“Oupwe Chok Esinei Ngeni Kot Ami Mochen”
“Oupwe Chok Esinei Ngeni Kot Ami Mochen”
“Ren mettoch meinisin oupwe chok esinei ngeni Kot ami mochen ren iotek o tingor o pwal eti kilisou.”—FILIPI 4:6.
1. Sia tufichin pworaus ngeni iö, iwe, met popun ena tufich mi amwarar?
MET epwe fis ika ka mochen fos ngeni ewe sou nemenemen fönüom? Eli kopwe tongeni fos ngeni nöün we seketeri nge esap ewe sou nemenem. Iwe nge, esap ina ussun ika ka mochen fos ngeni ewe Sou Nemenem mi lapalap seni meinisin, Jiowa Kot, ewe Epinkepiisom. Sia tongeni fos ngeni i ese lifilifil ia sia nonnom ie are ese lifilifil inet sia mochen chuuri. Iotek mi pwüng repwe tori i fansoun meinisin. (Än Salomon Fos 15:29) Mwa met ren amwararen ena kokkot! Esap itä pwe ach kilisou ina met a amwökütükich le ikkiotek ngeni ewe “Chon Aüselinga iotek”?—Kölfel 65:2, NW.
2. Met a lamot pwe Kot epwe aüselinga ach kewe iotek?
2 Iwe nge, eli emön epwe eis, ‘Kot epwe aüselinga met sokkun iotek?’ Ewe Paipel a awewei ussun eü mettoch mi lamot pwe Kot epwe aüselinga ach kewe iotek lupwen a apasa: “Are emon esap luku, iwe, esap tongeni apwapwai i. Pun are emon mi mochen arap ngeni Kot, epwe fakkun luku pwe a wor Kot, o a liwini ngeni ir ekkewe mi kukutta i.” (Ipru 11:6) Ewe lesen mwen ei a apworausakich pwe lükü a fokkun lamot ika sia mochen arap ngeni Kot. Kot a aüselinga iotekin chokkewe mi arap ngeni, nge a lamot pwe repwe iotek ren lükü me epwe wor ar kewe föfför mürinnö, kapachelong eü letip mi pwüng me enlet.
3. (a) Met sokkun mettoch nöün Kot kewe chon angang me loom ra iotek ussun? (b) Ikkefa ekkewe sokkun iotek sipwe tongeni eäni?
3 Ewe aposel Paul a pesei ekkewe Chon Kraist lon ränin we: “Ousap aurek ren och mettoch, pwe ren mettoch meinisin oupwe chok esinei ngeni Kot ami mochen ren iotek o tingor o pwal eti kilisou. Iwe, an Kot we kinamwe, ewe mi somelo seni ach ekiek meinisin, epwe mamasa letipemi o ami ekiek lon Kraist Jises.” (Filipai 4:6, 7) Sia tongeni älleäni chommong pworaus ussun ekkewe aramas mi iotek ngeni Kot ussun ar kewe osukosuk, ussun choweän Hana, Elias, Hesekaia, me Taniel. (1 Samuel 2:1-10; 1 King 18:36, 37; 2 King 19:15-19; Taniel 9:3-21) Sipwe äppirüür. Paul a apasa pwe mei wor sokkopaten iotek. Iotekin kilisöü ewe sokkun iotek mi pwäralo ach aücheani met Kot a föfföri fän äsengesich. Eli ei sokkun iotek epwe pwal fiti kapasen mwareiti Kot. Sia tongeni tingormau ngeni Kot ren unusen letipach fän tipetekison. Sia pwal tongeni titchiki met sia mochen lupwen sipwe tingor och mettoch seni Kot. (Luk 11:2, 3) Semach lon läng a pwapwa le aüselinga ach kewe iotek lon ekkeei sokkun iotek.
