Ioien Mettoch Lon Läng Me Mettoch Won Fönüfan
Ioien Mettoch Lon Läng Me Mettoch Won Fönüfan
“Me ren minne a pwapwa ngeni . . . epwe öchufengenni mettoch meinisin lon Kraist, ekkewe mettoch lon läng me ekkewe mettoch won fönüfan.”—EFISOS 1:9, 10.
1. Ifa ewe mettoch Jiowa a “pwapwa ngeni” fän iten läng me fönüfan?
KINAMWE LON UNUSELAPEN LÄNG ME FÖNÜFAN! Ina än Jiowa kokkot mi fokkun mürinnö, pwe i “ewe Koten kinamwe.” (Ipru 13:20) A emmweni ewe aposel Paul an epwe makkei pwe “a pwapwa ngeni” an epwe “ochufengennisefälli mettoch meinisin lon ewe Kraist, ekkewe mettoch lon läng me ekkewe mettoch won fönüfan.” (Efisus 1:9, 10) Met weween ena kapas mi afföü ngeni ‘ochufengennisefälli’ lon ena wokisin? Iei alon ewe sou käeö Paipel itan J. B. Lightfoot: “Ena kapas a wewe ngeni pwe mettoch meinisin lon unuselapen läng me fönüfan repwe tipeeüfengen, iwe, esap chüen wor mettoch mi efisatä osukosuk me fitikoko, nge mettoch meinisin repwe chufengen me ririfengen lon Kraist. Tipis me mälo, letipeta me osupwang me riäfföü repwe morolo.”
“Ekkewe Mettoch lon Läng”
2. Ekkewe “mettoch lon läng” repwe ioifengen ra wewe ngeni iö?
2 Ewe aposel Piter a affataöchü ewe äpilükülük mi mürinnö a nom ren chon Kraist mi enlet pwe iei makkeian: “Nge usun än Kot pwon sia witiwiti eü läng mi fö me eü fanüfan mi fö ia pwüng epwe chöchöla ie.” (2 Piter 3:13) Ena “läng mi fö” lon ena pwon a wewe ngeni ewe mineföön nemenem, ewe Mwuun Messaia. Lon nöün Paul we taropwe ngeni chon Efisus a mak pwe “ekkewe mettoch lon läng” repwe ioifengen “lon ewe Kraist.” Ikkena ir ekkewe aramas mi kaük iteiter, iwe, ra kefilitä pwe repwe eti Kraist le nemenem lon läng. (1 Piter 1:3, 4) Ekkena 144,000 chon Kraist mi kepit ra “kamöto seni fönüfan,” “amömöto seni lein aramas,” pwe repwe chienen Kraist kewe chon alemwir lon an we Mwu lon läng.—Pwarata 5:9, 10; 14:3, 4; 2 Korint 1:21; Efisus 1:11; 3:6.
3. Pwata sia tongeni apasa pwe chon kepit ra ‘motfengen lon läng’ inaamwo ika ir mi chüen nonnom won fönüfan?
3 Chon Kraist mi kepit ra kefilitä, are upsefäl, ren ewe ngün mi fel pwe repwe wiliti nöün Jiowa lon pekin ngün. (Jon 1:12, 13; 3:5-7) Pokiten Jiowa a muutiir pwe repwe “nöün,” ra wiliti pwiin Jises. (Rom 8:15; Efisus 1:5) Pokiten ir pwiin kewe, a mak pwe ra ‘kekitä me motfengen lon läng fiti Kraist Jises’ lon pwal mwo nge le atun ar ra nonnom won fönüfan. (Efisus 1:3; 2:6) Ra nonnom lon wiser na mi tekia lon pekin ngün pün ra fen “mechenilo ren ewe ngün mi fel, ewe mi pwonetiu, iwe, ina eü esissin fän iten minne repwap alemwiri,” nge a iseis fän asengesir lon läng. (Efisus 1:13, 14; Kolose 1:5) Iwe, chokkana ra wewe ngeni ekkewe “mettoch lon läng,” iwe, iteiter meinisin repwe ioifengen, nge ena ukukun filien Jiowa.
