Sipwe Küna Pwapwa Lon Ach Föralo Chon Käeö
“Oupwe feinno . . . o oupwe ewinireno pwe repwe nei chon kaeo.”—MAT. 28:19, Ewe Kapasen God.
EMÖN sister mi fiti ewe kümiin chon fosun Hindi lon Merika a makkei: “Üa fen käeö ngeni ewe famili seni Pakistan 11 wiik. Aua chiechiöchfengen me ena famili, ina popun lupwen üa silei pwe repwele liwiniti leenier, üa fokkun kechiuetiir. Üa kechiu pwe usap chüen chiechi ngeniir me ai we pwapwa le käeö ngeniir ussun Jiowa.”
2 Ka meefi pwapwa ussun chök ewe sister lupwen ka käeö Paipel ngeni emön? Jises me nöün kewe chon künö ra pwal küna pwapwa le föralo chon käeö. Lupwen ekkewe 70 chon käeö, ekkewe Jises a asukuler, ra liwinto fän pworaus mi apwapwa, iwe Jises “a uren pwapwa ren Ngünmifel.” (Luk 10:17-21) Pwal ussun chök ikenäi, chommong ra fokkun pwapwa lon ei angangen föralo chon käeö. Ina popun, lon eü ier mi kukuto, ekkewe chon afalafal mi pwapwa me angang weires ra käeö ewe Paipel ngeni onu esopw million aramas iteiten maram!
1-3. (a) Met meefian chommong ussun ar repwe käeö ngeni aramas ewe Paipel? (b) Ikkefa ekkewe kapas eis sipwe ekiek woon?
3 Iwe nge, ekkoch chon afalafal resaamwo küna ewe pwapwa mi pop seni ach asukula emön ewe Paipel. Ekkoch rese mwo nge nöüni emön chon käeö lon ekkeei ier mi kanoto. Met kewe ra aweiresikich lon ach achocho le käeö ngeni emön ewe Paipel? Ifa ussun sipwe pworaiti ekkewe minen eppet? Ikkefa ekkewe feiöch sipwe küna lupwen sia älleasochisi än Jises allük ren unusen ach tufich: “Oupwe feinno . . . o oupwe ewinireno pwe repwe nei chon kaeo”?—Mt. 28:19, KG.
Mettoch mi Aweiresikich mi Tongeni Atai ach Pwapwa
4, 5. (a) Ifa ussun aramas lon ekkoch fönü ra etiwa ewe kapas allim? (b) Ikkefa ekkewe mettoch mi aweiresi ekkewe chon afalafal lon ekkoch fönü?
4 Lon ekkoch fönü, aramas ra fokkun etiwa nöüch kewe puk me mochen käeö ewe Paipel rech. Eü pean pwüpwülü seni Australia nge iei ra mwo angang lon Zambia ra makkei: “Mi fen pwüng met aua rongorong pwe ewe angangen afalafal lon Zambia mi fokkun uwaaöch. Ach chuuri aramas woon al a mmen ämmeseik! Aramas ra pwisin pwereto rem, ra tingorekem ekkewe puk ra sani.” Iwe, lon eü ier mi kkanoto, pwiich kewe lon Zambia ra käeö ngeni lap seni 200,000 aramas ewe Paipel, weween emön chon afalafal a nöüni lap seni emön chon käeö.
5 Iwe nge, lon ekkoch fönü, ekkewe chon afalafal ra küna weiresin ar repwe anöünöü ekkewe puk me käeö Paipel ngeni aramas iteitan. Pwata? Fän chommong, lupwen ra afalafal imw me imw, aramas rese nom lon imwer nge ren ekkoch mi nom rese mochen aüseling ussun lamalam. Neman ekkoch mi fen määritä lon eü famili rese sissilei lamalam are fen ekkoch ra oput pokiten ra küna likotuputupun lamalam mi chofona. Chommong aramas ra riäfföü me torotorongaü lon pekin ngün pokiten nöür kewe sou mas mi chofona rese tümünüür. (Mt. 9:36) Ina popun sia weweiti pwata ekkena aramas rese mochen etiwa ewe pworausfengen woon Paipel.