4. Inaamwo ika Jiowa a silei met sia osupwang ren nge, met popun sipwe chüen tingor ach kewe osupwang?
4 Eli ekkoch aramas repwe apasa, ‘Jiowa ese fen silei mettoch meinisin sia osupwang ren?’ Ewer, a silei. (Mattu 6:8, 32) Iwe, met popun a chüen mochen pwe sipwe apasawu ach kewe tingor? Ekieki mwo ussun ei pworaus: Emön minne an eü sitowa a mochen liffang eü pisek ngeni nöün kewe customer. Nge, ika aramas ra mochen angei ewe liffang, repwe feilo tingorei minne an ewe sitowa. Chokkewe rese mochen feilo tingor ra pwäralo pwe rese wesewesen aücheani ewe liffang. A pwal ina ussuch ika sise kan iotek ussun ach kewe mochen. Sia pwäralo pwe sise aücheani kaworen Jiowa. Jises a apasa: “Oupwe chok tingor, o oupwe angei.” (Jon 16:24) Iei ussun, sia pwäratä ach lükülük woon Kot.
Ifa Ussun Sipwe Arap Ngeni Kot lon Iotek?
5. Met popun sipwe iotek fän iten Jises?
5 Jiowa ese föri chommong allük mi titchik ussun lapalapen ach iotek ngeni i. Nge, a lamot ach sipwe silei ekkewe lapalap mi pwüng fän iten ach arap ngeni Kot lon iotek me ren ewe Paipel. Ren chök awewe, Jises a äiti ngeni nöün kewe chon käeö: “Are oupwe tingor och seni Semei, epwe chok ngenikemi fan itei.” (Jon 16:23) Ina popun, a lamot ach sipwe iotek fän iten Jises. Iei ussun a pwälo ach mirititi pwe än Kot efeiöchü aramas meinisin a fiffis ren Jises chök.
6. Epwe ifa lapalapen inisich lupwen sia iotek?
6 Epwe ifa lapalapen inisich lupwen sia iotek? Ese mak lon Paipel pwe Kot epwe aüselinga ach kewe iotek ika a iei are ina ussun lapalapen inisich. (1 King 8:22; Nehemia 8:6; Mark 11:25; Luk 22:41) Ewe mettoch mi lamot, ina ach sipwe iotek ngeni Kot ren pwüng me letip mi enlet.—Sowel 2:12, 13.
7. (a) Met weween “amen”? (b) Ifa ussun sipwe nöünöü ewe kapas “amen” lon ach kewe iotek?
7 Met weween ewe kapas “amen”? Ewe Paipel a pwäratä pwe a kan mürinnö ika ach kewe iotek repwe wes ren ei kapas, akkaewin lupwen sia iotek mwen aramas. (Kölfel 72:19; 89:52) Ewe kapas ʼa·menʹ lon kapasen Ipru a wewe ngeni “ewer epwe ina.” Eü puken awewe a äiti ngenikich pwe weween ewe kapas “Amen” le muchuloon ach iotek “a apwüngalo ekkewe kapas me mwan me a wewe ngeni eü tingor pwe repwe pwönüetä.” Ina popun, ika emön mi iotek a apasa “Amen” le muchuloon an iotek, iwe, a pwäratä pwichikkaren an memmeef ussun met a kerän apasa. Lupwen emön chon Kraist a apasa “Amen” le muchuloon an we iotek fän iten ewe mwichefel, iwe, chokkewe mi aüseling repwe pwal apasa “Amen” le monomon are ren leuwommong, pwe repwe pwäratä ar tipeeü ngeni ewe iotek.—1 Korint 14:16.
8. Ifa ussun ach kewe iotek repwe ussun chök än Jekop me än Eperiam iotek, iwe, met ekkeei iotek repwe pwäratä ussun kich?
8 Fän ekkoch Kot a mut ngenikich le pwäratä alollolun meefiach ussun ekkewe mettoch sia iotek ussur. Eli a lamot ach sipwe äppirü än Jekop likiitu lupwen a fiu ngeni emön chonläng tori an epwe ränilo pwe epwe angei feiöch seni. (Keneses 32:24-26) Are fän ekkoch epwe lamot ach sipwe äppirü Eperiam lupwen a tittingor ngeni Jiowa fän iten Lot me fän iten aramas mi pwüng mi chüen nonnom lon Sotom. (Keneses 18:22-33) Sipwe pwal tongeni tingormau ngeni Jiowa ussun ekkewe mettoch mi aüchea ngenikich. Sipwe tingor ngeni i pokiten an pwüng, kirökiröch, me ümöümöch.
