SIA rongorong än ekkewe aramas kekkechiu. Chon letipeta ra üföüf mi chol ra püpüchör le kechiu me sengituttun, me ra turulo me fafares le ppwul pokiten ar letipeta. Ra walong moni me liffang lon ewe leenien ouw ünükün ewe pworun mi mä. Pworausen met ena? Ikkeei ekkoch eöreni fän iten ekkaan mei mä, atun chommong aramas repwe chuto pwe repwe ouw woon ewe somä.

Chommong Chon Pwäratä Jiowa ra nonnom lein aramaser me chon orur kewe mi niuokkusiti ekkewe mi mälo me eäni ewe sokkun lükü, awewe chök, ren mwiringaü, ewe mi chök longolong woon kapas chofona. Fite million aramas ra lükü pwe lupwen emön a mälo, ngünün we a fit lein ngünün chon loom, iwe, a tufichin älisi are efeiengaüa ekkewe mi manau. Ei sokkun lükü a riri ngeni chommong eöreni fän iten ekkaan mi mä. Pwüngün, ese wor ngaüen ach sipwe kechiueiti ekkewe mi mälo. Fän ekkoch, Jises me nöün kewe chon äppirü ra pwal kechiueiti attonger kewe ra fen mälo. (Jon 11:33-35, 38; Fof. 8:2; 9:39) Nge rese kon essenükü ar ngüngüres me kechiu ussun met aramas ra föfföri lon ena fansoun. (Luk 23:27, 28; 1 Tes. 4:13) Pwata? Popun, pun ra silei ewe enlet ussun ekkewe mi mälo.

A ffat met ewe Paipel a apasa: “Pun ekewe chon manau ra silei pwe repwe mäla. Nge ekewe sotup resap silei och mettoch . . . Ar tong me ar oput pwal ar lolowo esap chüen wor . . . Esap wor och angang, ekiek, silelap ika tipachem lon lenien sotup ewe ia kopwe feila ie.” (SalAf. 9:5, 6, 10) Ekkeei wokisin seni Paipel ra affata pwe lupwen emön a mälo, ese chüen silei och mettoch. Esap tongeni ekiek, meefi, fos, are weweiti och. Iwe, ifa ussun än Chon Kraist weweiti ei pworaus mi enlet seni Paipel epwe kküü ar akkota kokkotun woon emön mi mä?

“Ousap Atapa Och Mettoch mi Limengaü”

Ese lifilifil ika menni fönü Chon Pwäratä Jiowa ra popu seni, nge rese fokkun fiti ekkewe eöreni mi riri ngeni ewe lükü pwe mei wor ngünün aramas a chüen manau mwirin mälo, me ra tongeni älisi are efeiengaüa ekkewe mi manau. Fän chommong, lape ngeni ekkena eöreni ra äletipengaüa Kot pun ra pop seni afalafalen ekkewe timon, ewe mi erä pwe ngünün aramas esap tongeni mälo, ussun choweän aüchimwa ewe mi mä pokiten ena lükü, ächechchemen mi mä, asomä, me eöreni fän iten ekkewe mi mä pwülüwer. (Ais. 26:14) Chon Kraist mi enlet resap “tongeni mongö seni än ach Samol chepel, nge pwal mongö seni än ekewe anün rochopwak chepel,” ina popun, resap fiti ekkena eöreni. (1 Kor. 10:21) Ra älleasochisi än Kot allük: “Oupwe aimwükemiila seniir. Ousap atapa och mettoch mi limengaü.” (2 Kor. 6:17) Iwe nge, ach äimukichelo seni ekkena sokkun eöreni esap fokkun mecheres.

