Ekkekieki Öchün Än Jiowa We Mwicheich

“Äm aipwe üren feiöch ren ekewe mettoch mi mürina me lon imwom we mi pin.”​—KÖLFEL 65:4.

1, 2. (a) Ekkewe kokkot fän iten ewe imwen fel repwe atoto met ngeni nöün Kot kewe aramas? (b) Met Tafit a awora fän iten kaütään ewe imwen fel?

 TAFIT emön lein ekkewe aramas mi fakkun iteföülo a mak pworauser lon ewe Tesin Ipru. Ena chon masen siip, chon nikättik, soufos, me king a lükü Jiowa Kot ren unusen letipan. Än Tafit ririöch ngeni Jiowa a efisatä an mochen aüetä eü imw fän iten Kot. Ena imwen fel epwe wiliti ewe iolap fän iten fel mi enlet lon Israel. Tafit a silei pwe ekkewe kokkot fän iten ena imwen fel repwe atoto chengel me feiöch ngeni nöün Kot kewe aramas. Ina minne, iei än Tafit köl: “Feiöchün chokewe ka [Jiowa] filiretä o emwenireto pwe repwe nom lon leniom mi pin. Äm aipwe üren feiöch ren ekewe mettoch mi mürina me lon imwom we mi pin.”​—Kölfel 65:4.

² Ese mumutä ngeni Tafit an epwe emmweni kaütään imwen Jiowa we. Nge, nöün we, Solomon, a kefilitä ren ena wis mi aüchea. Tafit ese ngününgün pokiten an a mumutä ngeni pwal emön ena wis pwisin i a fakkun tipeni. Ewe mettoch mi lamot seni meinisin lon letipan, ina kaütään ewe imwen fel. A peni ena angang ren unusen letipan ren an ngeni Solomon liosun ena imw a angei seni Jiowa. Pwal och, Tafit a akkota fite ngeröü chon Lifai lon fitu tettelin angang me a liffangelo chommong kolt me silfer ren kaütään ena imwen fel.​—1 Kronika 17:1, 4, 11, 12; 23:3-6; 28:11, 12; 29:1-5.

3. Met ekiekin nöün Kot kewe chon angang ussun ekkan kokkot fän iten fel mi enlet?

³ Chon Israel mi tuppwöl ra peni ekkewe kokkot fän iten fel mi enlet ren imwen Kot we. Pokiten kich chon angang ngeni Jiowa lon ei fansoun, sia pwal peppeni minne mi kawor lon ewe kinikinin än Jiowa we mwicheich a nom won fönüfan fän iten än aramas fel ngeni Kot. Ren ach föfföri ena, sia kan pwäratä pwe ekiekich a ussun chök ekiekin Tafit. Sap minne kich sou ngününgün. Nge, sia kan ekkekieki öchün än Kot we mwicheich. En mi ekkekieki ekkewe chommong mettoch mi mürinnö sia tongeni enletin meefi kilisou rer? Sipwe käeö ussun ekkoch leir.

 Kilisou ren Ekkan Chon Emmwen

4, 5. (a) Ifa ussun “ewe chon angang mi tuppwel o tipatchem” a akkapwönüetä wisan? (b) Ifa meefien ekkoch Chon Pwäratä Jiowa ussun ewe möngöön ngün ra akkangei?

⁴ A wor popun mi nüküchar ach sipwe meefi kilisou ren “ewe chon angang mi tuppwel o tipatchem,” ewe mi seikitä me ren Jises Kraist pwe epwe wisen tümünü pisekin kewe won fönüfan. Ena mwichen chon angang, weween, ewe mwichen chon Kraist mi kepit, a wisen emmweni ewe angangen afalafala ewe pworaus allim, a akkota mwich fän iten ach fel ngeni Kot, me a föri ekkan puk mi longolong won Paipel lon lap seni 400 sokkun fos. Fite milion aramas won unusen fönüfan ra äkkäeä ena “mongo lon fansoun mi fich,” möngöön ngün, fän kilisou. (Mattu 24:45-47) Ese fakkun wor popun ach sipwe ngününgün ussun ena.