Ewe Angangen Ioifengen a Poputä
4. Ineet me ifa ussun a poputä ioien “ekkewe mettoch lon läng”?
4 Me ren än Jiowa we “minen emmwen,” are lapalapen an ekkemmweni mettoch meinisin, ioien “ekkewe mettoch lon läng” epwe poputä “le mwuchuloon ewe fansoun mi kaük.” (Efisus 1:10) Ena fansoun mi kaük a mwüch lon Pentikos 33 C.E. Lon ena rän, ewe ngün mi fel a niniitiu won ekkewe aposel me eü mwichen chon käeö, nge ir mwän me fefin. (Fofor 1:13-15; 2:1-4) Ina eü minen pwäratä pwe a poputä pöchökkülen ewe pwon mi fö, iwe, a pwal poputä ewe mwichefelin Kraist me ewe mineföön mwuun Israel lon pekin ngün, “ewe Israelin Kot.”—Kalesia 6:16; Ipru 9:15; 12:23, 24.
5. Pwata Jiowa a föratä eü mineföön “mwu” fän iten siwilin wesewesen chon Israel?
5 Ewe pwon mi longolong won ewe Allük, ewe mi weneiti wesewesen chon Israel, ese föratä eü “mwichen souasor me eü mwü mi pin” mi angang ngeni Kot lon läng tori feilfeilo chök. (Ekistos 19:5, 6) Iei alon Jises ngeni ekkewe sou emmwen lon ewe lamalamen Jus: “Iei mine üpwe ürenikemi, pwe Kot epwe angei senikemi Mwün we o ngeni eu mwichen aramas mi awora ua ren ar föri föför mi pwüng.” (Mattu 21:43) Ena mwu, weween, ewe Israel lon pekin ngün, a förütä seni chon Kraist mi kepit, iwe, ir mi kapachelong lon ewe pwon mi fö. Iei makkeien ewe aposel Piter ngeni chokkana: “Nge ämi eu ainang mi fil, eu mwichen souasor än ewe king, eu mwuun aramas mi pin, nöün Kot kewe aramas, oua fil pwe oupwe arongafeili än Kot kewe föför mi manaman, i ewe mi körikemiwu seni rochopwak, pwe oupwe tolong lon an saram mi amwarar. Me lom ousap nöün Kot aramas, nge ikenai oua nöün.” (1 Piter 2:9, 10) Wesewesen chon Israel rese chüen nöün Jiowa kewe aramas fän iten eü pwon. (Ipru 8:7-13) Me ren än Jises we oesini, a tiwelo seniir ewe wis mi aüchea, wisen ar repwe kapachelong lon ewe Mwuun Messaia, iwe, a suuk ngeni ekkewe 144,000 chon ewe Israel lon pekin ngün.—Pwarata 7:4-8.
Ra Kapachelong lon ewe Pwon fän iten Eü Mwu
6, 7. Menni pwon mi sokkolo aüchean Jises a föratä lefiler me pwiin kewe chon kepit, me ifa weween ena mettoch ngeniir?
6 Lon ewe pwinin än Jises poputäni Achechchemenien an mälo, iei alon ngeni nöün kewe aposel mi tuppwöl: “Ämi oua etiei lon ai kewe riaföü meinisin. Usun Semei a ngeniei ai üpwe nemenem, iei usun üpwe pwal ngenikemi ewe nemenem. Oupwe mongö o ün won ai chepel lon mwüi, oupwe pwal mot won ekewe lenien motun king o nemeni ekewe engol me ruu ainangen Israel.” (Luk 22:28-30) Jises a kapas ussun eü pwon mi fö mi sokkolo aüchean a föratä lefiler me pwiin kewe 144,000 chon kepit, iwe, repwe “tuppwöl tori mälo” me änneta pwe ir chon ‘pworaiti’ mettoch meinisin.—Pwarata 2:10; 3:21.
7 Chon ena mwich mi kaük iteiter ra kan likitalo ewe apilükülükün ar repwe manau tori feilfeilo chök won fönüfan lon pekin futuk me chcha. Repwe fiti Kraist le nemenem lon läng, iwe, repwe mot won leenien motun samol pwe repwe wisen eäni apwüng won chon fönüfan. (Pwarata 20:4, 6) Iei sipwe käeö pwal fitu wokisin mi weneiti ekkena chök chon kepit, iwe, repwe affata ewe popun ekkewe “pwal fitemön siip” rese kan äeä ekkewe minen lios lon ewe Achechchem.—Jon 10:16.
