“Om Kewe Afalafal Iei Ekkewe Mettoch Üa Pwapwa Ren”

“Pun minne mi makketiu lom, a makketiu pwe sipwe kaeo.”​—ROM 15:4.

1. Ifa ussun Jiowa a fönöükich, iwe, met popun an kewe kapasen achechchem ra lamot ngenikich?

 JIOWA a awora kapasen achechchem pwe epwe älisikich le pwäkini ekkewe osukosuk lon ei fansoun weires. Ekkeei kapasen achechchem a torikich lupwen sia älleani ewe Paipel, are lupwen sia aüseling ngeni ekkewe afalafal me pworaus seni pwiich kewe atun ach kewe mwich. Sia fen käeö chommong lein ekkewe pworaus sia älleani me rongorong lon ekkeei fansoun. Iwe nge, pokiten sia kan mönüki pworaus, a lamot ach ekkenniwili met sia fen käeö ussun än Jiowa kewe kokkot, allük, me emmwen. Sia pwapwaiti än Kot kewe kapasen achechchem. Ra apöchökkülakich ren ar achema ngenikich ekkewe popun sia atipeeüfengenni manauach me letipen Kot. Ina popun, ewe soumakkei kölfel a kölu: “Om kewe afalafal, iei ekkewe mettoch ua pwapwa ren.”​—Kol Fel 119:24.

2, 3. (a) Met popun Jiowa a mochen pwe pworausen manauen aramas repwe nom lon Paipel? (b) Menni pworaus seni Paipel sipwe käeö lon ei lesen?

² Än Kot we Kapas mi manaman inaamwo ika a mak chommong ier me loom. (Ipru 4:12) Paipel a äiti ngenikich ewe enlet ussun pworausen manauen aramas. Inaamwo ika eörenien me ekiekin aramas ra siwil, nge fän chommong, ekkewe osukosuk a torikich ra ussun chök met a tori aramasen loom. Chommong pworaus ussun aramas lon ewe Paipel ra achüngü letipach me älisikich pun ra pwäralo tong me tuppwöl ngeni Jiowa fän sokkopaten osukosuk mi chou. Pwal ekkoch pworaus ra affata ekkewe sokkun föfför Kot a oputa. Jiowa a tümünü pwe ekkena pworaus ussun aramas mi mürinnö are aramas mi ngaü, repwe fen mak lon Paipel fän iten ar repwe öüröürakich. Ewe aposel Paul a makkei: “Pun minne mi makketiu lom, a makketiu pwe sipwe kaeo, pwe epwe wor rech ach apilukuluk allim ren likiitu o aururu me ren ekkewe puk.”​—Rom 15:4.

³ Sipwe käeö ülüngät pworaus lon ewe Paipel: pworausen än Tafit föfför ngeni Saul, pworaus ussun Ananias me Safira, me pworaus ussun Josef me pwülüwen Potifar. Sipwe käeö ekkoch lesen mi fokkun aüchea seni ekkeei pworaus.

Tuppwöl Ngeni Än Kot Kewe Kokkot

4, 5. (a) Met sokkun osukosuk a ppiitä lefilen King Saul me Tafit? (b) Ifa ussun Tafit a poluen ngeni än Saul oputa i?

⁴ King Saul ese tuppwöl ngeni Jiowa, iwe, ese fich ngeni an epwe nemeni Nöün kewe aramas. Ina popun Kot a pöütalo Saul. Iwe, a ereni ewe soufos Samuel pwe epwe epiti Tafit pwe epwe king lon Israel. Lupwen aramas ra mwareiti Tafit pokiten an pwora, Saul a poputä le ekieki pwe Tafit emön chon appölua. Saul a sotun nielo Tafit fän fitu nge Tafit ese ninniilo pun Jiowa a tümünü i.​—1 Samuel 18:6-12, 25; 19:10, 11.

⁵ Ren chommong ier, Tafit ese tongeni nonnom lon wesetan fönüan. Chienan Tafit kewe ra pesei ngeni an epwe nielo Saul lupwen a tufichin föri. Ra apasa pwe Kot a isetiu  chon koputaan fän pöün. Nge Tafit ese aüseling ngeniir pokiten an tuppwöl ngeni Jiowa me an süföl ngeni wisen Saul, ewe kingen nöün Kot kewe aramas. Jiowa a fen seikatä Saul pwe epwe kingen Israel, ika met? Iwe, Jiowa epwe pwal angei seni Saul wisan lon ewe fansoun mi fich. Tafit a ekieki pwe esor an pwüüng an epwele angolong lon ei osukosuk. Mwirin an a föri mettoch meinisin ükükün an tufich le chächchäri letipen Saul pwe esap chüen oput i, Tafit a apasa: “Üa silei pwe Kot epwe püsin niela, ika epwe tori an mäla, ika epwe mäla lon maun. Ewe Samol mi Lapalap epwe epeti ai üpwe angeetä won nöün we siles mi nom asen möküran me an rumen koluk pwe sipwe feila.”​—1 Samuel 24:3-15; 26:7-20.

