“[Jesus] a feitä won eu chuk . . . nge nöün kewe chon kaiö ra feito ren. Iwe, Jesus a popuetä le afalafaleer.”​—MAT. 5:1, 2.

1, 2. (a) Lon menni napanap Jises a eäni än we Afalafal woon Chuuk? (b) Ifa ussun Jises a poputä an we afalafal?

 LON ewe ier 31 C.E. Jises a ekis kaülo an angangen afalafal lon Kalilea pwe epwe akkomw fiti ewe Pasofer lon Jerusalem. (Jon 5:1) Lupwen a liwiniti Kalilea, a iotek ngeni Kot unusen eü pwin fän iten an emmwen le filatä ekkewe engol me rüüemön aposel. Lupwen a ränilo, eü mwichen aramas ra mwicheto ren Jises atun a echikaratä ekkewe mi semwen. Jises a feitä woon ewe chuuk o a mottiü, iwe a poputä an afalafal ngeni nöün kewe chon künö me ekkoch aramas.​—Mt. 4:23–5:2; Luk 6:12-19.

² Jises a poputä än we Afalafal woon ewe Chuuk ren an menlapei ewe pwapwa a feito seni ach ririöch ngeni Kot. (Älleani Mattu 5:1-12. a) Pwapwa a wewe ngeni “och memmeef mi sokkopat alolloolun seni än emön meefi menemenöch tori a meefi chengel mi watte.” Ekkewe tiu pwapwa Jises a pworaus woon 2,000 ier loom, a menlapei ewe popun Chon Kraist ra meefi pwapwa, nge kich ikenäi sipwe pwal tongeni küna feiöch seni ussun chök iir. Iei sipwele nengeni eü me eü ekkeei kapas.

‘Chon Silei Pwe Ra Wöüngaü Lon Pekin Ngün’

3. Met weween ach silei pwe sia wöüngaü lon pekin ngün?

³ ‘Ra feiöch chon silei pwe ra wöüngaü lon pekin ngün, pun iir repwe mwüni Mwün Läng.’ (Mt. 5:3) Ekkewe ‘chon silei pwe ra wöüngaü lon pekin ngün’ ra weweiti pwe iir mi osupwang ren än Kot emmwen me ümöümöch.

4, 5. (a) Met popun ra pwapwa iir kewe mi meefi ar osupwang lon pekin ngün? (b) Ifa ussun sipwe pwäkini ach osupwang ren än Jiowa emmwen?

⁴ Iir kewe ra silei ar osupwang lon pekin ngün ra pwapwa, “pun ir repwe mwüni Mwün Läng.” Ren ar lükü ewe Messaia, a suuk ngeni nöün kewe chon künö ar repwe fiti Jises le nemenem lon än Kot we Mwu lon läng. (Luk 22:28-30) Ese lifilifil ika sia äpilükülükün fiti Jises le nemenem lon läng are sia eäni äpilükülükün manau lon paratis woon fönüfan feilfeilo fän nemenien ewe Mwu, sipwe fokkun pwapwa ika sia wesewesen meefi ach osupwang lon pekin ngün me wewefichiti lamoten ach kütta än Kot emmwen lon manauach.

⁵ Pokiten nafangaüen ar lükü me rese aücheani  ekkewe mettoch mi pin, chommong aramas rese meefi osupwangen än Kot emmwen lon manauer. (2 Tes. 3:1, 2; Ipru 12:16) Ach käeöfichi Paipel, tinikken le fiti ewe angangen föralo chon käeö me fiti ekkewe mwich iteitan epwe tongeni pwäkini ach osupwang ren än Jiowa emmwen.​—Mt. 28:19, 20; Ipru 10:23-25.

Ra “Feiöch” Chon Kechiu Leluker

6. Iö kewe “chon kechü leluker,” me pwata ra “feiöch”?

⁶ “Ra feiöch chon kechü leluker, pun Kot epwe echipeer.” (Mt. 5:4) Ekkewe “chon kechü leluker” pwal iir ussun chök ekkewe aramas mi ‘silei pwe ra wöüngaü lon pekin ngün.’ Rese kechiu pokiten nonnomongaüen manauer. Nge ar kechiu a feito seni ar meefi letipechou pun iir chon tipis me napanapangaüen nonnomur pokiten rese unusöch. Pwata ra “feiöch” ekkeei chon kechiu? Pokiten ra anganga ar lükü Kot me Jises iwe, ar ririöch ngeni Jiowa a echipa letiper.​—Jon 3:36.

