Eü Minen Emmwen Fän Iten Pwönütään Än Kot Kokkot

“Ekei mettoch meinisin ra fisitä usun met Kot a fen ekiekietä o filätä.”​—EFISOS 1:11.

1. Pwata ekkewe mwichefelin Chon Pwäratä Jiowa meinisin repwe mwich lon April 12, 2006?

 LEKUNIOLUN Aülüngät, April 12, 2006, 16 milion som aramas repwe mwichefengen pwe repwe fiti ewe Fääfen Ach Samol. Lon iteiten ar kewe leenien mwich meinisin, epwe wor eü chepel, iwe, won ewe chepel epwe wor pilawa ese lefen mi liosuetä inisin Kraist, me wain mi par, ewe mi liosuetä chchaan we mi niniilo. Arap ngeni le sopwoloon eü afalafal mi affata weween Achechchemenien mäloon Jises, ekkena minen lios repwe passfetal lein meinisin chon fiti, akkom ewe pilawa, iwe mwirin, ewe wain. Lon ekkoch chök mwichefelin Chon Pwäratä Jiowa, emön are ekkoch chök repwe äeä ekkena pret me wain. Iwe nge, lon chommong leeni, ese wor epwe mongo. Met popun ekkoch chök chon Kraist, weween, chokkewe mi apilükülükü pwe repwe manau lon läng ra mongo, nge ekkewe chommong lusun, weween, ir kewe mi apilükülükü pwe repwe manau tori feilfeilo chök won fönüfan, rese kan mongo?

2, 3. (a) Ifa ussun Jiowa a poputä le föratä mettoch meinisin me ren an kokkot? (b) Met popun Jiowa a föratä fönüfan me aramas?

² Jiowa emön sou akkot. Ren an epwe apwönüetä an kokkot, a “atetteli mettoch meinisin me ren letipan.” (Efisus 1:11, NW) A akkom föratä Nöün we äläemön. (Jon 1:1, 14; Pwarata 3:14) Iwe, ren Nöün we, Jiowa a föratä nöün kewe chonläng mi ussun chök eü famili, iwe, lo, lo, lo, ekkewe lusun mettoch meinisin, pachelong ei fönüfan me aramas.​—Hiop 38:4, 7; Kölfel 103:19-21; Jon 1:2, 3; Kolose 1:15, 16.

³ Jiowa ese föratä fönüfan pwe epwe itä eü leenien sossot fän iten an epwe awatteei familien nöün kewe chonläng lon läng, pwe ina aitien chommong lamalamen Kristentom. A föratä fän iten eü kokkot mi ffatöch, weween, pwe epwe “lenien aramas.” (Aisea 45:18) Kot a föratä fönüfan fän iten aramas me aramas fän iten fönüfan. (Kölfel 115:16) Unusen fönüfan epwe itä wiliiti eü paratis, epwe masou ren aramas mi pwüng, iwe, repwe wisen äkkämääri me tüttümünü. Esap fän eü an a suuk ngeni ewe äkkäewin pean aramas ewe apilükülükün manau lon läng.​—Keneses 1:26-28; 2:7, 8, 15.

Emön A Appölüa Än Jiowa Kokkot

4. Ifa ussun emön a appölüa lapalapen än Jiowa nemenem le poputän uruwon aramas?

⁴ Emön nöün Kot chonläng a ü ngeni, iwe, a ekiekin pinei än Jiowa kokkot ren an äeämwäälli an tuufichin pwisin filatä föfförün, nge ei tufichin filatä, iei eü liffang seni Kot. A atai ewe kinamwe mi toto ngeni meinisin mi alleasochisi än Jiowa nemenem fän tong. Setan a luki letipen ewe äkkäewin pean aramas, iwe, a amwokutuur pwe repwe imwulo seni fän nemenien Kot. (Keneses 3:1-6) Sap minne a amamesini än Jiowa manaman, nge a appölüa lapalapen an nemenem, me an pwüüng le nemenem. Ina popun, ewe popun alongolongun kapwüng mi weneiti  pwüngün än Jiowa nemenem a piitä won fönüfan le poputän uruwon aramas.

