Feffetal Ussun Chok Jises A Feffetal

‘Are emon a apasa pwe a nonnom lon Jises, iwe, epwe fakkun fefetal usun chok i a fefetal.’​—1 JON 2:6.

1, 2. Ifa weween ach nenneloi Jises?

 PAUL a apasa: “Sipwe chok likiitu le sa lon ewe kitir mi nom mwach. Sipwe nenneloi Jises, Samolun ach luku, o ewe Chon Aunusochulo” ach luku. (Ipru 12:1, 2) Ren ach sipwe feffetal won ewe alen tuppwol, iwe, sipwe nenneloi Jises Kraist.

² Ewe kapas “nenneloi” lon ewe Tesin Krik a wewe ngeni “ekkekiekifichi och mettoch me sisap kullu seni,” “ukutiu le nengeni och mettoch pwe sipwe nengeni pwal eu,” “afota och mettoch.” Eu puken awewe a apasa: “Lon ewe chok seken ekiekin emon chon Kris mi sassa a riki seni ewe kitir ren an epwe nengeni ekkewe chon katol, iwe, an ssa a mmangolo. A pwal ina ussun ren chon Kraist.” Ekkewe minen arikirik repwe eppeti ach feffeita lon pekin ngun. Sipwe nengenifichi Jises Kraist. Iwe, met sipwe kuna lupwen sia nengeni ewe Samol? Ei kapas lon fosun Kris fan iten “samol” a wewe ngeni “sou emmwen, emon a emmweni sokkopaten angang me a isetiu ewe leenien appiru mi murinno.” Weween ach nenneloi Jises pwe sipwe appiru i.

3, 4. (a) Met sipwe fori ren ach sipwe feffetal ussun chok Jises? (b) Ikkefa ekkewe kapas eis sipwe pwungupwung won?

³ Alon ewe Paipel: “Are emon a apasa pwe a nonnom lon i, iwe, epwe fakkun fefetal usun chok i a fefetal.” (1 Jon 2:6) Sipwe fori met Kot a kutta senikich ren ach alleasochisi an Jises kewe alluk ussun chok Jises a nenneloi Seman.—Jon 15:10.

⁴ Iwe, ika sipwe feffetal me ren minne Jises a kutta senikich, sipwe atolafichi nouch we Sou Emmwen me tapwelo lon ipwan kewe. Mei wor ulungat kapas eis sipwe pwungupwung won: Ifa ussun Jises a emmwenikich? Epwe ifa ussun lapalapen manauach ika sia tapwelo lon ipwan? Ikkefa ekkewe feioch sipwe kuna seni ach appiru Jises?

Ifa Ussun Jises A Emmweni Noun Kewe Chon Kaeo

5. Met Jises a pwon ngeni noun kewe chon kaeo mwen a feita lang?

⁵ Jises Kraist a awiisa ngeni noun kewe chon kaeo eu angang mi fokkun lamot mwen a feita lang. A apasa: “Iei minne, oupwe feilo asoulangalo chon fonu meinisin.” Ina ewe fansoun a pwon: “Nengeni, ngang upwe nonnom remi ran meinisin, tori le sopolon ei fansoun.”  (Mattu 28:19, 20) Iwe, ifa ussun Jises a nonnom ren noun kewe chon kaeo lon ekkewe ranin le sopwoloon?

6, 7. Ifa ussun Jises a emmwenikich ren ngun mi fel?

⁶ Jises a apasa: “Nge ewe Chon Aururu, ewe Ngun mi Fel, ewe Semei epwe tinato fan itei, epwe aiti ngenikemi mettoch meinisin, o epwe pwal achema ngenikemi mettoch meinisin minne ua fen apasa ngenikemi.” (Jon 14:26) Me ren an Jises tingor, Kot a tinato ngun mi fel ren an epwe emmwenikich me apochokkulakich. A asaramakich me a alisata ach weweiti “ekkewe le olololun Kot.” (1 Korint 2:10) Pwal och, ekkewe lapalap mi murinno, “tong, pwapwa, kinamwe, mosonoson, kirokiroch, lipwakoch, luku, tipefesir, forfichi,” ir “uwan Ngun.” (Kalesia 5:22, 23) Sia amaaraata ekkeei lapalap ren alillis seni ewe ngun mi fel.

