sipwe manau lein chon fonufan fan iten ach sipwe esilefeili an we poraus ngeni aramas, porausen apilukulukoch me auruuruun letip. (Rom 10:13-15) Nge, ussun an a pwalo lon an Jises we iotek, pokiten sia manau lein chon fonufan, ewe emon “mi ingau” a tufichin mimminakich. Aramas mi rongolap me chonlang mi ngau ra kan efisata watte cheuch me riaffou, iwe, sap minne esap tori chon Kraist fansoun riaffou.​—1 Piter 5:9.

3. Pwal mwo nge ir kewe mi tuppwol le fel ngeni Jiowa repwe weweiti menni poraus mi pwung, nge ikkefa ekkewe kapasen auruuruun letip sia kan kuna lon an Kot we kapas?

³ Fan ekkena sokkun sossot, epwe kan wor fansoun ach sipwe letipechou. (An Salomon Fos 24:10) Lon Paipel a mak chommong porausen chon tuppwol mi kuna riaffou. “Chommong sokkun riaffou repwe tori emon mi pung; nge ewe SAMOL epwe chok angasalo i senir meinisin.” (Kölfel 34:19) Ewer, mettoch mi ngau a pwal fis ngeni “ewe emon mi pung.” Ussun Tafit, ewe sou makkei kol mi fel, eli lon ekkoch fansoun epwe ussun ita pwe mi ‘unun inisich me sipwe fokkun chapapelo.’ (Kölfel 38:8, NW) Iwe nge, ach silei pwe “Jiowa a arap ngeni ir kewe mi letipeta; me a amanaua chokewe mi chuuppwul,” a kan auruuru letipach.​—Kölfel 34:18, NW; 94:19.

4, 5. (a) Me ren minne a mak lon An Salomon Fos 18:10, met sipwe fori ren ach sipwe tufichin kuna an Kot tumun? (b) Ikkefa ekkoch mettoch sipwe tongeni fori ren ach sipwe kuna an Kot alillis?

⁴ Me ren an Jises we iotek, Jiowa a enletin tuttumunukich. I ach we “leenien op lon fansoun riaffou.” (Kölfel 37:39) A pwal mak ewe chok sokkun  kapas lon ewe puken An Salomon Fos, pwe iei alon: “Iten ewe Samol mi Lapalap a usun chok eu imw tekia mi pochokkul, ewe chon pwung a salong lon o kuna manau.” (An Salomon Fos 18:10) Ena wokisin a pwari eu poraus mi enlet ussun an Jiowa tongei forian kewe. Kot a akkaewin awora tumun ngeni chon pwung mi kukkutta i, weween, a ussun ita sia sassalong lon eu imw tekia mi pochokkul pwe sipwe kuna tumun lon.

⁵ Ika epwe torikich osukosuk sipwe wesewesen riaffou ren, ifa ussun sipwe tongeni suuri Jiowa ren an tumun? Sipwe kaeo ulungat mettoch mi fokkun lamot sipwe tongeni fori ren ach sipwe kuna alillis seni Jiowa. Aewin, sipwe kulliiti Semach we lon lang ren ach iotek ngeni. Oruuan, sipwe atipeeufengenni fofforuch me an we ngun mi fel. Iwe, aulungatin, sipwe anomukich fan an Jiowa kokkot ren ach achocho le fiffiti chienach kewe chon Kraist, ir kewe mi tongeni akukkunatiu ach riaffou.

Manamanen Iotek

6. Ifa ekiekin chon Kraist mi enlet ussun iotek?

⁶ Ekkoch sou silelap lon pekin safei ra pesei aramas ar repwe iotek fan iten an epwe kukkunulo ar letipechou me aurek. Inaamwo ika eli mi enlet pwe ach alaemonulo le ekieki mettoch mi murinno fan kinamwe epwe akukkunatiu lolilen, nge sipwe pwal tongeni apasa pwe a chok pwal ina ussun ach auseling ngeni ekkoch mettoch won ei fonufan are an emon rawani sokuruch. Chon Kraist mi enlet rese kan akukkunatiu lamoten iotek ren ar eani ewe ekiek pwe ina och chok minen alillis fan iten ar resap letipechou. Sia eani ewe ekiek pwe iotek eu foffor mi pin, fofforun ach sipwe kapas ngeni ewe Chon Forikich. Iotek a wewe ngeni ach pinini me luku Kot. A enlet pwe iotek a kapachelong lon ach feffel ngeni Kot.

