Kot A Tongei Ekkewe Chinnap

SISE mäirü ren watteen ewe kirikiringaü ngeni chinnap ikenäi. Ewe Paipel a oesini pwe atun “ekkewe ran le sopolon” an ei otot mi ü ngeni Kot, aramas repwe “tongei pwisin ir, .  . . esap wor ar chen.” (2 Timoti 3:1-3) Ewe kapas lon fosun Kris mi affou “chen” a pwal tongeni wewe ngeni ewe tong lefilen chon eü famili. Mi fokkun enlet ewe oesini lon Paipel. Ena esin tong a kisikisilo ikenäi.

Jiowa a fokkun sokko seni chokkewe mi kirikiringaü ngeni ekkewe chinnap. A tongeer me aücheaniir. Sipwe ppii an a pwälo lon ewe Paipel.

“Chon Mas An Ekkewe Fefin Mi Ma Puluer”

Än Jiowa tong fän iten ekkewe chinnap a pwälo lon ewe Tesin Ipru. Lon Kol Fel 68:5, Tafit a apasa pwe Kot ewe “chon mas an ekkewe fefin mi ma puluer,” iwe, lape ngeniir fefin mi chinnap. a Lon pwal ekkoch Paipel, ewe kapas “chon mas” a chiyaku ngeni “soukapwung,” “chon tümünü,” me “atepwora.” A ffat pwe Kot a tongei ekkewe fefin mi mälo pwülüwer. Ren enletin, a mak lon ewe Paipel pwe Jiowa a fokkun song lupwen aramas ra kirikiringaü ngeniir. (Ekistos 22:22-24) Fefin mi mälo pwülüwer me chinnap mi tuppwöl meinisin ra fokkun aüchea ngeni Kot me nöün kewe chon angang. A iei ussun An Salomon Fos 16:31 a pwäri ekiekin Jiowa me nöün kewe aramas: “Meten mökür mi üwan epa mwärämwär mi ling, a fis ngeni eman mi manau fän pwüng.”

 Ina popun sisap mäirü pwe suföl ngeni chinnap ina eü kinikin mi lamot lon ewe Allük Kot a ngeni Israel. Iei eü allük: “Kopwe ütä me mwen eman mi pwech möküran o asamolu ekewe chinlap, kopwe meninitiei ngang ewe Samol mi Lapalap om we Kot.” (Lifitikos 19:32) Iwe, lon Israel, suföl ngeni chinnap a riri ngeni än emön chiechiöch ngeni Jiowa. Emön ese tongeni apasa pwe a tongei Kot ika a kirikiringaü ngeni chinnap.

Chon Kraist rese nom fän ewe Allükün Moses. Iwe nge, ir mi nonnom fän ewe “allukun Kraist” mi nemeni ar kewe föfför me ekiek. Ina popun repwe tongei semer kewe me iner me chinnap meinisin. (Kalesia 6:2; Efisus 6:1-3; 1 Timoti 5:1-3) Saminne Chon Kraist ra tongei aramas pokiten chök a allük ngeniir. Pwisin letiper a amwökütüü/r. Piter a apasa: “Oupwe fakkun tongfengen lefilemi seni lon letipemi.”—1 Piter 1:22.

Jemes a awewe won pwal eü popun sipwe tümünü ekkewe chinnap. A makkei: “Nge iei ewe sokkun fel mi limelimoch o pwechepwech fan mesen Kot ewe Sam, emon epwe äämwa ekkewe semirit mi mäsen, o pwal ekkewe fefin mi malo puluer, lon ar fansoun riaffou; o epwe tumunu pwisin i, pwe esap wor an tikitikipwul ren manauen fonufan.” (Jemes 1:27) Än Jemes poraus a achüngü letipach. A achema ngenikich pwe chinnap mi aüchea ngeni Jiowa.

Ina popun sap minne chök pwe sisap kirikiringaü ngeni chinnap. Sipwe tongeer me älisiir. (Nengeni ewe pwoor “Tong Mi Manau,” lon pekin taropwe 6-7.) Jemes a makkei: “Luku mi imu seni fofor a pwal malo.”—Jemes 2:26.

Aururuur “Lon Ar Fansoun Riaffou”

Mei wor pwal och mettoch sipwe käeö seni alon Jemes. Jemes a ereni chon Kraist pwe repwe tümünü fefin mi mälo pwülüwer “lon ar riaffou.” Ewe kapasen Kris mi chiyaku ngeni “riaffou” a wewe ngeni aurek, weires, are osukosuk pokiten minne a fiffis lon manauach. Chommong chinnap ra küna ekkeei sokkun osukosuk. Ekkoch ra pwos are letipechou pokiten minne rese chüen tongeni föri. Pwal mwo nge chinnap mi chüen tufichin angang ngeni Kot ra tongeni letipechou. Ekieki mwo pworausen Jon, b emön chon afalafala ewe Mwu mi tuppwöl ren lap seni 40 ier, nge 30 ier me leir a pioneer. Iei Jon a tori 80 ier. A erä pwe a letipechou fän ekkoch: “Fän chommong üa chechchemeni ekkewe mettoch mi mwääl üa fen föri. Itä pwe manauei epwe fen mürinnö seni ena.”

Letipen chokkewe repwe kinamwelo ika repwe chechchemeni pwe, inaamwo ika Jiowa mi unusöch nge, ese kütta pwe sipwe unusöch. A silei ach kewe mwääl, nge a mak lon ewe Paipel: “SAMOL, are kopwe chechemeni ekkewe tipis, Samol, io epwe tongeni uta?” (Kol Fel 130:3) Ewer, Jiowa ese chök küna ach kewe mwääl. A wesewesen nengeni met a nom lon letipach. Ifa ussun sia silei ena?