6. Ikkefa ekkewe minen eppet mi aweiresi ekkoch?
6 Ekkoch chon afalafal mi tuppwöl ra küna pwal eü minen eppet mi tongeni atai ar pwapwa. Inaamwo ika ra angang weires loom lon ei angangen afalafal, nge iei ra küna weires ren samau me apwangapwangen chinnap. Mei pwal wor ekkoch minen eppet kich sia pwisin efisatä. Ren chök awewe, ka ekieki pwe ka lipwäkingaü le käeö ngeni emön? Neman ka meefi ussun chök Moses lupwen Jiowa a tinalo pwe epwe fos ngeni Farao. Moses a apasa: “Ai Samol, sap ngang eman mi sousile kapas seni me lom pwal tori ei fansoun.” (Eks. 4:10) Ach meefi pwe sia lipwäkingaü epwe tongeni pwal wewe ngeni ach niuokkus pwe esap sopwöch ach angang. Eli sia lolilen pwe nöüch chon käeö esap wiliti emön chon Kraist pun kich sise lipwäköch. Pokiten sia ekieki pwe esap sopwöch ach angang, iwe sia tunalo wisach le käeö ngeni emön. Ifa ussun sipwe pworaiti ekkena minen eppet?
Ammolnatä Letipach
7. Met a amwökütü Jises le föri an angang?
7 Äeüin, sipwe ammolnatä letipach. Jises a erä: “Eman aramas epwe chök apasawu met mi nom lon letipan.” (Luk 6:45) Jises a ekieki seni enletin letipan met epwe öchiti aramas, ina met a amwökütü i le föri an angang. Ren chök awewe, lupwen a küna ekkewe chon Jus mi attong pokiten ra towau seni Kot, iwe, “a fokun tonger.” A ereni nöün kewe chon käeö: “Ewe räs a fokun watte, . . . oupwe tüngorei ewe Samolun räs pwe epwe tinala chon angang pwe repwe angang ngeni ewe räs.”—Mt. 9:36-38.
8. (a) Met epwe öch ach sipwe ekieki? (b) Met sipwe tongeni käeö seni meefien emön chon käeö Paipel?
8 Lupwen sia fiti ewe angangen föralo chon käeö, a öch sipwe ekieki ifa ussun sia feiöch ren än emön awora an fansoun le käeö ngenikich ewe Paipel. Nge iei sipwe pwal ekieki ifa ussun ekkewe aramas sia chuuri repwe pwal küna feiöch seni ar rongorong ewe pworaus sia uwei ngeniir. Emön fefin a mak ngeni ewe branch ofes: “Üa mochen apasatä ai kilisou ngeni ekkewe Chon Pwäratä ra käeö ngeniei lon imwei. Neman fän ekkoch üa achipwanger ren chommongun ai kapas eis nge a lulo seni nöür kulok. Nge ra mosonottam me pwapwa le käeö ngeniei. Üa kilisou ngeni Jiowa me Jises pwe üa chuuri ekkeei aramas.”
9. Met Jises a ännefota, me ifa ussun sipwe äppirü?
9 Pwüngün pwe esap meinisin ra etiwa än Jises afalafal. (Mt. 23:37) Ekkoch ra fiti i ekis chök fansoun nge mwirin rese chüen tipeeü ngeni an kewe afalafal, iwe, “resap chüen mochen tapwela mürin.” (Jon 6:66) Iwe nge, Jises ese pwal ekieki pwe esor lamoten ewe pworaus a uwei ngeni aramas pokiten chök ra tunalo. Ikaamwo lap ngeni ekkewe pwikil Jises a fotuki rese uwa, nge Jises a chök nengenifichi ewe angang mi mürinnö a pwönütä. Jises a küna pwe uwaan irään lon ekkewe tänipi ra fen nupulo, pwe ra öchün ar repwe kinikin. Iwe, a fokkun küna pwapwa seni an fiti ewe angangen räs. (Älleani Jon 4:35, 36.) Iwe, sipwe äppirü met Jises a ännefota, ese nengeni ewe pwül mi pöön esor uwaan, nge sipwe chök nefotofot ngeni ekkewe uwa sipwe tongeni kini lon ach leenien afalafal. Iwe, sipwe nengeni ifa ussun sipwe eäni ei esin ekiek mi pwüng.
