Aramas “Seni Ekkewe Mwü Mi Sokola Ar Kapas” Ra Rongorong Ewe Kapas Allim

“Engol mwän seni ekewe mwü mi sokola ar kapas repwe [apasa]: ‘Kose mochen kopwe mwüt ngenikem pwe aipwe etikemi, pun äm aia rong pwe Kot a etikemi.’”​—SEKARAIA 8:23.

1. Ifa ussun Jiowa a filiöchü ineet me ia a poputä ewe lamalamen Kraist ren aramas seni sokkopaten fönü me kapas?

 A FISITÄ lon ränin Pentekos 33 C.E., lon ewe leeni me fansoun mi fokkun fich. Fitu wiik me mwan, chon Jus me chon ekis mi choni ewe lamalamen Jus, seni 15 fönü fän nemenien Muun Rom, ra nonnom lon Jerusalem fän iten ewe Pasofer. Iwe, iei, lon Pentekos, fite ngeröü lein ekkena chon Jus ra rongorong ewe kapas allim lon pwisin ar kewe fos seni aüen aramas kisikis mi ur ren ngün mi fel. Ra weweöchüüti met ra rongorong. Ese ussun chök ewe fitikoko lon Papilon loom. (Fofor 2:1-12) Ina poputään ewe mwichefelin Kraist. A pwal poputä eü angangen asukula aramas lon chommong fönü me fos. Ei angang a sopwosopwolo tori ei fansoun.

2. Met popun aramas mi rongorong kapas seni ekkewe chon käeö lon Pentekos 33 C.E. ra “weitifengen”?

² Ese mwääl nöün Jises kewe chon käeö ra eäni fosun Kris, ewe fos chommong aramas ra eäni lon ena fansoun. Ra pwal eäni fosun Ipru, ewe fos aramas ra eäni lon ewe imwen fel. Iwe nge, lon ena ränin Pentekos, lupwen aramas ra rongorong kapasen ekkewe chon käeö, ra “weitifengen” pokiten ra rongorong poraus lon pwisin ar kewe fos. Met mwiriloon? Iwe, ewe poraus a fokkun achüngü letiper pokiten ra rongorong ekkewe kapas lon fosun fönüer kewe. Le muchuloon ena rän, ena kükkün mwichen chon käeö a lapalapelo tori 3,000!​—Fofor 2:37-42.

3, 4. Ifa ussun ewe angangen afalafal a lapelo lupwen ekkewe chon käeö ra su seni Jerusalem, Jutia, me Kalili?

³ Ekis chök mwirin, chon Kraist lon Jerusalem ra küna eü fansoun riäfföü mwääl, iwe “ekkewe mi kupetfesen ra chok feilfetal o afalafala ewe kapas.” (Fofor 8:1-4) Iwe, nengeni met sia älleaani lon Fofor sopwun 8 ussun Filip, emön chon afalafal mi eäni fosun Kris. Filip a afalafal ngeni chon Sameria. A pwal afalafal ngeni emön nouwis seni Itiopia mi etiwa ewe poraus ussun Kraist.​—Fofor 6:1-5; 8:5-13, 26-40; 21:8, 9. 

⁴ Ekkewe chon Kraist ra kükkütta ia repwe tongeni nonnom ie, lükün Jerusalem, Jutia, me Kalili. Lon leenier kewe mi fö, ra chuuri aramas mi sokkolo ar fos me eörenier kewe. Eli ekkoch leir ra afalafal ngeni chon Jus chök me mwan. Iwe nge, ewe aposel Luk a apasa: “Nge ekkoch leir, ekkoch re Saipros, pwal ekkoch re Sairine, lupwen ra tori Antiok, ra pwal kapas ngeni ekkewe re Kris, o ra pwal afalafala usun ewe Samol Jises.”​—Fofor 11:19-21.

Emön Kot Ese Lifilifil Aramas—Eü Poraus Fän Iten Meinisin

5. Ifa ussun porausen ewe kapas allim a affata pwe Kot ese lifilifil aramas?

⁵ Met a fisitä me loom a unusen tipeeü ngeni lapalapen än Kot angang. Kot ese lifilifil  aramas. Jiowa a älisi ewe aposel Piter an epwe siwili an ekiek ussun chon ekis. Iei met Piter a makkei mwirin: “Enlet, ua koran wewe pwe Kot ese lifilifil aramas, nge lon ekkewe mu meinisin, eka e niuokusiti i o fori minne mi pung, iwe, Kot epwe etiwa i.” (Fofor 10:34, 35; Kol Fel 145:9) Me loom, ewe aposel Paul a eriäfföü chon Kraist. Iwe, Paul a affata pwe Kot ese lifilifil aramas lupwen a awewei ussun letipen Kot pwe “aramas meinisin repwe kuna amanauen ngunur.” (1 Timoti 2:4) Enletin ei poraus ussun Kot a ffatolo ren ewe äpilükülük ussun Muun Kot mi suuk ngeni mwän are fefin, me aramas mi chol are pwech seni fönü me fos meinisin.

