Sia Kan Pekkus, Nge Sise Unusen Molululo

“Jiowa, ewe Chon Forata le sopwosopwun fonufan kewe, . . . a ngeni ewe emon mi molu manaman; iwe, a unusen atufichi ewe emon mi rosolo seni pochokkulan.”​—AISEA 40:28, 29, NW.

1, 2. (a) Ifa ewe kapasen etiuetiu mi apwapwa a katowu ren meinisin mi mochen fiti ewe lamalam mi unusen limoch? (b) Ifa eu mettoch mi efeiengau ngeni pochokkulach lon pekin ngun?

 POKITEN kich noun Jises chon kaeo, sia sileochu an ei kapasen etiuetiu mi apwapwa: “Oupwe feito rei, ami meinisin mi pekus o chouchou, o ngang upwe asosokemi. . . . Pun ai iok mi murinno, o osei a pwas.” (Mattu 11:28-30) Chon Kraist repwe pwal tongeni kuna “fansoun pochokkuletaan letiper . . . seni Jiowa pwisin.” (Fofor 3:19, NW) Ese mwaal ka fen pwisin meefi pochokkuletaan letipom pokiten om kakkaeo ekkewe poraus mi enlet seni Paipel, om akkeani apilukulukoch ren mwach kkan, me om akkapwonueta an Jiowa kewe kapasen alongolongun alluk lon manauom.

² Iwe nge, ekkoch me lein ir kewe mi fel ngeni Jiowa ra kan meefi pekkus lon letiper lon ekkoch fansoun. Fan ekkoch a chok mwoch ekkena fansoun letipechou. Nge fan ekkoch moluluun letiper epwe sopwosopwolo fansoun langattam. Iwe, lo lo, eli ekkoch repwe meefi pwe wiiser kewe, wiisen chon Kraist, ra kon chou ngeniir ar repwe ekiir, iwe, esap ina eu mettoch letiper a pwapwa ren, weween, ese ussun minne Jises a fen pwonei. Eli ena sokkun memmeef ese pwung epwe eu minen efeiengau ngeni an emon chon Kraist ririfengen me Jiowa.

3. Pwata Jises a awora ewe fon lon Jon 14:1?

³ Iei alon Jises ekis mwen an we ares me nninniilo: “Letipemi esap lolilen. Oua luku Kot, iwe, oupwe pwal lukuei.” (Jon 14:1) Jises a uwawu ena kapas pun ekkewe aposel repwele kuna mettoch mi fokkun ololilen. Mwirin, epwe poputa eu fansoun an aramas repwe eriaffouur. Jises a silei pwe noun kewe aposel repwe tongeni turukapelo pokiten watteen ar letipechou. (Jon 16:1) Ika esap wor alillis ngeniir, eli repwe apwangapwangelo lon pekin ngun pokiten ar letipengau, iwe, resap chuen anomu ar lukuluk won Jiowa. Mi pwal enlet ena ren chon Kraist lon ei fansoun. Letipechou mi nomottam epwe tongeni efisata watte riaffou, iwe, eli letipach epwe kon chouchou. (Jeremaia 8:18) Eli ewe aramasen leutuch epwe apwangapwangelo. Fan ena sokkun sossot, eli epwe ussun ita a pe letipach me sia fen ma lon pekin ngun, iwe, epwe tongeni pwal mwo nge morolo senikich ach mochen fel ngeni Jiowa.

4. Met epwe tongeni alisi letipach pwe esap unusen molululo?

⁴ Mi fokkun pwung ei fon seni Paipel: “Lap seni mettoch meinisin kopwe tumunu, kopwe akkaewin tumunu letipom, pun ekkewe puachen manau ra popu seni.” (An Salomon Fos 4:23, NW) Ewe Paipel a awora fon mi alisikich le tuttumunu letipach seni letipengau me molu lon pekin ngun. Iwe nge, akkom a lamot ach sipwe esinna met a kan efisata ach molu.