⁵ Ren chommong ier, emön Chon Pwäratä Jiowa mi chinnap itan Elfi a küna aururun letipan me älillis ren an lefareni ewe fön seni Paipel a mak lon ekkan puk ewe mwichen chon angang a föfföri. Iei makkeien Elfi pokiten watteen an kilisou: “Epwe ifa me watteen äi osupwang ika esor än Jiowa mwicheich.” Peter me Irmgard ra pwal angang ngeni Kot ren chommong ier. Irmgard a apasa an kilisou ren mettoch meinisin mi kawor me ren “än Jiowa we mwicheich mi tongekich me aücheanikich.” A wor lein ekkena puk ekkewe sokkun mi för fän äsengesin aramas mi sokkolo osupwanger, awewe chök ren chon mesechun are chon selingepüng.

6, 7. (a) Mei fet ewe kokkotun emmwen fän iten ekkewe mwichefel won unusen fönüfan? (b) Met ekkoch aramas ra apasa ussun ewe kinikinin än Jiowa we mwicheich a nom won fönüfan?

⁶ Ewe Mwichen Sou Nemenemen än Chon Pwäratä Jiowa a tupuni ena ‘chon angang mi tuppwel,’ iwe, chon ei kükkün mwich, ir mwän mi kepit ren ewe ngün mi fel. Ir mi angang lon ofesilapen Chon Pwäratä Jiowa lon Brooklyn, New York. Ena Mwichen Sou Nemenem ra kan seikatä nöün Jiowa kewe chon angang mi äsimaü pwe repwe wisen angang lon ekkewe kisin ofes mi emmweni angangen lap seni 98,000 mwichefel won unusen fönüfan. Ekkan mwän mi eäni ekkewe tufich mi affatetiu lon Paipel ra seikitä ngeni elter me ministerial servant lon ekkena mwichefel. (1 Timoti 3:1-9, 12, 13) Ekkan elter, ir chon emmwen, iwe, fän tong ra mammasa än Kot we mwichen siip mi nom fän ar tümün. A ifa me watteen feiöchüch pokiten kich chon ena mwichen siip, me ach küna ewe tong me tipeeü mi nom lein “unusen ewe mwicheichen pwipwi”!​—1 Piter 2:17; 5:2, 3.

⁷ Ese lien wor ngününgün leich, nge fän chommong aramas ra apasa ar kilisou ren ewe emmwen seni Paipel ekkan elter ra awora  ngeniir fän tong. Ren chök awewe, iei pworausen Birgit, emön fin Kraist mi pwüpwülü, iwe, a lap seni 30 ierin. Le säräföön, a ngaü chiechian kewe, iwe, a lükün föfföringaü. Nge ffatöchün ewe fön seni Paipel ekkewe elter ra awora ngeni me älillisin chienan kewe chon lükülük ra cheri neminnen pwe esap feiengaü. Ifa meefien Birgit iei? Iei alon: “Ua fakkun kilisou pwe ngang mi chüen nonnom lon än Jiowa we mwicheich mi fakkun mürinnö.” Iei alon Andreas, a 17 ierin: “Iei enletin än Jiowa mwicheich, ewe mi mürinnö seni meinisin won fönüfan.” Sisap itä meefi kilisou ren öchün ei kinikinin än Jiowa we mwicheich, ewe mi nom won fönüfan?

Chokkan Mi Wisen Emmwenikich Rese Unusöch

8, 9. Mei fet föfförün ekkoch me lein piloon Tafit kewe, me met meefien Tafit föfförür kana?

⁸ Mi enlet pwe chokkan mi seikitä ngeni ewe wis chon emmwen fän iten fel mi enlet rese unusöch. Ir meinisin ra kan mwäälilo, me ekkoch leir ra kan achocho ngeni ar repwe amoielo ar kewe apwangapwang mi fen nomottam. Sipwe itä mängaü pokiten ena? Aapw. Lon Israel loom loom, aramas mi eäni wis tekia ra tipis watte. Ren chök awewe, le alüwölün Tafit, a wisen chon nikättik ngeni King Saul fän iten an epwe akinamwei letipan mi fakkun riäfföü. Mwirin, Saul a sotuni le nielo Tafit, iwe, lo lo lo, a sü seni pwe ete mälo.​—1 Samuel 16:14-23; 18:10-12; 19:18; 20:32, 33; 22:1-5.

