Kesap Kkuf ren Apilukulukungau

EN mi meefi apilukulukungau? Lon ei fansoun lukulukungau me fitikoko, chommong aramas ra apilukulukungau. Ekkoch ra apilukulukungau pokiten esor ar angang. Pwal ekkoch ra sotun chikarsefal mwirin eu aksiten. Pwal ekkoch aramas ra osukosuk ren ekkoch fitikoko lon ar famili, eu semmwen watte, are ra meefi ppos.

Ika ka apilukulukungau, ia kopwe tongeni kuna alillis me ia? Fite million aramas won unusen fonufan ra kuna pwe ar alleani an Kot we Kapas, ewe Paipel a aururu letiper. Ra lukulukoch ren alon ewe aposel Paul, ewe a apasa: “Kot epwe feioch, Semen ach Samol Jises Kraist, i mi Semen umoumoch, o Koten sokkun aururu meinisin, mi aururu letipach lon sokkun ach riaffou meinisin.” (2 Korint 1:3, 4) Pwata kese alleani ei poraus me pwal ekkoch lon pwisin noum we Paipel? Om kopwe foffori ena mettoch epwe ‘aururu letipom me alikiituk.’​—2 Tesalonika 2:17.

Sia pwal tongeni kuna alillis le pworaiti apilukulukungau ren ach sipwe chiechi ngeni ekkewe mi angang ngeni Jiowa. An Salomon Fos 12:25 a apasa: “An eman aramas ourek lon lelukan a efisata lolilen, nge eu kapas pwetete a apwapwai i.” Lupwen sipwe fiti an Chon Kraist kewe mwich, sipwe rongorong ena “kapas mi murinno,” mi “arar ngeni eman aramas o apochokula inisin.” (An Salomon Fos 16:24) Pwata kese fiti eu mwich lon eu Kingdom Hall an Chon Pwarata Jiowa pwe kopwe pwisin kuna ewe sokkun pochokkul ena sokkun mwich epwe tongeni atoto ngonuk?

Kopwe pwal tongeni kuna alillis seni ewe manamanen iotek. Ika ka meefi osukosuk watte ren aurekin manauom, esilei ngeni ewe “chon auseling ngeni iotek” om kewe lolilen. (Kol Fel 65:2) Ewe Chon Forikich, Jiowa Kot, a sileikich lap seni ach silei pwisin kich. Sipwe tongeni luku pwe epwe alisikich. An we Kapas a pwon ngenikich: “Kopwe chok likiti ngeni ewe Samol osom we, o epwe amwochuk; esap mut ngeni emon pwe epwe amokutu ekkewe aramas mi pung.” (Kol Fel 55:22) Ewer, “chokewe mi anomu ar apilukuluk won ewe Samol mi Lapalap repwe angei pochokul mi fo.”​—Aisea 40:31.

Jiowa Kot a awora ngenikich ekkewe minen alillis mi manaman fan iten ach sipwe pworacho ngeni apilukulukungau. Kopwe akkaea minne Kot a awora?