⁷ Lupwen sia kaeo ewe Paipel me sia achocho le apwonueta alon ach kaeo, ngunun Jiowa epwe alisata lapeloon ach tipatchem, mirit, weweoch, sile, ach tufichin apwungu minne mi lamot, me ach tufichin ekiekoch. (An Salomon Fos 2:1-11) Ngun mi fel a pwal alisata ach likiitu fan sossot. (1 Korint 10:13; 2 Korint 4:7; Filipai 4:13) Iwe, chon Kraist repwe ‘alimelimochu pwisin ir seni sokkun limengauen fituk meinisin me limengauen ngun meinisin, me aunusochalo manauer mi fel ren niuokusun Kot.’ (2 Korint 7:1) Sia tongeni wiliiti aramas mi pin ika esor alillis seni ngun mi fel? Ngun mi fel seni Jiowa eu me lein ekkewe minen emmwen Jises a nounou ren an epwe emmwenikich ikenai.​—Mattu 28:18.

8, 9. Ifa ussun Kraist a nounou “ewe chon angang mi tuppwel o tipatchem” ren an epwe emmweni an we mwichefel?

⁸ Ekieki mwo ussun io Jises a pwal nounou ren an epwe emmweni ewe mwichefel. Lupwen Jises a fos ussun ekkewe ranin le sopwoloon, a apasa: “Iwe, lupwen a mottiu won ewe Chukun Olif, ekkewe chon kaeo ra chok imulo ren i, o ra apasa: “Iwe, nge io ewe chon angang mi tuppwel o tipatchem noun we masta a fen seikata me lein chienan kewe pwe epwe wisen awisa ngenir aner mongo fansoun meinisin? Feiochun ewe chon angang, are noun we masta epwe kuna pwe a fori iei usun lupwen a feito. Enlet, upwe apasa ngenikemi, epwe seikata i won pisekin meinisin.”​—Mattu 24:3, 45-47.

⁹ Ewe “masta,” Jises Kraist. Iwe, ewe “chon angang” a wewe ngeni ekkewe chon Kraist mi kepit won fonufan. Ei mwichen aramas a wiisen tumunu pisekin Jises won fonufan me awora mongoon ngun lon ewe fansoun mi fich ngeni. Ekkoch mwan mi asimau seni ewe mwichen aramas mi kepit ra eani wiiser lon eu Mwichen Sou Pwungupwung. Iei ussun ra tupuni unusen ewe “chon angang mi tuppwel o tipatchem.” Ra emmweni ewe angangen afalafal won unusen fonufan me ra awora mongoon ngun lon ewe fansoun mi fich ngeni. Iwe, Kraist a emmweni an we mwichefel ren “ewe chon angang mi tuppwel o tipachem” mi seikita ren ngun mi fel me ren an we Mwichen Sou Pwungupwung.

10. Epwe ifa ach ekiek ussun ekkewe elter, me met popun?

¹⁰ An Jises emmwen a pwal pwalo ren eu “liffang,” ekkewe elter lon ewe mwichefel. Jises a liffang ngenikich ekkeei aramas ren an epwe ‘aunusochalo ekkewe aramas mi fel’ me fan iten eu ’angangen alisi, ngeni aufichietaan ewe inisin Kraist.’ (Efisus 4:8, 11, 12) Iei met Paul a apasa ussur lon Ipru 13:7: “Oupwe chechemeni ekkewe chon emmwenikemi, ir mi fen apasa ngenikemi ewe kapasen Kot. Oupwe ekieki usun uwan manauer, o oupwe appiru ar luku.” Ekkewe elter ra emmweni angangen ewe mwichefel. Pokiten ir chon appiru Kraist, a fich ngenikich ach sipwe appiru ar luku. (1 Korint 11:1) Sia pwaralo ach kilisou ngeniir ren ach tipemecheres me ach alleasochis ngeni  ekkeei mwan mi ussun chok eu “liffang.”​—Ipru 13:17.