Ach Fiti ewe Lamalamen Kraist Esap Eu Mettoch mi Eriaffou

5. Ikkefa ekkewe ruu poraus mi ussun ita polufesen ussun ir kewe mi tapwelo mwirin Kraist?

⁵ A pwung pwe ach tapwelo mwirin Kraist eu mettoch sipwe achocho ngeni. (Luk 13:24) Pwal iei mwo alon Jises: “Ika emon esap mwarei pwisin an iraan nninni me tapwoto mwiri, iwe, esap tufich an epwe emon nei chon kaeo.” (Luk 14:27, NW) A ussun ita ena kapas a polufesen me alon Jises we lupwen a apasa pwe an iok eu minen apwapwa me a pwas, nge wesewesen pwungun pwe rese polufesen.

6, 7. Pwata sipwe tongeni apasa pwe lapalapen ach fel ngeni Kot esap eu mettoch mi amolulukich?

⁶ Inaamwo ika epwe pekkus inisich lupwen sipwe uwonnuk me achocho fan iten och angang,  nge sipwe tongeni meefi pwapwa me pochokkuletaan letipach seni ika a murinno ewe popun ach fori ewe angang. (Än Salomon Afalafal 3:13, 22) Iwe, a ita wor pwal och popun mi murinno seni ach uwei ngeni chon oruch kewe ekkewe poraus mi amwarar, poraus mi enlet seni Paipel? Pwal och, weiresin ach kamwochunnuk won an Kot kewe alluk fan iten foffor mi limoch a ussun ita molo lupwen sia kan ekieki ekkewe feioch mi tottorikich seni. (An Salomon Fos 2:10-20) Pwal mwo nge lupwen aramas repwe eriaffoukich, sia kan meefi pwe a eu minen aitochukich ach sipwe kuna riaffou fan iten an Kot we Muu.​—1 Piter 4:14.

⁷ An Jises iok wesewesen eu minen apochokkula letipach, akkaewin, lupwen sipwe ekieki ewe rochopwak lon pekin ngun mi pwoluelo ir kewe mi nom fan ioken lamalam chofona. Kot a kan tongeikich, iwe, esap awiisa ngenikich minne esap ki rech. An Jiowa kewe ‘alluk rese kon chou woch.’ (1 Jon 5:3, NW) Ewe lamalam mi enlet, lamalamen Kraist, ussun an a affatiu lon Paipel, esap eu lamalam mi eriaffou aramas. A ffat pwe lapalapen ach fel ngeni Kot ese kan amolulukich me aletipechoukich.

“Pwilitaou Ekkena Mettoch mi Achoukich”

8. Fan chommong, met a kan efisata molulu lon pekin ngun?

⁸ Fan chommong ewe pekkus lon pekin ngun sia meefi a popu seni minne ei otot mi ngau a kan wata woch. Pokiten “fonufan meinisin a nonnom fan nemenien ewe mi ingau,” a pwellikich weiweiin ekkewe mettoch mi ngau, iwe, a tongeni amolulukich me atai ach itepok me ruuepek lon wiisach we, wiisen chon Kraist. (1 Jon 5:19) Mettoch ese lamot epwe tongeni afitikokoi me angaua ach kokkotun angang, angangen chon Kraist. Eli ekkena mettoch repwe chounikich me pwal mwo nge aletipetakich. Iwe, a pwung an ewe Paipel fonoukich pwe sipwe “pwilitaou ekkena mettoch mi achoukich.”​—Ipru 12:1-3.