 King David ese unusüöch. Iwe, a tipis fän chommong. A makkei ekkeei kapas fän emmwenien Kot lon Kol Fel 139:1-3: “SAMOL, ka fen sotuniei, o ka sinei usi! Ka sinei ai fansoun momot, o pwal ai fansoun uta. Ka meefi usun ekiekin letipei seni touau. Ka fen kukutta ai we al, o pwal ai kokonelo, o ka sinei usun lapalapen ai fofor meinisin.” Ngünün Kot a emmweni ekiekin Tafit pwe epwe makkei ei poraus mi affata pwe Jiowa a tongeni tölü seni tupuwan ekkewe mettoch mi ngaü sia fen föri nge chechchemeni ach kewe föfför mi mürinnö chök.

Semach mi ümöümöch a chechchemeni me aücheani ach kewe föfför mürinnö ika sia tuppwöl ngeni i. Alon ewe Paipel, Kot a apasa pwe ika a mönüki ach kewe föfför me ewe tong sia fen pwäri fän itan, iwe, ina eü föfför ese pwüng.—Ipru 6:10.

“Ekkewe Mettochun Lom Ra Fen Morelo”

Me ren ewe Paipel, ekkewe riäfföün chinnap esap letipen Kot. Aramas ra küna riäfföün chinnap mwirin ewe aewin pean aramas ra ü ngeni ewe Chon Förata. (Keneses  3:17-19; Rom 5:12) Ei riafföü epwe wesifocholo.

Le poputään ei pworaus, sia fen käeö pwe ekkewe mettoch mi ngaü mi fiffisitä lon ei fansoun, kapachelong kirikiringaü ngeni chinnap, ra annetatä pwe sia manau iei “lon ekkewe ran le sopolon” an ei otot mi ngaü. (2 Timoti 3:1) Kot a akkota pwe epwe unusen awesalo ekkewe liwinin tipis, kapachelong ewe riäfföü aramas ra meefi pokiten chinnap me mälo. Iei alon ewe Paipel: “[Kot] epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.”—Pwarata 21:4.

Lon än Kot we fönüfan sefö, metekin chinnap epwe fen morolo. Esap pwal wor kirikiringaü ngeni chinnap. (Mika 4:4) Pwal mwo nge ekkewe mi mälo Kot a chechchemeniir repwe manausefäl, pwe repwe tufichin manau tori feilfeilo won eü paratis won fönüfan. (Jon 5:28, 29) Lon ena fansoun, epwe fokkun pwälo ükükün än Kot tongei ekkewe chinnap me aramas meinisin mi älleasochisi i.

[Footnote]

[Pwoor/​Sasing lon pekin taropwe 6, 7]

Tong Mi Manau

Ekkewe elter lon ekkewe mwichefelin Chon Pwäratä Jiowa ra akkom le älisi ekkewe chinnap lon ewe mwichefel. Ra äfänni än Piter kapas: “Oupwe tutumunu noun Kot kewe siip, ekkewe mi nonnom fan nemeniemi.” (1 Piter 5:2) Met a kapachelong lon wiser le tümünü nöün Kot kewe siip ren kaworen älillis lon pekin aion fän iten ekkewe mi chinnap?

A lamot pwe ekkewe elter repwe mosonottam me äämwa emön chinnap fän fitu ren ar repwe silei an kewe osupwang. Eli ewe chinnap a osupwangen älillis ren lo kamö me alimelim, feffeilo fiti mwich, älleani Paipel me ekkewe puk me chassi, me pwal chommong mettoch. Lupwen ewe mwichefel a tufichin awora älillis, epwe kawor ren eü kokkot mi nukuchar. c

Iwe nge, met epwe fis ika emön chinnap lon ewe mwichefel a fokkun osupwang, eli pokiten nafangaüen moni? Akkom, me ren ewe poraus lon 1 Timoti 5:4, ekkewe elter repwe ppii ika mei wor nöün are aramasen ewe chinnap mi tongeni awora älillis: “Ika mi chuen wor ren emon leir noun kewe, are noun noun kewe, iwe, repwe kaeo lom usun foforun Soulang ngeni lon pwisin ar famili, pwe repwe liwini och ar alisi ngeni semer kewe me iner. Pun ei sokkun fofor mi murinno fan mesen Kot.”

Eli ewe chinnap a osupwangen emön epwe älisi pwe epwe silei ika mi fich ngeni alillis seni ewe mwu. Ekkoch lon ewe mwichefel repwe tongeni älisi i? Iwe, ika esor älillis seniir, ekkewe elter repwe filatä ika ewe chinnap a fichiiti älillis seni ewe mwichefel. Seni met Paul a mak ngeni Timoti, sia silei pwe fän ekkoch ewe mwichefelin loom a älisi ekkoch chinnap: “Kosap makketiu lon taropwe iten emon fefin mi malo puluan, are esaamo tori wone ier, o are a pupulu lap seni fan eu. Nge are kopwe makketiu iten emon, iwe, epwe pwal iteulo ren an kewe fofor murinno, usun chok emon mi fen tutumunu noun kewe semirit, o etiwa wasola, o tolu pechen ekkewe aramas mi fel, o alisi ir ekkewe mi riaffou, o achocho ngeni sokkun fofor-murinno meinisin.”​—1 Timoti 5:9, 10.

[Footnote]

[Sasing lon pekin taropwe 5]

Torkas a älisi ekkewe fefin mi mälo pwülüwer.​—Fofor 9:36-39.