7. Met weween iotek fan lukuluk pochokkul, me ifa ussun ena esin iotek epwe tongeni alisikich pwe sipwe likiitu fan riaffou?

⁷ Epwe pacheri ach kewe iotek ewe mettoch lukuluk won Jiowa. Iei makkeien ewe aposel Jon: “Iei ewe lukuluk sia eani ngeni i, pwe ese lifilifil met sipwe tingor me ren minne letipan, epwe auseling ngenikich.” (1 Jon 5:14) Jiowa, ewe Epinkepiisom, ewe emon chok Kot mi enlet me ewe mi tekia seni meinisin, a enletin akkauselingochu ekkewe iotek mi fiti tinikken, iotekin ir kewe mi fel ngeni i. Ach silei pwe ach we Kot mi ur ren tong a kan akkauseling ngenikich lupwen sipwe kapas ngeni ussun ach kewe aurek me osukosuk a kan auruuru letipach.​—Filipai 4:6.

8. Lupwen chon Kraist mi tuppwol repwe arap ngeni Jiowa lon iotek, pwata resap sau are meefi pwe ese fichiitiir ar repwe iotek ngeni?

⁸ Lupwen chon Kraist mi tuppwol repwe iotek ngeni Jiowa, resap sau, are lukulukummang, are meefi pwe ese fichiitiir ar repwe iotek ngeni. A enlet pwe lupwen sia letipengau pokiten apwangapwangach kewe are a kon chounikich ach kewe osukosuk, eli sisap lien ekiekin arap ngeni Jiowa lon iotek. Lon ena sokkun fansoun epwe murinno ach sipwe chechchemeni pwe Jiowa a kan “tongei noun kewe mi riafou” me a kan “auruuru ir kewe mi letipechou.” (Aisea 49:13; 2 Korint 7:6, NW) Akkaewin lon fansoun letipeta me riaffou epwe lamot ach sipwe kulliiti Semach we lon lang  fan lukuluk pun i ach we leenien op mi pochokkul.

9. Ifa lamoten ewe mettoch luku lupwen sipwe arap ngeni Kot lon iotek?

⁹ Ren ach sipwe kuna sokkun alillis meinisin seni iotek, epwe nom rech ewe sokkun lukuluk mi enlet. Ewe Paipel a apasa pwe “emon mi mochen arap ngeni Kot epwe fakkun luku pwe a wor Kot, o a liwini ngeni ir ekkewe mi kukutta i.” (Ipru 11:6) Ewe mettoch luku a lap seni ach achifoua chok pwe mei wor emon Kot. Ewe sokkun lukuluk mi enlet a wewe ngeni pwe epwe fokkun lapalap ach achifoua pwe Kot a tufichin liwinikich me ina wesewesen an mochen ika sipwe akkalleasochisi i. “Mesen ewe Samol mi chok nennengeni ekkewe aramas mi pung, o selingan mi susuuk ngeni ar kewe iotek.” (1 Piter 3:12) Ach meefi fansoun meinisin pwe Jiowa a tongeikich a kan alapalo aucheaan ach kewe iotek.

10. Epwe fet ach kewe iotek ren ach sipwe tufichin angei seni Jiowa minne epwe amanauakich lon pekin ngun?

¹⁰ Jiowa a akkauseling ngeni ach kewe iotek ika ra popu seni unusen letipach. Iei makkeien ewe sou makkei Kölfel: “Ua fen kokko ren unusen letipei. Kopwe polueniei, O Jiowa.” (Kölfel 119:145, NW) Ach kewe iotek ra sokko seni ekkan pwomwen iotek lon chommong lamalam pun rese ussun och chok eoreni are och mettoch sia osopwisekin fori. Ika sipwe iotek ngeni Jiowa ren “unusen letipach,” epwe watte aucheaan me lamoten ach kewe kapas. Mwirin ach eani ena esin iotek fan tinikken, sipwe kan poputa le meefi ach ngaselo seni aurek, nge ina eu mettoch mi popu seni ach ‘likiti ngeni ewe SAMOL osach we.’ Ussun an ewe Paipel pwonei ngenikich, ‘pwisin i epwe alikiitukich.’​—Kölfel 55:22, NW; 1 Piter 5:6, 7.