9. Ifa ussun ewe mettoch chei wouun fonufan epwe tongeni chounikich?

⁹ Ren chok awewe, an chon fonufan tipeni ekkeei mettoch ussun chowean itetekia, moni, minen apwapwa, kunou lon fonuen ekis, me ar chei wouun fonufan epwe tongeni oruka ach ekiek. (1 Jon 2:15-17) Ekkoch chon Kraist mi chei wouun fonufan lon ewe aewin senturi ra fokkun afitikokoi manauer. Ewe aposel Paul a awewei pwe “Ir mi mochen pisekisekilo repwe turutiu lon sosot, lon ser, lon chommong sokkun mochenia mi umwes o afeiengau, ekkewe sokkun mochenia mi akokatiu aramas lon feiengau o kiteter. Pun mochenia moni, iei ewe popun ingau meinisin. Pokiten ei sokkun mochenia, ekkoch aramas ra feilseni ewe luku, o ra tu ngeni letiper chommong sokkun lolilen.”​—1 Timoti 6:9, 10.

10. Met sipwe tongeni kaeo ussun wouun fonufan seni an Jises we kapas awewe ussun ewe chon amora pwikil?

¹⁰ Lupwen sipwe meefi pekkus me letipengau lon ach angang ngeni Kot, a ita ina ussuch pokiten ach chei wouun fonufan a kan amopu pochokkulach lon pekin ngun? Epwe wesewesen tufich an epwe fis ena, ussun an a ffatolo ren an Jises we kapas awewe ussun ewe chon amora pwikil. Jises a alollofengenni “aurekin fonufan me otupuen pisek o mochenia ren pwal mettoch” me folun ira mi “tolong o ra pwoluelo” pwikilin ewe kapasen Kot lon letipach. (Mark 4:18, 19) Ina minne, a iei ussun an Paipel fonoukich: “Tongei moni esap nonnom lon letipemi, nge ami oupwe menei minne mi nom remi. Pun pwisin i a fen apasa, ‘Usap fakkun likitukelo, o usap fakkun poutukelo.’”​—Ipru 13:5.

11. Ifa ussun sipwe tongeni likitatiu ekkewe mettoch mi tongeni chounikich?

 ¹¹ Fan ekkoch minne mi afitikokoi manauach ese popu seni ach chei wouun fonufan, pwe seni minne sia foffori ren ekkewe mettoch mi fen nom rech. Eli ekkoch repwe meefi molu lon letiper pokiten watteen apwangapwangen inisir, maloon attonger kewe, are pwal och osukosuk watte. Ra fen kuna lamoten ar repwe siwili nonnomur fan fite. Eu pupulu ra filata pwe repwe likitalo ekkoch mettoch ra mmen saani ar repwe fori me angang won, nge sanne ra wenewenen lamot. Ra wesewesen nengeni pisekir kewe meinisin, iwe, ra tukumalo mettoch meinisin mi chu ngeni ar kana minen apwapwa, iwe, ra isoniir pwe rete chuen kuner. Fan ekkoch sipwe tongeni kuna feioch seni ach atittina eoreniach kewe me pisekich kewe, iwe, sipwe likitatiu ekkewe mettoch rese lamot fan iten ach sisap pekkus me fangeta lon letipach.

A Lamot Ekiek Pwung me Tipetekison

12. Met sipwe miritiiti ussun ach kewe foffor mi mwaal?

¹² Pwisin ach kewe foffor mi mwaal, lon pwal mwo nge mettoch mi kisikis, repwe tongeni afitikokoi manauach. A fokkun pwung alon Tafit ei: “Pun ai kewe fofor mi ingau ra fen pwoluelo mokurei; ra chok chounieitiu usun chok och mettoch ese ki rei.” (Kol Fel 38:4) Fan chommong, ach siwili ekkoch mettoch lon manauach epwe angasakichelo seni mettoch mi chounikich.

13. Ifa ussun ach eani ekiek mi pwung epwe tongeni alisikich pwe epwe itepok me ruuepek ach memmeef ussun ach angangen afalafal?