11. Ifa ussun Kraist a emmweni noun kewe chon kaeo ikenai, me met sipwe fori ika sia mochen feffetal ussun chok Kraist?

¹¹ Iwe, iei Jises a emmweni noun kewe chon kaeo ren ewe ngun mi fel, “ewe chon angang mi tuppwel o tipatchem,” me ekkewe elter lon ewe mwichefel. Weween ach feffetal ussun chok Kraist pwe sipwe weweiti ifa ussun Jises a emmweni ewe mwichefel me anomukich fan ena emmwen. Sia pwal wiisen achocho ngeni ach sipwe appiru lapalapen an Jises feffetal. Ewe aposel Piter a makkei: “Pun iei popun a fen korikemi, pwe Kraist a pwal kuna riaffou fan asengesimi, o a isetiu eu leenien appiru mwemi, pwe ami oupwe tapwelo mwirin lon ipwan.” (1 Piter 2:21) Ifa ussun ach tapwelo mwirin Jises epwe siwili manauach?

Kopwe Mirit Lupwen A Wor Wiisom

12. Ekkewe elter repwe akkaewin appiru Jises ren met?

¹² Kot a ngeni Jises nemenem mi lapalap seni ese lifilifil menni nemenem won fonufan, nge Jises a mirit ren ifa ussun a eani an nemenem. Meinisin lon ewe mwichefel, akkaewin ekkewe elter, repwe chechchemeni ei fon: “Ami mosonoson epwe pwapwalo ngeni aramas meinisin.” (Filipai 4:5; 1 Timoti 3:2, 3) Pokiten ekkewe elter ir sou emmwen lon ewe mwichefel, iwe, a wenewenen lamot ar repwe appiru lapalapen an Jises emmwen.

13, 14. Ifa ussun ekkewe elter repwe appiru Jises lupwen ra pesei aramas ar repwe angang ngeni Kot?

¹³ Jises a chechchemeni apwangapwangen noun kewe chon kaeo. Ese tingor seniir minne ese ki rer. (Jon 16:12) Jises ese erianiir nge a peseer ar repwe “achocho ngeni” ar repwe fori letipen Kot. (Luk 13:24) A peseer ren an pwisin emmweniir me ren an achungu letiper lupwen a afalafaleer. Iwe, ekkewe elter repwe appiru Jises. Resap aniua aramas are asaueer are tipi ngeniir. Repwe pesei aramas ar repwe angang ngeni Kot pokiten tong fan iten Jiowa, Jises, me chon orur kewe.—Mattu 22:37-39.

¹⁴ Jises ese aeamwaalli an nemenem ren an nemeni manauen aramas. Ese kutta minne ese ki rer. Ese pwal ngeni aramas chommong, chommong alluk. Jises a sotun achungu letipen aramas ren afalafal ussun ekkewe kapasen alongolongun alluk ekkewe alluk Kot a ngeni Moses ra alongolong won, pwe aramas repwe pwisin fori minne mi pwung. (Mattu 5:27, 28) Ekkewe elter repwe appiru Jises. Resap isetiu chommong alluk are eriani aramas ar repwe tipeeu ngeni ekiekin ewe elter. Ren porausen foutach, ufach, me met sia fori lupwen sia asoso me kulou, ekkewe elter repwe sotun achungu letipen aramas ren ewe emmwen seni Kot, ussun chok ewe emmwen a kawor lon Mika 6:8; 1 Korint 10:31-33; me 1 Timoti 2:9, 10.