An Kot we Ngun mi Fel Ach Chon Alillis

11. Ifa ussun Jiowa a kan poluenikich lupwen sipwe “tittingor” seni i an alillis?

¹¹ Sap minne Jiowa ewe chok Chon Auseling ngeni iotek nge pwal i ewe Chon Polueni iotek. (Kölfel 65:2) Iei makkeien Tafit: “Lon ranin ai riaffou, ua kokori en, pun ka poluen ngeniei.” (Kölfel 86:7) Ina minne, Jises a pesei noun kewe chon kaeo pwe repwe “tittingor” ren an Jiowa alillis pun “ewe Sam lon lang” epwe “liffangelo ngun mi fel ngeni ekkewe mi tittingorei i.” (Luk 11:9-13, NW) Ewer, an Kot we manaman a ussun emon chon alillis, are chon auruuru letip, ngeni noun kewe aramas.​—Jon 14:16.

12. Ifa ussun an Kot we ngun mi fel epwe tongeni alisikich lupwen a ussun ita ese ki rech ach kewe osukosuk?

¹² Ika epwe torikich sossot, an Kot we ngun mi fel epwe tongeni aurakichelo ren “ewe manaman mi lap seni minne epwe pukun nom rech.” (2 Korint 4:7, NW) Ewe aposel Paul, ewe mi likiitu fan chommong sokkun mettoch mi eriaffou, a apasa ei fan an lukuluk mi pochokkul: “Ngang mi tufich ren mettoch meinisin lon ewe emon mi apochokkulaei.” (Filipai 4:13) Iwe, pwal ussun chok, chommong chon Kraist lon ei fansoun ra meefi pwe ra pochokkulsefal lon pekin ngun me pwal lon letiper ren poluen ar kewe tingor. Fan chommong, a ussun ita nge ese chuen watte ekkan osukosuk mi fokkun eriaffou mwirin ach angei alillisin an Kot we ngun mi fel. Pokiten a nom rech ena pochokkul seni Kot, sipwe tongeni apasa ei mettoch, ussun chok ewe aposel: “Sia nonnom fan sokkun riaffou meinisin, nge sise mo talo; sia pwal nonnom fan fitikoko, nge sise mo tori apilukuluk ingau; sia kuna ninni, nge sise mo tamepichelo; sia turutiu ren ninni, nge sise mo talo.”​—2 Korint 4:8, 9.

13, 14. (a) Ifa ussun Jiowa a fen wiliiti ach leenien op mi pochokkul ren an awora an we Kapas, ewe mi fen mak? (b) Ifa ussun om akkapwonueta an Paipel kewe kapasen alongolongun alluk a fen alisuk?

¹³ Ewe ngun mi fel a fen pwal emmweni an aramas makkei Paipel, iwe, a pwal isoni are tumunu an Kot we kapas pwe sipwe kuna feioch seni. Ifa ussun Jiowa a kan wiliiti ach leenien op lon fansoun riaffou pokiten an a nom rech an we Kapas? Iei ussun: A awora ngenikich mirit me ewe tufichin ekiekifichi poraus. (An Salomon Fos 3:21-24) Ewe Paipel a kan ekkemiriti tupuwach pwe epwe eani ekiek mi pwung me a akkamurinnolo ach tufichin apwunguochu poraus. (Rom 12:1) Ika sipwe akkalleani me kakkaeo an Kot we Kapas, iwe, pwal akkaea minne sia kaeo seni, epwe tongeni lapalapalo “ach tufichin esinna minne mi pwung me mwaal.” (Ipru 5:14, NW) Eli ka fen pwisin kuna ifa ussun an Paipel kewe kapasen alongolongun alluk ra fen alisuk le filata minne mi  pwung lupwen a toruk fansoun osukosuk. Ewe Paipel a kan awora ngenikich ewe sokkun mirit mi tufichin alisikich le kuna minne epwe pwakini osukosuk watte.​—An Salomon Fos 1:4.

¹⁴ Ewe Kapasen Kot a pwal awora ngenikich pwal eu mettoch mi akkapochokkulakich​—nge iei ewe apilukulukun manau esemuch. (Rom 15:4) Ewe Paipel a apasa pwe mettoch mi ngau esap sopwosopwolo chok. Ekkewe fansoun riaffou mi tottorikich resap nomofoch. (2 Korint 4:16-18) A nom rech “apilukulukun ewe manau esemuch, nge iei ewe manau esemuch Kot a pwonei seni chok lom lom, iwe, i esap tongeni kapas chofona.” (Taitos 1:2, NW) Ika sipwe pwapwaiti ena apilukuluk, nge fansoun meinisin sipwe ekieki ekkewe mettoch mi murinno Jiowa a pwonei fan iten mwach kkan, iwe, sipwe tufichin likiitu lon fansoun riaffou.​—Rom 12:12; 1 Tesalonika 1:3.