6. Met popun pworausen Tafit me Saul a lamot ngenikich?

⁶ Sia käeö eü lesen mi lamot seni ei pworaus. Ka fen ekieki ika met popun osukosuk ra ppiitä lon ewe mwichefel? Neman ka küna pwe föfförün emön lon ewe mwichefel ese fich ngeni emön chon Kraist. Eli ese kon ngaü met a föri, nge a aosukosukok. Met kopwe föri? Pokiten ka tongei i, me pokiten om tuppwöl ngeni Jiowa, neman kopwe awora älillis ren om kapas pwöteete ngeni. Nge met ika ese pwäk ewe osukosuk? Ika ka fen föri mettoch meinisin ükükün om tufich, kopwe chök likiti ngeni Jiowa. Ina met Tafit a föri.

7. Ifa ussun sipwe äppirü Tafit lupwen aramas ra pwüngüngaü me lifilifil ngenikich?

⁷ Neman ka osukosuk pokiten än aramas pwüngüngaü are ra lifilifil pokiten om lamalam. Ese watte met kopwe tongeni föri le pwäkini ekkeei osukosuk lon ei fansoun. A fokkun weires ena, nge minne Tafit a föri lupwen aramas ra föfföringaü ngeni a äiti ngenikich eü lesen. Ekkewe kölfel Tafit a makkei rese chök apworausa ussun an kewe iotek pwe Kot epwe tümünü seni Saul. Ra pwal pwäralo an tuppwöl ngeni Jiowa me an tong fän iten lingeloon iten Kot. (Kol Fel 18:1-6, 25-27, 30-32, 48-50; 57:1-11) Tafit a tuppwöl ngeni Jiowa inaamwo ika an Saul föfför ese pwüng ngeni ren chommong ier. Sipwe pwal tuppwöl ngeni Jiowa me an we mwicheich fän pwüngüngaü are ese lifilifil met aramas ra föri. Sia lükülük pwe Jiowa a silei ussun met a fiffis.​—Kol Fel 86:2.

8. Met ekkewe Chon Pwäratä Jiowa lon Mozambique ra föri lupwen ra küna sossotun ar tuppwöl ngeni Jiowa?

⁸ Ekkewe chon Kraist lon Mozambique ra isetiu eü leenien appiru lon ach ei fansoun ren ar amwöchü ar tuppwöl ngeni Jiowa fän sossot. Lon 1984, sounfiu mi ü ngeni mwuun fönüer ra maunei sopwur kewe. Ra solä, keni imw, me nielo aramas. A ussun itä pwe esor och mettoch ekkeei chon Kraist ra tufichin föri pwe repwe tümünü pwisin manauer. Ekkewe sounfiu ra echimwa  aramas lon ewe leeni ar repwe fitiir me älisiir. Chon Pwäratä Jiowa ra meefi pwe ar föri ena esap tipeeü ngeni ar lükü pwe chon Kraist resap pekini eü pekin lon maun. Ekkewe sounfiu ra fokkun lingeringer. Inik som Chon Pwäratä Jiowa ra ninniilo lon ena fansoun osukosuk, iwe nge, pwal mwo nge lupwen repwele mälo, rese likitalo ar tuppwöl. a Ussun chök Tafit, ra likiitu fän pwüngüngaü, nge lo, lo, lo, ra pworacho ngeni.

Eü Kapasen Öüröür

9, 10. (a) Ifa ussun ekkoch pworaus lon Paipel repwe älisikich? (b) Met popun föfförün Ananaias me Safaira a ngaü?

⁹ Pworausen ekkoch aramas lon ewe Paipel a öüröürakich ussun ekkewe sokkun föfför sipwe ti senikich. Pwüngün pwe ewe Paipel a masou ren chommong pworaus ussun aramas, pwal mwo nge nöün Kot kewe chon angang, ra föri minne mi mwaäl me ra küna pwününgaüen ar kewe föfför. (1 Korint 10:11) Eü me leir pworausen Ananaias me Safaira, eü pean pwüpwülü mi choni ewe mwichefel lon ewe aewin senturi lon Jerusalem.

