Iei Ewe Fansoun Sipwe Mwokutukut

“Ifa ukukun fansoun ami oupwe tipemwaramwar won ruu ekiek?”​—1 KING 18:21.

1. Met sokkofesennin ach ei fansoun me ewe fansoun loom?

 EN MI luku pwe Jiowa ewe Kot mi enlet? Iwe, pokiten om kaeo ekkewe oesini lon Paipel, en mi luku pwe ikkeei “ekkewe ran le sopolon” fan iten an Setan otot mi ngau? (2 Timoti 3:1) Ika pwe wuu, kopwe tipeeu pwe iei ewe fansoun sipwe mwokutukut. Manauach me manauen aramas meinisin a alongolong won met sipwe fori.

2. Met a fis lon ekkewe engol einangen Israel fan an King Ahap nemenem?

² Me loom, loom, ekkewe chon Israel ra wiisen filata io repwe angang ngeni. King Ahap, fan etipetipaen puluwan we Jesepel, a alisata fel ngeni Paal lon Israel. Ita Paal epwe efeiochu ekkewe chon atake ren nafochun ran me uwa mi murinno. Fan iten ar repwe angei ena feioch won ar kewe atake me won nour kewe man, chommong chon fel ngeni Paal repwe kisi are chapetiu mwen liosun ei kot, are feilo ngeni ewe imwen fel ren ar repwe koon ren ekkewe mwan lisowu me fin lisowu ikewe ie. Ra pwal pwisin akinaseer tori a suputiu chchaar.​—1 King 18:28.

3. Ifa ussun fel ngeni Paal a siwili manauen noun Kot kewe aramas?

³ Nge, 7,000 chon Israel rese fiti ei fel ngeni lios mi limengau me mwanesol. (1 King 19:18) Ra kuna riaffou mwaal pokiten ir chon fel ngeni Jiowa. Ren chok awewe, Kiwin Jesepel a pwal mwo nge nnielo chommong noun Jiowa kewe soufos. (1 King 18:4, 13) Pokiten watteen ewe osukosuk, chommong chon Israel ra feffel ngeni Jiowa fengen me Paal. Iwe nge, minne ra fori a fokkun ngau pokiten emon chon Israel esap riki seni Jiowa ren an epwe fel ngeni emon kot chofona. Jiowa a pwon pwe epwe efeiochu ekkewe chon Israel mi tongei i me alleasochisi an kewe alluk, nge  a ouroureer pwe repwe nninniilo ika rese fel ngeni i chok.​—Tuteronomi 5:6-10; 28:15, 63.

4. Ifa an Jises me an ekkewe aposel oesini ussun met epwe fisita lein ekkewe chon Kraist, me ifa ussun ewe oesini a pwonueta?

⁴ Kirisentom a ussun chok Israel loom. Fofforun me lukuen chommong chon Kraist, pwal mwo nge ar kewe ran mi pin, ra u ngeni ekkewe afalafal lon ewe Paipel. Ussun chok Jesepel, nouwisin lamalam ra eriaffou noun Jiowa kewe Chon Pwarata. Uruwoon fonufan a pwaralo ifa ussun nouwisin lamalam ra alisata maun. Ina popun chchaan fite, fite milion souleng a nonnom won ekkena nouwis. Me ren ewe Paipel, chiechi lefilen ekkewe lamalamen fonufan me ekkewe muun fonufan a wewe ngeni lisowu mwaal lon pekin ngun. (Pwarata 18:2, 3) Pwal och, me ren chommong lamalamen Kraist, ese chuen ngau sokkopaten lisowu mi mwaal me loom, pwal mwo nge fan iten ekkewe nouwis. Jises Kraist a oesini pwe epwe fis ei sokkun rikilo. (Mattu 13:36-43; Fofor 20:29, 30; 2 Piter 2:1, 2) Met epwe fis ngeni ekkewe lap seni eu bilion chon Kraist won fonufan? Iwe, ifa wiisen chokkewe mi fel ngeni Jiowa ngeni ekkewe aramas mi tupulo ren lamalam chofona? Sipwe polueni ekkena kapas eis lupwen sia atittina met a emmwen ngeni ewe fansoun “Jehu a aukatiu an aramas fel ngeni ewe anu Paal me lon Israel.”​—2 King 10:28.

