Ach Weweiti Esissin Mi Lamot!

”Akkom use lolilen lupwen a metek mokuren nouch we aat, Andreas. Iwe nge, ua lolilen lupwen a pwichikkarelo, ese chuen mwon mongo, me metekin mokuran a lapelo. Lupwen puluwei a war, am meinisin aua feilo pioing. Ewe tokter a cheki ekkewe esissin me a era pwe Andreas epwe luing. Ese chok metek mokuran. Andreas a uri eu semmwen mi chou. Chon pioing ra alisi Andreas, iwe, muttir chok, a pochokkul sefal.”​—Gertrud, emon inelap lon Tois.

CHOMMONG sam me in ra fen lolileniesini pochokkulen nour kewe ussun chok Gertrud. Ra kuna ekkoch esissin mi esinna pwe nour we a semmwen. Inaamwo ika semmwen meinisin rese chou nge, sam me in resap tongeni tunalo ekkewe esissinnen semmwen lon nour kewe. Atittinnen ekkewe esissin me mwirin, ar mwokutukut me ren minne ra fen kaeo seniir, epwe awora alillis watte. Ei mei lamot.

Saminne pwe esissinnen ekkewe esissin mi lamot fan iten chok pochokkulen inisich. Chemeni mwo ewe noopwoopwo a efeiengaua chommong fonu unukkun ewe Setin India fan December 2004. Scientist lon Australia me Hawaii ra silei pwe a fis eu chechchechin fonu mi fokkun watte me ra silei pwe chommong aramas repwe feiengau ren eu noo nge, esor eu minen ouroura aramas lon ekkewe fonu repwele feiengau. Ina popun, lap seni 220,000 aramas ra malo.

Eu Esissin Mi Fokkun Watte Lamotan

Jises Kraist a afalafal ngeni aramas ussun lamoten esissin me met repwe fori lupwen ra kuneer. An afalafal a fokkun lamot. Iei met a mak lon ewe Paipel: “Iwe, ekkewe Farisi me Satusi ra feilo pwe repwe sotuni i, o ra tingorei pwe epwe api ngenir och esisin seni lang. Nge a poluenir, ‘Lekuniol oua apasa, “Epwe ranoch, pun lang a parapar”; pwal lesesor, “Epwe raningau ikenai, pun lang a parapar o pwal topotop.” Ewer, oua fen sinei oesini ewe mesen lang, nge esisinen ekkewe fansoun ouse tongeni.’”​—Mattu 16:1-3.

 Jises a affata pwe ekkena chon Jus mi auselinga an afalafal repwe ita silei atapwalapwalen ar kewe fansoun, lupwen a fos ussun “esisinen ekkewe fansoun.” An chon Jus kokkotun fel, pwungun pwe kokkotun manauer, epwele feiengau wachemuk nge esor mi tongeni su seni. Iwe, fitu chok ran mwen an malo, Jises a fos ussun pwal eu esissin epwe esinna pwe a nonnom. Met Jises a apasa lon ena fansoun a fokkun lamot ngenikich meinisin.