A Lamot Ngenikich Emön Messaia?

ELI kopwe eäni ena kapas eis, “A lamot ngenikich emön Messaia?” Ewer, epwe pwüng om kopwe ösükü ika mi wesewesen lamot ngonuk emön Messaia.

Ewe Paipel a affata pwe a lamot ngenikich emön Messaia. Emön mi silelapei allükün chon Jus lon ewe äewin senturi a makkei ei pworaus ussun ewe Messaia: “Ese lifilifil ika fite än Kot kewe pwon, nge ra wiliti Ewer me ren i.” A ina ussun an menlapei lamoten ewe Messaia lon än ewe Chon Föratä kokkot, kokkotun an epwe efeiöchü ekkewe mwu meinisin won fönüfan. (2 Korint 1:20) Pokiten a fakkun lamot angangen ewe Messaia, ekkewe oesini lon Paipel ra äkkäewin weneiti warotoon me manauan. Nge a lamot an epwe waroto? Pwata a lamot om kopwe ekieki ussun ena mettoch?

Ewe kapas “Messaia” a enletin wewe ngeni “Ewe Emön mi Kepit” me a wewe chök me ewe kapas “Kraist,” nge iei eü kapas chommong ra fen rong. A lamot pwe ena emön epwe war pokiten föfföringaüen ewe äkkäewin pean aramas, Atam me If. Lupwen ra fförütä, ir mi unusöch, iwe, a nom rer ewe äpilükülükün ar repwe manau tori feilfeilo chök lon Paratis, nge a pöüt seniir ena äpilükülük. Emön chonläng mi ü ngeni Kot, nge a iteni Setan ewe Tefil mwirin, a ussun itä apasa pwe a kon pöchökkül wor allükün ewe Chon Föriir me epwe lapelo feiöchür ika repwe pwisin filatä minne a öch me ngaü.​—Keneses 3:1-5.

If a tupulo, iwe, a lükü ena kapas mi chofona. Neman Atam, pokiten an aücheani pwülüwan we lap seni an epwe tuppwöl ngeni Kot, a fiti ewe Tefil le ü ngeni Kot. (Keneses 3:6; 1 Timoti 2:14) Ren ar kewe föfför, sap minne a chök pöütülo ar äpilükülükün manau tori feilfeilo chök lon paratis. Nge ra pwal likiti ngeni mwirimwirir kewe resaamwo uputiu ewe mettoch tipis me liwinin, weween, mälo.​—Rom 5:12.

Jiowa, ewe Chon Förikich, a müttir ekiekietä minne epwe amoielo pwününgaüen ekkewe mettoch mi fisitä pokiten föfförün ekkewe chon ü ngeni Kot. Lupwen Jiowa Kot a apwüngü ewe Tefil, a uwawu ei äkkäewin oesini lon Paipel: “Üpwe afiukemi me ewe fefin, pwal mwirimwirum me mwirimwirin. Men epwe puri mökürom, nge en kopwe küw apilipilin pechen.” (Keneses 3:15) Emön sou käeö Paipel a makkei pwe Kot epwe nöünöü ewe Messaia fän iten an epwe “amoielo unusen liwiningaüen tipisin ekkewe popun aramas,” iwe, epwe atoto feiöch ngeni aramas ren ena kokkot.​—Ipru 2:14, 15.

Iwe nge, eli kopwe meefi pwe aramas rese fakkun kükküna feiöch iei. Nge, ra chök meefi äpilükülüküngaü me riäfföü. Ina minne, The World Book Encyclopedia a apasa pwe “chommong chon Jus ra chüen ekieki pwe emön Messaia epwe war,” iwe, epwe “apwüngü minne mi mwääl me akkufu chon koputen nöün kewe aramas.” Iwe nge, ewe Paipel a apasa pwe ewe Messaia a fen war, me a apasa pwe Jises ewe Messaia. Sia tongeni lükü minne ewe Paipel a apasa.