Ra Aporausa Kapas Allim Ngeni Ekkewe Mi Selingepüng

“RA ÄLISIKICH lon pekin ngün!” Ina alon ewe director lon eü imwen chinnap lon Navalcarnero, Madrid, Spain, lupwen a fos ussun än Chon Pwäratä Jiowa chuuri ewe leeni. Met popun a apasa ena?

Ekkoch aramas lon ewe Rosas del Camino imwen chinnap ra selingepüng. Iwe nge, pokiten ekkewe chon Pwäratä ra achocho le käeö Spanish Sign Language, ra tongeni afalafal ngeniir. Ewe director a mwareiti ekkewe Chon Pwäratä pokiten ra fangolo chok ar fansoun le älisi ekkewe mi osupwang lon pekin ngün. A küna uwaöchün ar afalafala ewe kapas allim ussun ewe Muu ngeni ekkewe ra nonnom lon ewe leenien chinnap. Iwe, pwal ekkewe ra nonnom lon ewe leeni, äkkäewin ekkewe mi selingepüng are chuun ra fokkun aücheaani än ekkewe Chon Pwäratä chuuriir.

Emön leir mi chuun me selingepüng itan Eulogio, a käeö Paipel ren Chon Pwäratä Jiowa iei. Eü rän, lupwen Eulogio a käkkäeö, emön mwän chinnap a kineto me a ngeni ewe Chon Pwäratä eü köl aramasen ewe leeni ra föri ren ar repwe pwäratä ar kilisou. Itelapen ewe köl, “Emön Chon Pwäratä.” Iei kinikinin minne ra makkei, “Ra manaueni manauer mi mürinnö me kokkotöch, iwe, seni Jiowa ra angei tipatchem mi apwapwai ir. Ra chuchchuuri aramas lon imwer kewe pokiten ra lükülük won Jiowa.”

Pwüngün pwe ena lükülük won Jiowa, ina met a emmwen ngeni chommong Chon Pwäratä won unusen fönüfan ar repwe käeö ewe fos fän iten aramas mi selingepüng lon fönüer. Iei ussun ra aporausa ngeniir ewe porausen manau lon ewe Paipel.