¹⁰ Mwirin Pentekos 33 C.E., a lamot pwe ekkewe chon Kraist repwe awora älillis lon pekin aion ngeni ekkewe mineföön chon lükü chon ekis mi nomolo lon Jerusalem, pwe repwe küna feiöch seni ar chiechi ngeni ekkewe aposel. Ekkoch lon ewe mwichefel ra amömölö fönüer pwe esor epwe osupwang. (Fofor 2:41-45) Ananaias me Safaira ra amömölo eü fönüer, iwe, ra ngeni ekkewe aposel kinikinin liwinin ewe fönü. Iwe nge, ra apasa pwe ina unusen ewe moni ra angei seni ar amömölo ewe fönü inaamwo ika ra fen amwöchü och seni liwinin. Pwüngün pwe ükükün watteen are kükkünün ewe moni repwe liffangolo, filien Ananaias me Safaira. Nge mi ngaü ewe popun ra mochen liffangolo ewe moni, iwe, rese wenechar. Ra mochen einga ewe mwichefel me efisi ewe ekiek pwe ar liffang a watte seni minne ra wesewesen wattiu. Ewe aposel Piter, fän emmwenien ewe ngün mi fel, a pwäralo ar föför mi pworongaü me likotupotup. Iwe, Jiowa a niirelo.​—Fofor 5:1-10.

11, 12. (a) Awewe won ekkoch kapasen achechchem seni Paipel ussun wenechar. (b) Ikkefa ekkewe feiöch epwe toto rech pokiten sia wenechar?

¹¹ Amwo pworausen Ananaias me Safaira epwe isetiu eü leenien appirü ngenikich ika  sia ekiekin kapas chofona pwe aramas repwe ekieköch ussuch. Sia tongeni otupu aramas nge sise tongeni otupu Jiowa. (Ipru 4:13) Fän chommong, ewe Paipel a pesekich pwe sipwe wenechar pun esap chüen wor chon kapas chofona won ewe fönüfan mi limelimöchülo. (An Salomon Fos 14:2; Pwarata 21:8; 22:15) A ffat ewe popun sipwe kapas wenechar. Ewe chon achöüfetälei kapas chofona meinisin, ina i Setan ewe Tefil.​—Jon 8:44.

¹² Ach wenechar fansoun meinisin a atoto rech chommong feiöch. Mwelien letipach a limelimöch me sia menemenöch pokiten aramas ra lükülük woch. Fän chommong, pokiten ra wenechar, ekkewe chon Kraist ra küna angang are rese katowu seni ar angang. Iwe nge, iei ewe feiöch mi lamot seni ena, ach sipwe wenechar a atufichi ach chiechifengen me ewe Kot mi Lapalap seni meinisin.—Kol Fel 15:1, 2.

Akkamwöchü Limelimöch

13. Ifa ewe osukosuk a tori Josef, iwe, met a föri?

¹³ Josef, nöün Jekop, a wiliiti chon kichiniwel lupwen a 17 ierin. Lo, lo, lo, a angang fän iten emön nouwisen Isip itan Potifar. Pwülüwen Potifar a sani Josef. A mochen onnut ren Josef, emön aluwöl mi ätöch. Iwe, rän me rän a ereni Josef: “Kopwe kon rei.” Josef a towau seni an we famili. Aramas rese silei i lon ena fönü. Aramas resap pwal silei ika a fen onnut ren ei fefin. Nge lupwen pwülüwen Potifar a turufi Josef, ätewe a sü.​—Keneses 37:2, 18-28; 39:1-12.

14, 15. (a) Met popun pworausen Josef a lamot ngenikich? (b) Met popun emön fin Kraist a kilisou pwe a älleasochisi än Kot kewe kapasen öüröür?

¹⁴ Josef a märitä lon eü famili mi niueiti Kot, me a weweiti pwe a ngaü föfförün chufengen lefilen ruuemön rese pwüpwülüfengen. Josef a apasa: “Ifa usun, üpwe föri och föför mi fokun ngau o tipis ngeni Kot?” Ese mwääl pwe än Josef silei met Kot a allük ngeni aramas lon Ichen a emmweni met a föri. Kot a allükü pwe emön epwe pwülüweni emön chök. (Keneses 2:24) Nöün Kot kewe aramas repwe küna älillis seni ar ekkekieki ussun met Josef a föri lupwen repwe sereni ena osukosuk. Lon ekkoch leeni, chommong aramas ra ekieki pwe esor ngaüen lisowu mwääl. Ina popun, chienen ekkewe säräfö ra kan turunufaseer ika rese mochen lisowu mwääl. Iwe, chommong lein ekkewe mi watte ra kan lisowu mwääl. Ina ewe popun pworausen Josef eü minen achechchem mi aüchea fän itach. Än Kot allük a chüen apasa pwe lisowu mwääl me mocheisou ra wewe ngeni tipis. (Ipru 13:4) Chommong  mi kkuf ren lisowu mwääl ra tipeeü pwe mei wor popun mi lamot ach sisap lisowu mwaäl. Uwan lisowu mwääl, säü, mwelien letip mi mengiringir, lolowo, pwopwoon lipich, me semmwenin sikepwach. Ewe Paipel a achema ngenikich pwe, emön mi föfföri lisowu mwääl a “tipis ngeni pwisin inisin.”​—1 Korint 5:9-12; 6:18; An Salomon Fos 6:23-29, 32.

