Äppiru Mosonottamen Jiowa

“Ewe Samol esap mang le apwönüetä an pwon, . . . pwe a mosonotam.”​—2 PITER 3:9.

1. Ifa ewe liffang mi mürinnö seni meinisin Jiowa a ekiekin ffang ngeni aramas?

 JIOWA a ekiekin ffang ngenikich minne esor pwal emön epwe tongeni ffang ngenikich. Ina eü mettoch mi fokkun mürinnö me auchea, nge sisap tongeni moni are angei pokiten itä liwinin och angang. Ewe liffangen manau esemuch, ina ewe mettoch a ekiekin ffang ngenikich, lape ngenikich, sipwe manau esemuch lon eü paratis won fönüfan. (Jon 3:16) A ifa me watten apwapwaan ena mettoch! Esap chüen wor ekkewe mettoch mi efisata letipeta, awewe chök, oput, föfförün mwänesol, woungau, atai allük, semwen, me pwal mwo nge mälo. Lon ena fansoun, aramas repwe manau fän kinamwe me tipeeü mi unus fän nemenemen än Kot we Mwu. Sia fokkun tipeni ena Paratis!​—Aisea 9:6, 7; Pwarata 21:4, 5.

2. Pwata Jiowa esaamwo ataielo än Setan otot won fönüfan?

² Jiowa a pwal ükküti ewe fansoun an epwe efisi ewe Paratis won fönüfan.Popun, pün a tongei minne mi mürinnö me pwüng. (Kol Fel 33:5) Ese fokkun pwapwa lupwen a nennetiu fönüfan me küna aramas mi tenechepwäk are oputa an kewe popun alongolongun allük, ei fönüfan mi oputa an nemenem me eriäfföü nöün kewe aramas. Nge, mei wor ekkoch popun mi mürinnö esaamwo ataielo än Setan otot mi ingaü. Ekkena popun ra weneiti ika a pwüng are mwääl lapalapen an nemenem. Ren an epwe apwüngalo ekkeei popun alongolongun kapwüng, Jiowa a pwäratä eü lapalap mi fokkun mürinnö, eü lapalap chommong aramas ikenai ra osupwang ren—mosonottam.

3. (a) Met weween ekkewe kapas lon fosun Krik me Ipru mi afföü ngeni “mosonottam” lon ewe Paipel? (b)  Ikkefa ekkewe kapas eis sipwe afänni iei?

³ Mei wor eü kapasen Krik ewe New World Translation a afföü ngeni “mosonottam” fän ülüngät. Iwe, fän chommong a afföü ngeni “songommang” me fän eü “anganga mosonottam.” Ekkewe kapasen Krik me kapasen Ipru mi afföü ngeni “mosonottam” a pwal wewe ngeni tipemecheres me songommang. Ifa ussun mosonottamen Jiowa a efeiöchükich? Ikkefa ekkewe lesen sipwe käeö seni mosonottamen me likiitüün Jiowa me nöün kewe chon angang mi tuppwöl? Pwata sia silei pwe mei aüküük än Jiowa pwäratä mosonottam? Iwe, sipwe pii.

Ekieki Ussun an Jiowa Mosonottam

4. Met ewe aposel Piter a mak ussun än Jiowa mosonottam?

⁴ Ewe aposel Piter a makkei ei pworaus ussun än Jiowa mosonottam, a erä: “Nge ami mi achengicheng, esap lama senikemi ei chok eu mettoch: eu ran epwe usun chok engerou ier ren ewe Samol, o engerou ier epwe pwal usun chok eu ran. Ewe Samol esap amanga an we pwon, usun chok ekkoch aramas ra ekieki usun mang, nge a chok mosonottam ngenikemi, pun ese mochen pwe emon epwe poutmwalilo, pwe aramas meinisin repwe tori aier.” (2 Piter 3:8, 9) Kese mochen kopwe nengeni ruu pworaus mi mak asan ra tongeni älisikich le weweiti än Jiowa mosonottam.