Kot A Tongei Noun Kewe Aramas Mi Rikilo

5. Ifa ussun Jiowa a pwaralo pwe a tongei noun kewe aramas mi rikilo?

⁵ Jiowa ese pwapwa lupwen a wiisen apwungu noun kewe aramas mi rikilo. Jiowa a ussun chok emon sam mi tongei noun kewe me a mochen pwe ekkewe mi rikilo repwe aier me kulsefal ngeni i. (Isikiel 18:32; 2 Piter 3:9) A ffatolo pwungun ena poraus ren ekkewe chommong soufos Jiowa a tiinalo lon ranin Ahap me Jesepel, ren an epwe ouroura  Noun kewe aramas ussun watteen ewe feiengau repwe kuna pokiten ra fel ngeni Paal. Elias emon lein ekkena soufos. Atun ewe pwas Elias a oesini, atewe a ereni King Ahap pwe chon Israel me noun Paal kewe soufos repwe chufengen won ewe Chuuk Karmel.​—1 King 18:1, 19.

6, 7. (a) Ifa ussun Elias a affata ewe popun Israel a rikilo? (b) Met noun Paal kewe soufos ra fori? (c) Met Elias a fori?

⁶ Ei mwich a fisita lon leenien eu rong fan iten Jiowa “mi katala.” Eli aramas ra ataielo ewe rong fan iten ar repwe apwapwai Jesepel. (1 King 18:30) A mmen solap pwe ekkewe chon Israel mi fiti ena mwich rese silei ika Jiowa are Paal epwe apungaatiu ewe ran. Mei wor 450 soufosun Paal, nge Elias a chok alaemon. Elias a silei ewe popun ekkewe aramas ra osukosuk. A apasa: “Ifa ukukun fansoun ami oupwe tipemwaramwar won ruu ekiek? Are ewe Samol mi Lapalap i Kot, oupwe fel ngeni, nge are ewe anu Paal i Kot, oupwe chok fel ngeni.” Elias a mochen amwokutu ekkewe chon Israel ar repwe fel ngeni Jiowa chok, iwe, a apasa pwe epwe wor eu sossot lefilen ekkewe Kot. Aramas repwe nnielo ruuemon atemwanin kou fan iten asor, emon fan iten Jiowa, emon fan iten Paal. Ewe Kot mi enlet epwe etiwa an we asor ren ekkei. Ekkewe soufosun Paal ra ammonlata ar we asor me ra kokko ngeni Paal ren fitu awa: ”Paal, kopwe auseling o paluenikem.” Lupwen Elias a esiiter, iwe, ra pupuchor me ra akinasa inisir tori a suputiu chchaar. Nge Paal ese polueniir.​—1 King 18:21, 26-29.

⁷ Iwe, met Elias a fori? Akkom a senisefallieta an Jiowa rongen asor me a iseta inisin ewe atemwanin kou won. Mwirin, a apasa pwe aramas repwe niinatiu ruaanu rumen konik won ewe asor. A fis fan ulungat tori ewe warawar mi pwelli ewe rong a ureta ren konik. Iwe, Elias a iotek: “Ai Samol mi Lapalap, an Apraham, Isaak, me Jakop we Kot, kopwe pwari ikenai pwe en ewe Kot lon Israel, nge ngang noum chon angang. Kopwe pwal pwari pwe ua fori ekei mettoch meinisin fan alom. Kopwe palueniei, ai Samol mi Lapalap, kopwe palueniei, pwe ekei aramas repwe silei pwe en Kot ai Samol mi Lapalap, repwe pwal silei pwe en ka akulusefali leluker.”​—1 King 18:30-37.

8. Met Jiowa a fori lupwen a rongorong an Elias iotek, iwe, met Elias a fori mwirin?

⁸ Jiowa a tinatiu ekkei seni lang. Ewe ekkei a muttir kenalo ewe asor, ewe mwuch, me ewe rong a ffor seni fau. Ewe ekkei a pwal apwasaata ewe konik lon ewe warawar! Ekieki mwo ussun ekiekin ekkewe chon Israel. “Ra chapetiu  lepwul o kokko, ’Ewe Samol mi Lapalap i Kot, ewe Samol mi Lapalap, i chok Kot.’” Iei fansoun Elias a ereni ekkewe chon Israel: “Oupwe turufi noun ewe anu Paal kewe soufos. Ousap mwut ngeni eman pwe epwe su.” Iwe, 450 noun Paal kewe soufos ra nninniilo unukkun ewe Chuuk Karmel.​—1 King 18:38-40.