Tongei Aramas Me Omusalo Ar Kewe Tipis

15. Met Jises a fori lupwen noun kewe chon kaeo ra kkuf?

¹⁵ Jises a likiti ngenikich eu pisekin nengeni ren met a fori lupwen noun kewe chon kaeo ra kkuf are tipis. Ekieki mwo porausen ruu mettoch ra fisita lon ewe saingoon pwin Jises a nonnom won fonufan. Lupwen Jises a feilo Ketsemeni “a angei Piter me Jemes me Jon pwe repwe fiti i” me a ereniir  pwe repwe “mamasa.” Iwe, “a imuelo ekis, o a chapelo won pwul, o a iotek.” Nge lupwen a liwin “a kuna pwe ra chok momour.” Met Jises a apasa? “Ngun a fen mochen nge fituk a apwangapwang.” (Mark 14:32-38) Jises ese eani kapas pochokkul ren an epwe apwungu Piter, Jemes, me Jon. A apasa pwe a weweiti ewe popun ra molulu. Iwe, lon ena pwinin, Piter a amam Jises fan ulungat. (Mark 14:66-72) Ifa ussun ekiekin Jises ussun Piter mwirin? “Ewe Samol a fen manausefal, o a pwa ngeni Saimon!” (Luk 24:34) “Iwe, mwirin, a pwa ngeni Sifas, o ngeni ekkewe engol-me-ruemon.” (1 Korint 15:5) Jises ese songeiti Piter. A omusalo tipisin ena aposel me a apochokkula i. Mwirin a pwal awiisa ngeni Piter wiisan kewe mi lapalap.—Fofor 2:14; 8:14-17; 10:44, 45.

16. Ifa ussun sipwe feffetal ussun chok Jises lupwen pwiich kewe rese apwonueta wiiser are tipis ngenikich?

¹⁶ Lupwen pwiich kewe rese apwonueta wiiser are ra tipis ngenikich pokiten ir mi apwangang, iwe, sisap pwal tongeer me omuseerelo ussun chok Jises a fori? Piter a pesei chienan kewe chon luku: “Iwe, mwiriloon, ami meinisin oupwe tipeeufengen o tongfengen, oupwe tongei pwimi kewe Soulang, o letipemi epwe umoumoch pwal tipetekison. Ousap liwini ingau ngeni ingau, are lalingau ngeni lalingau, nge epwe fen murinno are oupwe afeiochu, pun iei popun a korikemi, pwe oupwe alemwiri feiochumi.” (1 Piter 3:8, 9) Iwe nge, ifa ussun ika aramas rese appiru Jises me rese weweiti pwe kich mi apwangapwang are omusalo ach kewe tipis ngeniir? Iwe, sipwe chuen appiru Jises me fos ngeniir ussun chok Jises epwe fen fos ngeniir.​—1 Jon 3:16.

Kutta Loom Ewe Muu

17. Ifa ussun sia silei pwe letipen Kot mi akkom lon manauen Jises?

¹⁷ An afalafala ewe kapas allim ussun Muun Kot ewe mettoch mi lamot seni meinisin lon manauen Jises, me ina pwal eu mettoch sipwe fori ika sia mochen feffetal ussun chok Jises. Iei met Jises a ereni noun kewe chon kaeo mwirin a afalafal ngeni emon fin Sameria unukkun ewe telinimwen Saikar: “Iei anei, pwe upwe fori letipen ewe emon mi tinieito, o upwe pwal efisata an angang.” (Jon 4:34) Jises a manau seni an foffori letipen Seman. Ena angang a apochokkula me asoso i, me a apwapwai i, ussun chok a pochokkulelo me a pwapwaiti anan mongo wesewesan. Ach unusen achocho le fori letipen Kot ussun chok Jises epwe apochokkula me apwapwaikich?

18. Ikkefa ekkewe feioch ra pop seni ach pesei nouch kewe ar repwe pioneer?

¹⁸ Lupwen ekkewe sam me in ra pesei nour kewe ar repwe pioneer, pwisin ir fengen me nour kewe ra feioch. Emon sam a pesei noun kewe nipwe at seni le kukkunur ngeni ar repwe pioneer. Iwe, ekkewe ruuemon ra pioneer mwirin ra sochungio. Iei met ena sam a makkei pokiten an chengel: “Aua fokkun pwapwa ren noum kewe at. Am me ruuemon aua apasa: ‘Nengeni, nouch kewe at, iei mi alemwirach me ren ewe Samol.’” (Kol Fel 127:3) Iwe, ifa ussun ekkewe nau repwe feioch? Emon in a wor noun kewe limon a apasa: “Ewe angangen pioneer a alisi nei kewe ar repwe chiechioch ngeni Jiowa, a alisata  ar tufichin kaeo, a alisiir ar repwe nounouochu ar we fansoun, me a alisata ar akkomwa mettochun ngun lon manauer. A chommong ekkewe mettoch ra siwili lon manauer pwe repwe pioneer nge ir meinisin ra pwapwa pwe ra fori.”