¹⁵ Jenny, b emön Chon Pwäratä Jiowa mi lipich, a wor popun an epwe kilisou ren än Jiowa kewe achechchem. Lon an leenien angang, chienan chon angang mi ätöch a sani i. Nge lupwen Jenny a pwäratä pwe ese sani, ätewe a chök alapalo an charameni i. Jenny a apasa: “A weires äi üpwe amwöchü ai limelimöch pokiten sia kan pwapwa lupwen emön mwän a sanikich.” Nge, Jenny a miritiiti pwe ewe mwän a chök mochen otupu i pwe epwe tongeni asika ngeni chienan kewe pwe Jenny emön me lein ekkewe chommong fefin a onnut rer. Lupwen Jenny a meefi pwe an mochen ü ngeni ätewe a apwangapwangelo, a tingorei Jiowa pwe epwe älisi i le amwöchü an tuppwöl. Jenny a küna pwe ekkewe mettoch a käeö lupwen a kütta älillis lon ewe Paipel me lon nöüch kewe puk me chassi, ra ussun chök kapasen öüröür mi älisatä an mammasa. Eü me lein ekkena kapasen öüröür, ina pworausen Josef me pwülüwen Potifar. Jenny a pwal apasa: “Ükükün ai achema ngeni pwisin ngang ussun watteen äi tongei Jiowa, esor popun üpwe niuokkus pwe üpwe föri ei mettoch mi fokkun ngaü me tipis ngeni i.”

Älleasochisi Än Kot Kewe Kapasen Fön!

16. Ifa ussun sipwe küna feiöch seni ach enniwili me ekkekieki ussun manauen ekkewe aramas lon ewe Paipel?

¹⁶ Öukich meinisin sipwe tongeni alapalo ach aücheani än Kot kewe allük ren ach achocho le weweiti ewe popun a akkota pwe ekkoch pworaus repwe mak lon Paipel fän itach. Met ra äiti ngenikich? Ikkefa lapalapen ekkewe aramas lon Paipel sipwe appirü are ti senikich? Pworausen chommong aramas ra mak lon än Kot we Kapas. A lamot pwe meinisin mi tongei emmwen seni Kot repwe amäratä ar mochen angei ewe tipatchem mi amanauakich, pachelong ekkewe lesen sia käeö seni ekkewe pworaus Jiowa a ngenikich lon ewe Paipel. Fän chommong a wor pworaus ussun aramas lon ei chassi mi äitikich ekkoch lesen mi aüchea. Pwata kese enniwili ekkoch ekkena pworaus?

17. Ifa meefiom ussun än Jiowa kewe kapasen achechchem, iwe, met popun?

¹⁷ A ifa me watteen ach kilisou fän iten ewe tong Jiowa a pwäralo ngeni chokkewe mi achocho le föri letipan! Sise unusöch. Ekkewe mwän me fefin lon Paipel rese unusöch. Iwe nge, pworausen ar kewe föfför eü minen älillis ngenikich. Ren ach aüseling ngeni än Kot kewe fön, iwe, sipwe tümünükich seni ach föri ekkewe mettoch mi efeiengaüakich, me sipwe tongeni appirü ekkewe föfför mi mürinnö än ekkewe mi feffetäl won ewe alen pwüng. Ika sipwe föri ena, iwe, sipwe tongeni köl fengen me ewe soumak kölfel: “Mi feioch ir mi alleasochisi an kewe afalafal, ir mi kukutta i seni lon unusen letiper. Nguni a alleasochisi om kewe afalafal, ua fakkun aucheani ir chapur.”​—Kol Fel 119:2, 167.

[Footnote]

Ifa Ussun Kopwe Pölüeni?

• Met sia käeö seni än Tafit ekiek ussun Saul?

• Met ewe pworaus ussun Ananais me Safira a äitingenikich?

• Met popun pworausen manauen Josef a lamot ngenikich ikenäi?

[Ekkewe kapas eis fan iten ewe lesen]

[Sasing lon pekin taropwe 24]

Met popun Tafit ese mut ngeni pwe Saul epwe ninniilo?

[Sasing lon pekin taropwe 25]

Met sia käeö seni ewe pworausen Ananaias me Safaira?

[Sasing lon pekin taropwe 26]

Met a älisi Josef pwe epwe oput ewe föfförun lisowu mwääl?