Tumunu Seni “Leuwen Ekkewe Chon Ekis”

“Resap mo tapwelo mwirin emon chon ekis, pwe repwe chok su seni, pun rese sinei leuwen ekkewe chon ekis.”​—JOHANNES 10:5, NW.

1, 2. (a) Met Meri a fori lupwen Jises a kori ren itan we, iwe, ei poraus a pwarata pwungun menni kapas awewe Jises a fen eani me lom? (b) Met a atufichikich ach sipwe arap ngeni Jises?

 JISES a fen manausefal, iwe, a nengeni ewe fefin mi ukkuta lukun an we peias mi po. A sileifichi neminan. Ina i Meri Maktalin. Orun ruu ier lom, a atou seni neminan ekkoch timon. Seni ena fansoun, Meri a fiti ir me noun kewe aposel fan iten an epwe awora ngenir tufichin manauer ran me ran. (Luk 8:1-3) Iwe nge, ikenai, Meri a kechiu, me a letipechou pun a kuna ninniloon Jises, nge iei, ese chuen nom inisin we! Iwe, Jises a eisini: “Neminen, pwata ka kechiu? Io ena ka kutta?” Iwe, pokiten Meri a ekieki pwe i ewe chon atake, a polueni: “Aten, are ka ekielo i ekis, kopwe chok pwar ngeniei ikewe ka isetiu i ie, o ngang upwe walo.” Iwe, Jises a kori, “Meri!” Iwe, Meri a muttir esinna lapalapen an fos ngeni. Ren pwapwa, a koko, “Rapponai!” Iwe, a foropachei.​—Jon 20:11-18.

² Ei poraus a pwarata pwungun minne Jises a fen apasa me mwan. Ren an alollo pwisin i ngeni emon chon masen siip me noun kewe chon kaeo ngeni siip, a apasa pwe ewe chon masen siip a kori noun kewe siip ren en me itan me repwe silei leuwan. (Jon 10:3, 4, 14, 27, 28) Pwungun pwe ussun chok emon siip epwe esinna noun we chon mas, Meri a pwal esinna noun we Chon Mas, Kraist. A pwal ina ussun noun Jises kewe chon kaeo ikenai. (Jon 10:16) Ussun chok selingen emon siip mi mirit a atufichi  an epwe nonnom ren noun we chon mas, ach mirit lon pekin ngun epwe atufichikich ach sipwe tapwelo mwirin lon ipwen nouch we Chon Mas mi Murinno, Jises Kraist.​—Jon 13:15; 1 Jon 2:6; 5:20.

3. Ikkefa ekkewe kapas eis an Jises we kapas awewe ussun ewe mwichen siip a achema ngenikich ussun?

³ Iwe nge, me ren ena chok kapas awewe, an ewe siip tufichin esinna leuwen aramas a atufichi an epwe silei sap chok emon chienan we nge pwal emon chon oput. A fokkun lamot ena pun ekkewe chon oputakich ra tipatchem-sola. Io kana? Met ra foffori? Epwe ifa ussun sipwe tongeni pwisin tumunukich? Ren ach sipwe silei, sipwe pii met Jises a pwal apasa lon an we kapas awewe ussun ewe mwichen siip.

‘Emonewe Ese Tolong Lon ewe Asam’

4. Me ren ewe kapas awewe ussun ewe chon mas, io ekkewe siip repwe tapwelo mwirin, iwe, resap feilo ren io?

⁴ Jises a apasa: “Nge ewe emon mi tolong me lon ewe asam, iwe, ina i chon masen ekkewe siip. Iwe, ewe chon mamasa asam epwe suuki ngeni i, o ekkewe siip repwe rong leuwan. Iwe, atewe epwe kori noun kewe siip ngeni iter, o epwe emmwenirelo lukun. Lupwen a wes me atou noun kewe siip meinisin, iwe, a feilo mwer. O ekkewe siip repwe tapwelo mwirin, pun ra sinei leuwan. Resap mo tapwelo mwirin emon, pwe repwe chok su seni, pun rese sinei leuwen ewe emon.” (Jon 10:2-5) Nengeni, fan ulungat Jises a nounou ewe kapas “leuwan.” Fan ruu a kapas ussun leuwen emon chon masen siip, nge lon ewe aulungatin fansoun, a kapas ussun “leuwen ekkewe chon ekis.” Met sokkun chon ekis Jises a kapas ussun?