Fotuki pwe Sipwe Kini
10, 11. Met epwe älisuk pwe om pwapwa epwe sopwosopwolo?
10 Emön chon atake a achocho le fotukatiu pwe epwe pwal kini. Pwal ussun chök, a lamot ach sipwe achocho le afalafal pwe sipwe poputääni nöüch chon käeö. Nge met ika sia afalafal iteitan nge äkkäemön chök ekkewe aramas ra nom lon imwer are a mmen weires ach sipwe künasefäli ekkewe aramas sia fen pin chuuriir? Ei mettoch a aletipengaüakich. Iwe, sipwe fangetä le afalafal imw me imw? Aapwi! Pun mei chüen wor aramas ra kerän äkkäeüin chuuri Chon Pwäratä Jiowa ren ewe angangen afalafal imw me imw, eü angang sia fen pin föfföri seni loom tori ikenäi.
11 Iwe nge, ren an epwe sopwosopwolo om pwapwa, ka tongeni sotuni pwal ekkoch napanapen afalafal pwe kopwe pwal tori ekkoch aramas? Ren chök awewe, ka fen sotuni le chuuri aramas woon al are lon ar leenien angang? Ka fen afalafal ngeni aramas woon telefon are angei nampaan nöür telefon, ekkewe ka fen chuuri pwe kopwe sopwelo ämi pworausfengen woon telefon? Ren om pwäratä tinikken me tipemecheres le sotuni sokkopaten napanapen om afalafal, iwe, kopwe pwapwa ren om chuuri aramas mi pwapwaiti pworausen ewe Mwu.
Likiitü Fän än Aramas Tenechepwäk
12. Met sipwe tongeni föri ika aramas sia chuuri rese mochen aüseling?
12 Met ika lon ach leenien afalafal aramas rese äfänni pworausen lamalam? Ka tongeni sotuni pwal och pworaus repwe efich? Ewe aposel Paul a mak ngeni pwiin kewe chon lükü lon Korint, a erä: “Ngeni ekewe chon Juta, üa manau usun chök eman chon Juta, . . . ngeni ekewe chon lükün Israel, üa manau usun chök eman chon lükün Israel esap nom fän än ekewe chon Juta Allük, . . . ei esap wewen pwe üsap aleasochisi än Kot kewe allük.” Pwata Paul a föri ena? A apasa: “Iei usun üa manaueni sokun manau meinisin lein sokun aramas ese lifilifil, pwe üpwe tongeni amanaua ekoch me leir ren met epwe tufich ngeniei.” (1 Kor. 9:20-22) Sia pwal tongeni ussun Paul pwe sipwe kütta och pworaus sipwe tongeni tipeeüfengen woon me aramas sia chüri? Chommong aramas rese sissilei lamalam nge ra mochen ririin ar famili epwe mürinnölo. Neman ra pwal ekieki met popun ra manau woon fönüfan. Sia tongeni afalafal ngeniir pworausen ewe Mwu pwe repwe pwapwaiti ar aüseling?
13, 14. Ifa ussun sipwe tongeni alapalo ach pwapwa lon ach angangen föralo chon käeö?
13 Chommong chon afalafal a chüen wattelo ar pwapwa seni ei angangen föralo chon käeö, pwal mwo lon ekkewe leeni lap ngeni aramas ra tenechepwäk. Ifa ussun? Ren ar käeö fosun pwal eü fönü. Eü pean pwüpwülü 60 som ieriir, ra küna pwe fite ngeröü chon sukul fitifengen me ar famili, iir chon Saini, ra nonnom lon än ewe mwichefel leenien afalafal. Ewe mwän a erä: “Pokiten ei mettoch, a wor pesepes pwe äm aupwe käeö fosun Saini. Inaamwo ika äm aua awora watteen fansoun le käeö ewe fos iteitan rän, nge aua fokkun pwapwa pun äm aua käeö Paipel ngeni ekkewe chon Säini lon leeniem.”