¹³ Ewe Paipel a peseikich pwe sipwe amaarata “mirit me ewe tufichin ekiekoch.” (An Salomon Fos 3:21, 22) Ewe Paipel a apasa pwe “Ewe mirit seni asan a . . . eani ekiek mi pwung.” (Jemes 3:17, NW) Ekkoch ra ekieki pwe wiiser ar repwe fori ewe chok ukuukun angang chiener kewe lon ewe mwichefel ra tufichin fori lon ewe angangen afalafal. Iwe nge, iei an Paipel fon ngenikich: “Emon me emon epwe anneta pwungun en me an angang, iwe mwirin, epwe wor popun an epwe mwaneketa pokiten pwisin i chok, nge esap pokiten an apopofengen me pwal emon. Pun emon me emon epwe uwei en me osan.” (Kalesia 6:4, 5, NW) A enlet pwe achochoon chienach kewe chon Kraist epwe tongeni apochokkulakich pwe sipwe angang ngeni Jiowa ren unusen letipach, nge mirit me ekiek mi pwung repwe alisikich le akkota minne sipwe achocho ngeni me ren en me pwisin nonnomun.

14, 15. Ifa ussun sipwe tongeni pwarata mirit lupwen sipwe ekieki minne a lamot ngenikich lon pekin aion me pekin letip?

¹⁴ Ach eani ekiek mi pwung lon pwal mwo nge ekkewe mettoch mi ussun ita lamot kisikis epwe tongeni pinei senikich ach meefi pekkus. Ren chok awewe, sia kan foffori ekkewe mettoch mi akkalapalo pochokkulen inisich? Ekieki mwo porausen eu pupulu mi angang lon eu me lein ekkewe kisin ofesin Chon Pwarata Jiowa. Ra fen weweiti lamoten ekiek mi pwung fan iten eppetin pekkus. Iei alon ewe fefin: “Ese lifilifil ika ifa ukuukun watteen ach angang, nge am aua onnut lon ewe eu chok kulok iteiten pwin. Mei pwal wor am kokkotun taiso. A wesewesen alisikich ekkena mettoch. Am aua fen silei ukuukun tufichim,  iwe, ukuukun am angang a chok fiti ukuukun pochokkulem. Am ause apopofengennikem me ir kewe mi ussun ita esap tongeni mmuch ar pochokkul.” Sia kan akkaea mongo mi murinno lon kulokun mongo me pippi pwe epwe nafoch ach fansoun onnut? Ach eani ekiek mi pwung le tumunu pochokkul inisich epwe tongeni akukkunalo ach meefi molu lon letipach me pwal lon pekin ngun.

¹⁵ A och sokkun minne mi lamot ngeni ekkoch leich. Ren chok awewe, emon sister a fiti ewe angangen afalafal full-time fan ekkoch lapalap mi weires. A uri ekkoch samau watte, pachelong kanser. Met a kan alisi neminnewe pwe epwe likiitu lon fansoun weires? Iei alon: “A lamot ngeniei fansoun ai upwe alaemonulo me unusen kinamwelo chok. Ika a kan lapalo ai meefi weires me pekkus, iwe, ina ewe atun a kon lamot ai upwe alaemonulo lon leeni mi kinamwe pwe upwe tongeni akkallea puk me asoso.” Mirit me ewe tufichin ekiekoch repwe tongeni alisikich le weweiti me fori minne a lamot ngenikich fan iten ach sisap pekkus lon pekin ngun.

Jiowa Kot a Akkapochokkulakich

16, 17. (a) Pwata a fokkun lamot ach sipwe tuttumunu pochokkulach lon pekin ngun? (b) Met sipwe akkota ach sipwe foffori iteiten ran meinisin?

¹⁶ Pwungun pwe a mmen lamot ach sipwe tuttumunu pochokkulach lon pekin ngun. Ika sipwe ririoch ngeni Jiowa Kot, eli inisich epwe pekkus, nge sisap molululo, iwe, ukutiu seni ach fel ngeni i. Jiowa ewe emon mi “ngeni ekewe chon malulu pochokkul, nge ekewe chon lipwakingau a ngeniir tufich mi somwola.” (Aisea 40:28, 29) Ewe aposel Paul a pwisin kuna pwungun ena kapas, iwe, iei makkeian: “Sise kan fangeta, nge inaamwo ika inisich a moromorolo, a fokkun pwung pwe ewe aramasen leutuch a sefosefallilo ran me ran.”​—2 Korint 4:16, NW.