5. Menni popun alongolongun kapwüng a piitä, iwe, a weneiti iö?

⁵ Setan a eppietä ewe oruen popun alongolongun kapwüng lon fansoun Jop, iwe, a ririfengen me ewe äkkäewin popun alongolongun kapwüng mi weneiti pworausen iö a wor an pwüüng le nemeni mettoch meinisin. Setan a efisatä tipemwaramwar ussun ewe popun förien Jiowa kewe ra alleasochisi i me angang ngeni. Setan a ussun itä apasa pwe ra angang ngeni pokiten ar mocheniangaü, iwe, ika repwe küna sossot, repwe ü ngeni Kot. (Hiop 1:7-11; 2:4, 5) Inaamwo ika ena popun alongolongun kapwüng a piitä fän iten emön aramas mi angang ngeni Jiowa, nge a pwal weneiti nöün Kot kewe chonläng, me pwal mwo nge Nöün Jiowa we Äläemön.

6. Ifa ussun Jiowa a tuppwöl ngeni an kokkot me itan we?

⁶ Pokiten Jiowa a tuppwöl ngeni an kokkot me weween itan we, a wiliti emön Soufos me emön Chon Amanau. a Iei alon ngeni Setan: “Üpwe afiukemi me ewe fefin, pwal mwirimwirum me mwirimwirin. Men epwe puri mökürom, nge en kopwe küw apilipilin pechen.” (Keneses 3:15) Ren an nöünöü Mwirimwirin ewe “fefin,” nge ei fefin a wewe ngeni chon an Kot we mwicheich mi nonnom läng, Jiowa epwe awora pölüen än Setan tipimwääl ngeni me awora ngeni mwirimwirin Atam kewe ewe apilükülükün ar repwe ngaselo seni fötek me küna manau esemwüch.​—Rom 5:21; Kalesia 4:26, 31.

“Ewe Kapas Monomon mi Fel Ussun Letipan”

7. Ifa ewe kokkot Jiowa a pwäri ren makkeien ewe aposel Paul?

⁷ Lon nöün we taropwe ngeni chon Kraist lon Efisus, ewe aposel Paul a mmen angöch le awewei ifa ussun Jiowa a kan ekkemmweni mettoch meinisin pwe epwe apwönüetä an kokkot. Iei makkeien Paul: “A pwäri ngenikich ewe kapas monomon mi fel ussun letipan. Me ren minne a pwapwa ngeni, a föratä eü minen emmwen le muchuloon ekkewe fansoun mi kaükülo, pwe epwe ochufengennisefälli mettoch meinisin lon ewe Kraist, ekkewe mettoch lon läng me ekkewe mettoch won fönüfan.” (Efisus 1:9, 10, NW) Iei än Jiowa kokkot mi lingemwarar, pwe epwe atipeeüfengenni mettoch meinisin lon unuselapen läng me fönüfan, iwe, förian kewe chök mi anomuur fän nemenian pokiten ar tongei i repwe manau. (Pwarata 4:11) Epwe ina ussun itan we epwe pinilo, epwe letelo pwe Setan emön chon kapas chofona, me letipen Kot epwe pwönütä “won fanüfan usun chok lon lang.”​—Mattu 6:10.

8. Ifa weween ewe kapas mi afföü ngeni “minen emmwen”?

⁸ Minne Jiowa a “pwapwa ngeni,” are, an kokkot, epwe pwönütä ren “eü minen emmwen.” Paul a nöünöü eü kapas mi wesewesen wewe ngeni “emmwen lon famili.” Sap minne a wewe ngeni eü mwu, awewe chök ren ewe Mwuun Messaia, nge a wewe ngeni eü kokkotun emmwen. b  Ewe lapalap mi fokkun amwarar Jiowa a ekkemmweni mettoch meinisin ren pwe epwe apwönüetä an kokkot a weneiti eü “kapas monomon mi fel,” iwe, weween ena kapas a pwäpwälo ekis me ekis lon fetälin fitepuku ier.​—Efisus 1:10; 3:9.