Met Sipwe Tingor Ussun?
9. Met sipwe akkomwa lupwen sia iotek?
9 Chechchemeni mwo met Paul a apasa: “Ren mettoch meinisin oupwe chok esinei ngeni Kot ami mochen.” (Filipai 4:6) Ina popun, pwisin ach kewe iotek repwe weneiti mettoch meinisin lon manauach. Nge, sipwe akkomwa minne a weneiti Jiowa lon ach kewe iotek. Taniel a isetiu eü leenien äppirü mi mürinnö. Lupwen Israel a küna kapwüng pokiten ar kewe tipis, Taniel a tingorei Jiowa pwe epwe eäni ümöümöch, iwe, a apasa: “Äm Samol, kose mochen kopwe aüselinga kem o amüttirato om alilis ngenikem pokiten itom.” (Taniel 9:15-19) Ach kewe iotek ra kan pwäralo pwe piniloon iten Jiowa me pwonüetään letipan ir ekkewe metttoch mi lamot seni meinisin ngenikich?
10. Ifa ussun sia silei pwe mi fich ach sipwe iotek ussun ekkewe mettoch mi weneiti pwisin kich?
10 A pwal fich ach sipwe tingor ussun ekkewe mettoch mi weneiti pwisin kich. Ren chök awewe, ewe soumak kölfel a iotek pwe epwe lapelo an weweiti mettochun ngün mi alollon. Iei an iotek: “Kopwe ngeniei tipatchem pwe upwe alleasochisi om alluk, o fori seni lon unusen letipei.” (Kölfel 119:33, 34; Kolose 1:9, 10) Jises a “iseta an kewe iotek o a tingormau le pupuchor chapur, eti chonun mesan, ngeni ewe emon a tongeni amanaua i seni malo.” (Ipru 5:7) Lupwen Jises a föri ena, a pwälo mürinnöön ach tingor pwe sipwe pöchökkülelo lon fansoun osukosuk are sossot. Lupwen Jises a äiti ngeni nöün kewe chon käeö ifa ussun repwe iotek, a fos ussun ekkewe mettoch ra lolileniesini ussun chök ar omusalo tipis me aner möngö iteiten rän.
11. Ifa ussun iotek a tongeni älisikich pwe sisap tolong lon sossot?
11 Lon ewe iotekin ach Samol, Jises a pwal eäni ei tingor: “O kete emmwenikemelong lon sosot, nge kopwe angasakemelo seni mi ingau.” (Mattu 6:9-13) Mwirin, a apasa: “Oupwe mamasa o iotek, pwe oute tolong lon sosot.” (Mattu 26:41) Iotek a fokkun lamot lupwen a torikich sossot. Eli sia küna sossot ren ach ekiekin tunalo ekkewe allükün Paipel atun angang are sukul. Neman ekkewe chon lükün repwe etiwakich le föri ekkoch mettoch rese fich ngeni Chon Kraist. Eli aramas ra tingor pwe sipwe föri och mettoch mi atai allükün ewe Paipel. Lon ekkena fansoun, a lamot ach sipwe älleäsochisi än Jises emmwen pwe sipwe iotek mwen me lupwen sia küna sossot. Sipwe tingor än Kot älillis pwe sisap tolong lon ewe sossot.
12. Met sokkun mettoch mi efisatä aürek ra tongeni amwökütükich le iotek, iwe, met sia lükü pwe Jiowa epwe föri?
12 Sokkopaten fitikoko me osukosuk ra pippiitä lon manauen nöün Kot kewe chon angang ikenäi. Semmwen me riäfföün letip ra aosukosuka chommong. Aramas ra riäfföü pokiten föfför mi akkachofesä. Nafangaüen moni a aweiresi än aramas atufichi manauer. A ifa me watteen ewe aurur lupwen sia silei pwe Jiowa a aüselinga ach kewe iotek ussun ekkeei mettoch! Kölfel 102:17 a apasa ussun Jiowa: “Epwe lolileniesini iotekin ekkewe aramas mi mäsen, o esap turunufasei ar iotekin tingor.”