Chommong aramas ra lükü pwe ika rese föri ekkena eöreni, ngünün ewe mi mä epwe song. Me rer, ika emön esap fiti ewe eöreni, ina eü tipis watte pun epwe tongeni atoto anümamaü are feiengaü watte ngeni chon sopwur meinisin. Pokiten Chon Pwäratä Jiowa rese fiti ekkewe eöreni mi ü ngeni Paipel, chommong leir ra küna esiit, pweningaü, me ra sochoul me ren chon sopwur are ar eterenges. Ekkoch ra tipimwääl ngeniir pwe iir mi kirikiringaü are süfölüngaüeiti ewe mi mälo. Fän ekkoch,  ekkewe esap iir Chon Pwäratä Jiowa repwe walong ar pöchökkül le nemeni än Chon Kraist kokkot fän iten ewe mi mä. Ina minne, ifa ussun sipwe tümünü pwe sisap änini ngeni chokkewe mi tipeweires le aumwesikich pwe sipwe fiti ar kewe eöreni Kot a oput? Nge met a fen lamot seni ena, met sipwe föri pwe sipwe imulo seni ekkena eöreni me föfför mi tongeni atai ach riri ngeni Jiowa?

Affata Minne Sia Mochen

Me ren eörenien ekkoch fönü, samolun ewe eterenges me aramaser me lükün ar famili repwe wisen nemeni kokkotun woon ewe mi mä. Ina minne, a lamot ngeni emön Chon Kraist mi tuppwöl an epwe affata pwe ekkewe Chon Pwäratä Jiowa repwe wisen akkota kokkotun woon ewe mi mälo me ren ekkewe kapasen emmwen lon Paipel. (2 Kor. 6:14-16) A lamot pwe ekkewe kokkot me mwökütüküt woon ewe mi mä esap aosukosuka mwelien letipen pwiich kewe chon lükü are oturukapa chokkewe mi silei met kich Chon Kraist sia lükü me asukula aramas ussun ekkewe mi mälo.

Ika emön chon tupuni ewe mwichefel epwe wisen akkota kokkotun woon ewe mi mä, ekkewe elter mi kefilitä repwe emmweni me älisi ekkewe chon lükü mi letipeta pwe repwe weweiti ekkewe kapasen emmwen seni Paipel mi weneiti kokkotun woon ewe mi mä. Ika ina, meinisin ekkewe kokkot repwe tipeeü ngeni ewe Paipel. Ika ekkoch esap iir Chon Pwäratä Jiowa ra mochen walong ekkewe eöreni mi ü ngeni Paipel, mi lamot kich Chon Pwäratä Jiowa sipwe üppos me pwora le aweweei än Chon Kraist lükü fän mosonoson me mennin. (1 Pit. 3:15) Nge ifa ussun ika märäriir esap iir Chon Pwäratä Jiowa ra walong ar pwüüng me pöchökkül pwe repwe chök föri eörenier kewe mi mwääl? Iwe, eli chon ewe famili iir Chon Pwäratä Jiowa repwe filatä ar resap fiti ena kokkot woon ewe mi mä. (1 Kor. 10:20) Ika ina, epwe tongeni fis eü afalafal lon ewe Kingdom Hall are lon pwal eü leeni mi fich pwe ekkewe mi letipechou ren mäloon attonger we repwe küna ‘aurur me ren ekkewe wokisin.’ (Rom. 15:4, TF) Inaamwo ika ese nom ewe somä ikewe epwe fis ewe afalafal ie, nge ena esin kokkot epwe mürinnö me fiti süföl. (Tut. 34:5, 6, 8) Än aramas walong ar pöchökkül a tongeni alapalo riäfföün me osukosuken ena fansoun, nge epwe aururukich ach silei pwe Jiowa, ewe a ngenikich “ei tufich mi somwola,” epwe chechchemeni ach tipeppos le föri minne mi pwüng.​—2 Kor. 4:7.

