Met Ka Silei Ussun Jises Kraist?

EKIEKI mwo ussun mwasangasangen emon anuwol, re Jus, itan Antru lupwen a keran rongorong an Jises afalafal! A mak lon ewe Paipel pwe Antru a muttir ereni pwiin we: “Am aua fen kuna ewe Messaia (a wewe ngeni Kraist).” (Jon 1:41) Lon kapasen Ipru me Krik, ekkewe kapas “Messaia” me “Kraist” ra wewe ngeni “ewe mi Kepit.” Jises ewe mi Kepit, ewe mi Filita me ren Kot, ewe Sou Emmwen mi pwonetiu. (Aisea 55:4) Mei wor oesini lon Paipel ussun i me ekkewe chon Jus lon ranin Jises ra luku pwe ewe Messaia epwe pwalo lon ar we fansoun.​—Luk 3:15.

Ifa ussun sia silei pwe Jises Noun Kot mi Filita? Iwe, ekieki mwo met a fis lon ewe ier 29 C.E. lupwen Jises a 30 ierin. A feilo ngeni Jon Papatais ren an epwe papatais lon ewe chanpupu Jortan. Ewe Paipel a apasa: “Lupwen a wes an Jises papatais, a muttir feita seni ewe konik, o nengeni, lang a suukulo, o a kuna Ngunun Kot, pwe a feitiu usun chok emon lisom, o a sotiu won. Iwe, nengeni, och mongungu seni lang a apasa, ’Iei nei at mi achengicheng rei; ua unusen pwapwa ren.’” (Mattu 3:16, 17) Jon epwe ita tipemwaramwar pwe Jises a filita me ren Kot mwirin an rongorong ekkena kapas? Lupwen Jiowa Kot a niinatiu ngunun won Jises, iwe, a epiti i fan iten wiisan, Kingen ewe Muu epwe feito. Ina ussun Jises a wiliiti Jises Kraist, are Jises ewe mi Kepit. Nge, ifa ussun Jises Noun Kot? Iwe, ia Jises a feito me ie?

Jises Seni “Lomlom”

Mei wor ulungat kinikinin manauen Jises. Ewe aewin kinikinin manauan a poputa me loom loom, mwen an uputiu won fonufan. Me ren ewe kapas lon Mika 5:2, Jises “a nonnom seni lomlom, seni fansoun ese pop.” Jises a pwisin apasa: “Ngang seni won,“ are seni lang. (Jon 8:23) Lon lang, Jises emon ngun mi fokkun lapalap.

A wor poputaan mettoch meinisin mi foruta, iwe, ina popun a wor fansoun Kot a chok alaemon. Iwe nge, me loom, loom, Kot a wiliiti emon Chon Forata. Io mi foruta akkom mwen meinisin? Ewe saingoon puken Paipel a apasa pwe Jises “ewe chon popueta forien Kot kewe.” (Pwarata 3:14) Jises ewe “mwanichien forien Kot kewe meinisin.” Mei pwung ena poraus “pun a fori mettoch meinisin ren i, mettochun lang, pwal mettochun fonufan; ekkewe mettoch sia tongeni kuna, pwal ekkewe mettoch sise tongeni kuna.” (Kolose 1:15, 16) Jises ewe emon Kot a pwisin forata. Ina popun Jises noun Kot “Alaemon.” (Jon 3:16) Noun Kot mwanichi a pwal iteni “ewe Kapas.” (Jon 1:14) Met popun a ina itelapan? Pokiten mwen an uputiu won fonufan, Jises a wiisen aueni auen Kot lon lang.

”Ewe Kapas” a nonnom ren Jiowa Kot “lepopun,” lupwen “lang me fanufan” ra foruta. Lupwen Kot a apasa: “Sipwe fori aramas mi wewe ngenikich,” a foffos ngeni Jises. (Jon 1:1; Keneses 1:1, 26) Noun Jiowa we mwanichi, Jises, a angangfengen me Seman. Lon  ewe puken An Salomon Fos 8:22-31, a ussun ita pwe Jises a foffos: “Ua nom ren Kot usun eman sousile angang, ngang popun an pwapwa iteiten ran. Ua meseik me fan mesan fansoun meinisin, ua meseikeiti unusen an we fanufan.”

A ifa me pochokkulen ewe chiechi a fisita lefilen Jiowa Kot me noun we alaemon atun ar angangfengen. Ar chiechifengen a fokkun alapalapa lapalapen Jises. Ei Nau a akkalleasochisi seman, Jiowa Kot, me a lapalapeni lapalapen Seman. Ren enletin, Kolose 1:15 a apasa pwe Jises “a weichiki Kot.” Iei ewe popun sile ussun Jises a alisata ach silei ussun Kot me a fokkun lamot ngeni ach pochokkul lon pekin ngun. Mettoch meinisin Jises a fori won fonufan, letipen Jiowa. Iwe, lupwen sia kaeo ussun Jises, sia alapalo ach silei ussun Jiowa. (Jon 8:28; 14:8-10) Nge, ifa ussun Jises a feitiu won fonufan?