5. Pwata sisap awasolaochu ekkewe sokkun chon ekis Jon sopwun 10 a kapas ussun?

⁵ Jises ese kapas ussun ewe sokkun chon ekis sipwe mochen awasolaochu​—ina eu kapas mi wewe ngeni “tongei chon ekis” lon ewe popun fos ewe Paipel a mak lon. (Ipru 13:2) Lon an Jises we kapas awewe, ewe chon ekis esap emon chon wasola emon a fen etiwa. “Ese tolong lon asamen ewe titin siip, pwe a tota me ekis.” “Atewe mi chok chon sola o mwanesol.” (Jon 10:1) Lon an Kot we Kapas, io ewe akkaemonun emon mi wiliti chon sola mi mwanesol? Satan ewe Tefil. Sia kuna ewe pisekin pwarata lon ewe puken Keneses.

Ewe Aeuin Fansoun Emon a Rongorong Leuwen ewe Chon Ekis

6, 7. Pwata epwe pwung ach sipwe eita ngeni Satan emon chon ekis me emon chon sola?

⁶ Keneses 3:1-5 a kapas ussun ewe aeuin fansoun chon fonufan ra rongorong leuwen emon chon ekis. Ewe poraus a apasa pwe Satan a fos ngeni ewe akkaemonun fefin, If, ren emon serepenit mi eani och kapasen otupotup. Pwungun pwe ese wesewesen eita ngeni Satan “emon chon ekis” lon ena poraus. Iwe nge,  an kewe foffor a pwarata pwe lon chommong mettoch, a ussun chok ewe chon ekis lon an Jises we kapas awewe mi mak lon Jon sopwun 10. Ekieki mwo ussun ekkoch mettoch ra lollo chok won.

⁷ Jises a apasa pwe ewe chon ekis ese tolong lon asamen ewe tittin siip, nge a tota me ekis. Iwe, pwal ussun chok, Satan ese pwisin chuuri emonewe nge a nounou emon serepenit. Ei fofforun otupotup a pwarata pwe Satan, i wesewesen emon sou otupotup mi tomwaalilong. Pwal eu, ewe chon ekis mi nom lon ewe tittin siip a sotun solani ekkewe siip seni minne noun. Pwungun pwe a ngau lap seni emon chon sola, pun a pwal mochen “nielo o atailo.” (Jon 10:10) Iwe, Satan pwal emon chon sola. Lupwen a otupu If, a solani an tuppwol seni Kot. Satan a pwal atoto ngeni aramas malo. Ina minne, i emon chon nielo.

8. Ifa ussun Satan a sorei alon Jiowa kewe me an kewe minen amwokut?

⁸ A pwapwalo an Satan pworongau lupwen a sorei alon Jiowa me efisi tipemwaramwar ussun an kkewe minen amwokut. A eisini If: “Ifa usun, Kot a wesewesen apasa pwe ousap fokun mongo seni ekewe iran ei tanipi?” Satan a tipin mairu, iwe, a ussun ita nge apasa: ‘Pwata ina watten an Kot kirikiringau?’ A pwal apasa: “Pun Kot a silei pwe lon ranin ami oupwe mongo seni, mesemi epwe nela.” Nengeni alon: “Kot a silei.” A ussun ita nge Satan a apasa: ‘Ua silei minne Kot a silei. Ua silei met a amwokutu i, iwe, a ngau.’ (Keneses 2:16, 17; 3:1, 5) Solapan, If me Atam rese kul seni leuwen ena chon ekis. Iwe nge, ra auseling ngeni me atoto riaffou ngeni pwisin ir me pwal nour kewe.​—Rom 5:12, 14.

9. Pwata sia silei pwe sipwe rongorong leuwen ekkewe chon ekis ikenai?

⁹ Satan a pwal akkaea ena sokkun foffor le otupu noun Kot kewe aramas ikenai. (Pwarata 12:9) I “semen kapas chofona,” me ir mi ussun chok i me sotun otupu noun Kot kkewe chon angang, ir noun kkewe. (Jon 8:44) Sipwe nengeni ifa ussun aramas ra rongorong leuwen ekkena chon ekis ikenai.

