Sipwe Niuokkusiti Jiowa​—Iwe Mwirin, Sipwe Pwapwa!

“Mi pwapwa ewe aramas mi niuokkusiti Jiowa.”​—KÖLFEL 112:1.

1, 2. Ach niuokkusiti Jiowa epwe tongeni atoto met?

 ESAP mecheres an epwe toto rech pwapwa. Pwapwa mi enlet a kan longolong woon ach fiffilatä minne mi pwüng, ach föfföri minne mi pwüng, me ach kukkullulo seni minne mi mwääl. Ewe Chon Förikich, Jiowa, a ngenikich an we Kapas, ewe Paipel, pwe epwe äiti ngenikich ifa ussun sipwe tongeni eäni ewe sokkun manau mi nampa eü mürinnöön. Ren ach kükkütta me akkapwönüetä än Jiowa emmwen, nge iei pisekin pwäratään ach niuokkusiti Kot, iwe, sipwe tongeni enletin küna pwapwa.​—Kölfel 23:1; Än Salomon Fos 14:26.

² Lon ei lesen, sipwe käeö pworausen aramas lon Paipel me pwal lon ei fansoun, iwe, repwe affata ifa ussun ach enletin niuokkusiti Kot epwe apöchökkülakich pwe sipwe tufichin fiffiu ngeni ekkan mettoch mi etipetipakich pwe sipwe föri minne mi mwääl me apworaikich fän iten ach sipwe föri minne mi pwüng. Sipwe küna pwe ach niuokkusiti Kot epwe tongeni atoto rech pwapwa ren an amwökütükich pwe sipwe awenecharasefälli och föfför mi mwääl, ussun minne King Tafit a föri. Sipwe pwal küna pwe ach niuokkusiti Jiowa, iei enletin eü alemwir mi aüchea ekkan sam me in repwe tongeni likiti ngeni nöür kewe. Enlet, iei eü kapasen anükünük ngenikich lon ewe Kapasen Kot: “Mi pwapwa ewe aramas mi niuokkusiti Jiowa.”​—Kölfel 112:1.

Ach Künasefälli ewe Pwapwa mi fen Pöüt Senikich

3. Met a älisi Tafit pwe epwe pöchökkülsefällitä seni an kewe tipis?

³ Ussun sia fen käeö lon ewe lesen mi akkom mwen ei, fän ülüngät Tafit ese niuokkusiti Kot, iwe, a tipis. Iwe nge, ren an aüseling ngeni ewe fön seni Jiowa, a pwäratä pwe lon letipan a enletin niuokkusiti Kot. An menniniti me süföliti Kot a amwökütü pwe epwe pwäri an tipis, awenechara föfförün, me försefällietä an ririöch ngeni Jiowa. Inaamwo ika an kewe tipis ra efisatä riäfföü ngeni i me pwal fitemön, nge an enletin aier a atoto ngeni än Jiowa  älillis me feiöch. Föfförün Tafit epwe tongeni enletin apöchökküla chon Kraist mi tipis watte lon ei fansoun.

4. Ifa ussun än aramas niuokkusiti Kot epwe tongeni älisiir pwe repwe künasefälli pwapwa?

⁴ Ekieki mwo pworausen Sonja. a Inaamwo ika Sonja emön chon afalafal full-time, nge a chiechi ngeni aramas mi föfföringaü, a föri minne ese fichiiti chon Kraist, iwe, a katowu seni ewe mwichefelin Chon Kraist. Sonja a miritsefäl, iwe, a föri minne kewe meinisin pwe epwe tufichin chäsefäl ngeni Jiowa. Mwirin och fansoun, a tösefällilong lon ewe mwichefel. Lon unusen ena fansoun, esap fän eü än Sonja likiti an mochen angang ngeni Jiowa. Lo, lo, lo, a fitisefälli ewe angangen pioneer. Mwirin, a pwülüweni emön elter mi äsimaü, iwe iei, a küna pwapwa seni ar angangfengen lon ewe mwichefel. Inaamwo ika Sonja a mengiringir ren an rikilo seni alen chon Kraist ren och fansoun, nge a pwapwa pwe an niuokkusiti Kot a älisi i pwe epwe liwiniti Jiowa.

A Mürinnö Ach Sipwe Küna Riäfföü Lap Seni Ach Sipwe Tipis

5, 6. Aweweei mwo ifa ussun me met popun a fän ruu Tafit ese nielo Saul.