9. Ifa ussun chon fel mi enlet ra chuen sossot?

⁹ Lon ena ran mi amwarar, mwirin a pwas ren ulungat esop ier, Jiowa a apungatiu ewe ran. (Jemes 5:17, 18) Ekieki mwo met ekkewe chon Israel ra foffos ussun lupwen ra liwinlo ngeni imwer kewe. Iten Kot a fen aitochulo me a ffatolo pwe Jiowa ewe Kot mi lapalap. Iwe nge, ekkewe chon fel ngeni Paal rese ffang. Jesepel a chuen eriaffou noun Jiowa kewe chon angang. (1 King 19:1, 2; 21:11-16) Tuppwolun noun Kot kewe aramas a chuen sossot. Io repwe fel ngeni Jiowa lon ranin ewe kapwung won aramas mi fel ngeni Paal?

Mwokutukut Mwo Iei

10. (a) Met ekkewe chon Kraist mi kepit ra foffori lon ei fansoun? (b) Ifa ussun sipwe alleasochisi ewe alluk lon Pwarata 18:4?

¹⁰ Lon ei fansoun, ekkewe chon Kraist mi kepit ra fori eu angang ussun chok an Elias angang. Ren afalafal, puk, me chassi, ra ouroura aramas lon ekkewe lamalam meinisin, ese lifilifil ir chon ia, pwe feiengau watte a pop seni lamalam chofona. Pokiten ena angang, fite milion ra mwokutukut. Ra likitalo lamalam chofona. Ra fangolo manauer ngeni Jiowa me ra papatais. Iei ussun ra wiliiti noun Jises kewe chon kaeo. Ekkeei aramas ra auselingaochu an Kot poraus mi atapwalapwal ussun lamalam chofona: “Ami nei aramas, oupwe tou seni neminewe, pwe oute chiechi ngeni i lon an kewe tipis, o oute pwal eti i lon an kewe riaffou.”​—Pwarata 18:4.

11. Met sipwe fori pwe Kot epwe pwapwa rech?

¹¹ Iwe nge, mei pwal wor fite milion aramas mi saani ewe poraus Chon Pwarata Jiowa ra esileifeili nge, resaamwo filata met repwe fori. Eli, fan ekkoch, repwe fiti mwich, are ewe Faafin Ach Samol, are eu mwichelap. Iwe, sia peseer meinisin pwe repwe ekkekieki ussun an Elias kewe kapas: “Ifa ukukun fansoun ami oupwe tipemwaramwar won ruu ekiek?” (1 King 18:21) Amwo resap chok witiwit. Nge iei ewe fansoun  repwe unusen achocho le fangolo manauer ngeni Kot me papatais. Iei ussun repwe manaufoch.​—2 Tesalonika 1:6-9.

12. Ifa ussun ekkoch chon Kraist ra feiengau lon pekin ngun, iwe, met repwe fori iei?

¹² A mmen solap pwe a kisikiselo ewe lamoten fel ngeni Kot lon letipen ekkoch chon Kraist are pwe rese chuen fel ngeni. (Ipru 10:23-25; 13:15, 16) Neman rese chuen tinikken pokiten niuokkus ussun riaffou mwaal, lolilen ussun tufichin manauer, achocho ngeni ar repwe wouoch, are pokiten ra mochen fori minne chok ra pwisin pwapwa ren. Jises a apasa pwe ekkeei mettoch repwe oturu, akkufu, me ssarei ekkoch lein noun kewe chon kaeo. (Mattu 10:28-33; 13:20-22; Luk 12:22-31; 21:34-36) Ita resap “tipemwaramwar won ruu ekiek,” nge repwe “achocho ngeni o aier,” weween pwe repwe achocho le apwonueta minne ra fen pwon ngeni Kot.​—Pwarata 3:15-19.