5. Ifa ussun ekiekin Jiowa ussun fansoun a kkü an kewe föfför?

⁵ Iei ewe äewin pworaus, än Jiowa ekiek ussun fansoun ese löllö ngeni ach. Ren ewe Emön  mi manaufochofoch, engeröü ier epwe ussun chök eü rän. Esap meefi atapwal pokiten fetälin are nafangaüen fansoun, nge ese mmang le ataweei och osukosuk. Pokiten ese aüküük an tipatchem, Jiowa a silei inet epwe mürinnö seni meinisin an epwe föri och mettoch fän iten feiöchun meinisin, me a mosonottam le witiwiti ena fansoun. Iwe nge, sisap ekieki pwe Jiowa a tenechepwäk ussun riäfföün nöün kewe chon angang lon ekkena fansoun witiwit. I emön Kot mi “ümöümöch,” me ewe liosun tong. (Luk 1:78; 1 Jon 4:8) A tongeni unusen amoielo ekkewe feiengaü ei fansoun mumutään riäfföü mi mwochomwoch a efisatä. (Kol Fel 37:10)

6. Met sisap lükü ussun Kot, me pwata?

⁶ Pwüngün pwe esap mecheres än emön witiwiti eü mettoch a tipeni. (An Salomon Fos 13:12) Ina minne, lupwen aramas rese müttir apwönüetä minne ra pwonetiu, eli aramas repwe meefi pwe resap ekiekin föri. Sipwe umwes le eäni ena ekiek ussun Kot! Ika sipwe eäni ewe ekiekmwääl pwe än Kot mosonottam a wewe ngeni mmangan, mwirin och fansoun epwe mecheresin efisatä ach tipemwaramwar me äpilükülüküngaü, me sipwe pwal tongeni eiessum lon pekin lükü. Nge ewe a ngaü seni, sipwe tongeni tupulo ren ir kewe Piter a öüröüra ussun—ekkewe chon esiit, ekkewe rese lükü. Iwe, ra kan apasa: “Ia pwonen an epwe feito? Pun seni chok fansoun semach kewe ra mourelo, mettoch meinisin ra usun we chok seni popun lom.”​—2 Piter 3:4.

7. Ifa ussun än Jiowa mosonottam a riri ngeni an mochen pwe aramas repwe aier?

⁷ Iei ewe oruen lesen sipwe tongeni käeö seni Piter, Jiowa a mosonottam pün a mochen pwe meinisin repwe aier. Ir kewe rese fokkun mochen kul seni ar kewe föfföringaü repwe küna ninni seni Jiowa. Iwe nge, Kot ese pwapwaiti mäloon emön mi ingaü. Nge, a pwapwa lupwen a küna pwe aramas ra aier, kul seni ar föfförmwääl, me manauelo. (Isikiel 33:11) Ina minne, a mosonottam me efisi pwe ewe kapas allim epwe esileefeil won unusen fönüfan pwe aramas repwe tufichin manauelo.

8. Ifa ussun mosonottamen Kot a pwäpwälo lon an föfför ngeni ewe mwuun Israel?

⁸ Mosonottamen Kot a pwal pwäpwälo lon an kewe föfför ngeni ewe mwuun Israel loom. Ren fitepükü ier, a mosonottam ngeni ar alleasolap. Fän chommong a peseer me ren nöün kewe soufos: “Oupwe likitala ämi föför mi ngau o aleasochisi ai kewe allük me pwüüng, ekewe allük meinisin üa alluk ngeni ämi kewe lewo, üa pwal tinala remi nei kewe chon angang  ekewe soufos, pwe repwe asile ngenikemi.” Iwe, met mwiriloon? Ekkewe aramas “resap aleasochis.”​—2 King 17:13, 14.

9. Ifa ussun mosonottamen Jises a ussun chök än Seman we?

⁹ Säingonoon, Jiowa a tinatiu Nöün we, ewe a peppesei ekkewe chon Jus pwe repwe chäsefäl ngeni Kot. Mosonottamen Jises a ussun chök än Seman we. Pokiten Jises a silei pwe arapakkan epwele ninnilo, Jises a apasa: “Jerusalem, Jerusalem! Ka niela ekewe soufos o mone fau ngeni ekewe chon künö Kot a tinato reöm! A fän fite ai mochen achufengeni noumw kewe aramas usun eman inelapen chuko a amwichafengeni nöun kana fän pöükässin, nge ämi ousap mochen.” (Mattu 23:37) Ekkeei kapas esap alon emön soukapwüng mi kon ekkeipö me fokkun ekiekin liwini ngeni emön an föfförmwääl nge alon emön chiechi mi tong me mosonottam ngeni aramas. Jises, ussun chök Seman we lon läng, a mochen pwe aramas repwe aier pwe resap küna kapwüng. Pokiten ekkoch ra alleasochisi an Jises kewe kapasen öüröür, ra ngase seni ewe kapwüngüchou a tori Jerusalem lon 70 C.E.​—Luk 21:20-22.