Makkeei me Affataöchü Om Mochen

Lupwen emön a makketiu titchikin an mochen ussun met epwe fis lupwen a mälo, epwe emecheresi än ewe familien chon lükü awewe ngeni ekkewe rese lükü, iwe eli repwe tipemecheres le süföliti mochenin ewe mi mä. Ikkeei ekkewe mettoch mi lamot emön epwe makketiu lon nöün we taropwe: Epwe ifa ussun kokkotun  woon ewe mi mä, ia epwe fis ia, me iö epwe wisen akkota unusen kokkotun woon ewe mi mä. (Ken. 50:5) Epwe öch ika emönnewe epwe sainei ewe taropwe me epwe wor chon pwäratä repwe pwal sain. Ina minne, iir kewe mi mirititi alon ewe Paipel repwe ammolnatä. Resap witiwit tori ra chinnap are choulo lon ar semwen me arap ngeni mälo me mwen repwe ekiekin makkeei lon taropwe minne ra mochen.​—SalF. 22:3; SalAf. 9:12.

Ekkoch rese meefi kinamwe le makkeei ar mochen lon taropwe. Iwe nge, ach föri ena a pwäratä pwe kich Chon Kraist mi äsimaü me sia tongei ekkewe ekkoch. (Fil. 2:4) Epwe fen öch ika emön me emön epwe pwisin affataöchü met an mochen lupwen a chüen pöchökkül. Nge esap likiti ngeni chon an famili mi letipechou mwirin an mälo ar repwe wisen akkota pun eli aramas repwe eriäniir le walong ar kewe eöreni mi ü ngeni Paipel nge ewe mi mälo ese lükü are tipeeü ngeni.

Esap kon Ssenük Kokkotun woon ewe mi Mä

Chommong ra lükü pwe ewe kokkotun woon somä epwe watte me eingeing pwe esap asonga ngünün ewe mi mälo. Nge pwal ekkoch ra äeä ena fansoun pwe repwe pwäralo itetekiar me ‘lamalam tekian ar pisek’ me repwe einga ngeni aramas ükükün ar echeni ewe mi mälo. (1 Jon 2:16, TF) Ra angang weires me awora watteen fansoun, moni, me pisek pwe epwe “pwüng” me ren ekiekin aramas kokkotun ar peiasini ewe mi mä. Eli repwe ammanga an epwe peias ren fitu rän ika wiik pwe epwe naföch monien kokkotun woon ewe mi mä. Fän chommong, a kapachelong möön ewe somä me an famili woon sepelin le liwiniti wesetään fönüer ren an epwe peias ikena ie. Fän chommong, aramasen ewe mi mä ra anükünükü ewe leeni ikewe ie aramas repwe kiito ren ewe somä ie. Aramasen ewe mi mä ra amöngööni chiener me märäriir kewe mi etto aururuur, me fän ekkoch, ra aleenier lon imwer are pwal eü imw mi kkan ngeni. Ika a mmang le peias, epwe aweiresi familien ewe mi mä pun epwe watte moni towu le amöngööni ekkewe aramas. Nge ika familien ewe mi mä ra äeäöchü pisek me nöünöüöchü moni, ar na osukosuk esap atai kokkotun ar fel ngeni Jiowa.​—Fil. 1:10.

Ekkewe chon Kraist mi äsimaü ra mirititi pwe resap föri mettoch mi kon lulo ussun met aramas rese silei are äfänni ewe kapasen  emmwen seni Paipel ra föri. Sia fokkun silei pwe ekkewe föfför mi kon ssenük me eöreni mi ü ngeni ewe Paipel ‘resap pop seni ewe Sam, nge ra pop seni ei fanüfan epwe morola.’ (1 Jon 2:15-17) Sipwe tümünükich pwe sisap fiti än chon fönüfan ekiek ussun akkuffengen. (Kal. 5:26) Pwüngün pwe lon ekkewe fönü ikewe ra kon niuokkusiti ekkewe mi mälo ie, fän chommong kokkotun woon emön mi mälo a kon watte ren chommongun aramas pwe iwe a weires ach sipwe nemeni me a mwittir fis osukosuk. Pwal eü, ar kon essenükü ar epini ekkewe mi mälo a apöchökküla ekkewe chon lükün ar repwe eäni föfför rese pwüng. Ikewe ie ewe mi mä a nom ie, epwe tongeni wor kechiuengaü, kisi ewe somä, sengituttun (fos ngeni ewe somä ussun itä a chüen manau), me pacheetä moni are pisek woon ewe somä. Ika a fis ekkeei mettoch lon än chon Kraist kokkotun woon mi mä, epwe fokkun eitengaüa Jiowa me nöün kewe aramas.​—1 Pit. 1:14-16.

