Ekkewe mi Mosonoson Repwe Fönüeni ewe Fönüfan

“Ua anchangei atun ekkewe mettoch mi pükün nom woon fönüfan repwe akkasiwil me försefäl feilfeilo. . . . Esap lon fansoun kanoto chök nge pwal lon fansoun mwachkkan, atun epwe fis ewe läng sefö me ewe fönüfan sefö.”​—Iei alon Jean Marie Pelt, emön sou käeö mettochun fönüfan seni Franis.

POKITEN riäfföü seni mettochun ei fönüfan me lapalapen manauen aramas, chommong repwe pwapwa le küna fönüfan an epwe wiliti eü paratis. Nge esap chök aramas ikenäi ra sani ena. Seni me loom loom, ewe Paipel a pwonei pwe epwe fissefäl ewe Paratis woon fönüfan. Jises a apasa, “ir mi mosonoson . . . repwe fonueni fonufan” me “letipom epwe pwonueta, won fonufan usun chok lon lang,” iwe, ikkena ekkewe wokisin aramas ra kon silei seni Paipel. (Mattu 5:5; 6:10) Ikenäi, esap chommong ra lükülük woon eü paratis woon fönüfan epwe masou ren aramas mi mosonoson. Ren chommong ra erä pwe ir chon Kraist, a ussun itä nge ewe paratis a pöütülo.

Ewe chassi lon Franis itan La Vie a aweweei pwata a pöütülo ewe afalafal ussun eü paratis​—ika epwe fis lon läng are woon fönüfan—​nge mwaren lon ewe lamalamen Katolik: “Arapakkan orun 1900 ier a pöchökkül ena afalafal lon ewe lamalamen Katolik, nge iei a morolo seni ar kewe leenien iotek, me leenien ekkekiekifichi mi imulo seni aramas, seni ar kewe afalafal a kan katowu lon Räninfel, lon ar kewe sukulen lamalam, me katekis.” A ussun itä nge ewe kapas Paratis a tükütükülo lon “eü kuchuchol mi monomonolo me fitikokokis.” Ekkoch chon afalafal ra ükütiu le fos ussun paratis pun a “efisatä an aramas ekkekiek ussun pwapwa woon fönüfan.”

Me ren Frédéric Lenoir, emön sou käeö ussun mwichen aramas, äkkäeüin lon pekin lamalam, a pwisin nom ren aramas ekiek ese pwüng ussun ewe Paratis. Pwal ussun Jean Delumeau, emön sou uruwo me soumakken fite puk ussun Paratis, a ekieki pwe pwönütään ekkewe pwon lon Paipel kapas monomon chök. A makkei: “Ren ei kapas eis, ‘Met mwirimwirin ach ekiek ussun Paratis?’ lüküen chon Kraist a chüen affata: Kilisou ngeni manausefällin ewe Chon Amanau, pwe eü rän meinisin kich sipwe küna pwönütään ach na äpilükülük.”

Mei chüen lamot ewe pworaus ussun paratis woon fönüfan? Met epwe wesewesen fis ngeni ach ei fönüfan? Ach ekiek ussun mwachkkan a toputop, are epwe tufichin ffataffatöchülo? Ewe lesen mwirin ei epwe pölüeni ekkeei kapas eis.