8. Chon kepit ra pwäratä met ren ar äeä ewe pilawa?
8 Ekkena chon kepit ra küna riäfföü ussun chök Kraist me ra tipemecheresin tipeeü ngeni ar repwe mälo ussun chök i. Pokiten Paul emön chon ena mwich, a makkei pwe a tongeni föri mettoch meinisin pwe epwe “silei Kraist o mefi manamanen an manausefäl, . . .pwal eti i lon an riaföü.” Ewer, Paul a wesewesen tipeeü ngeni an epwe “wewe ngeni i lon an mäla.” (Filipai 3:8, 10) Chommong chon Kraist mi kepit ra fen “uwoufeili än Jises mäla” lon inisiir.—2 Korint 4:10.
9. Ewe pilawa lon ewe Ächechchem a liosuetä menni inis?
9 Iei alon Jises lupwen a poputäni ewe Fääfen Ach Samol: “Iei inisi.” (Mark 14:22) A kapas ussun wesewesen inisin, iwe, ekiselo chök mwirin, epwe kawet me epwe ninilo chchaan. Mi fichiiti ena inis pwe pilawa ese lefen epwe liosuetä. Met popun? Pün lon ewe Paipel, lefen a liosuetä tipis are mettoch mi ngaü. (Mattu 16:4, 11, 12; 1 Korint 5:6-8) Jises a unusöch, me inisin esor tipisin. Epwe fangolo ena inis mi unusöch fän iten eü asorun tipis. (Jon 6:51) An föri ena epwe efeiöchü meinisin chon Kraist mi tuppwöl, ese lifilifil ika ra eäni ewe apilükülükün ar repwe manau lon läng are küna manau esemuch lon eü paratis won fönüfan.—Ipru 7:26; 1 Jon 2:2.
10. Ifa ussun chokkewe mi äeä ewe wain lon ewe Ächechchem ra ‘tupwufengen lon chchaan ewe Kraist’?
10 Iei makkeien Paul ussun ewe wain chon Kraist mi kepit ra äeä lon ewe Ächechchem: “Ewe sepien feioch sia ioteki, esap iei sepien ach chiechifengen me chaan Kraist?” (1 Korint 10:16) Ifa ussun ekkewe mi äeä ewe wain ra ‘chiechifengen me chaan Kraist’? Sap minne ra tupwufengen le awora ewe möön kepich, pün a lamot ngeni pwisin ir ewe minen omusomusen tipis. Ren ar lükü ewe manamanen omusomusen tipis lon chchaan Kraist we, a musolo ar tipis me ra iteni aramas mi pwüng fän iten ar repwe manau lon läng. (Rom 5:8, 9; Taitos 3:4-7) Ekkewe 144,000 chienen Kraist chon alemwir ra “pinilo,” are käimulo, me limöchülo seni tipis pwe repwe “chon pin” ren chchaan Kraist we mi ninilo. (Ipru 10:29; Taniel 7:18, 27; Efisus 2:19) Ewer, ren chchaan we, Kraist a“möni aramas fän iten Kot, ekewe aramas seni ekewe ainang me kapas me mwü me sokopaten aramas meinisin. Ka för seniir eu mwün souasor, pwe repwe angang ngeni ach Kot, nge repwe nemenem won fanüfan.”—Pwarata 5:9, 10.
11. Än aramas äeä ewe wain lon ewe Ächechchem a liosuetä met?
11 Iei alon Jises lupwen a poputäni Ächechchemenien an mälo, iwe, a ngeni nöün kewe aposel mi tuppwöl ewe kapen wain: “Ämi meinisin oupwe ün seni. Pun iei chai a allükülükü än Kot we pwon mi fö ngenikemi, a nninnila fänäsengesin chomong aramas, pwe amusamusen ar tipis kana.” (Mattu 26:27, 28) Chchaan ätemwänin kowu me siike a awora pöchökkülen ewe pwon lefilen Kot me ewe mwuun Israel, iwe, pwal ussun chök, chchaan Jises a awora pöchökkülen ewe pwon mi fö Jiowa a föratä fän iten ewe Israel lon pekin ngün, poputä lon Pentikos 33 C.E. (Ekistos 24:5-8; Luk 22:20; Ipru 9:14, 15) Ren ar äeä ewe wain mi liosuetä “chchaan ewe pwon,” chon kepit ra affata pwe ra kapachelong lon ewe pwon mi fö me ra kükküna feiöch seni.