Ach silei ewe enlet ussun napanapen ekkewe mi mälo epwe apworakich le eäni ekkewe kokkot mi limöch woon emön mi mä, esap mwo nge wor ekis tikitikipwülün fönüfan. (Ef. 4:17-19) Inaamwo ika Jises ewe mwän mi lapalap me lamot seni meinisin, nge lupwen a peias, esor osukosukan are angang mi ssenük, nge a chök kokkotöch. (Jon 19:40-42) Ren ekkewe mi “eäni ekiekin Kraist,” esor ässäüen ena sokkun peias. (1 Kor. 2:16) Epwe fokkun mürinnö ika än chon Kraist kokkot woon ekkewe mi mä esap fiti ekkewe angang mi kon ssenük, esap wor ekkewe eöreni mi ü ngeni ewe Paipel, nge epwe chök kinamwe, ämmäfel, me fich ngeni chokkewe mi tongei Kot.

Wesin Ewe Peias

Fän chommong mi chök sopwosopwolo ekkewe eöreni mi ü ngeni ewe Paipel wesin ewe peias. Lon ekkoch fönü, ewe famili ra pworausfengen woon ekkewe osukosuk lefiler me ra omusomusfengen ren ar repwe chääri ngünün ewe mi mälo. Ra niuokkus pwe ngünün ewe mi mälo epwe song ika rese fiti ekkena eöreni.

Pokiten ekkewe chon Kraist mi enlet ra silei napanapen ekkewe mi mälo, rese niuokkusitiir. (SalAf. 9:5, 10) Ina minne, ika ra silei pwe eü eöreni a popu seni ekkewe timon, iwe, ese fokkun fich ngeniir ar repwe fiti. Än emön föri ena sokkun eöreni a atai än Paipel kewe kapasen emmwen me süfölüngaüeiti Kot me mwelien letipen chienan chon fel ngeni Jiowa.

Aramas Repwe Küna Pwe Kich mi Sokkolo

A ifa me watteen ach kilisou pwe sia ngaselo seni ach niuokkusiti ekkewe mi mälo, ewe mi chöüfetäl lein ekkewe rese silei ewe enlet! (Jon 8:32) Pokiten sia “nom fän ewe saram,” esap kon ssenük ach pwäratä letipeta me weires nge epwe fis fän süföl pun sia mirititi pwe mi wor ach äpilükülükün manausefäl. (Ef. 5:8; Jon 5:28, 29) Ena äpilükülük epwe tümünükich pwe esap lulo ach pwäratä letipeta ussun chök “chokewe esap wor ar äpilükülüköch.” (1 Tes. 4:13) Epwe apworakich pwe sipwe üppos fän iten fel mi limelimöch, nge sisap kkuf ren ach niuokkusiti aramas.​—1 Pit. 3:13, 14.

Ach tuppwöl le älleasochisi än Paipel kewe kapasen emmwen epwe älisi aramas ar repwe ‘kuna ifa sokkofesenin . . . emon mi angang ngeni Kot me ewe ese angang ngeni.’ (Mal. 3:18, KG) Lon ekkena rän mwach, esap chüen wor mälo. (Pwar. 21:4) Atun sia wikkiti pwönüetään ena pwon mi lap, amwo Jiowa epwe küna pwe kich mi limöch, esor ach tikitikipwül, me sia unusen imulo seni ei fönüfan mi ngaü me an kewe eöreni mi eitengaüa Kot.​—2 Pit. 3:14.

[Sasing lon pekin taropwe 30]

Iei ewe alen tipatchem ach makkeei me affata ach mochen ussun kokkotun fansoun ach mälo

[Sasing lon pekin taropwe 31]

Än Chon Kraist kokkot woon ewe mi mä esap fiti ekkewe angang mi kon ssenük, nge epwe wor süfölün