14 Inaamwo ika esor om tufich le käeö fosun pwal eü fönü, ka tongeni nöünöüöchü ewe puk Kapas Allim Fän Iten Aramas Meinisin (Good News for People of All Nations) lupwen ka chuuri emön mi eäni pwal eü fos. Ka pwal tongeni tingor seni ewe mwichefel ekkoch puk ra mak lon fosun ewe fönü, ekkewe aramas ka chuuri ra eäni. Pwüngün pwe a lamot sipwe awora pwal och fansoun, me achocho le fos ngeni iir kewe mi eäni pwal eü fos me eöreni. Nge sipwe chechchemeni ewe kapasen emmwen lon än Kot we Kapas lupwen a erä: “Are fotan eman a somwosomwöch, kinian epwe pwal somwosomwöch.”—2 Kor. 9:6.
Unusen Än Ewe Mwichefel Älillisfengen
15, 16. (a) Pwata ewe angangen föralo chon käeö a longolong woon än unusen ewe mwichefel älillisfengen? (b) Ifa ussun ekkewe chinnap ra wisen awora älillis?
15 Iwe nge, ewe angangen föralo chon käeö ese longolong woon än emön chon afalafal pwisin achocho. Nge a pwal kapachelong unusen än ewe mwichefel älillis. Pwata sipwe tongeni apasa ena? Pun Jises a apasa: “Are oupwe echenifengenikemi, aramas meinisin repwe silei pwe ämi nei chon kaiö.” (Jon 13:35) Lupwen ekkewe chon käeö ra fiti ekkewe mwich ra ingeiti ewe tong a pwälo lefilach. Emön chon käeö a makkei: “Ua fokkun pwapwaiti le fiti ekkewe mwich. Ekkewe aramas ra etiwaöchüei fan pwapwa!” Jises a apasa pwe chokkewe mi wiliti nöün chon käeö repwe tongeni küna koput me ren pwisin chon le imwer. (Älleani Mattu 10:35-37.) Iwe nge, Jises a pwonei pwe lon ewe mwichefel, repwe küna chommong ‘pwiir, fefiner, iner, nöür.’—Mark 10:30.
16 Äkkäeüin pwiich kewe chinnap ra awora watte älillis ngeni ekkewe chon käeö Paipel pwe repwe feffeitä. Ifa ussun? Inaamwo ika ekkoch chinnap rese tongeni pwisin käeö ngeni emön ewe Paipel, nge meefier kewe ra uwawu atun ekkewe mwich ra apöchökküla meinisin. Pworausen manauer ifa ussun ra “manau fän pwüng,” a alingalo ewe mwichefel me lukeato ekkewe mi letipwenechar ngeni än Kot mwicheich.—SalF. 16:31.
Pworaiti Ach Ekiekmwääl
17. Met sipwe tongeni föri pwe sipwe pworaiti ewe ekiek pwe kich mi lipwäkingaü?
17 Met kopwe föri ika ka meefi pwe ka lipwäkingaü le käeö ngeni emön? Sipwe chechchemeni pwe Jiowa a älisi Moses ren an liffang ngeni ewe ngün mi fel me awora ngeni emön chienan, pwiin we, Aaron. (Eks. 4:10-17) Jises a pwonei pwe än Kot ngün mi fel epwe älisikich lon ach we angangen afalafal. (Fof. 1:8) Pwal och, Jises a tinirelo akkarüüemön nöün chon künö ar repwe afalafal. (Luk 10:1) Ina popun, ika ka meefi weires le käeö ngeni emön ewe Paipel, tingor än Kot ngün mi fel pwe epwe ngonuk tipatchem. Iwe, kopwe pwal angangfengen me emön chienom mi lipwäköch mi tongeni älisuk me apöchökkülok om kopwe angangöch. Ina eü minen apöchökkül ach sipwe chechchemeni pwe Jiowa a filatä ekkewe mi tekison, “ekewe mi apwangapwang me ren fanüfan,” pwe repwe apwönüetä ei angang mi amwarar.—1 Kor. 1:26-29.