6, 7. Ikkefa ekkewe oesini lon Paipel ra affata pwe ewe kapas allim epwe esilesilfeil lon chommong fönü me fos?

⁶ A wor oesini ussun watteeloon ewe mwichefel fite pükü ier me mwan. Me ren Taniel, “[Jises] a angei an nemenem me lingan me mwün, pwe aramasen fanü me mwü, pwal aramas mi eäni sokopaten fos repwe angang ngeni.” (Taniel 7:14) Ekkewe kapas lon ei chassi ra siwil ngeni 153 fosun fönüfan fän iten an epwe ainet fetäl won unusen fönüfan pwe en mi tongeni älleaani porausen Muun Jiowa we. Iei ussun a pwönüetä ei oesini lon Paipel.

⁷ Mi oesini lon Paipel pwe aramas mi silei sokkopaten fos repwe rongorong an we porausen manau. Ina met Sekaraia a pwal oesini: “Lon ekana rän engol mwän seni ekewe mwü mi sokola ar kapas repwe amwöchü lepwülün üfen eman chon Juta [chon Kraist mi kepit, kinikinin ewe “Israelin Kot”] o üra, ‘Kose mochen kopwe mwüt ngenikem pwe aipwe etikemi, pun äm aia rong pwe Kot a etikemi.’” (Sekaraia 8:23; Kalesia 6:16) Iwe, ewe aposel  Jon a awewe won minne a küna lon eü längepwi: “Mwirin, ua nennengeni, o nengeni, eu mwich mi fakkun lapalap, esor emon mi tongeni alleani iteiter, seni ekkewe mu meinisin, o ekkewe einang meinisin, o sokkun aramas meinisin, ra ukkuta mwen ewe leenien motun king, o mwen mesen ewe Lam.” (Pwarata 7:9) Sia fen küna pwönüetään ekkeei oesini!

Afalafal Ngeni Sokkopaten Aramas

8. Met popun sia wiisen siwili lapalapen ach angangen afalafal?

⁸ Ikenäi, aramas ra mwökütüküt fetäl lap seni me loom. Pokiten eü kompani a tongeni föri business lon sokkopaten fönü iei, chommong chon angang ra mwöküt ngeni eü mineföön fönü. Aramas ra pwal mochen su seni fönüer pokiten maun are nafangaüen moni, ren ar repwe atufichi ar kewe famili. Ina popun a tongeni wor fitu mwichen aramas mi eäni en me an fos lon eü chök fönü. Ren chök awewe, aramas ra eäni lap seni 120 fos lon Finland. Mei wor lap seni 200 fos lon Australia. Lon eü chök telinimw lon San Diego, Merika, aramas ra eäni lap seni 100 fos.

9. Itä met ach ekiek ussun aramas lon ach leenien afalafal mi eäni pwal eü fos?

⁹ Ifa ussun? Sia ekieki pwe ekkeei aramas mi eäni sokkopaten fos, ir eü minen eppet ngeni pwönüetään ach angangen afalafal? Aapwi! Nge, sia eäni ewe ekiek pwe ‘ekkewe malamal ra fen pwechepwech ren ewe ras,’ weween pwe a watteelo ach angangen afalafal. (Jon 4:35) Sia mochen älisi meinisin mi meefi ar osupwang lon pekin ngün ese lifilifil fönüer are fos. (Mattu 5:3) Ina popun ewe choochoon aramas mi wiliiti nöün Kraist chon käeö nge mi “sokala ar kapas,” a lapalapelo. (Pwarata 14:6) Ren chök awewe, lon August 2004, aramas lon Tois ra afalafal lon 40 fos. Engol ier me loom, ewe kapas allim mi esilesilfeil lon 18 fos chök lon Australia. Iei, arapakan 30. Lon Kris, Chon Pwäratä Jiowa ra afalafal lon arapakan 20 fos. Iei fosun Merika ewe fos aramas ra kan silei lap seni meinisin, nge 80 persentin Chon Pwäratä Jiowa ra eäni pwal eü fos.