Manauen Jises Won Fonufan

Ewe oruuen kinikinin manauen Jises a poputa lupwen Kot a tiinatiu Jises ngeni fonufan ren eu manaman. Jiowa a isenalong manauen Jises lon an emon fin Jus mi tuppwol leenien monukol, itan Meri. Esor och apwangapwang are tipis ren Jises pokiten seman sap seni fonufan. Meri a pwopwo ren angangen ngun mi fel lupwen an Kot manaman a ‘pwoluelo’ i. (Luk 1:34, 35) Ina popun Meri a nounatiu emon nau mi unusoch. Puluwen Meri, Josef, a eani angangen taiku, iwe, an Jises famili ese wouoch. Jises ewe mwanichi lon eu famili mei wor fitemon semirit lon.​—Aisea 7:14; Mattu 1:22, 23; Mark 6:3.

Ese watte ach sile ussun Jises lupwen a kukkun nge mei wor eu poraus mi lamot. Jises a kan fiti inan me seman lupwen ra feilo Jerusalem iteiten ier. Lupwen Jises a 12 ierin, a feilo lon ewe imwen fel ikewe a ‘momot lein ekkewe sounpetak pwe epwe auselinga ar kapas, o eisinir ekkoch kapas eis.’ Pwal och, “ir meinisin mi auselinga i ra weitifengennir ren an tipatchem o ren an kapas.” Iwe, Jises ese chok eani kapas eis nge a pwal silei ifa ussun epwe polueni kapas eis ren poraus mi murinno. (Luk 2:41-50) Jises a mammaarita lon Nasaret, ikewe a kaeo ewe angangen taiku seni seman, Josef.​—Mattu 13:55.

Jises a nonnom lon Nasaret tori a 30 ierin. Ina ewe fansoun a papatais me a poputa an angangen afalafal. Ren ulungat esop ier Jises a feilfetal lon Israel ren an epwe esileifeili ewe kapas allim ussun Muun Kot. Jises a annetata pwe a feito seni lang ren ekkewe manaman a fori, ekkewe foffor mi amwarar rese tufich ngeni aramas.​—Mattu 4:17; Luk 19:37, 38.

Jises emon mwan mi tongei aramas. An tong a akkaewin pwalo ren an kewe foffor ngeni aramas me an ekiek ussur. Pokiten  Jises a kirokiroch, aramas rese pireir ar repwe fos ngeni. Pwal mwo nge semirit ra pwapwa lupwen Jises a nonnom rer. (Mark 10:13-16) Lon ranin Jises we, chommong mwan ra ekieki pwe fefin mi tekisoson me lamot mwaal, nge Jises a sufoliiti fefin. (Jon 4:9, 27) Jises a alisi aramas mi woungau me riaffou ar repwe kuna ‘asosoon ngunur.’ (Mattu 11:28-30) Aramas ra weweoch lupwen Jises a asukuleer me an afalafal a alisiir me a ffat. Ra pwaralo an Jises mochen pwe aramas repwe silei ussun ewe Kot mi enlet, Jiowa.​—Jon 17:6-8.

Jises a apochokkula chon semmwen ren an Kot ngun mi fel. (Mattu 15:30, 31) Iwe, lupwen emon mwan mi rupun pwotur a ereni Jises: “Samol, are ka mochen, ka tongeni alimochuei.” Iwe, Jises a eitielo poun ren an epwe attapa ewe mwan. A apasa: “Ua mochen, kopwe limoch.” Iwe, ewe mwan mi semmwen a pochokkulelo!”​—Mattu 8:2-4.

Ekieki mwo met a fisita lupwen esor mongo ren ewe pwin aramas mi auseling ngeni Jises ren ulungat ran. Jises a tongeer me a amongooniir, “fongerou mwan, lukun fefin me semirit.” (Mattu 15:32-38) Jises a pwal tumunu chiechian kewe lupwen a akinamwelo ewe molumol. (Mark 4:37-39) Jises a amanauasefallieta aramas. a (Luk 7:22; Jon 11:43, 44) Jises a pwal mwo nge fangolo pwisin manauan pwe aramas repwe manau tori feilfeilo chok lon mwach kkan. A mmen watte an Jises tong fan iten aramas!

Ia Jises A Nonnom Ie Iei?

Jises a malo won efoch ira lupwen a 33 1/2. b Iwe nge, ewe aulungatin kinikinin manauan a poputa ulungat ran mwirin lupwen Jiowa Kot a amanauasefallieta Noun we. Jises a pwalo mwen mesen fite puku aramas mi manau lupwen a manausefal. (1 Korint 15:3-8) Mwirin ena, Jises a “mottiu pelimwanin Kot” ia a witiwiti ewe fansoun seman epwe affata ewe fansoun an nemenem epwe poputa. (Ipru 10:12, 13) Jises a poputa an nemenem lon ewe fansoun mi filita me ren Kot. Iwe, ifa ussun ach ekiek ussun sorosorun Jises iei? Sipwe anchangei emon mwan mi riaffou wachemuk epwele malo? Are sipwe ekieki pwe Jises ewe emon sipwe pin ngeni? Iwe, ikenai, Jises ese ussun chok emon mwan won fonufan are ewe Kot mi Lapalap. Jises emon King mi manaman chapur lon lang. Ekiselo chok, an Jises nemenem epwe pwappwalo won ei fonufan mi osukosuk.