⁹ Pwal fitemön chon Israel ra fakkun chüngaü. Ren chök awewe, nöün Tafit we meilapen sounfiu itan Joap a nielo märärin Saul we itan Apner. Apsalom a sorongaü ngeni seman we, Tafit, fän iten an epwe wisen king. Iwe, nöün Tafit we sou fön itan Ahitofel a chüngaü ngeni. (2 Samuel 3:22-30; 15:1-17, 31; 16:15, 21) Iwe nge, Tafit ese ngününgünükkis, ese pwal likiti fel mi enlet. Nge, a enlet pwe föfförün a mwäälfesen me ena. Fansoun weires a amwökütü Tafit pwe epwe kamwöchünnük won Jiowa me ekiekin a ussun we chök me ewe atun an a sülo seni Saul. Lon ena fansoun, iei än Tafit köl: “Kopwe ümöümöch ngeniei, ai Kot, kopwe ümöümöch ngeniei, pun üa eänuk lenien op. Üa op fän nürün poum, tori ewe mölümölün feiengau a feil seniei.”—Kölfel 57:1.

10, 11. Emön chon Kraist itan Gertrud a küna met le föpwülün, me met a apasa ussun mwäälin chienan kewe chon lükülük?

¹⁰ Esor popun ach sipwe ngününgün ussun chüngaüen aramas lon än Kot we mwicheich lon ei fansoun. Sap minne Jiowa are nöün kewe chonläng are ekkan chon mas repwe tongeni mut ngeni aramas mi chüngaü are föfföringaü ar repwe nonnom lon ewe mwichefelin Kraist. Iwe nge, oukich meinisin sia kükküna än aramas kewe apwangapwang, weween, pwisin ach me än ekkewe lusun nöün Kot chon angang.

¹¹ Gertrud emön mi fel ngeni Jiowa fansoun langattam. Le föpwülün, a wor och tipimwääl ngeni pwe a likotuputup me esap i emön chon afalafala pworausen ewe Mwu full-time. Met a föri? Gertrud a itä ngününgün ussun? Aapw. Ekis mwen an we mälo lon 2003 lupwen a ierini 91, a nesöküriti manauan, iwe, iei alon: “Seni minne ua küna, üa weweiti pwe inaamwo ika aramas ra kan mwäälilo, nge Jiowa a ekkemmweni an we angang mi fakkun lapalap ren an nöünöü kich aramas, nge esor emön leich mi unusöch.” Lupwen Gertrud a küna osukosuk pokiten mwäälin nöün Kot kewe chon angang, a iotek ngeni Jiowa ren unusen letipan.

12. (a) Ifa ewe leenien äppirü mi ngaü ekkoch chon Kraist lon ewe äeüin senturi ra isetiu? (b) Met sipwe ekilapei?

¹² Pokiten chon Kraist meinisin rese unusöch, pwal mwo nge ir mi fakkun tuppwöl me tinikken, iwe, lupwen emön mi seikitä ngeni och wis epwe mwäälilo, sipwe sopwelo le “föri [ach] angang meinisin, nge [sisap] lal are anini.” (Filipai 2:14) Epwe ifa me watteen ngaüen ach sipwe äppirü föfförmwäällin ekkoch lon ewe mwichefelin Kraist lon ewe äeüin senturi! Me ren ewe chon käeö Juta, sense mi chofona  lon ena fansoun ra “turunufasei än Kot nemenem o esita ekewe meilap lon läng mi wor ar ling.” Pwal och, ekkena chon föfföringaü, ir “chon ngününgününgaü.” (Juta 8, 16) Amwo sipwe sü seni alen chon ngününgün me ekilapei ekkewe mettoch mi mürinnö mi toto rech seni ewe ‘chon angang mi tuppwel.’ Sipwe aücheani öchün än Jiowa we mwicheich me sipwe ‘föri ach angang meinisin, nge sisap lal are anini.’

