Eü Lesen Mi Weneiti Tipetekia me Tipetekison

OCH mettoch a fisitä lon manauen King Tafit a menlapei sokkofesennin ewe lapalap tipetekison mi enlet me tipetekia. A fis mwirin än Tafit liapeni Jerusalem, me ewe telinimw a wiliti ewe iolap. Me ren Tafit, Jiowa ewe wesewesen King lon Israel, ina popun a akkota pwe ewe Pworofel mi liosuetä pwe Kot a nonnom rer epwe nonnom lon Jerusalem. Ei fansoun a fokkun lamot ngeni Tafit. A pwäralo an pwapwa ngeni ekkewe aramas atun a tapwelo mwirin ekkewe samol fel mi uwei ewe Pworofel. Ekkewe aramas lon Jerusalem ra küna nöür we king mi “mwetemwet” me “pwörük . . . fän an pöchökül.”​—1 Kronika 15:15, 16, 29; 2 Samuel 6:11-16.

Iwe nge, Mikal pwülüwen Tafit we, ese fiti ena karis mi apwapwa. Lupwen a newu seni eü asamwocho, a poputä le “turunufasei Tafit lon lelukan” nge uruurun pwe epwe ingeiti lapalapen än Tafit mwareiti Jiowa. (2 Samuel 6:16) Met popun a ina ussun meefien Mikal? A ffat pwe a ekitekia pokiten i nöün ewe äemönün Kingen Israel, Saul, me iei i pwülüwen ewe arüemönün kingen Israel. Neman a meefi pwe pwülüwan we, ewe king, esap itä kon atekisonatiu pwisin i pwe epwe löllö ngeni aramas mi tekison, me esap itä pwörük fetäl ussur. Ena esin ekitekian a pwälo ren an kapwong ngeni Tafit lupwen a liwiniti imwan we. A eäni kapasen esiit: “Mwa met, ewe kingen Israel a püsin aitöchü ikenai. A püsin aselelai ikenai me fän mesen ekewe chon angang fefin nöün nöün kewe nöüwis, usun eman mi akkochofäsä a säwemang le püsin aselelai.”​—2 Samuel 6:20.

Ifa ussun Tafit a pölüeni ei kapasen esiit? Tafit a apwüngü Mikal ren an apasa pwe än Jiowa chen a nom ren Tafit nge Kot a fen pöütalo seman we, Saul. Tafit a pwal apasa: “Üpwe atekisonaei lap seni ei. Üpwe itengau me reöm, nge ren ekewe föpwül ka kapas usur üpwe iteüöch rer.”​—2 Samuel 6:21, 22.

Ewer, Tafit a uppos le angang ngeni Jiowa fän tipetekison. Ei lapalap a älisikich le weweiti ewe popun Jiowa a eita ngeni Tafit “emon mwan mi apwapwai letipei.” (Fofor 13:22; 1 Samuel 13:14) Ren enletin, Tafit a äppirü Jiowa Kot, ewe mi tipetekison seni meinisin. Ewe kapas Tafit a eäni lupwen a fos ngeni Mikal, “Üpwe atekisonaei” a feito seni ewe kapasen Ipru a pwal wewe ngeni än Kot we ekiek ussun chon fönüfan. Inaamwo ika Jiowa ewe Nöüwis mi fokkun tekia seni meinisin won unuselapen läng me fönüfan nge, Kölfel 113:6, 7 a awewei pwe i “a nennetiu [a atekisonatiu pwisin i ren an epwe älisi aramas kisikis] won ekkewe lang o pwal fonufan? A apwatai ekkewe aramas mi woungau seni lon pwul moromor, o a pwisata ekkewe mi osupwang seni won ekkewe chukuchukun falang.”

Pokiten Jiowa a tipetekison, esap eü minen ämäirü pwe a oputa “wolamalamtekia.” (An Salomon Fos 6:16, 17) Pokiten än lapalapeni ei lapalap mi ngaü me a pwal süfölüngaü ngeni ewe king, Kot a filatä pwe esap wor nöün Mikal ät me won Tafit. Mikal a riit tori an mälo. A ifa me lamoten ena lesen fän itach? A lamot pwe meinisin mi mochen küna än Kot we chen repwe älleäsochisi ekkeei kapas: “Oupwe pwilitalong tipetekison lefilemi, pun ‘Kot a ü ngeni ir mi lamalam tekia, nge a fangelo chen ngeni ir mi tipetekison.’”​—1 Piter 5:5.