12. Ifa ussun chon kepit ra papataiselong lon än Kraist mälo?
12 A wor pwal eü mettoch chon kepit repwe chechchemeni. Iei alon Jises ngeni nöün kewe chon käeö mi tuppwöl: “Oupwe fokun ünümi seni ewe kap ngang upwe ünümi, oupwe pwal fokun papatais ngeni ewe papatais ngang upwe papatais ngeni.” (Mark 10:38, 39) Mwirin, ewe aposel Paul a makkei pwe chon Kraist ra “papatais lon än [Kraist] malo.” (Rom 6:3) Chon kepit ra kan pennukuolo manauer. Ar mälo a ussun chök eü asor pün ra unusen likitalo ewe apilükülükün manau won fönüfan. Papataisin ekkena chon Kraist mi kepit lon än Kraist mälo a unusen pwönütä lupwen ra mälo fän tuppwöl, iwe mwirin, ra manausefällitä lon pekin ngün pwe repwe fiti Kraist le “nemenem ussun king” lon läng.—2 Timoti 2:10-12; Rom 6:5; 1 Korint 15:42-44, 50.
Än Aramas Äeä Ewe Pret me Wain
13. Pwata chokkewe mi eäni ewe apilükülükün manau won fönüfan resap äeä ekkewe minen lios lon ewe Ächechchem, nge met popun ra fiffiti ewe Ächechchem?
13 Pokiten ekkena mettoch meinisin ra pacheri äeän ewe pilawa me wain lon ewe Ächechchem, iwe, a ffat pwe esap pwüng ngeni chokkewe mi eäni ewe apilükülükün manau won fönüfan ar repwe äeä. Chokkewe mi äpilükülükü pwe repwe manau won fönüfan ra miritiiti pwe esap ir kifetin inisin Kraist, kifetin kewe mi kepit, iwe, rese pwal kapachelong lon ewe pwon mi fö Jiowa a föratiu fän iten ir kewe repwe fiti Jises Kraist lon an nemenem. Pokiten “ewe kap” a liosuetä ewe pwon mi fö, chokkewe chök mi kapachelong lon ewe pwon mi fö repwe äeä ewe pret me wain. Chokkewe mi ükküti ar repwe küna manau esemuch won fönüfan ren ar wiliti aramas mi unusöch fän nemenien ewe Mwu rese papataiselong lon än Jises mälo me rese pwal filitä pwe repwe eti i le nemenem lon läng. Ika repwe äeä ewe pret me wain , epwe wewe ngeni ar föri och mettoch ese fichitiir. Ina minne, rese äeä ekkewe minen lios, nge ra kan fiti ewe Ächechchem pwe repwe käeö pworausan fän süföl. Ra kan kilisou ren mettoch meinisin Jiowa a föri fän äsengesiir ren Nöün we, nge a kapachelong an awora ewe minen omusomusen tipis fän iten chchaan Kraist we mi ninilo.
14. Ifa ussun chon kepit ra kan pöchökkületä lon pekin ngün ren ar äeä ewe pilawa me wain?
14 Arapakkan epwele wes amuchün mechenin ekkewe ekkoch chök chon Kraist mi kefilitä pwe repwe fiti Kraist le nemenem lon läng. Chokkewe mi kepit ra kan pöchökkületä lon pekin ngün ren ar äeä ekkewe minen lios lon ewe Ächechchem tori muchüloon manauer won fönüfan, manauer ra fen pennukuolo. Ra mefi pwe ra ririfengen me pwiir kewe lon pekin ngün pokiten ir kifetin inisin Kraist. Ar äeä ewe pilawa me wain a kan ächchema ngeniir pwe wiser ar repwe tuppwöl tori mälo.—2 Piter 1:10, 11.
Ioien “Ekkewe Mettoch won Fönüfan”
15. Iö kkan ra ioifengen le pelien chon Kraist mi kepit?
15 Poputä seni 1935, a fen lalapolo ekkewe “pwal fitemön siip,” nge esap ir chon ewe “mwich kisikis,” iwe, ra äpilükülükü pwe repwe küna manau esemuch won fönüfan. Chokkana ra kan peppeni chokkewe mi kepit. (Jon 10:16; Luk 12:32; Sekaraia 8:23) Ir mi tuppwöl le chiechi ngeni “pwiin” Kraist kewe, iwe, ra akkawora watte alillis fän iten ewe angangen afalafala “ei pworaus allimen ewe mwü” pwe epwe eü minen pwäratä ngeni mwüün fönüfan meinisin. (Mattu 24:14; 25:40) Ren ar föfföri ena, ra fen anomuur lon ewe tettelin aramas mi iteni “siip” me ren ekiekin Jises, iwe, repwe nom le peliefichin lupwen epwe war fän iten an epwe apwüngü ekkewe mwu. (Mattu 25:33-36, 46) Pokiten ar lükü chchaan Kraist we, repwe wewe ngeni ewe “mwich mi lapalap,” iwe, repwe küna manau lupwen ewe “riäfföü mi lapalap” epwe war.—Pwarata 7:9-14.