18. Ifa ussun sipwe pworacho ngeni ewe memmeef pwe esor ach tufich le älisi nöüch chon käeö?
18 Ifa ussun sipwe pworacho ngeni ewe memmeef pwe esor ach tufich le älisi nöüch chon käeö? Ach angangen föralo chon käeö esap ussun chök emön a kuk möngö fän iten famili, annöön are ngaüen ewe möngö a longolong woon ena chon kuk. Nge, ei angangen föralo chon käeö a lamot pwe ülümön are lap seni repwe älillisfengen. Äkkäeüin, Jiowa a lamot, pun I a wisen emmwenato ewe chon käeö ngeni I. (Jon 6:44) Oruuen, ewe chon afalafal minne nöün ewe chon käeö me pwal ekkoch chon ewe mwichefel repwe achocho le lipwäköch pwe repwe älisi ewe chon käeö an epwe feffeitä. (Älleani 2 Timoti 2:15.) Aülüngätin, a lamot pwe ewe chon käeö epwe pwisin apwönüetä met a fen käeö. (Mt. 7:24-27) Ewer, sipwe lichippüng ika emön chon käeö a ükütiu seni an käeö. Pwüngün, sia äneän pwe ekkewe chon käeö repwe kefilöch, nge emön me emön leir epwe “püsin pwärätä föförün lon manauan ngeni Kot.”—Rom. 14:12.
Ikkefa Ekkewe Feiöch?
19-21. (a) Ikkefa ekkewe feiöch sipwe küna seni ach käkkäeö ngeni aramas ewe Paipel? (b) Ifa ekiekin Jiowa ngeni chokkewe ra fiti ewe angangen afalafal?
19 Ach käkkäeö Paipel ngeni aramas a älisikich ach sipwe kütta loom ewe Mwu. A pwal atufichikich le fotukalong lon ekiekich me letipach ewe enlet lon ewe Kapasen Kot. Met popun? Emön pioneer itan Barak a aweweei: “Lupwen üa käeö ngeni aramas, a lamot ai upwe angangöchülo le pwisin käeö ewe Paipel. Üa küna pwe mi lamot ai upwe apöchökküla met üa pwisin lükü me mwen ai upwe asukula emön.”
20 Ika ese mwo wor emön noum chon käeö iei, itä weween pwe esor lamoten om angang ngeni Kot? Aapwi! Jiowa a fokkun aücheani ach achocho le mwareiti I. Meinisin mi fiti ewe angangen afalafal, iir nöün Kot ‘chon angang mi akkangangfengen.’ Iwe nge, ach käeö ngeni emön a atoto rech pwapwa atun sia küna pwe Kot a ämääraatä minne sia fotukatiu. (1 Kor. 3:6, 9, TF) Iei alon Amy: “Lupwen sia küna emön chon käeö a feffeitä, a watte ach meefi kilisou ngeni Jiowa pwe a nöünöükich le awora ngeni och liffang mi amwarar, ina ewe tufichin silei Jiowa me ewe äpilükülükün manau esemuch.”
21 Ika sipwe achocho le poputääni me käeö ngeni aramas ewe Paipel ükükün ach tufich, epwe älisikich le ekilapei ach angang ngeni Kot iei, me epwe apöchökküla ach äpilükülükün manau lon ewe otot mi fö. Ren än Jiowa we älillis, sipwe tongeni älisi ekkewe ra aüseling ngenikich. (Älleani 1 Timoti 4:16.) A ifa me watteen ena pwapwa!
En mi Chechchemeni?
• Ikkefa ekkewe mettoch mi aweiresi ewe angangen käeö ngeni aramas ewe Paipel?
• Met sipwe föri ika chommong aramas lon ach we leenien afalafal ra tenechepwäk?
• Ikkefa ekkewe feiöch sipwe küna seni ach käkkäeö ngeni aramas ewe Paipel?
[Ekkewe Kapas Eis fan Iten ewe Lesen]
[Sasing lon pekin taropwe 15]
Ka fen sotuni pwal ekkoch napanapen afalafal pwe kopwe chuuri ekkewe mi letipwenechar?