10. Ifa ussun än Kot we mosonottam a efeiöchükich?

¹⁰ Ese fokkun amwarar mosonottamen Kot? Inaamwo ika a fokkun watte an aramas älleasolap, nge Jiowa a mut ngenikich me pwal fitu milion aramas, ewe fansoun pwe sipwe silei i me ngüüri ewe apilükülükün amanau. Piter a mak ngeni chienan kewe Chon Kraist: “Oupwe ekieki usun ei, pwe ren mosonotamen ach Samol oua küna manau.” (2 Piter 3:15) Sise kilisou pwe mosonottamen Jiowa a suuk ngenikich ewe alen amanau? Sise iotek pwe Jiowa epwe mommosonottam ngenikich lon ach angang ngeni rän me rän?—Mattu 6:12.

11. Ach weweiiti an Jiowa we mosonottam epwe achchüngükich pwe sipwe föri met?

¹¹ Lupwen sia weweiti ewe popun Jiowa a mosonottam, a älisikich ach sipwe witiwit fän mosonottam fän iten ewe amanau epwe atoto rech, iwe, sisap ekieki pwe a mmang le apwonuetä an kewe pwon. (Kölün Kechü 3:26) Atun sipwe ikkiotek pwe Mwüün Kot epwe feito, sia lükü pwe Kot a silei ewe fansoun mi mürinnö seni meinisin pwe epwe pölüeni ena iotek. Pwal eü, epwe amwökütükich pwe sipwe äppirü Jiowa ren ach sipwe mosonottam lon ach kewe föfför ngeni pwich kewe chon ewe mwichefel me ekkewe aramas sipwe afalafala. Iwe, sise pwal mochen emön epwe mälo nge sia mochen ar repwe aier me eäni ach apilükülükün manau esemuch.​—1 Timoti 2:3, 4.

Ekieki Ussun Mosonottamen ekkewe Soufos

12, 13. Ifa ussun ewe soufos Aisea a sopwöch le pwäpwäratä mosonottam?

¹² Ren ach sipwe käeö ussun mosonottamen Jiowa, epwe älisikich pwe sipwe aücheäni me ämäratä ena lapalap. Esap mecheres ngeni aramas rese unusöch ar repwe mosonottam, nge epwe tufich ngenir. Sipwe tongeni käeö seni nöün Kot kewe chon angang loom loom. Ewe chon käeö Jemes a makkei: “Ämi pwii kana, oupwe chechemeni ekewe soufos mi kapas fän iten ach Samol. Oupwe eäniir lenien apirü lon  ar mosonotam me likitu fän ekewe riaföü.” (Jemes 5:10) A aururu letipach me apöchökkülakich lupwen sipwe silei pwe pwal ekkoch aramas ra sopwöch le ataweei ekkewe sokkun osukosuk ra torikich.

¹³ Awewe chök, a lamot ngeni ewe soufos Aisea an epwe mosonottam lon wisan we. Jiowa a ereni i ena mettoch ren an apasa ngeni: “Kopwe feila o aronga ngeni ekei aramas, ‘Oupwe aü selingemi o rongorong, nge ousap wewe ren. Oupwe nenengeni, nge ousap küna och.’ Kopwe aföüala letipen ekei aramas, kopwe apüngala selinger o achunala meser, pwe resap tongeni künakün ren meser ika rongorong ren selinger ika wewe ren letiper, pwe resap kul o küna manau.” (Aisea 6:9, 10) Inaamwo ika ekkewe aramas rese aüseling, nge Aisea a mosonottam lon an afalafala ekkewe kapasen öüröür seni Jiowa, iwe, ese kisikis seni 46 ier! Epwe pwal ina ussuch pwe ach sipwe mosonottam epwe älisikich le likiitu lon ach angangen afalafala ewe kapas allim, inaamwo ika chommong aramas rese mochen aüseling.

