Met Epwe Wesewesen Efisata Pwapwa

JIOWA, “ewe Koten pwapwa,” me Jises Kraist, “ewe emon chok [sou nemenem] mi pwapwa,” ra silei lap seni meinisin met epwe efisata pwapwa. (1 Timoti 1:11; 6:15, New World Translation) Ina minne, esap eu minen amairu pwe sipwe kuna ewe kien pwapwa lon an Kot we Kapas, ewe Paipel.​—Pwarata 1:3; 22:7.

Lon an Afalafal won ewe Chuuk mi itefoulo, Jises a awewei met epwe efisata pwapwa. Iwe, a apasa: “Ra pwapwa” ir mi (1) woungau lon ngun, (2) lolilen, (3) mosonoson, (4) echik o kaka ngeni minne mi pung, (5) umoumoch, (6) limelimoch letiper, (7) efisata kinamwe, (8) kuna riaffou pokiten mi pung, me (9) kuna lalingau me riaffou pokitan.“​—Mattu 5:3-11. *

Io epwe appolua ei poraus pwe emon mi mosonoson, umoumoch, me efisata kinamwe pokiten letipan mi limelimoch epwe pwapwa lap seni ekkewe mi nisosong, fiffiu, me ese umoumoch? Ewe Paipel a pwal erenikich pwe an Kot we ngun mi fel a riri ngeni pwapwa, me epwe nonnom ren chok ekkewe mi alleasochisi Kot, nour sou nemenem. (Foffor 5:32) Ena sokkun aramas ra mochen kutta emmwen seni Kot pun ra silei pwe i chok epwe tongeni alisi aramas pwe  repwe pworacho ngeni ar kewe apwangapwang.​—An Salomon Fos 16:3, 9; 20:24.

Angangen Fituk are ewe Uwan Ngun?

Jiowa ese fangelo an we ngun ngeni ekkewe mi foffori “ekkewe angangen fituk.” Ekkena angang, kapachelong lisou-mwaal, angangen rong, me unupuch, a mak lon Kalesia 5:19-21. Ekkena foffor resap efisata pwapwa, nge repwe atai an emon riri ngeni mararin kewe me chienan kewe. Pwal eu, an Kot we Kapas a apasa pwe ekkewe mi “foffori ekkeei sokkun resap alemwiri ewe muun Kot.”

Iwe nge, Kot a fangelo an we ngun ngeni ekkewe mi uwani “ewe uwan ngun.” Mi kapachelong ekkeei lapalap, “tong, pwapwa, kinamwe, mosonottam fan iten minne mi pwung, kirokiroch, murinno, luku, mosonoson, nemenifichi pwisin kich.” (Kalesia 5:22, 23, NW) Lupwen sipwe pwarata ekkeei lapalap lon manauach, sipwe efisata kinamwe lefilach me aramas me Kot, iwe, mwirinoon, sipwe kuna pwapwa enlet. (Nengeni ewe pwor.) Lap seni ena, sipwe apwapwai Jiowa me eani ewe apilukulukun manau esemuch lon an Kot we fonufan sefo mi pwung.

Met Epwe Efisata Pwapwa?

Ren ei poraus mi mwochomwoch: Ti senuk “ekkewe angangen fituk” me amarata “ewe uwan ngun.” Ika emon epwe pwapwa, epwe fokkun mochen an epwe ririoch ngeni Kot. Emon mi akkachocho ngeni ena mettoch epwe fichiti an Jises awewei usun emon mi pwapwa.

Ina minne, kete meefi pwe esap tufich ngonuk om kopwe kuna pwapwa. Pwungun pwe eni lon ei fansoun a toruk semmwen, are osukosuk lon om pupulu, om angang, are tufichin manauom. Iwe nge, kopwe chok apilukuluk allim; esor popun om kopwe lolilen! Nemenemen an Kot we Muu epwe pwakini ekkeei osukosuk me pwal fitepuku me lukun. Enlet, arapakan chok, Jiowa Kot epwe apwonueta an we pwon ewe sou makkei kol fel a makketiu, a era: “Muum we eu mu esemuch . . . Ka suukalo poum, o ka amotalo mettoch meinisin minne mi manau.” (Kol Fel 145:13, 16) Ussun fite million chon angang ngeni Jiowa won unusen fonufan ra tongeni apasa, om kopwe chechemeni an Jiowa we pwon epwe fokkun alapalo om pwapwa ikenai.​—Pwarata 21:3.

[Ekkewe pwóróus fan]

[Pwoor lon pekin taropwe 5]

Ekkewe Mettoch mi Alapalo Pwapwa

Tong epwe amwokutu aramas ar repwe pwal tongeiok

Pwapwa epwe awora ngonuk pochokkul pwe kopwe pwakini osukosuk.

Kinamwe epwe alisuk le akukkunalo osukosuk lon om riri ngeni aramas.

Mosonottam fan iten minne mi pwung epwe atufichuk om kopwe pwapwa pwal mwo nge fan sossot.

Kirokiroch epwe luki aramas ngonuk.

Murinno, ina lapalapom we epwe amwokutu aramas ar repwe alisuk lupwen ka osupwang.

Luku epwe alukuluku ngonuk pwe Kot a emmwenuk ren tong.

Mosonoson epwe atoto reom kinamwe lon pekin letip, ekiek, me inis.

Nemeni pwisin en epwe wewe ngeni pwe epwe chokukkunulo om kewe mwaal.