9. Ifa ussun Jiowa a pwäri weween ewe kapas monomon mi fel ussun letipan ekis me ekis?

⁹ Ren eü tettelin pwon mi fel, Jiowa a pwäri ekis me ekis ifa ussun an we kokkot mi weneiti Mwirimwirin ewe fefin we mi pwonetiu lon Ichen epwe pwönütä. An we pwon ngeni Eperiam a pwääratä pwe Mwirimwirin ewe fefin we mi pwonetiu epwe uputiu won fönüfan lon tettelin Eperiam, iwe, “chon ekewe mwü won unusen fanüfan” repwe küna feiöch ren ena emön. A pwal pwälo ren ena pwon pwe pwal fitemön repwe kapachelong lon äkkäewin kinikinin Mwirimwirin ewe fefin we. (Keneses 22:17, 18) Ewe pwon chon Israel ra kapachelong lon, pwonen ewe Allük, a affata pwe iei än Jiowa kokkot, pwe epwe wor “eü mwichen souasor me eü mwu mi pin.” (Ekistos 19:5, 6) Ewe pwon ngeni Tafit a affata pwe Mwirimwirin ewe fefin we epwe wisen King lon eü Mwu tori feilfeilo chök. (2 Samuel 7:12, 13; Kölfel 89:3, 4) Lupwen ewe Allük fän iten eü pwon a wisen emmwen ngeni chon Jus ewe Messaia, Jiowa a pwäri pwal ekkoch mettoch fän iten pwönütään an kokkot. (Kalesia 3:19, 24) Ekkena aramas mi kapachelong lon äkkäewin kinikinin mwirimwirin ewe fefin, repwe wewe ngeni ewe “mwichen souasor me eü mwu mi pin,” iwe, repwe kapachelong lon “eü pwon mi fö,” repwe wewe ngeni ewe minefön “Israel,” ewe Israel lon pekin ngün.​—Jeremaia 31:31-34; Ipru 8:7-9. c

10, 11. (a) Ifa ussun Jiowa a pwäri ika iö Mwirimwirin ewe fefin we a wewe ngeni? (b) Met popun Nöün Kot we äläemön a feitiu fönüfan?

 ¹⁰ Ren an epwe pwönütä ewe kokkot mi fel, a war ewe fansoun ren pwäloon Mwirimwirin ewe fefin we won fönüfan. Jiowa a tinalo ewe chonläng Kapriel ngeni Meri pwe epwe ereni pwe epwe nöünatiu emön ät, iwe, epwe iteni Jises. Iei alon ewe chonläng ngeni: “Ätei epwe lap, epwe iteni Nöün Kot ewe mi Unusen Tekia. Nge Kot, ewe Samol epwe amota won lenien motun King usun an we lewo Tafit. I epwe nemeni ekewe mwirimwirin Jakop feilfeilachök, nge mwün esap fokun müchüla.” (Luk 1:32, 33) A ina ussun an a ffatolo ika iö Mwirimwirin ewe fefin we mi pwonetiu a wewe ngeni.​—Kalesia 3:16; 4:4.

¹¹ Nöün Jiowa we äläemön epwe feitiu fönüfan me epwe unusen sossot. Epwe tongeni affataöchü pwe ese pwüng än Setan kapasen appölüa Kot. Epwe itä tuppwöl ngeni Seman we? Eü kapas monomon mi fel a kapachelong lon. A iei ussun än ewe aposel Paul awewei wisen Jises: “A fokun lapalap monomonen ach lükülük: I a pwäla lon fituk, a pwä pwe a pwüng me ren Ngünmifel, chon läng kana ra küna i, chon fanüfan ra rongorong pworausan, won fanüfan mi wor chon lükü itan, Kot a angeatä lon lingan.” (1 Timoti 3:16) Ewer, ren an unusen tuppwöl tori an mälo, Jises a affataöchü pwe ese pwüng än Setan appölüa Kot. Nge epwap ffatolo pwal fitu titchikin pworaus ussun ewe kapas monomon mi fel.

“Ewe Kapas Monomon mi Fel Ussun Mwuun Kot”

12, 13. (a) Ifa eü mettoch mi kapachelong lon “ewe kapas monomon mi fel ussun ewe mwüün Kot”? (b) Met Jiowa a föri lupwen a filatä pwe ekkoch aramas mi kaük iteiter repwe feitä läng?

