Pwüngün An Epwe Wor Itach

MEI wor an emön me emön pwüüng an epwe wor itan. Lon Tahiti, ra pwal mwo nge eita emön mönükol inaamwo ika ese ffat iö seman me inan. Lon leenien mak it a tongeni ngeni ewe mönükol eü it me last name.

Nge a ussun itä pwe a wor emön ese tori ewe pwüüng pwe epwe wor itan. Ina i “Semach, ewe iteiten einang meinisin, lon lang o pwal won fonufan, ra angei iter seni.” (Efisus 3:14, 15) Chommong aramas rese mochen nöünöü iten ewe Chon Föratä mi mak lon ewe Paipel. Ra siwili itan ngeni ekkoch itelap, awewe chok ren “Kot,” “ewe Samol,” are “Samol mi Lapalap.” Iwe, ifa itan? Ewe soumak köl mi fel a pölüeni ena kapas eis: “En, mi iteni ewe SAMOL [Jiowa], en chok Ewe mi Fakkun Tekia won fonufan meinisin.”​—Kol Fel 83:18.

Orun ruu pükü ier loom, lupwen ekkewe misineri seni ewe London Missionary Society ra tori Tahiti, chon Polynesia ra fel ngeni chommong kot. Ekkena kot meinisin mei wor pwisin iter. Ruuemön me leir, ar kewe kot mi tekia seni meinisin, ra kör ngeniir Oro me Taaroa. Iwe, ekkewe misineri ra nöünöü ewe it mi pin, Iehova lon fosun Tahiti, ren ar repwe asokkalo ewe Koten ewe Paipel seni ekkewe ekkoch kot.

Ina popun, chommong aramas lon Tahiti ra rongorong me nöünöü ena it lupwen ra porausfengen me lupwen ra mak taropwe. Ewe kingen Tahiti, King Pomare II, mi nemenem lon ewe fansoun ekkewe misineri ra war, a nöünöü ena it fän chommong lupwen a mak taropwe. Iei sasingin nöün ewe king taropwe, a annetatä enletin ena poraus. Ei taropwe mi mak lon fosun Merika mi nom iei lon Ewe Leenien Iseis Pisek Auchea An Tahiti me Fönüan Kewe. leenien iseis pisek mi aüchea lon Tahiti. Ei taropwe a annetatä pwe ekkewe chon Tahiti lon ena fansoun rese oput ewe it mi pin. Pwal och, iten Kot a mak fän fite ngeröü lon ewe Paipel lon fosun Tahiti, mi katöwü lon 1835.

[Sasing lon pekin taropwe 32]

King Pomare II

[Credit Line]

King me taropwe: Collection du Musée de Tahiti et de ses Îles, Punaauia, Tahiti