Ämi Oua Ussun Ewe Irä Itan Lagani Auna?

LON eü sopw lukun kiänin ewe sopw Port Moresby, Papua New Guinea, ruuemön chon afalafal ra liwin seni ewe angangen afalafal. Lupwen ra fetäl, ra küna efoch irä mei fokkun lingöch. Ewe mwan mi watte ierin leir a kötä, “Iionnee, nge efoch lagani auna!” Iwe, a sapengeni ewe emön, a erä, “Weween ena it, ‘fän eü iteiten ier.’ Esap ussun chommong irä lon ena leenien pwichikkar, pün iteiten ier ena irä a mworetiw chön me a eiemämälo. Nge lupwen a püng rän, a manausefal, pöönirawu, me lingesefal.”

Sia tongeni kaeo eü lesen seni ewe irä lagani auna, are royal poinciana, ina eü itan me ren aramas. Me ren ekkoch sou kaeo irä, a fit lein ekkewe limu irä mi wor pöön irään mi lingemwarar lap seni meinisin won fönüfan. Inaamwo ika a mworetiw pöön irään me chön lon fansoun pwas, nge a pwisin wor an leenien isoisen konik. Waran kewe ra fokkun pöchökkül me ra etikitikfetal lein faü fanipwul. Pokiten ena, esap tongeni tur lon fansoun pöchökkülen äsepwäl. Weween, a chüen mämäröch fän lapalap mi weires.

Ese mwääl, epwe pwal sossot pöchökkülen ach lükü. Met epwe alisikich pwe sipwe likiitü? Ussun ewe irä lagani auna, sia tongeni angei me isoni ewe konikin manau seni an Kot we Kapas. Sia pwal tongeni fitipacheiti ‘ach achau’ Jiowa, me an we mwicheich. (2 Sam. 22:3) Ewer, ewe lagani auna a ächema ngenikich pwe pwal mwo nge lon fansoun osukosuk, sipwe tongeni likiitü ika sia akkangei ekkewe minen alillis Jiowa a awora. Ren ach föri ena, sipwe tongeni alemwiri ekkewe pwon a pwonei, pachelong ewe pwonen manau esemuch.​—Ipru 6:12; Pwarata 21:4.