14, 15. Met a älisi Jeremaia pwe epwe ataweei ekkewe fansoun weires me äpilükülüküngaü?

¹⁴ Pwüngün pwe atun ekkewe soufos ra apwonuetä ewe angangen afalafal, rese chök küna osukosuk pokiten ekkewe aramas rese mochen aüseling, nge ra pwal küna riäfföü. Aramas ra annükü pechen Jeremaia kewe lefilen irä, “kalapusei lon imwen fötek,” me aturalong lon eü chönüttu. (Jeremaia 20:2; 37:15; 38:6) A küna ei riäfföü le pöün ekkewe aramas a mochen älisi. Nge, Jeremaia ese song, iwe, ese pwal liwini ngeniir ar föfföringaü. Ren lap seni fäik ier a likiitü fän mosonottam.

¹⁵ Jeremaia ese fangetä fän ewe riäfföü me kapasen esiit, iwe, sise pwal fangetä pokiten föfförün aramas ikenäi. Pwüngün pwe eli fän ekkoch sipwe mefi äpilükülüküngaü. Jeremaia a mefi äpilükülüküngaü. A makkei: “Aramas ra ämängauaei o turunufaseei iteiten rän, pun üa asilefeili om kapas. Nge üa apasa, ‘Usap chüen föüni iten ewe Samol mi Lapalap ika kapas fän itan.’ ” Iwe, met a fis? Ita Jeremaia a ukutiu le afalafal? A sopweelo le era, “[Alon Kot] a usun chök ekkei mi kü me lon lelukei, a pwourur me lechüi. Üa resin apwosalong, nge üsap chüen tongeni.” (Jeremaia 20:8, 9) Nengeni pwe lupwen a ekilapei ussun an aramas esiita i, a pöüt seni i an pwapwa. Lupwen a ekilapei amwaraaren me lamoten ewe pworaus a ukkuwei, a pwapwasefäl. Pwal och, Jiowa a nom ren Jeremaia “usun chök eman sounfiu mi pöchökül,” iwe, a apöchökküla i pwe epwe afalafala alon Kot ren tinikken me pwora.​—Jeremaia 20:11.

16. Ifa ussun sipwe tongeni akkamwöchü ach pwapwa lon ach angangen afalafala ewe kapas allim?

¹⁶ Ewe soufos Jeremaia a küna pwapwa lon an angang? Fokkun ewer! A apasa ngeni Jiowa: “Üa iseis lon lelukei om kewe kapas, lupwen ra toriei. Om kapas a fis pwe ai pwapwa, lelukei a meseik ren, pun itom a föü woi, ai Kot Samol mi Unusen Manaman.” (Jeremaia 15:16) Jeremaia a pwapwaesini wisan we, wisen tupuni ewe Kot mi enlet me afalafala alon. Kich mi pwal tongeni pwapwa. Pwal och, sia pwapwa ussun chök ekkewe chonläng lon läng, pwe chommong won unusen fönüfan ra ngüüri pworausen ewe Mwü, aier, me aleni ewe alen manau esemuch.—Luk 15:10.

 “Än Jop Likiitü”

17, 18. Ifa än Jop alen likiitü, me ifa mwiriloon?

¹⁷ Mwirin an kapas ussun ekkewe soufosun loom, ewe chon käeö Jemes a makkei: “Oua fen rong usun an Jop likiitu, o oua fen kuna letipen ewe Samol, pwe ewe Samol mi fakkun umoumoch o kirokiroch.” (Jemes 5:11) Weween ewe kapasen Krik mi afföü ngeni “likiitü” a kan ngeni weween ewe kapas Jemes a nöünöü lon ewe wokisin mwan fän iten ewe kapas “mosonoson.” Ren an kapas ussun sokkofesenin ekkena ruu kapas, emön sou käeö a makkei: “Ewe äewin kapasen Krik a wewe ngeni mosonottam lupwen aramas repwe eriäfföükich, ewe oruuan a wewe ngeni mokurechou me pwora fän ekkewe mettoch mi osukosukakich.”