⁵ Pwüngün pwe epwe fen öch ika än aramas niuokkusiti Kot epwe älisiir pwe resap tipis. Mi enlet ena ren Tafit. Fan eü, lupwen Saul a chei Tafit fän ülüngät ngeröü sounfiu, a tolong lon ewe chök pokungo ikewe Tafit me chienan kewe ra op ie. Chienen Tafit kewe ra ereni pwe epwe nielo Saul. Esap pwe Jiowa a itä fangelong le pöün Tafit chon koputan? Tafit a ännifelo ren Saul, iwe, a reii lepwülün üfan we. Pokiten Tafit a niuokkusiti Kot, a fokkun mengiringir ren minne a föri. Tafit a asüolo chienan kewe mi ningeringer ren an ereniir pwe: “Me ren ekiekin Jiowa, usap fakkun tongeni ekiekin föri ei mettoch ngeni ai we samol, ewe mi kepit me ren Jiowa.” b​—1 Samuel 24:1-7.

⁶ Lon pwal eü fansoun, Saul a nom lon eü leeni lepwin, iwe, ir me nöün kewe mwän ra annutechou pun Jiowa “a awarato eu möürüchou wor.” Tafit me märärin we mi pwora itan Apisai ra annifelong lukanapen leenier we, iwe, ra ütiu woon Saul nge mi annut. Apisai a mochen nielo i. Tafit a pinei Apisai ren an eisini: “Iö a tongeni angeetä won nöün ewe Samol mi Lapalap mi kepit, nge esap tipis?”​—1 Samuel 26:9, 12.

7. Met a pinei Tafit seni an epwe tipis?

⁷ Pwata Tafit ese nielo Saul lupwen a tufichin nielo fän ruu? Pun a niuokkusiti Jiowa lap seni an niueiti Saul. Pokiten än Tafit menniniti Kot, a meefi pwe epwe mürinnö an epwe küna riäfföü lap seni an epwe tipis. (Ipru 11:25) A lükü ren unusen letipan pwe Jiowa epwe tümünü Nöün kewe aramas me pwal pwisin i. Tafit a silei pwe an älleäsochisi me lükü Kot epwe atoto ngeni pwapwa me chommong feiöch, nge an tunalo Kot epwe atoto än Kot song. (Kölfel 65:4) A pwal silei pwe Kot epwe apwönüetä an pwon, pwonen an epwe seikatä Tafit ngeni ewe wis king, iwe, epwe atowu Saul seni wisan we lon eü fansoun me lapalap epwe pwisin filatä.​—1 Samuel 26:10.

Ach Niuokkusiti Kot epwe Atoto Pwapwa

8. Ifa ussun föfförün Tafit fän sossot eü leenien äppirü fän itach?

⁸ Pokiten kich chon Kraist, sia tongeni ekiekin küna turunufas, riäfföü, me pwal fitu sokkun sossot. (Mattu 24:9; 2 Piter 3:3) Fän ekkoch, sipwe pwal mwo nge küna osukosuk lefilach me chienach kewe chon fel. Iwe nge, sia silei pwe Jiowa a kan küna mettoch meinisin me a kan rongorong ach kewe iotek, iwe, epwe awenechara mettoch meinisin me ren letipan lon fansoun mi fich ngeni. (Rom 12:17-21; Ipru 4:16) Ina minne, sisap niueiti chon ü ngenikich, nge sipwe niuokkusiti Kot me lükü pwe epwe selänikich. Ussun chök Tafit, sise kan aliwini ngeni aramas minne mi ngaü me sise pwal likitalo kapasen alongolongun allük mi pwüng fän iten ach sisap küna riäfföü. Ach ikkina ussun epwe atoto pwapwa le sopwoloon. Nge ifa ussun?

9. Aweweei mwo ifa ussun ach niuokkusiti Kot epwe tongeni atoto pwapwa inaamwo ika aramas repwe eriäfföüükich.

⁹ Iei alon emön misineri mi nomottam lon Afrika: “Ua ekieki emön fefin me nöün we föpwül ar rese tongeni mööni kaatoon mwuun pokiten än chon Kraist imulo seni mwökütükütün  mwuun fönüfan. Epwi mwän ra wenewenen awater, iwe, ra ereniir pwe repwe liwiniti imwer. Lupwen ra feffetäl, ewe fefin a sotun aururu nöün we föpwül mi kechiu, pun ese tongeni weweiti pwata ekkewe mwän ra awater. Rese pwapwa lon ena atun, nge ra silei pwe ra fen föri minne mi pwüng. Mwirin, ra fokkun pwapwa pokiten ar älleasochisi Kot. Ika ra fen mööni ekkewe kaatoon mwuun, ewe pwiin aramas repwe fokkun pwapwa. Ekkewe mwän repwe ngeniir ünümer Fanta, iwe, repwe pwelliir le pwörük tori ar liwiniti imwer. Nge ewe föpwül me inan we repwe fen kon letipengaü pokiten ar fangetä.” Ese fis ena pokiten ar niuokkusiti Kot.