¹² Lon eü me lein ekkewe fansoun a afalafal lon Kalili, Jises a apasa pwe ewe kapas monomon mi fel a ririfengen me an we Mwüün Messaia. Iei alon ngeni nöün kewe chon käeö: “Kot a fen ngenikemi ewe tufich pwe oupwe silei usun monomonen Mwün Läng [“Mwün Kot,” Markus 4:11].” (Mattu 13:11) Eü pworaus mi kapachelong lon ena kapas monomon a weneiti än Jiowa filatä eü “mwich kisikis,” weween, 144,000 aramas mi fiti Nöün we pwe repwe kapachelong lon Mwirimwirin ewe fefin we, iwe, repwe eti i le nemenem lon läng.​—Luk 12:32; Pwarata 14:1, 4.

¹³ Pokiten aramas ra fförütä pwe repwe manau won fönüfan, a ussun itä Jiowa a föratä eü mettoch “mi fö” lupwen a akkota pwe aramas repwe feitä läng. (2 Korint 5:17) Iei makkeien ewe aposel Piter, nge i emön lein chokkewe mi kefilitä fän iten ena apilükülük mi sokkolo aücheean, apilükülükün manau lon läng: “Ousipwe mwareiti Kot ewe Semen ach Samol Jesus Kraist! Pün lon an tong mi lapalap a aupusefälikich ren än Jesus Kraist manausefäl seni mäla. Ei a aurakich ren eü apilükülük mi manau, pwe sipwe feiöchüni och feiöch esap morola, esap tikipwül, esap pwal aiolol, a iseis lon läng fänäsengesimi.”​—1 Piter 1:3, 4.

14. (a) Ifa ussun chon Jentail ra kapachelong lon “ewe kapas monomon mi fel ussun mwüün Kot”? (b) Pwata sia tufichin weweiti “ekewe ekiekin Kot mi alolol”?

¹⁴ Pwal eü kinikin mi weneiti nemenien ewe Mwu lon fansoun epwe feito, kinikinin ewe kapas monomon mi fel, iei letipen Kot pwe chon Jentail repwe kapachelong lein ekkewe ekkoch aramas mi kefilitä pwe repwe eti Kraist le nemenem lon läng. A iei ussun än Paul awewei ena pworaus ussun än Jiowa we “minen emmwen,” are lapalapen an ekkemmweni pwönütään an kokkot: “Lon ekewe fansoun ra la Kot esap asile ngeni aramas won fanüfan usun ei monomon, nge iei Kot a pwärala ren Ngünmifel ngeni nöün kewe soukünö me soufos mi pin. Iei ewe monomon: Ren ewe Pworausen Manau ekewe chon lükün Israel repwe eti ekewe chon Juta le feiöchüni än Kot kewe feiöch, repwe chufengen lon ewe eü chök inis o äeäfengen ewe feiöchün pwon Kot a föri ren Kraist Jesus.” (Efisus 3:5, 6) Weween ena kinikin lon ewe kapas monomon mi fel a pwälo ngeni ekkewe “soukünö me soufos mi pin.” Iwe, pwal ussun chök lon ei fansoun, ika esor alillisin ewe ngün mi fel, sisap tongeni weweiti “ekewe ekiekin Kot mi alolol.”​—1 Korint 2:10; 4:1; Kolose 1:26, 27.

15, 16. Pwata Jiowa a filatä chienen Kraist kewe sou nemenem me lein aramas?

 ¹⁵ A mak pwe “ekkewe ipükü-fäik-me-rüänü ngerou” mi ükküütä won ewe Chuukun Sion lon läng ren “ewe Lam” ra “kamoto seni fönüfan” me ra “amomoto seni lein aramas usun chok mwenuwa ngeni Kot me ewe Lam,” Kraist Jises. (Pwarata 14:1-4) Jiowa a fili emön lein nöün kewe chonläng, pwe epwe wiliti ewe äkkäewin kinikinin Mwirimwirin ewe fefin, ewe mi pwonetiu lon Ichen, nge pwata a fili chokkana repwe fiti Kraist me lein aramas? Ewe aposel Paul a awewei pwe chokkana mi kaük iteiter ra “kökkö me ren an [Jiowa] kokkot,” “me ren minne a pwapwa ngeni lon letipan.”​—Rom 8:17, 28-30; Efisus 1:5, 11; 2 Timoti 1:9.