10. Ifa wiisen emön me emön chon afalafal lon ewe angangen asoulängalo “chon fönü meinisin”?

¹⁰ Pwüngün pwe än Jises allük pwe sipwe “feilo asoulangalo chon fonu meinisin” a pwöppwönütä iei. (Mattu 28:19) Pokiten ra etiwa ei allük, Chon Pwäratä Jiowa ra afalafal lon 235 fönüen fönüfan. Ra ainetifetälei puk me chassi lon lap seni 400 fosun fönüfan. Än Jiowa mwicheich a awora ewe pisek mi älisatä kälisitään aramas, nge emön me emön chon afalafal epwe achocho le uwei ewe poraus lon Paipel ngeni “sokkun aramas meinisin” lon eü fos ra weweiti. (Jon 1:7, NW) Ei angang a fen atufichi fite milion aramas mi eäni sokkopaten fos ar repwe küna feiöch seni ewe kapas allim. (Rom 10:14, 15) A wor lamoten angangen iteiten chon afalafal!

Achocho Ngeni Wiisach

11, 12. (a) Aramas mi afalafal ngeni aramas lon pwal eü fos repwe achocho ngeni met, iwe, ifa ussun ngün mi fel a älisiir? (b) Ifa aücheaan än aramas rongorong ewe kapas allim lon pwisin ar fos?

¹¹ Iei, chommong chon afalafal ra mochen käeö eü mineföön fos, nge rese ekieki pwe repwe silei ewe mineföön fos pokiten manamanen läng chök. (1 Korint 13:8) Emön epwe fokkun achocho ngeni ika a mochen  käeö eü mineföön fos. Pwal mwo chokkewe mi sileöchü pwal eü fos repwe siwili lapalapen ar afalafal ren ar repwe älisi aramas mi sokkolo eörenier kewe me nonnomun manauer ren ewe poraus lon Paipel. Pwal och, fän chommong aramas ra säü me niuokkus lupwen ra wareiti eü mineföön fönü. Ina popun ekkewe chon afalafal repwe achocho le weweiti lapalapen ekiekir.

¹² Iwe nge, ewe ngün mi fel a chüen älisi nöün Jiowa kewe chon angang mi mochen älisi aramas mi silei pwal eü fos. (Luk 11:13) Rese silei pwal eü fos pokiten manamanen läng, nge ewe ngün mi fel a tongeni alapalo ar mochen fos ngeni aramas mi silei ewe fos ra käkkäeö. (Kol Fel 143:10) Eli ewe poraus sia afalafala aramas lon pwisin ach fos epwe tori tupuwer nge, ika ewe poraus epwe achüngü letiper, a kan mürinnö ar rongorong lon pwisin ar fos. Iei ussun ekkewe kapas repwe kkü ar kewe mochen, ekiek, me äpilükülük.​—Luk 24:32.

13, 14. (a) Met popun ekkoch chon afalafal ra käeö pwal eü fos? (b) Menni poraus a pwäralo achochoon ekkewe chon afalafal?

¹³ Chommong chon afalafal ra mochen käeö eü mineföön fos lupwen ra silei pwe ra tongeni käeö ngeni chommong aramas. Pwal ekkoch ra pwapwaiti ar repwe fos ngeni aramas seni sokkopaten fönü are käkkäeö pwal eü fos. Emön mi angang lon eü branch ofes än Chon Pwäratä Jiowa lon öören Iurop a apasa: “Chommong seni ötiuen Iurop ra fokkun mochen aüseling.” Sia fokkun pwapwaiti ach älisi aramas mi mochen aüseling.​—Aisea 55:1, 2.

¹⁴ Sia wiisen pennukuolo manauach mi mecheres me apposa letipach ika ach angang epwe uwaöch. (Kol Fel 110:3) Ren chök awewe, ekieki mwo ussun ekkoch chon Pwäratä lon Japan. Ra amömölo imwer kewe mi mürinnö lon ewe telinimw ren ar repwe feilo ia chommong chon Saini ra nonnom ie. Ra mochen älisi ekkewe chon Saini ar repwe weweiti ewe Paipel. Lon Merika, pekin notou, chon afalafal ra säi lon chitosa ren eü are ruu awa ren ar repwe käeö ngeni aramas  mi silei fosun Filipin. Lon Norway, eü püpülü a käeö ngeni eü famili seni Afghanistan. Ra nöünöü ewe brochure Met Kot A Kütta Senikich? a lon fosun Norway me Merika. Ewe famili a älleaani ewe brochure lon fosun Persia, eü fos mi kan ngeni pwisin ar fosun Dari. Ra kapasfengen lon fosun Norway me Merika. Sia fokkun feiöch ren ach achocho me tipemecheres lupwen chon ekis ra etiwa ewe kapas allim.