¹⁷ Nengeni mwo ena kapas “ran me ran.” Epwe tongeni an epwe wewe ngeni ach akkangei minne Jiowa a akkawora iteiten ran meinisin. Emon misineri mi angang lon wiisan we 43 ier a kukkuna fansoun molu me letipechou. Nge neminnewe ese unusen molululo. Iei alon: “Ua fen eorenalo ai upwe pwatakai pwe mwen an epwe poputa ai angang, upwe tongeni iotek ngeni Jiowa me alleani an we Kapas. Ei sokkun kokkot a alisiei pwe upwe tufichin likiitu tori iei.” Sipwe wesewesen tongeni luku an Jiowa manamanen alikiitukich ika sipwe ikkiotek ngeni iteitan, ewer, “ran me ran,” me ekkekiekifichi lapalapan kewe mi fokkun tekia me an kewe pwon.

18. Ifa ussun ewe Paipel a kan auruuru ekkan chon tuppwol mi fen chinnapelo are samau?

¹⁸ Ena mettoch a akkaewin alisi ir kewe mi letipechou pokiten ar ra chinnapelo me a mmen apwangapwang inisir. Eli chokana repwe letipechou, esap pokiten ar apopofengenni manauer me manauen chiener kewe, nge pokiten ar chechchemeni minne ra fen pin tufichin fori me lom. A ifa me watteen auruuruun letipach pokiten ach silei pwe Jiowa a kan aucheani ekkewe mi chinnap! Iei alon Paipel: “Meten mokur mi uwan epa mwaramwar mi ling, a fis ngeni eman mi manau fan pwung.” (An Salomon Fos 16:31) Jiowa a silei met esap ki rech me a fokkun aucheani ach fel ngeni i ren unusen letipach inaamwo ika mei wor ach kewe apwangapwang. Iwe, ekkewe angang mi murinno sia fen fori ra ussun ita makfochelo lon ekiekin Kot. Iei an Paipel kapasen anukunuk ngenikich: “Kot mi pung, o esap monukalo ami angang me tong fan asengesin itan, mi ami oua pwaralo lon ami angang ngeni ekkewe aramas mi fel, seni lom tori ikenai.” (Ipru 6:10) A ifa me watteen ach pwapwa pokiten an a nonnom rech ir kewe mi fen pwarata ar tuppwol ngeni Jiowa ren fite, fite ier!

Kosap Fangeta

19. Ifa ussun sia kukkuna feioch seni ach foffori minne mi murinno?

¹⁹ Chommong ra luku pwe ach tattaiso iteitan epwe tongeni akukkunalo ach pekkus. Iwe, pwal ussun chok, ach fiffiti ekkewe angang lon pekin ngun iteitan epwe tongeni akukkunalo pekkusuch lon letipach are lon pekin ngun. Iei alon Paipel: “Iwe, sisap fangeta le foffori minne mi murinno, pun lon fansoun mi ffich sipwap kinikin ika sisap molululo. Iwe, pwungun pwe ukuukun chok a wor ach fansoun mi pwunguiti, sipwe angang fan iten minne mi ochiiti meinisin, nge akkaewin fan iten pacheriach kewe lon ewe luku.”  (Kalesia 6:9, 10, NW) Nengeni mwo ekkena kapas “foffori minne mi murinno” me “angang fan iten minne mi ochiiti meinisin.” Ra pwarata pwe mei wor wiisach sipwe apwonueta. Ach foffori mettoch mi murinno ngeni aramas epwe tongeni pinei senikich ach sipwe unusen molululo lon ach angang ngeni Jiowa.