10, 11. Ifa pwünüöchün än emön fefin niuokkusiti Kot?

¹⁰ Ach niuokkusiti Kot a pwal atoto pwapwa ika sipwe küna sossot mi weneiti ewe mettoch süföl ngeni pinin manau. Lupwen Mary a pwopwo ren aülümönün nöün, ewe tokter a pesei pwe epwe atai nöün we. A ereni, “Mi fokkun efeiengaü minne a toruk. Inisum epwe tongeni mwittir apwangapwangelo, iwe, ka tongeni mälo lon ükükün 24 awa. Ika kopwe mä, noum na epwe pwal mä. Ese lifilifil met kopwe fili, nge sisap tongeni apasa pwe esap wor tterin noum na.” Mary a käkkäeö Paipel ren älillisin Chon Pwäratä Jiowa, nge esaamwo papatais. Mary a apasa, “Nge ua fen filatä pwe upwe angang ngeni Jiowa, iwe, a pposolo letipei pwe upwe älleäsochisi i, ese lifilifil met epwe fis ngeniei.”​—Ekistos 21:22, 23.

¹¹ Atun an pwopwo, Mary a chök käkkäeö Paipel me tüttümünü an famili. Iwe, a tori fansoun an epwe nöünöü. Mary a apasa, “A weires ai nöünöü lap seni ekkewe rüüemön mi akkom mwan, nge esor watte osukosukan.” Pokiten Mary a niuokkusiti Kot, a limöch mwelien letipan, iwe, ekiselo mwirin, a papatais. Lupwen nöün we a wakkattetä, a pwal sissileelo an epwe niuokkusiti Jiowa, iwe iei, a angang lon eü kisin ofesin Chon Pwäratä Jiowa.

 ‘Apöchökkülok ren Jiowa’

12. Ifa ussun än Tafit niuokkusiti Kot a apöchökküla i?

¹² Sap minne än Tafit niuokkusiti Jiowa och chök minen eppetin föfföringaü. Nge a pwal apöchökküla i pwe epwe mwökütükäi fän mirit lon fansoun weires. Ren ükükün eü ier me rüänü maram, Tafit me nöün kewe aramas ra op seni Saul lon Siklak lon fönüen chon Filistia. (1 Samuel 27:5-7) Lon eü fansoun lupwen ekkewe re Israel ra lo ekis, chon Amalek mi sossoläfetäl ra keni ewe telinimw me uweialo meinisin pwülüwer kewe, nöür kewe, me ekkewe pwiin maan. Lupwen Tafit me nöün kewe aramas ra liwin, ra kechiu pokiten minne ra küna. Ar letipechou a mwittir wililo ngeni song, iwe mwirin, ekkewe mwän ra ekiekin mone ngeni Tafit faü. Inaamwo ika Tafit a riäfföü, nge ese äpilüküngaü. (Än Salomon Fos 24:10) An niuokkusiti Kot a amwökütü i pwe epwe kulliiti Jiowa, iwe, a “apöchökküla pwisin i ren älillisin Jiowa.” Ren än Kot älillis, Tafit me nöün kewe aramas ra liapeni ekkewe chon Amalek, iwe, ra angeisefälli mettoch meinisin.​—1 Samuel 30:1-20.

13, 14. Ifa ussun än emön chon Kraist niuokkusiti Kot a älisi pwe epwe kefilöch?

¹³ Lon ei fansoun, a pwal tottori nöün Kot kewe chon angang watte osukosuk, iwe, a lamot ngeniir watte lükülük woon Jiowa me pwora pwe repwe kefilöch. Ren chök awewe, ekieki mwo pworausen Kristina. Le kükkünün, Kristina a käeö Paipel ren älillisin Chon Pwäratä Jiowa. Nge a mochen pwe epwe emön chon ättik piano, iwe, a mmen angöchülo lon. Pwal och, a kan säü an epwe afalafal, ina minne, ese efich ekkewe mettoch chon papatais repwe wisen apwönüetä. Nge lupwen Kristina a sopwelo an käeö ewe Kapasen Kot, a poputä le meefi manamanan. A käkkäeö an epwe niuokkusiti Jiowa, iwe, a mirititi pwe Jiowa a ekiekin küna seni nöün kewe chon angang ar repwe tongei i ren unusen letiper, ekiekiir, ngünür, me pöchökküler. (Mark 12:30) Ena mettoch a amwökütü i pwe epwe fangolo ngeni Jiowa manauan, iwe, a papatais mwirin.