Ifa Ussun Aramas Ra Rongorong Leuwen Ekkewe Chon Ekis Ikenai

10. Ifa ussun aramas ra rongorong leuwen ekkewe chon ekis?

¹⁰ Kapasen otupotup. Ewe aposel Paul a era: “Ousap tokelo ngeni sokkun afalafal mi sokkofesen.” (Ipru 13:9) Met sokkun afalafal? Pokiten sipwe tongeni ‘tokelo’ ren, a ffat pwe Paul a kapas ussun ekkewe afalafal mi aingaua ach itepok me ruepek lon pekin ngun. Io kkewe ra eani ekkena sokkun afalafal mi sokkolo? Paul a ereni eu mwichen chon Kraist kkewe elter: “Seni pwisin ami, ekkoch leimi repwe uta o afalafala sokkun afalafal mi chok lamotengau, pwe repwe asepa ekkewe chon kaeo ngeni pwisin ir.” (Fofor 20:30) Pwungun, ikenai ussun  chok lon ranin Paul we, ekkoch mi pin fiti ewe mwichefelin chon Kraist ra sotun arikalo ekkewe siip ren ar eani sokkun afalafal mi chok “lamotengau”​—poraus mi ekis enlet me ekis mwakel me poraus mi unusen chofona. Ussun ewe aposel Piter a era, ra eani “kapas mi chofona”​—ussun ita nge mei enlet nge ra chok lamotengau.​—2 Piter 2:3.

11. Ifa ussun ekkewe kapas lon 2 Piter 2:1, 3 a pwarata fofforun me ekiekin ekkewe chon tokelo?

¹¹ Piter a pwal pwarata fofforun ekkewe chon tokelo ren an apasa pwe repwe “tukumolo ar afalafalen poutmwaalilo.” (2 Piter 2:1, 3) Ussun chok lon an Jises we kapas monomon ussun ewe tittin siip, ewe chon sola ese tolong “lon asamen ewe tittin siip, pwe a tota me ekis”, ekkewe chon tokelo ra chok anifelong. (Kalesia 2:4; Juta 4) Met ra mochen foffori? Piter a apasa: “Repwe ataielo feiochumi ren ar kapas chofona.” Pwungun pwe ese lifilifil met ekkewe chon tokelo repwe apasa mi mwaalfffesen me ena, nge ra wesewesen mochen “solani o nielo o atailo.” (Jon 10:10) Tumunuk seni ekkena chon ekis!

12. (a) Ifa ussun chiechiach kkewe repwe tongeni aronga ngenikich leuwen ekkewe chon ekis? (b) Ifa ussun fofforun Satan me ekkewe chon ekis ikenai ra lollo chok?

¹² Ekkewe chiechi mi ingau. Eni sipwe rongorong leuwen ekkewe chon ekis ren chiechiach kkewe. Ekkewe chiechi mi ingau repwe akkaeuin efeiengaua ekkewe sarafo. (1 Korint 15:33) Chechemeni mwo, Satan a fos ngeni If​—ewe mi kukkun ierin me pwal kisikis kunaen manauan me lein ewe aeuin pean aramas. A etipetipa If pwe Jiowa a eppeti an foffori minne a mochen, nge ren enletin, mei fokkun chofona. Jiowa a tongei forian kkewe aramas, iwe, a mochen ar repwe sopwoch. (Aisea 48:17) Pwal ussun chok ikenai, ekkewe chon ekis repwe sotun ameef ngeni ami kana sarafo pwe sememi kkewe me inemi Chon Kraist ra kon pinei om foffori pwisin letipom. Ifa ussun ena sokkun chon ekis repwe kku manauom? Emon fopwul Chon Kraist a apasa: “Ren och fansoun, a ekis apwangapwangelo ai luku ren chienei kkewe chon sukul. Fan chommong ra apasa pwe ai lamalam a kon titchik me kon weires ngeniei.” Iwe nge, mei enlet pwe semom kewe me inom ra tongeiok. Ina minne, lupwen chienom kewe chon sukul repwe sotun etipetipaok pwe kesap lukuluk won semom kkewe me inom, kesap tupulo ussun chok If.