Ewe Mwichefel —Eu Pisekin Pwarataan An Kot Tong

15. Ifa ussun chon Kraist repwe tongeni alillisfengen lefiler?

¹⁵ Pwal eu mettoch Jiowa a awora mi tufichin alisikich lon fansoun riaffou, iei ewe chiechifengen sia kan pwapwaesini lon ewe mwichefelin Kraist. Iei alon Paipel: “Emon chiechi mi enlet a kan pwarata tong fansoun meinisin, iwe, i emon pwipwi mi uputiu fan iten fansoun weires.” (An Salomon Fos 17:17, NW) Ewe Kapasen Kot a pesei meinisin chon ewe mwichefel pwe repwe asamolu me tongei meinisin lon. (Rom 12:10) Iei makkeien ewe aposel Paul: “Emon esap kukutta minne mi murinno ngeni pwisin i chok, pwe minne mi murinno ngeni chon orun.” (1 Korint 10:24) Ach eani ena sokkun ekiek epwe tongeni alisikich pwe sipwe ekilapei minne mi lamot ngeni chienach kewe nge esap pwisin ach kewe sossot. Ika sipwe alamota ach fansoun fan iten chienach kewe, sap minne sipwe chok alisiir nge sipwe pwal kuna pwapwa seni, iwe, ena mettoch epwe ussun ita akukkunalo osach kewe pwe sipwe tufichin likiitu fan.​—Fofor 20:35.

16. Ifa ussun emon me emon chon Kraist epwe tongeni apochokkula chienan kewe?

¹⁶ Epwe tongeni an epwe watte wiisen ekkewe mwan me fefin mi asimau lon pekin ngun, wiisen ar repwe apochokkula chiener kewe. Ren ar repwe fori ena mettoch, repwe suuki letiper ngeni chiener kewe me awora ar fansoun ngeniir. (2 Korint 6:11-13) Ewe mwichefel epwe enletin feioch ika meinisin repwe awora ar fansoun le apunga ekkewe kukkun, apochokkula ekkewe minefoon chon luku, me auruuru ekkewe mi letipechou. (Rom 15:7) Tongen pwipwi epwe pwal alisikich pwe esap wor amoson leich. Sisap muttir ekieki pwe osukosuk lon manauen emon a wewe ngeni pwe a apwangapwang lon pekin ngun. A pwung an Paul pesei chon Kraist pwe repwe “auruuru ir kewe mi letipechou.” (1 Tesalonika 5:14, NW) Ewe Paipel a affata pwe pwal mwo nge chon Kraist mi tuppwol ra kuna fansoun letipechou.​—Fofor 14:15.

17. Met sokkun fansoun a kan suuk ngenikich fan iten ach sipwe apochokkula ewe ririin pwipwi lefilen chon Kraist?

 ¹⁷ An chon Kraist kewe mwich ra kan awora ngenikich fansoun mi fokkun murinno fan iten ach sipwe tufichin auruurufengennikich me apochokkulafengennikich. (Ipru 10:24, 25) Sap minne ena sokkun pwarataan tong lefilach epwe chok fis lon fansoun mwich. Nge, noun Kot kewe aramas ra kan kutta fansoun ar repwe chiechifengen lukun fansoun mwich. Lupwen fansoun riaffou epwe piita, sipwe muttir alillisfengen pun a fen forutiu riri mi pochokkul, ririin pwipwifengen. Iei makkeien ewe aposel Paul: “Esap wor kinikinfesen lon ewe inis, nge . . . kifetin kewe repwe . . . tumunufengenniir. Iwe, ika eu kifetin epwe kuna riaffou, meinisin lusun kifetin repwe eti an riaffou; nge ika eu kifetin epwe lingelo, meinisin lusun kifetin kewe repwe eti chengelin.”​—1 Korint 12:25, 26, NW.