Ewe kapas monomon lon Pwarata 19:11-16 a apasa pwe Jises Kraist a mommot won emon ors mi pwechepwech me a mmonleta le apwungu aramas me mauneer fan pwung. A wor “emon katilas mi ken a itiu seni lon auan, pwe epwe nini ngeni ekkewe mu.” Ewer, Jises epwe nnielo ekkewe aramas mi ngau. Nge ifa ussun ekkewe aramas mi achocho le appiru manauen Jises won fonufan? (1 Piter 2:21) Jises me Seman repwe amanaueer seni ewe maun lon “ewe ran mi lap, ranin Kot mi Lapalap,” ewe maunen Armaketon, pwe repwe tongeni manau tori feilfeilo chok won fonufan fan nemenien an Kot we Muu lon lang.​—Pwarata 7:9, 14; 16:14, 16; 21:3, 4.

Jises epwe fori chommong manaman fan iten aramas meinisin atun an nemenem mi kinamwe. (Aisea 9:6, 7; 11:1-10) Jises epwe apochokkula chon semmwen me awesalo malo. Epwe amanaua fite bilion aramas mi malo pwe repwe tufichin manau tori feilfeilo chok won fonufan. (Jon 5:28, 29) Sise tufichin anchangei amwararen manauach fan nemenemen muun Kot. Ina popun a fokkun lamot pwe sipwe kaeo ewe Paipel me alapalo ach silei ussun Jises Kraist.

[Footnote]

 [Pwoor lon pekin taropwe 7]

ITA JISES EWE KOT MI LAPALAP SENI MEINISIN?

Chommong aramas ra apasa pwe Jises mi Kot. Ekkoch ra apasa pwe mei wor ulumon Kot lon emon, are eu Trinitas. Me ren ei afalafal, “ewe Sam mi Kot, ewe Nau mi Kot, me ewe Ngun Mi Fel mi Kot, iwe nge esor ulumon Kot nge emon chok.” Aramas ra pwal luku pwe ekkewe ulumon “ra lolloppok me esor poputar are sopwolar.” (The Catholic Encyclopedia) Mei pwung ena afalafal?

Jiowa Kot ewe Chon Forata. (Pwarata 4:11) Esor poputaan manauan, esap wor sopwoloon manauan. Jiowa ewe mi lapalap seni meinisin. (Kol Fel 90:2) Iwe nge, mei wor poputaan manauen Jises. (Kolose 1:15, 16) Jises a awewei pwe Kot Seman. A apasa: “Semei a lap seniei.” (Jon 14:28) Jises a pwal apasa pwe mei wor poraus Seman chok a silei, nge chonlang are i pwisin rese silei ussur.​—Mark 13:32.

Iwe, a iei ussun an Jises iotek ngeni Seman: “Sap letipei, pwe letipom epwe pwonueta.” (Luk 22:42) Esap pwe Jises epwe iotek ngeni emon mi lapalap seni i? Pwal och, Kot a amanauata Jises, Jises ese pwisin manauata. (Fofor 2:32) Lupwen Jises a nonnom lang akkom are won fonufan, a ffat pwe ewe Sam me ewe Nau rese lolloppok. Iwe nge, ifa ussun mwirin an Jises liwinsefallita lang? Aewin Korint 11:3 a apasa: “Mokuren Kraist Kot.” Ren enletin, ewe Nau a nonnom fan Kot fansoun meinisin. (1 Korint 15:28) Ewe Paipel a affata pwe Jises esap ewe Kot mi Lapalap Seni Meinisin, nge i Noun Kot.

Ewe aulumonun lon ewe Trinitas, ewe ngun mi fel, esap emon aramas. Ewe sou makkei kol mi pin a iotek ngeni Kot: “Lupwen ka tinau Ngunum, ka efisata ir; o ka forisefalli ewe pwul.” (Kol Fel 104:30) Ei ngun esap Kot nge an Kot manaman a tiinalo ren an epwe apwonueta letipan. Kot a forata lang me fonufan me mettoch mi manau meinisin ren ngun mi fel. (Keneses 1:2; Kol Fel 33:6) Kot a aea ewe ngun mi fel ren an epwe emmweni ekkewe aramas mi makkei ewe Paipel. (2 Piter 1:20, 21) Iwe, ewe Trinitas esap eu afalafal seni Paipel. c “Ewe Samol mi Lapalap ach Kot i chok ewe Samol mi Lapalap.”​—Tuteronomi 6:4.

[Footnote]

[Sasing lon pekin taropwe 5]

Lupwen Jises a papatais, a wiliiti Noun Kot we mi Kepit

[Sasing lon pekin taropwe 7]

Jises a unusen achocho ngeni an epwe apwonueta ewe angang Kot a awiisa ngeni

[Sasing lon pekin taropwe 7]

Iei, Jises emon King mi manaman