“Ei Kapas Mi Änenneiruk”

13. Met meefien ekkoch ussun än Jises Kraist kewe afalafal?

¹³ Ekkoch lon ewe äeüin senturi ra ngününgünü chon seikitä ngeni wis, nge pwal fitemön ra ngününgünü än Jises kewe afalafal. Iei alon Jises lon Johannes 6:48-69: “Iö a mongö fitukei o ünümi chai a eäni manau esemüch.” Lupwen ra rong ekkena kapas, “chomong lein nöün kewe chon kaiö . . . ra üra, ‘Ei afalafal a kon pöchökül. Iö a tongeni aüselinga?’” Jises a silei pwe “ra ngününgün usun an kewe kapas.” Pwal och, “seni ei fansoun chomong me lein nöün Jesus kewe chon kaiö ra kul seni o resap chüen mochen tapwela mürin.” Nge sap minne meinisin chon käeö ra ngününgün. Nengeni mwo minne a fis lupwen Jises a eäni ei kapas eis ngeni ekkewe 12 aposel: “Ifa usun, ami ousap pwal mochen feila?” Ewe aposel Piter a pölüeni: “Am Samol, io aipwe feila ren? En ka eani kapasen manau esemuch. Am aia luku o silei pwe en Ewe mi Pin ka feito seni Kot.”

14, 15. (a) Pwata ekkoch ra ngününgün ussun och me lein än chon Kraist kewe afalafal? (b) Ifa ewe lesen sipwe tongeni käeö seni pworausen emön mwän itan Emanuel?

¹⁴ Lon ei fansoun, fakkun ekkoch chök lein nöün Kot kewe aramas rese efich och afalafal chon Kraist ra lükü, iwe, ra ngününgünü ewe kinikinin än Jiowa we mwicheich a nom won fönüfan. Pwata a fis ena? Fän chommong ena sokkun ngününgün a popu seni nafangaüen än aramas weweiti lapalapen än Kot akkapwönüetä an kokkot. Ewe Chon För a pwäppwäri ewe enlet ngeni nöün kewe aramas ekis me ekis. Ina minne, fän ekkoch epwe siwil minne sia weweiti ussun masouen Paipel. A lap me lein nöün Jiowa kewe aramas ra kan pwapwa ren ffataffateloon ekkena pworaus. Nge ekkoch ra pwisin “ikeeretä,” iwe, ra oput ekkena siwil. (Än Salomon Afalafal 7:16) Eli ra lamalam tekia, me ra turulong lon ewe ssär, ssären ar imulo fän pwisin ar ekiek. Ese lifilifil ika ifa ewe popun, nge mi fakkun efeiengaü ena sokkun ngününgün, pun a tongeni lukisefällikichelong lon ewe otot minen loom me föfförün kewe.

¹⁵ Ren chök awewe, emön Chon Pwäratä Jiowa itan Emanuel a meefi pwe mi mwääl ekkoch pworaus a älleäni lon ekkewe puk, förien “ewe chon angang mi allükülük o tipatchem.” (Mattu 24:45) A ükütiu seni an älleäni nöüch kewe puk, iwe, lo, lo, lo, a ereni ekkewe elter lon an we mwichefel pwe esap chüen emön Chon Pwäratä Jiowa. Iwe nge, ekiselo mwirin, Emanuel a mirititi pwe a pwüng ekkan afalafal seni än Jiowa we mwicheich. A chuuri Chon Pwäratä Jiowa, a ereniir pwe a mwääl an ekiek, iwe, a katolong pwe epwe fitisefälli ewe mwichefelin Chon Pwäratä Jiowa. Ina popun a pwapwasefäl.

16. Met epwe tongeni älisikich le amoielo ach tipemwaramwar ussun ekkoch afalafal chon Kraist ra lükü?

¹⁶ Epwe ifa ussun ika sipwe ekiekin ngününgün pokiten ach tipemwaramwareiti ekkoch afalafal Chon Pwäratä Jiowa ra lükü? Sipwe mosonottam. Lo, lo, lo, eli ewe ‘chon angang mi tuppwel’ epwe atoura och pworaus mi pölüeni ach kewe kapas eis, iwe mwirin, epwe molo ach tipemwaramwar. Sipwe mirit ika sipwe kütta älillis seni ekkewe elter. (Jutas 22, 23) Iotek, ach pwisin käeö Paipel, me ach fiffiti chienach kewe chon lükülük mi äsimaü epwe pwal tongeni älisikich le amoielo tipemwaramwar me alapalo ach aücheani ekkewe pworaus mi enlet seni Paipel lüküach mi pöppöchökkületä rer, nge ikkena ekkena pworaus sia fen käeö ren älillisin än Jiowa we minen kaworen pworaus.