20. Ren ach sipwe poonalo letipechou, sipwe pippi pwe site fiffiti met sokkun aramas?

²⁰ Nge sokko seni ena, ach chiechi ngeni me fiffiti ekkan aramas mi tunalo an Kot kewe alluk epwe tongeni amolulukich. A iei ussun an Paipel ourourakich: “Efou fau a chou, pwal pi, nge ach osukosuk ren eman chon tiparoch a chou seni ekewe ruu mettoch.” (An Salomon Fos 27:3) Ren ach sipwe pooni letipechou me pekkus, epwe murinno ach sisap fiti aramas mi akkeani ekiek mi lamotongau nge ra pwal ekiekin kutta mwaallin aramas me ra pwal eani kapasen esiit.

21. Ifa ussun sipwe tongeni apochokkula chon fitikich lon ach kewe mwich, mwichen chon Kraist?

²¹ An chon Kraist kewe mwich eu mettoch Jiowa a akkawora, iwe, repwe tongeni mimminalong loch pochokkul lon pekin ngun. Ach kewe mwich ra kan suuki alen ach sipwe apochokkulafengennikich ren minne sia kakkaeo me ach chiechifengen. (Ipru 10:25) Wiisen meinisin chon ach mwichefel ar repwe achocho le eani kapasen apochokkul lupwen repwe uwawu meefier lon fansoun mwich are lupwen a wor wiiser lon ewe prokram. Ekkewe sou emmwen mi wiiseni wiisen sense repwe akkaewin apochokkula chiener kewe. (Aisea 32:1, 2) Lon pwal mwo nge fansoun epwe lamot ar repwe uwawu fon are apwung, lapalapen ar kapas epwe eu minen apochokkul. (Kalesia 6:1, 2) Ach tong ngeni chienach kewe epwe wesewesen alisikich le angang ngeni Jiowa nge sisap unusen molululo.​—Kol Fel 133:1; Jon 13:35.

22. Inaamwo ika sise unusoch, nge met popun epwe tongeni pwora letipach?

²² Ewe mettoch angang a kapach ngeni ach fel ngeni Jiowa lon ei fansoun sopwoloon. Iwe, sanne esap tori chon Kraist moluluun lon ekiekir, cheuchen lon letiper, me mettoch mi eriaffou. Pokiten sise unusoch, nikinikich, nikinikin aramas a ussun chok eu sepi ppwul mi mokukai. Iwe nge, iei alon Paipel: “Mi nom rech ei pisek auchea lon sepi ppwul, pwe ewe manaman mi somwolo seni minne mi pukun nom rech epwe popu seni Kot nge esap pwisin kich.” (2 Korint 4:7, NW) Pwungun pwe sipwe pekkus, nge amwo sisap unusen molululo are fangeta. Nge, sipwe “apworai letipach me apasa: ‘Jiowa ai chon alillis.’”​—Ipru 13:6.

Ekis Enniwili Poraus

• Ikkefa ekkoch mettoch mi chounikich sipwe tongeni likitatiu?

• Ifa ussun sipwe tongeni fiti ewe angangen foffori “minne mi murinno” ngeni chienach kewe chon Kraist?

• Ifa ussun Jiowa a kan alikiitukich lupwen sia meefi pekkus are letipechou?

[Ekkewe Kapas Eis fan Iten ewe Lesen]

[Sasing lon pekin taropwe 17]

Jises a silei pwe letipechou mi nomottam epwe tongeni aosukosuka ekkewe chon kuno

[Sasing lon pekin taropwe 18]

Ekkoch ra fen likitatiu ekkoch minen apwapwa me angang ra fokkun saani, weween, ekkewe mettoch rese wesewesen lamot

[Sasing lon pekin taropwe 20]

Inaamwo ika mei wor lipwakingauach, nge a mmen watte an Jiowa aucheani ach fel ngeni i ren unusen letipach