Lamalam Chofona Epwele Wes

13. Met a fiffis lon Israel lupwen Jehu a kepit ren an epwe king?

¹³ Ewe popun aramas repwe muttir pekini pekin Jiowa iei a pwalo ren met a fisita lon Israel 18 ier mwirin Jiowa a akkufu Paal unukkun ewe Chuuk Karmel. Jiowa a apwungu ewe lamalamen Paal atun an Elisa angangen afalafal. Ewe kapwung a muttir fisita lupwen aramas rese mmonleta ngeni. Noun King Ahap, Jehoram, a nemeni Israel. Jesepel, inen ewe king, a chuen manau. Elisa a tiinalo noun we chon angang ngeni Jehu, meilapen ekkewe sounfiu lon Israel. Atewe epwe epiti Jehu pwe epwe kingen Israel. Lon ena fansoun Jehu a fiti maun otiuen ewe Jortan lon Ramot-kiliat. King Jehoram a nom lon Jesreel, lon ewe leemool unukkun Mekito, ikewe a feilo ie mwirin a feiengau lon maun.​—2 King 8:29–9:4.

14, 15. Met Kot a awiisa ngeni Jehu, iwe, ifa ussun Jehu a apwonueta wiisan?

¹⁴ Iei met Jiowa a ereni Jehu: “Kopwe niela chon leimwen Ahap om we samol, pwe ngang upwe ngeni Isipel chappen an niela nei kewe soufos, pwal chappen an niela nei kewe chon angang meinisin. Pun unusen chon leimwen Ahap repwe rosola. . . . Kolak repwe ochei Isipel me lon kinikinin fanuen Jesrel, nge esap wor eman epwe peiaseni.”​—2 King 9:7-10.

¹⁵ Jehu a muttir mwokutukut. A tota won waan we woken ren an epwe feilo Jesreel. Ewe chon mas lon Jesreel a esinna Jehu pokiten lapalapen an uwei ewe woken. Lupwen ewe chon mas a aporausa King Jehoram pwe Jehu a feffeito, iwe, King Jehoram a tota won waan we woken ren an epwe chuuri meilapen noun kewe sounfiu. Lupwen ra chufengen, Jehoram a eis: “Ifa usun, Jehu, ka feito fan kinamwe?” Jehu a polueni: “Ifa usun a tongeni fis kinamwe, are Isipel inom we a chok fofori  ekewe angangen anumwal me angangen roong?” Iwe, mwen King Jehoram a tongeni su seni, Jehu a nnielo ewe king ren efoch asefich a pwereni foun ngasangasan.​—2 King 9:20-24.

16. (a) Met ekkewe nouwis lon imwen Jesepel ra muttir filata? (b) Ifa ussun an Jiowa we kapas ussun Jesepel a pwonueta?

¹⁶ Mwirin, Jehu a muttir feilo Jesreel. Jesepel a fen achola unukkun foun mesan me a ukkuutiu won Jehu me lon ewe asamwocho. A kotiu pwe epwe aniua Jehu ren an kapas nge Jehu ese auseling. Jehu a kutta io kewe repwe alisi i: “Io a nom won peki, io a nom won peki?” Iwe, iei ewe fansoun noun Jesepel kewe chon angang repwe kefiloch me mwokutukut. Ruuemon are ulumon nouwis ra rongorong. Iwe, muttir chok a wor sossot ussun io repwe tuppwol ngeni. Jehu a alluk ngeniir: “Oupwe aturatiu nemina.” Iwe, ekkewe nouwis ra oturatiu Jesepel. A turutiu won ewe aal ikewe noun Jehu kewe oris ra ipweri inisin me ie. Iei ussun ewe emon a poputa fel ngeni Paal lon Israel a malo. Mwen ar repwe tongeni peiasini Jesepel, ekkewe kolak ra fen ochei inisin, ussun chok ewe soufos a fen oesini.​—2 King 9:30-37.