¹⁶ Iei än Jiowa kokkot, pwe epwe epini itan we mi lap me fel, me pwal änneta pwe mi wor an pwüng le nemeni mettoch meinisin. Ren an we “minen emmwen” mi sokkolo tekian, are lapalapen an ekkemmweni mettoch meinisin, Jiowa a tinatiu ngeni fönüfan Nöün we mwänichi, iwe, a unusen sossot ikewe ie. Pwal och, a filatä pwe epwe kapachelong lon ewe Mwuun Messaia le pöün Nöün we, ekkewe aramas mi pwal änneta pwe ir chon tuppwöl ngeni an nemenem tori mälo.​—Efisus 1:8-12; Pwarata 2:10, 11.

17. Pwata sia pwapwa pokiten Kraist me chienan kewe sou nemenem ra fen piin manau won fönüfan me lom?

¹⁷ Jiowa a pwäratä an tong mi lapalap ren mwirimwirin Atam kewe ren an tinatiu ngeni fönüfan Nöün we me pwal ren an filatä me lein aramas chokkewe repwe fiti Nöün we le alemwiri ewe Mwu. Ifa ussun ena mettoch a tongeni efeiöchü ekkewe pwal fitemön mi tuppwöl ngeni Jiowa, poputä seni Epel feffeilo? Pokiten aramas ra fötek fän nemenien tipis me mälo seni uputiuer, a lamot ngeniir ar repwe chikaretä me unusöchülo lon pekin ngün me aion pwe ina än Jiowa kokkot ngeni aramas me le poputän. (Rom 5:12) A mmen apwapwa ngeni meinisin mi äneänei ar repwe küna manau esemuch won fönüfan ar silei pwe nöür we King epwe pwäratä tong me kirikiröch ngeniir, ussun chök an we pwäratä ekkena lapalap ngeni nöün kewe chon käeö atun an afalafal won fönüfan! (Mattu 11:28, 29; Ipru 2:17, 18; 4:15; 7:25, 26) Iwe, a pwal eü minen apöchökkül ngeniir ar ra weweiti pwe chienen Kraist kewe king me samol fel lon läng, ir mwän me fefin mi tuppwöl, iwe, ra fen fiu ngeni ar kewe apwangapwang me lom, me ra fen küna weiresin nonnomun aramas, ussun chök kich.​—Rom 7:21-25.

A Unusen Lüküchar An Jiowa Kokkot

18, 19. Pwata a ffataffatelo ngenikich weween alon Paul lon Efisus 1:8-11, me met sipwe käeö ussun lon ewe eü lesen mwirin ei?

¹⁸ Iei a fen lapalo ach weweiti lamoten alon Paul ngeni chon Kraist mi kepit, ussun an a mak lon Efisus 1:8-11. A apasa pwe Jiowa a pwäri “ewe kapas monomon mi fel ussun letipan,” me repwe “wisen chon alemwir” fiti Kraist, me ir mi “kefilitä me ren kokkotun ewe emön mi emmweni mettoch meinisin me ren minne letipan.” Sia weweiti pwe ekkena mettoch meinisin ra kapachelong lon än Jiowa we ‘minen emmwen’ mi amwarar, minen ekkemmweni mettoch meinisin fän iten pwönütään an kokkot. Ena pworaus a pwal alisikich le weweiti ewe popun ekkoch chök chon Kraist mi fiti ewe Fääfen Ach Samol ra kan äeä ewe pret me ewe wain.

¹⁹ Lon ewe eü lesen mwirin ei, sipwe käeö ussun aüchean Achechchemenien mäloon Kraist ngeni chon Kraist mi eäni ewe apilükülükün ar repwe feitä läng me ewe popun chokkewe mi eäni ewe apilükülükün ar repwe manau won fönüfan tori feilfeilo chök, repwe tinikken le käeö ussun weween ewe Achechchem.

[Footnote]

Enniwili Pworaus

• Pwata Jiowa a föratä fönüfan, iwe mwirin, a anomu aramas won?

• Pwata a lamot ngeni Nöün Jiowa we äläemön an epwe küna sossot won fönüfan?

• Pwata Jiowa a fili chienen Kraist kewe sou nemenem me lein aramas?

[Ekkewe kapas eis fan iten ewe lesen]