16. Iö kewe repwe kapachelong lein ekkewe “mettoch won fönüfan,” me ifa ussun chokkana meinisin repwe tufichin wiliti “nöün Kot”?
16 Ika epwe wes amuchün mechenin ekkewe 144,000, epwe tongeni kepichilo ekkewe “äsepwälin” kata pwe repwe eniti än Setan we otot mi ngaü won fönüfan. (Pwarata 7:1-4) Le atun ewe Engeröü Ierin Nemenemen Kraist me chienan kewe king me samol fel, chommong chon manausefäl repwe chu ngeni ewe mwich mi lapalap. (Pwarata 20:12, 13) Epwe suuk ngeni chokkana ewe äpilükülükün ar repwe nomofoch won fönüfan fän nemenien ewe King me Messaia, Kraist Jises. Le sopwoloon ewe Engeröü Ierin Nemenem, meinisin ekkena “mettoch won fönüfan” repwe küna eü saingoon sossot. Ekkewe mi tuppwöl fän ena sossot repwe wiliti “nöün Kot” me won fönüfan.—Efisus 1:10; Rom 8:21; Pwarata 20:7, 8.
17. Ifa ussun an Jiowa we kokkot epwe pwönütä?
17 Iwe, ren an we “minen emmwen” mi sokkolo tipatcheman, are lapalapen an akkota tettelin mettoch meinisin, Jiowa epwe fen apwönüetä an we kokkot, kokkotun an epwe “ochufengennisefalli mettoch meinisin lon ewe Kraist, ekkewe mettoch lon läng me ekkewe mettoch won fönüfan.” Förien Kot kewe meinisin mi mirit lon läng me pwal won fönüfan repwe fen ioifengen lon kinamween unuselapen läng me fönüfan, iwe, fän chengel repwe fen anomuur fän ewe nemenem mi pwüng, nemenemen ewe Sou Akkot mi Lapalap, Jiowa.
18. Ifa ussun ekkewe mi kepit fengen me chiener kewe repwe küna feiöch seni ar fiti ewe Ächechchem?
18 Epwe ifa me watten an epwe apöchökkülatä lüküen ewe mwichen chon kepit mi chokisikis me pwal fitu milion chiener kewe pwal ekkoch siip ar repwe chufengen fän April 12, 2006! Repwe föri Ächechchemenien Mäloon Kraist, ussun chök Jises a allükü: “Oupwe föri ei pwe oupwe chechemeniei.” (Luk 22:19) Meinisin mi fiti repwe chechemeni minne Jiowa a föri fän äsengesiir ren nöün we mi ächengicheng, Kraist Jises.
Enniwili Pworaus
• Ifa an Jiowa kokkot fän iten ekkewe mettoch lon läng me mettoch won fönüfan?
• Io “ekkewe mettoch lon läng,” iwe, ifa ussun ra ioifengen?
• Iö “ekkewe mettoch won fönüfan,” me ifa ar äpilükülük allim?
[Ekkewe kapas eis fan iten ewe lesen]
[Pwoor lon pekin taropwe 25]
“Inisin ewe Kraist”
Lon 1 Kor. 10:16, 17, Paul a kapas ussun “ewe inis” lon eü weween mi sokkolo aüchean, lupwen a kapas ussun lamotan ngeni pwiin Kraist kewe mi kepit ren ngün mi fel. A apasa: “Ren ach utu ewe pilawa lupwen sia mongo seni, sia chiechifengen lon ewe inisin Kraist. Pokiten mi wor efoch chök pilawa, kich mi chomong, sia eü chök inis, pun kich meinisin sia mongo seni ewe chök efoch pilawa.” Lupwen ekkewe chon Kraist mi kepit ra angei ewe pilawa lon ewe Ächechchem, ra pwäratä ar tipeeüfengen lon ewe mwichefelin chon kepit, ewe mi ussun eü inis, iwe, Jises ewe Mökür.—Mattu 23:10; 1 Korint 12:12, 13, 18.
[Sasing lon pekin taropwe 25]
Met popun ekkewe chök mi kepit repwe angei ewe pret me ewe wain?
[Sasing lon pekin taropwe 27]
Ren an Jiowa minen emmwen, mettoch meinisin lon läng me won fönüfan repwe tipeeüfengen