13. Ifa ewe alen tipatchem Tafit a aleni, iwe, ifa ussun sipwe tongeni appiru i?

¹³ Ewe sou makkei kol fel Tafit a kapas ussun chiechi mi ingau, a apasa: “Use mo mottiu ren aramas mi chofona, use pwal chiechi ngeni aramas mi mwakel.” (Kol Fel 26:4) Iwe, ka kuna pwal eu lapalapen ekkewe chon ekis? Ra tukumalo wesewesen lapalaper kewe​—ussun chok Satan a aopa io pwisin i ren an nounou emon serepenit. Ikenai, ekkoch aramas mi limengau manauer ra aopa io pwisin ir me minne ra tipeni ren ar nounou ewe Internet. Lon ar foffos lon ekkewe computer, ekkewe watte mi ngau repwe pwal mwo nge mwakeleta pwe ir sarafo fan iten ar repwe lukiuk ngeni eu sser. Ami kana sarafo, ouse mochen oupwe fokkun tuttumunu pwe oute feiengau lon pekin ngun.​—Kol Fel 119:101; An Salomon Fos 22:3.

14. Fan ekkoch, ifa ussun ekkewe sou repotei poraus ra arongafetalei leuwen ekkewe chon ekis?

¹⁴ Tipimwaal. Inaamwo ika a murinno ekkoch repot ussun Chon Pwarata Jiowa, nge fan ekkoch, ekkewe chon ekis ra nounou ekkoch sou repotei poraus le aronga leuwer. Awewe chok, lon eu fonu, eu repot mi chofona a apasa pwe ekkewe Chon Pwarata ra peni ewe muun Hitler lon ewe Oruuen Maunen Fonufan. Lon pwal eu fonu, eu repot a tipimwaal ngeni ekkewe  Chon Pwarata pwe ra atai ekkoch imwen fel. Lon ekkoch fonu, ekkoch sou repotei poraus ra tipimwaal ngeni ekkewe Chon Pwarata pwe rese mochen nour kewe semirit repwe angei alillis seni tokter me ra tunalo tipisin chiener kewe chon luku. (Mattu 10:22) Iwe nge, ekkewe aramas mi letip-wenechar mi pwisin sileikich ra silei pwe mei chok chofona ekkena kapasen tipimwaal.

15. Pwata esap eu alen tipatchem ach sipwe luku ekkewe poraus meinisin mi katou seni ekkewe sou repotei poraus?

¹⁵ Met sipwe fori ika sipwe rongorong kapasen tipimwaal mi choufetal ren leuwen ekkena chon ekis? Epwe murinno ach sipwe lefareni ewe fon lon An Salomon Fos 14:15, a era: “Emon mi wewemang a luku mettoch meinisin; nge emon mi mirit a nengeni ia epwe feila ie.” Esap eu alen mirit ach sipwe luku meinisin ekkewe poraus repwe katou seni ekkewe sou repotei poraus. Inaamwo ika sisap tipemwaramwareiti meinisin ekkewe poraus repwe atou, nge sia silei pwe “unusen fonufan a nonnom fan nemenien ewe mi ngau.”​—1 Jon 5:19.

“Sotuni Ekkewe Poraus Seni ewe Ngun”

16. (a) Ifa ussun fofforun wesewesen siip a pwarata enletin alon Jises kewe lon Jon 10:4? (b) Met ewe Paipel a peseikich ach sipwe fori?