19. Ekkewe sarafo repwe ekieki ussun menni wiiser lon mwach kkan?

¹⁹ Ami kewe sarafo, met oupwe fori lon mwach kkan? Oupwe achocho ngeni wiisemi watte lon fonufan? Are oupwe pioneer? Paul a apasa: “Iei minne, oupwe fakkun nengenifichi usun ami fefetal, esap usun ekkewe aramas mi tiparoch, pwe usun ekkewe mi tipatchem.” A peseikich ach sipwe alamota ei fansoun me a peseikich ach sisap “puchulo,” nge sipwe “wewe ren meeta letipen ewe Samol.”​—Efisus 5:15-17.

Kopwe Tuppwol

20, 21. Ifa ussun Jises mi tuppwol, me ifa ussun sipwe appiru an tuppwol?

²⁰ Ika sia feffetal ussun chok Jises, sipwe appiru an tuppwol. Iei met ewe Paipel a apasa ussun an Jises tuppwol: “Oupwe chok napanapeni ewe sokkun napanap Christ Jesus a aani: Fansoun meinisin a napanapeni napanapen God, nge ese mo ekieki pwe ren an pochokun epwe ne anonno pwisin i ngeni God. Iwe nge, seni pwisin an mefata non netipan o ponuku mettoch meinisin, iwe a angei napanapen emon chon angang. A winiti emon aramas o a pwato non napanapen aramas. A pwisin atekisonatiw o a anneasosich ngeni God tori mano.”​—Filipai 2:5-8. (Ewe Kapasen Kot)

²¹ Jises a pwal tuppwol ngeni noun kewe aposel. Ekkewe aposel ra apwangapwang me ra tipis nge Jises a tongeer “tori le sopolon.” (Jon 13:1) Ussun chok Jises, sisap akkapi pwiich kewe pokiten ar kewe apwangapwang.

Appiru An Jises Leenien Appiru

22, 23. Ikkefa ekkewe feioch seni ach appiru Jises?

²² Pwungun pwe sise tongeni unusen tapwelo lon ipwen Jises kewe. Iwe nge, ren ach sipwe fori ena, sia tongeni achocho ngeni. A lamot ach weweiti me anomukich fan an Jises kokkotun nemenem me amwochu ena kokkot.

²³ Sia feioch lupwen sia appiru Kraist. Sia menemenoch me a wor eu popun mi auchea ren manauach pokiten sia achocho le fori letipen Kot, sap chok letipach. (Jon 5:30; 6:38) Mwelien letipach mi limelimoch. Lapalapen manauach mi murinno. Jises a etiwa aramas mi pekus me chouchou ar repwe eti i me kuna asoso. (Mattu 11:28-30) Lupwen sia appiru Jises, sipwe asoso aramas lupwen sia chiechi ngeniir. Amwo sipwe feffetal ussun chok Jises.

En Mi Chechchemeni?

• Ifa ussun Kraist a emmweni noun kewe chon kaeo ikenai?

• Ifa ussun ekkewe elter repwe appiru Jises lupwen a wor wiiser seni Kot?

• Ifa ussun sipwe appiru Jises lupwen aramas ra tipis ngenikich?

• Ifa ussun ekkewe sarafo repwe kutta loom ewe Muu?

[Ekkewe kapas eis fan iten ewe lesen]

[Sasing lon pekin taropwe 15]

Ekkewe elter ra alisikich le appiru Jises

[Sasing lon pekin taropwe 16]

Ami kewe sarafo, met oua foffori iei ren ami oupwe wiliiti chon Kraist mi pwapwa lon mwach kkan?