 Eäni Ekieköch Fansoun Meinisin

17, 18. Sap minne sipwe ngününgün, nge met sokkun ekiek sipwe eäni, me met popun?

¹⁷ Mi enlet pwe pokiten aramas rese unusöch, ürürün pwe repwe tipis, iwe, eli a pöchökkül meefien ekkoch fän iten ar repwe ngününgünmwääl. (Keneses 8:21; Rom 5:12) Nge ika sipwe sou ngününgün, epwe tufich an epwe talo ach ririfengen me Jiowa Kot. Ina minne, a lamot ach sipwe amoielo ewe sokkun memmeef mi tongeni efisatä ngününgün.

¹⁸ Sisap ngününgünü mettoch lon ewe mwichefel, nge epwe mürinnö ach sipwe eäni ekieköch fansoun meinisin me akkapwönüetä eü kokkotun lon manauach an epwe älisikich pwe sipwe akkangang iteitan, chengel, ammafel, itepök me ruuepek, me pöchökkül lon ach lükülük. (1 Korint 15:58; Taitos 2:1-5) Jiowa a nennemeni mettoch meinisin lon an we mwicheich, me Jises a silei minne a fiffis lon iteiten mwichefel meinisin, ussun chök lon ewe äeüin senturi. (Pwarata 1:10, 11) Sipwe mosonottamen witiwit won Kot me Kraist, Möküren ewe mwichefel. Eli repwe nöünöü ekkan chon mas mi äsimaü fän iten ar repwe awenecharasefälli mettoch mi mwääl.​—Kölfel 43:5; Kolose 1:18; Taitos 1:5.

19. Met sipwe afota tori ewe Mwu epwe unusen nemenalo nonnomun aramas?

¹⁹ Ekiselo chök ei otot mi ngaü epwe sopwolo, me ewe Mwuun Messaia epwe unusen nemenalo nonnomun aramas. Iwe, a mmen lamot pwe emön me emön leich epwe eäni ekieköch fansoun meinisin tori ena fansoun! Ena mettoch epwe älisikich le sinneni ekkewe lapalap mi mürinnö a nom ren chienach kewe chon lükülük, nge sisap afota ar kewe apwangapwang. Ach afota lapalaper kewe mi mürinnö epwe atoto pwapwa ngenikich. Sap minne sipwe letipengaüelo pokiten ngününgün, nge sipwe pöchökkületä lon pekin ngün.

20. Ach eäni ekieköch epwe atufichi ach pwapwaesini met sokkun feiöch?

²⁰ Ach eäni ekieköch epwe pwal atufichi ach sipwe chechemeni ekkewe chommong feiöch sia kan pwapwaesini pokiten ach kapachelong lon ewe kinikinin än Jiowa we mwicheich a nom won fönüfan. Ina ewe eü chök mwicheich won unusen fönüfan a tuppwöl ngeni ewe Epinkepiisom. Met meefiom ussun ena pworaus mi enlet me ewe liffang mi aüchea a nom rech, liffangen ach sipwe fel ngeni ewe emön chök Kot mi enlet, Jiowa? Amwo meefiom epwe ussun meefien Tafit, pwe iei an köl: “En ka aüselinga iotek. Aramas meinisin repwe feito reöm. Feiöchün chokewe ka filiretä o emwenireto pwe repwe nom lon leniom mi pin. Äm aipwe üren feiöch ren ekewe mettoch mi mürina me lon imwom we mi pin.”​—Kölfel 65:2, 4.

En Mi Chechemeni?

• Pwata sipwe kilisou ren ekkan chon emmwen lon ach kewe mwichefel?

• Epwe fet meefiach lupwen ekkan brother mi wor wiser repwe mwäälilo?

• Epwe fet ach ekiek ika epwe siwil me ffataffatelo weween ekkan pworaus lon Paipel?

• Met epwe tongeni älisi chon Kraist fän iten ar repwe amoielo tipemwaramwar?

[Ekkewe kapas eis fan iten ewe lesen]

[Sasing lon pekin taropwe 28]

Tafit a ngeni Solomon liosun ewe imwen fel me a apöchökküla fel mi enlet ren unusen letipan

[Sasing lon pekin taropwe 31]

Ekkan elter ra kan awora älillis lon pekin ngün ren pwapwa