¹⁶ Iwe nge, epwe ifa ussun sipwe wesewesen silei ika sia kapasfengen me emon chiechi mi murinno are emon mi oputakich? Iwe, Jises a era pwe ekkewe siip ra tapwelo mwirin ewe chon masen siip “pun ra silei leuwan.” (Jon 10:4) Esap lapalapan me lukun ewe chon mas epwe amwokutu ekkewe siip ar repwe tapwelo mwirin, pwe leuwan. Eu puk ussun ekkewe fonuen Paipel a apasa pwe fan eu, emon chon wasola a apasa pwe ekkewe siip repwe esinna nour we chon mas ren ufan kewe, nge sap leuwan. Emon chon mas a polueni pwe ra silei leuwan. Ren an epwe anneta ewe poraus, ir me ruuemon ra nikasiwili ufer kewe. Ren an ufouf ufen ewe chon mas, ewe chon ekis a kori ekkewe siip, nge rese fori och. Rese silei leuwan. Iwe nge, lupwen ewe chon mas a koriir, inaamwo ika ese ufouf ufen emon chon masen siip, nge ekkewe siip ra muttir sa ngeni. Ina minne, eni emon epwe tongeni lapalapeni lapalapen emon chon mas, nge me ren ekkewe siip, ese annetata pwe i wesewesen emon chon mas. Ekkewe siip repwe sotun esinna ika leuwen ewe chon koko, ina leuwen ewe chon mas. An Kot we kapas a erenikich pwe sipwe fori ena​—“sotuni ekkewe porausen ngun, pwe oupwe sinei are ra fen feito me ren Kot.” (1 Jon 4:1, NW; 2 Timoti 1:13) Met epwe alisikich pwe sipwe fori ena mettoch?

17. (a) Ifa ussun sipwe sileifichi leuwen Jiowa? (b) Ach silei Jiowa a atufichikich ach sipwe fori met?

¹⁷ Pwungun pwe ukukun watten ach sileifichi leuwen Jiowa, are an kapas, ina ukukun watten ach tufichin esinna leuwen emon chon ekis. Ewe Paipel a aiti ngenikich ifa ussun sipwe amaari ena sokkun sile. A apasa: “Iwe, lupwen oua kul ngeni peliifich ika peliimong, selingemi repwe rongorong me lukun sokurumi, ‘Iei ewe al oupwe aleni.’” (Aisea 30:21) Ena “kapas” lukun sokuruch a popu seni Kapasen Kot. Iteiten fansoun sipwe alleani an Kot we Kapas, epwe ussun ita nge sipwe rongorong leuwen ach we Chon Masen Siip mi Lapalap, Jiowa. (Kol Fel 23:1) Ina minne, ach kakkaeo ewe Paipel epwe alapalo ach esinna leuwen Kot. Ena sokkun silelap epwe atufichikich ach sipwe muttir esinna leuwen ekkewe chon ekis.​—Kalesia 1:8.

18. (a) Met weween ach silei leuwen Jiowa? (b) Me ren Mattu 17:5, pwata sipwe alleasochisi leuwen Jises?

 ¹⁸ Met epwe pwal kapachelong lon ach silei leuwen Jiowa? Lukun ach rongorong, a pwal wewe ngeni ach sipwe alleasochisi. Nengenisefalli Aisea 30:21. An Kot we Kapas a apasa: “Iei ewe al.” Ewer, ren ach kakkaeo ewe Paipel, sipwe rongorong an Jiowa kkewe kapasen emmwen. Mwirin, a alluku ngenikich: “Oupwe aleni.” Jiowa a mochen ach sipwe apwonueta minne sia rongorong. Iwe, ren ach apwonueta minne sia kakkaeo, sipwe pwarata pwe sise chok rongorong leuwen Jiowa, nge sia pwal alleasochisi. (Tuteronomi 28:1) Ach alleasochisi leuwen Jiowa a pwal wewe ngeni ach alleasochisi leuwen Jises, pun Jiowa a pwisin erenikich ach sipwe fori ena. (Mattu 17:5) Met Jises, ewe Chon Masen Siip mi Murinno, a erenikich ach sipwe fori? A aiti ngenikich ach sipwe foralo chon kaeo me lukuluk won “ewe chon angang mi tuppwol o tipatchem.” (Mattu 24:45; 28:18-20) Ach alleasochisi leuwan a wewe ngeni ach sipwe kuna manau esemuch.​—Fofor 3:23.