17. An Kot kapwung won Jesepel epwe apochokkula ach luku pwe menni kapwung epwe fis?

¹⁷ Epwe pwal ina ussun kapwungun ewe fin lisowu itan “Papilon mi Lap.” Ei fin lisowu lon kapas awewe a liosueta ekkewe lamalam mi chofona meinisin lon an Setan fonufan. Waaren ekkeei lamalam a mammaar lon ewe telinimwen Papilon loom. Jiowa epwe apwungu aramas lon an Setan fonufan mwirin an apwungu ekkewe lamalam chofona. Ekkena aramas repwe nninniilo. Iei ussun epwe wor eu fonufan sefo mi pwung.​—Pwarata 17:3-6; 19:19-21; 21:1-4.

18. Met a fis ngeni ekkewe chon fel ngeni Paal mwirin maloon Jesepel?

¹⁸ Mwirin maloon Jesepel, King Jehu a muttir nnielo mwirimwirin Ahap kewe me ekkewe aramas ra alisi i. (2 King 10:11) Nge mei chuen wor chommong chon fel ngeni Paal lon Israel. Jehu ese likitiirelo. A mochen pwaralo an “tiliken fan iten ewe Samol mi Lapalap.” (2 King 10:16) Jehu a pwomweni pwe a fokkun tongei Paal. A akkota pwe epwe fis eu fetelap fan iten Paal lon ewe imwen fel Ahap a aueta lon Sameria. Ekkewe chon fel ngeni Paal meinisin ra fiti ewe fetelap. Lupwen ir meinisin ra nonnom lon ewe imwen fel, iwe, noun Jehu kewe mwan ra nniirelo. Iei muchuloon ei poraus lon ewe Paipel: “Iei usun Jehu a aukatiu an aramas fel ngeni ewe anu Paal me lon Israel.”​—2 King 10:18-28.

19. Ifa ewe feioch mi amwarar a wikiti ‘ewe mwich mi fakkun lapalap’ noun Jiowa kewe chon fel mi tuppwol?

¹⁹ Fel ngeni Paal a unusen rosolo me lon Israel. Pwal ussun chok, sopwoloon lamalam chofona iei epwe pwal muttir fisita. Aramas repwe mairu. Nge kopwe peni io lon ranin ena kapwung mi lap? Iei fansoun kopwe filata me mwokutukut pwe kopwe nonnom lein ewe “mwich mi fakkun lapalap” mi manau seni ewe “riaffou mi lapalap.” Iwe, kopwe pwapwa lupwen ka nesefal won met a fen fisita me kopwe mwareiti Kot ren an apwungu “ewe fin-lisou mi lap, ewe a alimengaualo fonufan ren an we lisou.” Ren chienom kewe mi fel ngeni Jiowa, kopwe tipeeu ngeni an ekkewe chonlang kol: ’Aleluia! Pun ach Samol Kot Lapalap a nemen.’​—Pwarata 7:9, 10, 14; 19:1, 2, 6.

Kapas Eis Sipwe Ekkekieki Ussur

• Met a kapachelong lon ewe fel ngeni Paal chon Israel loom ra etiwa?

• Ifa ewe rikilo mi lapalap Paipel a oesini? Ifa ussun ena oesini a pwonueta?

• Met epwe tori lamalam chofona?

• Met sipwe fori ren ach sipwe manauou seni ranin an Kot kapwung?

[Ekkewe kapas eis fan iten ewe lesen]

[Map lon pekin taropwe 25]

(Ren unusen napanapan, ppii ewe puk)

Soko

Afek

Helkat

Jokneam

Mekito

Taanak

Totan

SAMARIA

Entor

Sunem

Opra

Jesreel

Ipleam (Kat-rimmon)

Tirsa

Pet-semes

Pet-sean (Pet-san) (Scythopolis)

Japes-kiliat?

Apel-mehola

Pet-arpel

Ramot-kiliat

Mountain Peaks

Chuuk Karmel

Chuuk Tapor

More

Chuuk Kilpoa

[Bodies of water]

Saat Mediterranean

Nomwun Kalili

[River]

Chanpupu Jortan

[Spring and well]

Puachen koluk lon Harot

[Sasing lon pekin taropwe 25]

Ruu kinikinin fel mi enlet mi fokkun lamot: Akkafalafala porausen ewe Muu me fiffiti ekkewe mwich

[Sasing lon pekin taropwe 26]

Kich meinisin mi mochen manauou seni ranin Jiowa sipwe muttir mwokutukut, ussun chok Jehu