¹⁴ Kristina a tingorei Jiowa pwe epwe älisi le mämmäritä lon pekin ngün. Iei alon, “Ua silei pwe kokkotun lon manauen chon ättik piano a wewe ngeni an epwe säifetäl fansoun meinisin me sainnei taropween atipeeü pwe epwe ättik piano fän 400 lon eü ier. Ina minne, ua filatä pwe upwe emön sense fän iten tufichin manauei me fiti ewe angangen afalafal full-time.” Lon ena fansoun, a fen sain pwe epwe kerän äeüin ättik piano lon ewe leenien nikättik mi nampa eü iteföülo lon fönüan. A apasa pwe “Ewe äkkäeüin fansoun ai kerän ättik piano mwen chommong aramas a fis pwe pwal ina säingoon fansoun ai ättik piano.” Mwirin, Kristina a pwülüweni emön elter. Iei ir me rüüemön ra angang lon eü kisin ofesin Chon Pwäratä Jiowa. A pwapwa ren än Jiowa apöchökküla i pwe epwe kefilöch me an tufichin äeä an fansoun me pöchökkül lon an angang ngeni i.

Eü Alemwir mi Fokkun Aüchea

15. Met Tafit a mochen likiti ngeni nöün kewe, me ifa ussun an föri ena?

¹⁵ Iei makkeien Tafit, “Oupwe feito, ämi nei mwän o aüselingaei, üpwe aiti ngenikemi usun ämi oupwe meniniti ewe Samol mi Lapalap.” (Kölfel 34:11) Pokiten i emön sam, Tafit a fokkun mochen likiti ngeni nöün kewe eü alemwir mi fokkun aüchea—weween, ewe mettoch enletin niuokkusiti Jiowa, ewe sokkun mi fiti itepök me rüüepek me watte süföl. Ren an kewe kapas me föfför, Tafit a affata pwe Jiowa emön Sam mi tongei me aücheani nöün kewe me woon fönüfan, me a ümöümöch ngeniir, nge esap i emön Kot mi kon eipö are aniuaniu, itä ren an epwe mwittir apwüngüür pokiten ar ipweri an kewe allük. Tafit a eis, “Iö a tongeni mefi iteiten an föför mwäl?” Iwe mwirin, a affata an lükülük pwe Jiowa ese kan etittina mwäälich kewe fansoun meinisin, pun a makkei: “Kopwe amusa seniei ekewe tipis mi monomon!” Tafit a wenewenen lükü pwe ika epwe achocho ükükün an tufich, Jiowa epwe pwapwa ren an kewe kapas me ekiek.​—Kölfel 19:12, 14.

16, 17. Ifa ussun ekkan sam me in repwe tongeni äiti ngeni nöür kewe lamoten ar repwe niuokkusiti Jiowa?

¹⁶ Tafit eü leenien äppirü ren ekkan sam me in lon ei fansoun. Ralph me pwiin we ra kan angang lon eü kisin ofesin Chon Pwäratä Jiowa,  iwe, iei alon, “Lon unusen manauem, papa me mama ra älisikem pwe aupwe pwapwaesini äm nonnom lon ewe enlet. Le kükkünüüm, äm aua chök nom rer lupwen ra kapasfengen ussun sokkopaten angang lon ewe mwichefel, ina minne, äm aua mwasangasang ussun ewe enlet, ussun chök ir. Ra ämääraatä lon letipem äm lükü pwe aupwe tongeni föri mettoch mi mürinnö ika aupwe angang ngeni Jiowa. Iwe, ren fite ier äm aua nonnom lon eü fönü ikewe a mmen watte osupwangen chon afalafala pworausen ewe Mwu ie, iwe, ren äm älillis, a förütä ekkoch mineföön mwichefel.