18. Met sokkun ekiek sipwe tumunukich seni lupwen sia letipechou?

¹⁸ Fan ekkoch, eli ach letipechou epwe kon watte, iwe, sipwe meefi pwe sisap tongeni chiechifengen me pwiich kewe chon Kraist. Sipwe fiu ngeni ena sokkun memmeef pwe site aimukichelo seni ewe auruur me alillis chienach kewe chon luku repwe tongeni awora ngenikich. A iei ussun an Paipel ourourakich: “Emon mi alaemonulo epwe kutta pwisin letipan; epwe tipeforea ngeni sokkun kapas mi mirit meinisin.” (An Salomon Fos 18:1, NW) Pwiich kewe eu minen pwarataan an Kot alillis ngenikich. Ika sipwe miritiiti pwe ina eu mettoch mi kawor fan tong, iwe, sipwe kuna ewe alen ngaselo lon fansoun riaffou.

Eani Ekiek mi Murinno Fansoun Meinisin

19, 20. Ifa ussun ewe Paipel a kan alisikich le poonalo ekiek mi mwaal?

¹⁹ Ika ese muttir molo ach letipechou me letipeta, a mecheres ach sipwe eani ekiek mi mwaal. Ren chok awewe, ika epwe torikich fansoun weires, eli ekkoch repwe meefi pwe rese lien pochokkul lon pekin ngun, iwe, repwe ekieki pwe ar kuna fansoun weires eu pisekin pwarata pwe an Kot chen ese chuen nom rer. Iwe nge, chechchemeni mwo pwe Jiowa ese sotuni aramas ren “mettoch mi ngau.” (Jemes 1:13) Ewe Paipel a apasa pwe “Esap turun tipen Kot an epwe ariafouu ika aweiresi aramas won fonufan.” (Kölün Kechü 3:33) Nge, Jiowa a mmen letipechou lupwen noun kewe chon angang repwe kuna riaffou.​—Aisea 63:8, 9; Sekaraia 2:8.

²⁰ Jiowa “ewe Semen umoumoch, o Koten sokkun aururu meinisin.” (2 Korint 1:3) A kan tongeikich, iwe, epwe atekiakicheta lon fansoun mi ffich. (1 Piter 5:6, 7) Ach meefi fansoun meinisin an Kot tong ngenikich epwe alisikich pwe sipwe eani ekiek mi murinno, are pwal mwo nge meefi chengel. Iei makkeien Jemes: “Ami pwii kena, oupwe ekieki pwe minen pwapwa enlet fansoun ekkewe sosot mesemesekkis epwe torikemi.” (Jemes 1:2) Pwata? Iei poluan: “Pun mwirin ar pworacho repwe angei ewe mwarin manau, ewe mwaramwar Kot a fen pwonei ngeni ir ekkewe mi tongei i.”​—Jemes 1:12.

21. Ese lifilifil met sokkun fitikoko epwe torikich, nge ifa an Kot we kapasen anukunuk ngeni ir kewe mi tuppwol ngeni i fansoun meinisin?

²¹ Ussun Jises a ourourakich, sipwe kuna riaffou lein chon fonufan. (Jon 16:33) Nge ewe Paipel a pwonei pwe esap wor och “riaffou, are weires, are ninni, are lengita, are selelo, are feiengau” epwe aimukichelo seni tongen Jiowa me tongen Noun we. (Rom 8:35, 39) A ifa me watteen auruuruun letipach pokiten ach silei pwe sokkun riaffou meinisin sipwe kuna esap nomofoch! Nge iei, atun ach ei sia witiwiti sopwoloon riaffoun aramas, Semach we mi ur ren tong, Jiowa, a kan tuttumunukich. Ika sipwe suuri i ren tumun, epwe wiliiti “eu imw tekia mi nukunukoch ren aramas mi chuuppwul, eu imw tekia mi nukunukoch lon fansoun riaffou.”​—Kölfel 9:9, NW.

Met Sokkun Mettoch Sia Fen Kaeo?

• Met chon Kraist repwe ekiekin kuna atun ar ra mammanau lon ei otot mi ngau?

• Ifa ussun ach tinikken le iotek epwe tongeni apochokkulakich ika sipwe kuna sossot?

• Ifa ussun an Kot we ngun mi fel eu minen alillis ngenikich?

• Met sipwe tongeni fori ren ach sipwe alillisfengen lefilach?

[Ekkewe Kapas Eis fan Iten ewe Lesen]

[Sasing lon pekin taropwe 12]

Sipwe wesewesen kukutta Jiowa ussun ita nge sia sassaiti eu imw tekia mi pochokkul

[Sasing lon pekin taropwe 14]

Ir kewe mi asimau lon pekin ngun ra kan aea iteiten fansoun meinisin mi suuk ngeniir fan iten ar repwe apunga me apochokkula chiener kewe