13. (a) Met sokkun mettoch lon pwisin manauach ra fich ngeni ach sipwe iotek ussur? (b) Awewei met a fis lupwen emön pwiich we a iotek.
13 Pwüngün pwe sia tongeni iotek ussun mettoch meinisin a weneiti ach angang ngeni Jiowa are ach chiechi ngeni i. (1 Jon 5:14) Kopwe tongeni tingorei än Kot emmwen ika ka ekiekin pwüpwülü are en mi kütta angang are ussun om alapalo om angangen afalafal. Ren chök awewe, emön föpwül seni Philippines a mochen pioneer. Iwe nge, esor an angang fän iten an epwe atufichi manauan. Iwe, neminnewe a apasa: “Lon eü Ammon, ua titchik lon äi iotek ngeni Jiowa ussun ewe angangen pioneer. Lon ena chök rän, atun ua afalafal, ua anöünöü ngeni emön föpwül eü puk. Iwe, ua rükö lupwen ewe föpwül a apasa: ‘Kopwe mwittir feilo ngeni ai we sukul lesossorun Särinfäl.’ Iwe, ua eisini neminnewe, ‘Met popun?’ Iwe, ewe föpwül a apasa pwe an we sukul a kütta emön chon angang. Ua feilo ngeni ewe sukul me ra mwittir nöüniei chon angang. Ua fokkun mäiru ren mwittirin met a fisitä.” A pwal fis ei sokkun mettoch ngeni chommong Chon Pwäratä woon unusen fönüfän. Ina popun, kesap pireir le apworausa ngeni Kot om kewe tingor.
Epwe Ifa Ussun ika Sia Fen Tipis?
14, 15. (a) Met popun emön esap pireir le iotek lupwen a tipis? (b) Lükün pwisin an iotek, pwal met epwe älisi emön pwe epwe pöchökkul sefäl?
14 Ifa ussun iotek epwe tongeni älisi emön a tipis? Ekkoch aramas mi tipis rese mochen iotek pokiten ra säü. Nge, ese öch ika resap iotek. Ren chök awewe: Ekkewe pilot lon sepelin ra silei pwe ika ra rukolo, ra tongeni tingor älillis seni ekkewe chon angang lon kasoro. Nge, epwe ifa ussun ika emön pilot mi rukolo a pireir le tingor älillis pokiten a säü? Iwe, a tongeni fisitä eü watteen aksiten! Pwal ussun chök ren emön mi tipis nge a säü le iotek ngeni Kot. An we feiengaü a tongeni lapelo. Ürürün pwe säü esap pinei än emön kapas ngeni Jiowa. Ren enletin, Kot a etiwa chokkewe mi tipis watte ar repwe iotek ngeni i. Ewe soufos Aisea a pesei ekkewe chon tipis lon ränin we ar repwe kökkö ngeni Jiowa, “pun a müttir le amusala tipis.” (Aisea 55:6, 7) Nge eli a lamot pwe emön epwe kütta än Jiowa “chen” ren an ätipetekisonatiu pwisin i, kul seni an föfför mi ngaü, me wesewesen aier.—Kölfel 119:58; Taniel 9:13.
15 Mei wor pwal eü popun iotek a lamot lupwen emön a tipis. Iei alon Jemes ussun emön mi osupwangen älillis lon pekin ngün: “Epwe korato ekkewe elteren mwichefel, o repwe ioteki i, . . . o ewe Samol epwe apochokkula i.” (Jemes 5:14, 15) Ewer, a lamot pwe emön epwe pwisin pwäratä an tipis ngeni Jiowa, nge a pwal tongeni tingor ekkewe elter pwe repwe iotek fän itan. Iwe, ena mettoch epwe apöchökkülasefälli i lon pekin ngün.
Pölüen Ach Kewe Iotek
16, 17. (a) Ifa ussun Jiowa a pölüeni än aramas kewe iotek? (b) Menni pworaus ra annetatä pwe iotek a riri ngeni ewe angangen afalafal?