15. Ifa ussun kich meinisin sia tongeni afalafal ngeni aramas mi eäni sokkopaten fos?

¹⁵ En mi mochen afalafal ngeni aramas mi eäni pwal ekkoch fos? Iwe, akkom kopwe ekieki ussun menni kewe fos ka kan rongorong lon ewe leenien om afalafal. Lupwen kopwe feilo afalafal, uwei reom ekkoch tract are brochure lon ekkena fos. Ewe kükkün puk Good News for People of All Nations, mi katowu lon 2004, a fokkun älisatä ach afalafala porausen ewe Muu ren an poraus mi mecheres me mürinnö lon chommong fosun fönüfan.​—Nengeni ewe lesen “Good News for People of All Nations,” lon pekin taropwe 32.

“Tongei Ekewe Chon Ekis”

16. Ifa ussun ekkewe elter repwe älisatä ewe afalafal ngeni chon ekis?

¹⁶ Sia tongeni älisi chon ekis lon leeniach pwal mwo nge lupwen sise käeö pwal eü fos. Jiowa a ereni nöün kewe aramas pwe repwe “tongei ekewe chon ekis.” (Tuteronomi 10:18, 19) Ren chök awewe, lon eü telinimw watte lon Merika, mei wor limu mwichefel lon eü chök Kingdom Hall. A wor kokkot lon chommong Kingdom Hall mei wor fitu mwichefel lon pwe kulokun ekkewe mwich lon Räninfel epwe siwil iteiten ier. Iwe nge, ekkewe elter lon ekkewe ekkoch mwichefel ra tipemecheres le akkota pwe ewe mwich lon fosun Saini epwe chüen fisitä akkom lon lesossorun Räninfel pokiten chommong chon fiti ena mwich ra angang lon restaurant nge epwe weires ar fiti mwich ika a fiffis mwirin leonowas are le pwin.

17. Epwe ifa ussun ach ekiek ika chienach a mochen mwöküt ren an epwe älisi aramas mi silei pwal eü fos?

¹⁷ Ekkewe elter mi tong ra kan apunga pwiich kewe mi mochen mwöküt ngeni pwal eü mwichefel ren ar repwe älisi aramas mi eäni pwal eü fos. Chon ewe mwichefel epwe pwosiiti ekkeei sense mi lipwäköch nge, ekkewe elter ra eäni ewe sokkun ekiek ussun ekkewe lon Listra me Aikoniom. Rese amwöchü Timoti lupwen epwe fiti Paul, inaamwo ika Timoti a fokkun älisi an we mwichefel. (Fofor 16:1-4) Pwal och, ekkewe mi emmweni ewe angangen afalafal rese osukosuk ren sokkofesennin ekiekin me eörenien are lapalapen ekkewe chon ekis. Nge, ra pwapwaiti sokkofesenniir me ra kütta ifa ussun epwe wor kinamwe lefilen aramas fän iten feffeitään ewe kapas allim.—1 Korint 9:22, 23.

18. Menni asam mi lap ngeni angang a suuk ngenikich?

¹⁸ Ewe oesini pwe ewe kapas allim epwe esilesilfeil ngeni “ekewe mwü mi sokola ar kapas” a pwöppwönüetä iei, nge a chüen watte ewe angang lusun. Fite ngeröü chon afalafal ra fen pwerelong lon “eu asam lap ngeni angang mi lamot.” (1 Korint 16:9) Iwe, sipwe käeö lon ewe lesen mwirin ei pwal ekkoch mettoch sipwe achocho ngeni ren ach sipwe älisi ekkewe chon ekis.

[Footnote]

En Mi Tongeni Awewei

• Ifa ussun sisap lifilifil aramas ussun chök Jiowa?

• Itä ifa ach ekiek ussun ekkewe aramas rese eäni ach fos?

• Ifa lamoten ach sipwe afalafal ngeni aramas lon pwisin ar fos?

• Ifa ussun sia tongeni pwäralo tong ngeni chon ekis?

[Ekkewe kapas eis fan iten ewe lesen]

[Map/​Sasing lon pekin taropwe 4]

Rom

KRIT

ESIA

FRIJIA

PAMFILIA

PONTUS

KAPPATOSIA

MESOPOTEMIA

MITIA

PARTIA

lLAM

AREPIA

LIPIA

ISIP

JUTIA

Jerusalem

[Bodies of water]

Setin Mediterranean

Setipar

Setichol

Noomun Persia

[Sasing]

Lon Pentekos 33 C.E., aramas seni 15 fönü fän nemenien Rom ra rongorong ewe kapas allim lon pwisin ar kewe fos

[Sasing lon pekin taropwe 6]

Chommong chon ekis ra mochen aüseling ngeni ewe poraus lon Paipel

[Sasing lon pekin taropwe 5]

Esissin won eü Kingdom Hall mi mak lon limu fos