Chinnap nge Sap Minne Ra Fötek

LUPWEN aramas ra tori ierin chinnap, chommong a ter inisiir, me ra pwisin äimurelo seni ekkewe ekkoch. Nge ese ina ussun Fernand Rivarol, ewe a mälo lon an ier 95 lon Geneva, Switzerland. I chök lon imwan, pun pwülüwan we a mälo nge nöün we nengngin mi pwüpwülü a pwisin imulo lon imwan. Lap ngeni a chök nonnom leimw nge ese pwos. A kan mommot lon pwalangen imwan we ren an chepel me kököri iö a mochen pworaus ngeni lon ewe Paipel.

Lon manauen Fernand, a wor ewe fansoun a wesewesen fötek. Pwata? Atun ir me pwülüwan we ra kerän wiliti Chon Pwäratä ussun Jiowa lon 1939, a poputä ewe Oruuen Maunen Fönüfan lon Iurop. Fernand a chök kamwöchülo woon met a käeö seni Paipel pwe esap efeiengaüa aramas. Ren ei a towu seni an angang me kalapus fän fite—ükükün nimu esopw ier​—iwe, ina atun a towau seni pwülüwan we me nöün we nengngin.

Fernand a nesöküriti, a erä: “Me ren chommong aramas, ua fangetä ai we angang mi lükülüköch me likitalo ai we famili use chüen tümünüür. Aramas ra oputaei me ekieki pwe ngang emön chon atai allük. Iwe nge, atun ua anchangei ekkena ierin riäffou, ua kan chemeni ükükün watteen än Jiowa tümün me älillis ngenikem. Fitu ier a fen lo, nge ai lükülük woon Jiowa mi chüen lüküchar ussun chök lon ewe fansoun.”

An Fernand lükü a amwökütü an epwe äiti ngeni ekkoch aramas an äpilükülük allim woon phone. Ika emön a etiwaöchü an pworaus, a kan tinalo ngeni ekkoch puken aweween Paipel. Iwe ekiselo, a kan kököri emönnewe me eisini ika a pwapwaiti ewe puk. Fän ekkoch, aramas ra tinalo taropween kilisou ngeni Fernand, iwe, a fokkun apwapwai letipan.

Eli emön epwe pwal chuuruk lon leeniom ussun chök Fernand. Pwata kese mwaren aüseling ngeni met epwe erä pwe kopwe silei an lükü? Chon Pwäratä Jiowa ra pwapwa le atoura ngonuk lüküer.