¹⁷ “Sap minne eü pinükün allük mi titchik a älisikem pwe aupwe feffetäl woon ewe al mi pwüng, nge ren enletin, papa me mama ra lükü pwe Jiowa i wesewesen Kot, me a fokkun kirekiröch me mürinnö. Ra achocho le sissileelo Jiowa me akkapwapwai i, iwe, äm aua äppirü ar enletin niuokkusiti Kot me ar tongei i. Lon pwal mwo nge fansoun äm aua föri mettoch mi mwääl, papa me mama rese ämeef ngenikem pwe Jiowa ese chüen tongekem me rese pwal pinei senikem ekkoch mettoch fän song. A lap ngeni ar mommot rem me ra chök kapas ngenikem, iwe, fän ekkoch mama a achocho le achchüngü letipem fiti sürün chönün mesan. Minne ra föri a kkü letipem. Seni än papa me mama kapas me föfför, äm aua weweiti pwe a mmen aüchea ach niuokkusiti Jiowa me esap eü mettoch mi aweiresikich ach sipwe nöün Chon Pwäratä, nge a atoto pwapwa me chengel.”​—1 Jon 5:3.

18. Met epwe toto rech ika sipwe niuokkusiti ewe Kot mi enlet?

¹⁸ Iei och kapas seni “än Tafit kewe kapasen kasop”: “Ewe king mi nemeni aramas fän pwüng, mi nemenem fän an niuokusiti Kot, a wewe ngeni saramen tötän akkar lesosor.” (2 Samuel 23:1, 3, 4) Neman Salomon, nöün Tafit, ewe mi wii seman lon wisan, a mirititi ena lesen, pun a tingorei Jiowa pwe epwe awora ngeni “eu leluk mi mirit” me an tufichin “alefila mine a öch me mine a ngau.” (1 King 3:9) Salomon a mirititi pwe iei ewe alen mirit me pwapwa, ach sipwe niuokkusiti Jiowa. Mwirin, a makkei chüülapen ewe puken Än Salomon Afalafal ren ei kapas: “Iwe, oupwe rong ei kapasen lesopolan: oupwe niueiti Kot o alesochisi an kewe allük, pun iei a fichiti aramas meinisin. Nge Kot epwe apwüngü föför meinisin, pwal iteiten föför mi fis lemonomon, ika a mürina ika a ngau.” (Än Salomon Afalafal 12:13, 14) Ika sipwe apwönüetä ena fön, iwe, sipwe wesewesen küna pwe “ewe liwin fän iten eman mi tipetekison o niuokusiti ewe Samol mi Lapalap” esap mirit me pwapwa chök, pwe pwal “wöü me iteüöch me manauatam.”​—Än Salomon Fos 22:4.

19. Met epwe atufichikich pwe sipwe weweiti lamoten ach sipwe “niuokusiti ewe Samol mi Lapalap”?

¹⁹ Seni pworausen aramas lon Paipel me pwal lon ei fansoun, sia küna pwe a lamot me aüchea ewe mettoch niuokkusiti Kot lon manauen nöün Jiowa kewe chon angang mi enlet. Sanne ena sokkun niuokkus epwe chök pinekich seni ach föri minne Semach lon läng esap efich, nge epwe pwal tongeni apworaikich pwe sipwe üppos mwen mesen chon ü ngenikich me apöchökkülakich pwe sipwe likiitü fän ekkewe sossot me fansoun weires epwe tottorikich. Ina popun, oukich meinisin, kükkün me watte, sipwe tinikken le käeö ewe Kapasen Kot, ekilonei minne sia käkkäeö, me apöchökküla ach ririfengen me Jiowa ren ach ikkiotek ngeni iteitan seni wesewesen letipach. Ren ach föri ena, sap minne sipwe chök küna “silelap seni Kot,” nge sipwe pwal weweiti aüchean ach sipwe “niuokusiti ewe Samol mi Lapalap.”​—Än Salomon Fos 2:1-5, NW.

[Footnote]

En mi Tongeni Aweweei?

Ifa ussun ach niuokkusiti Kot

• epwe tongeni älisikich pwe sipwe pöchökkülsefällitä seni tipis watte?

• epwe tongeni atoto pwapwa lon fansoun sossot me ika aramas repwe eriäfföüükich?

• epwe tongeni apöchökkülakich fän iten ach sipwe föfföri letipen Kot?

• epwe tongeni eü alemwir mi aüchea fän iten nöüch kewe?

[Ekkewe kapas eis fan iten ewe lesen]

[Sasing lon pekin taropwe 13]

Än Tafit niuokkusiti Jiowa a pinei seni an epwe nielo King Saul

[Sasing lon pekin taropwe 15]

Ewe mettoch niuokkusiti Kot eü alemwir mi aüchea ekkan sam me in repwe tongeni likiti ngeni nöür kewe