‘Repwe Chok Su Seni I’

19. Met sipwe fori lupwen sipwe rong leuwen ekkewe chon ekis?

¹⁹ Iwe, met sipwe fori ren leuwen ekkewe chon ekis? Sipwe ussun chok ekkewe siip. Jises a era: “Resap mo tapwelo mwirin emon, pwe repwe chok su seni.” (Jon 10:5) Sipwe fori ruu mettoch. Aeuin, sisap “tapwelo mwirin” emon chon ekis. Ewer, sipwe unusen u ngeni emon chon ekis. Pwungun, lon ewe kapasen Krik ekkewe sou makkei Paipel ra nounou, ekkewe kapas “resap mo”, ina kapas pochokkul mi wewe ngeni u ngeni. (Mattu 24:35; Ipru 13:5) Oruuan, sipwe “su seni,” are sap seni. Ina chok ewe alen pwung lupwen sipwe rongorong afalafalen chokewe rese tipeeu ngeni leuwen ewe Chon Masen Siip mi Murinno.

20. Met sipwe fori lupwen sipwe rong (a) porausen ekkewe chon tokelo, (b) poraus seni chiechi mi ingau, (c) tipimwaal seni sou repotei poraus?

²⁰ Ina minne lupwen sipwe rongorong leuwen ir kkewe mi eani ekiekin ekkewe chon tokelo, sipwe mochen foffori minne an Kot we Kapas a apasa: “Oupwe esisinata ir mi efisata aimufesen, are sokkun riaffou mi u ngeni ewe afalafal oua fen kaeo; iwe, oupwe sap senir.” (Rom 16:17; Taitos 3:10) Iwe, ekkewe sarafo Chon Kraist mi tongeni kuna feiengau lon pekin luku ren chiener kewe repwe mochen apwonueta an Paul we kapasen fon ngeni ewe aluwol Timoti: “Su seni ekkewe mochenia-ingauen aluwol.” Iwe, lupwen sou repotei poraus repwe tipimwaal ngenikich, sipwe pwal chechemeni an Paul we kapasen fon ngeni Timoti, a era: “Repwe [ekkewe mi auseling ngeni leuwen ekkewe chon ekis] kul ngeni ekkewe tutunlapen rochopwak. Nge en, kopwe chok ononoto ren mettoch meinisin.” (2 Timoti 2:22; 4:3-5) Ese lifilifil ifa angangochun ekkewe chon ekis le foffos, nge sipwe su seni meinisin mi tongeni atai ach luku.​—Kol Fel 26:5; An Salomon Fos 7:5, 21; Pwarata 18:2, 4.

21. Ifa feiochun ekkewe mi u ngeni leuwen ekkewe chon ekis?

²¹ Ren ar repwe u ngeni leuwen ekkewe chon ekis, ekkewe Chon Kraist mi kepit ra apwonueta leuwen ewe Chon Mas lon Luk 12:32. Me ikkewe ie, Jises a erenir: “Ami mwich kisikis, ousap niuokkus; pun Sememi epwe pwapwa ren an epwe ngenikemi muun we.” Iwe, pwal ussun chok, ekkewe “pwal ekkoch siip” ra mwotores le witiwiti ewe fansoun ar repwe rongorong alon Jises kewe: “Ou feito, ami mi feioch me ren Semei, oupwe muuni ewe muu mi moleta remi seni le poputaan fonufan.” (Jon 10:16; Mattu 25:34) Met ren murinnoon ewe feioch epwe torikich ika sipwe u ngeni “leuwen ekkewe chon ekis.”!

En mi Chechemeni?

• Ifa ussun lapalapen Satan a ussun chok lapalapen ewe chon ekis lon an Jises kapas awewe ussun ewe tittin siip?

• Ifa ussun aramas repwe rongorong leuwen ekkewe chon ekis ikenai?

• Ifa ussun sipwe tongeni esinna leuwen ekkewe chon ekis?

• Met sipwe fori lupwen sipwe rong leuwen ekkewe chon ekis?

[Ekkewe Kapas Eis fan Iten ewe Lesen]

[Sasing lon pekin taropwe 27]

Meri a esinna Kraist

[Sasing lon pekin taropwe 28]

Ewe chon ekis a tukumi io pwisin i atun epwe arap ngeni ekkewe siip

[Sasing lon pekin taropwe 30]

Met sipwe fori lupwen sipwe rong leuwen ekkewe chon ekis?