16 Ifa ussun Kot epwe pölüeni ach kewe iotek? Fän ekkoch, mi mwittir me ffat pölüen ekkewe iotek. (2 King 20:1-6) Nge pölüen ekkoch iotek epwe mmang, me pölüen ekkoch mi weires ach sipwe miritiiti. Ussun chök ewe fefin mi mälo pwülüwan a chuchchuuri ewe soukapwüng lon än Jises kapas awewe, eli a pwal lamot ach ikkiotek ngeni Kot. (Luk 18:1-8) Iwe nge, sia silei pwe lupwen ach kewe iotek ra tipeeü ngeni letipen Kot, Jiowa esap erenikich: “Kete achipwangaei.”—Luk 11:5-9.
17 Chommong lein nöün Jiowa kewe aramas ra küna pölüen ar kewe iotek. Akkaeüin a pwäpwälo lon ach angangen afalafal. Ren chök awewe, rüüemön sister Chon Kraist lon Philippines ra ainetifetällei puk me chassi ngeni aramas lon eü leeni mi towau. Lupwen ra ngeni emön fefin eü tract, mesan a süür. Ewe fefin a apasa: “Le pwin ewe, üa iotek ngeni Kot pwe epwe tinato emön pwe epwe älisiei le weweiti ewe Paipel, iwe, üa meefi pwe iei pölüen ai we iotek.” Ekiselo chök mwirin, ewe fefin a poputä le fiffiti mwich lon ewe Kingdom Hall. Lon pwal eü leeni lon ötiu öörun Asia, emön brother Chon Kraist a pireir le afalafal lon eü leeni mei wor ttit me chon mas ie. Nge, a iotek ngeni Jiowa, iwe a pöchökkülelo me a tolong lon ewe leeni. A fichifich lon ewe asamen eü apartment, iwe, emön föpwül a suuki ewe asam. Lupwen pwiich we a awewe ngeni ewe popun a feito, ewe föpwül a poputä le kechiu. A apasa pwe a kükkütta Chon Pwäratä Jiowa me a tingor älillis lon iotek pwe epwe küner. Ewe brother a pwapwa le awewe ngeni i ifa ussun epwe küna ewe mwichefelin Chon Pwäratä Jiowa.
18. (a) Met sipwe föri lupwen a pölü ach kewe iotek? (b) Met sipwe lükü ika sia iotek fansoun meinisin?
18 Pwüngün pwe iotek eü minen älillis mi fokkun mürinnö. Jiowa a mmonletä le aüseling me pölüeni ach kewe iotek. (Aisea 30:18, 19) Nge, a lamot ach sipwe kükkütta ifa ussun Jiowa a pölüeni ach kewe iotek. Eli pölüen ach iotek esap met sia ekiekin küna. Nge, lupwen sia mirititi an we emmwen, sisap mönükalo ach sipwe kilisou ngeni i me mwareiti i. (1 Tesalonika 5:18) Pwal ooch, sia mochen chechchemeni alon ewe aposel Paul: “Ren mettoch meinisin oupwe chok esinei ngeni Kot ami mochen ren iotek o tingor o pwal eti kilisou.” Ewer, alamota ekkewe fansoun meinisin en mi tongeni fos ngeni Kot. Iei ussun, kopwe küna pwüngün alon Paul we ussun aramas lupwen a pölü ar kewe iotek: “Iwe, an Kot we kinamwe, ewe mi somelo seni ach ekiek meinisin, epwe mamasa letipemi o ami ekiek.”—Filipai 4:6, 7.
Kopwe Tongeni Pölüeni?
• Ikkefa ekkewe sokkun iotek sipwe tongeni eäni?
• Ifa ussun sipwe iotek?
• Met sokkun mettoch sipwe iotek ussun?
• Ifa ussun iotek epwe tongeni älisi aramas mi tipis?
[Ekkewe kapas eis fan iten ewe lesen]
[Sasing lon pekin taropwe 21]
Iotek seni letipach a älisikich pwe sisap tolong lon sossot
[Sasing lon pekin taropwe 23]
Ren iotek, sia pwäratä ngeni Kot ach kilisou, met sia lolileniesini, me ach kewe tingor