¹⁸ Jop a küna osukosuk watte. A küna wöüngaü, mäloon nöün kewe, me eü semwen mi metekitek. A pwal osukosuk ren eü tipimwääl pwe Jiowa a liwini ngeni tipisin. Fän an riäfföü Jop ese chök fanafanelo; a apasawu an letipechou ussun minne a fis ngeni me ussun itä a apasa pwe a pwüng lap seni Kot. (Hiop 35:2) Iwe nge, ese pöüt seni an lükü fän eü, iwe, ese pwal rikilo seni an tuppwöl. Ese otteki Kot ussun Setan a erä epwe föri. (Hiop 1:11, 21) Ifa mwiriloon? Jiowa a “afeiöchü lusun ränin manauen Hiop lap seni me mwan.” (Hiop 42:12) Jiowa a achikaratä Jop, a alapalo wöün fän ruu, me efeiöchü i ren manau mi apwapwa ren attongan kewe. Än Jop likiitü fän tuppwöl a pwal atufichi i le alapalo an weweiti lapalapen Jiowa.

19. Met sia käeö seni än Jop likiitü fän mosonottam?

¹⁹ Met sia käeö seni mosonottamen Jop? Ussun chök Jop, epwe tongeni ürikich semwen are pwal och sokkun fansoun weires. Eli sisap unusen weweiti ewe popun Jiowa a mutatä ach sipwe küna eü sokkun sossot. Nge, iei ewe mettoch sipwe tongeni lükü: Ika sipwe akkamwöchü ach tuppwöl, sipwe küna feiöch. Jiowa epwe fokkun liwini ngeni ir kewe mi kükkütta i. (Ipru 11:6) Jises a apasa: “Nge iö epwe likitü tori lesopolan epwe küna manau.”​—Mattu 10:22; 24:13.

“Ränin Jiowa Epwe Feito”

20. Pwata sipwe tongeni lükü pwe ränin Jiowa epwe feito?

²⁰ Inaamwo ika Jiowa a mosonottam, nge a pwal pwüng me esap mutatä föfföringaü an epwe nomofochelo. Mi aüküük an mosonottam. Piter a makkei: “Kot esap achika ewe fanüfan me lom.” Inaamwo ika Noa me an famili ra manauelo, nge ekkewe aramas mi ingaü ra mälo lon ewe noter. Jiowa a pwal apwüngü Sotom me Komora ren an unusen ataarelo me föralo ir pwe repwe falang. Ekkeei apwüng ra fis “pwe repwe minen afalafal ngeni chon fofor ingau mwirin.” Iwe, sipwe tongeni unusen lükü: “Ranin ach Samol epwe feito.”​—2 Piter 2:5, 6; 3:10.

21. Ifa ussun sipwe tongeni pwäratä ach mosonottam me ach likiitü, me ifa ewe pworaus sipwe käeö lon ewe lesen mwirin ei?

²¹ Ina minne sipwe äppirü än Jiowa we mosonottam ren ach sipwe älisi aramas le aier pwe repwe küna amanau. Iwe, sipwe pwal äppirü ekkewe soufos ren ach sipwe mosonottam le afalafala ewe kapas allim inaamwo ika repwe tenechepwäk ir kewe sipwe afalafala. Pwal och, ussun chök Jop, ika sipwe likiitü fän sossot, sipwe tongeni lükü pwe Jiowa epwe efeiöchükich ika sipwe akkamwöchü ach tuppwöl. Mei wor popun ach sipwe pwapwaesini ach angangen afalafal lupwen sia küna ifa ussun Jiowa a efeiöchü än nöün kewe aramas achocho le afalafala ewe kapas allim won unusen fönüfan. Iei ewe mettoch sipwe käeö lon ewe lesen mwirin ei.

En mi Chechemeni?

• Pwata Jiowa a pwäratä mosonottam?

• Met sia käeö seni mosonottamen ekkewe soufos?

• Ifa ussun Jop a pwäratä an likiitü, me ifa mwiriloon?

• Pwata sia silei pwe mei aüküük än Jiowa mosonottam?

[Ekkewe kapas eis fan iten ewe lesen]

[Sasing lon pekin taropwe 5]

An Jises mosonottam a ussun chök än Seman we

[Sasing lon pekin taropwe 6]

Ifa ussun Jiowa a liwini ngeni Jeremaia an mosonottam?

[Sasing lon pekin taropwe 7]

Ifa ussun Jiowa a efeiöchü an Jop likiitü?