7. Epwe itä ifa meefiach ussun än Setan we fönüfan?

⁷ Nge ifa ussun emön me emön leich, sia meefi letipeta ren ekkewe föfföringaü mi chöüfetäl lon än Setan fönüfan? Met sia wesewesen meefi ren minne ewe fönüfan a awora? Ewe aposel Jon a makkeei: “Pun mettochun lon fanüfan meinisin, mochenian fituk, mochenian lemas me lamalamtekian manauen aramas resap pop seni ewe Sam, nge ra pop seni ei fanüfan.” (1 Jon 2:16) Epwe ifa ussun ika sia meefi pwe ach riri ngeni Jiowa a apwangapwangelo pokiten etipetipaen “ngünün fanüfan,” ewe ekiek mi nemeni ei fönüfan mi imulo seni Kot? Iwe, sipwe siö ngeni Jiowa, käeö än we Kapas, me kütta älillis seni ekkewe elter. Ese lifilifil met sokkun weires sia nom fän, sipwe küna “chip” ika sia arap ngeni Kot.​—1 Kor. 2:12; Kölf. 119:52; Jem. 5:14, 15.

A Ifa me Watteen Pwapwaan “Chon Tipetekison”!

8, 9. Met weween än emön epwe tipetekison me pwata ra pwapwa?

⁸ “Ra feiöch chon tipetekison, pun ir repwe fanüeni fanüfan.” (Mt. 5:5) “Tipetekison” are mosonoson ese wewe ngeni apwangapwang are tipitipin mosonoson. Ika sia tipetekison, sipwe pwäratä mosonoson ren ach föri letipen Kot me etiwa an we emmwen. Ewe napanap tipetekison epwe pwal pwälo ren ach föfför ngeni chienach chon lükü me ekkewe ekkoch. Ena esin napanap a tipeeü ngeni än ewe aposel Paul kapasen fön.​—Älleani Rom 12:17-19.

⁹ Pwata ekkewe “chon tipetekison” ra pwapwa? Pokiten “repwe fanüeni fanüfan,” iei alon Jises ewe mi tipetekison. Jises a äkkäeüin Chon Alemwiri ewe fönüfan. (Kölf. 2:8; Mt. 11:29; Ipru 2:8, 9) Nge pwal ekkoch aramas mi tipetekison ‘repwe eti Kraist’ le älemwiri ewe fönüfan. (Rom. 8:16, 17) Fän än Jises nemenem, mei pwal wor chommong aramas mi tipetekison repwe nonnom woon fönüfan feilfeilo chök.​—Kölf. 37:10, 11.

10. Ifa ussun nafangaüen tipetekison a tongeni kküü wisach kewe lon ewe mwichefel me ach riri ngeni ekkewe ekkoch?

¹⁰ Sipwe pwal eäni ewe napanap tipetekison ussun chök Jises. Nge ika kich sou efisatä fitikoko, aramas resap mochen chiechi ngenikich. Esap fich ngeni ekkewe brother ar repwe wiseni eü wis lon ewe mwichefel ika iir sou anini. (1 Tim. 3:1, 3) Paul a ereni Taitos an epwe akkachchema ngeni ekkewe chon Kraist lon Kreta ar “repwe afisätä kinamwe, me chiechiöch o pwärala ar tipepwetete ngeni aramas meinisin.” (Tait. 3:1, 2) A ifa me aücheaan tipetekison ngeni aramas!

Ra Echik Fän Iten Minne mi “Pwüng”

11-13. (a) Met weween ach sipwe echik me kaka fän iten minne mi pwüng? (b) Ifa ussun Kot epwe ‘amenemenöchü’ iir kewe ra echik me kaka fän iten minne mi pwüng?

¹¹ “Ra feiöch chon mochen föri mine a pwüng me mwen mesen Kot, pun Kot epwe amenemenöchür.” (Mt. 5:6) Me ren Jises ewe napanap “pwüng” a wewe ngeni an emön epwe eäni ekkewe föfför mi pwüng mi tipeeü ngeni letipen Kot me an kewe allük. Ewe sou makkeei köl a apasa pwe “a tatakis ren an positi” än Jiowa kapwüng mi pwüng. (Kölf. 119:20) Nge kich, sia fokkun aücheani ewe napanap pwüng ussun itä sia echik are kaka fän itan?

 ¹² Jises a apasa pwe chokkewe mi echik me kaka fän iten ewe napanap pwüng repwe pwapwa pokiten Kot epwe “amenemenöchür.” A fis ena lon Pentikost 33 C.E. lupwen än Jiowa we ngün mi fel a “amefi ngeni chon fanüfan . . . usun pwüng.” (Jon 16:8) Ren ewe ngün mi fel, Kot a amwökütü ekkewe mwän ar repwe makkeei ewe Tesin Krik lon Paipel, ewe puk mi fokkun lamot ren “ach sipwe manau fän pwung.” (2 Tim. 3:16) Än Jiowa we ngün mi fel a atufichikich le “angei ewe manau mi fö mi för lon lapalapen Kot o pwäla lon eu manau mi enletin pwüng.” (Ef. 4:24) A fokkun aururukich ren ach silei pwe ekkewe ra aier me kütta omusomusen ar tipis fän manamanen än Jises asor repwe tongeni küna pwüng me ren Kot.​—Älleani Rom 3:23, 24.

¹³ Ika a wor ach äpilükülükün manau woon fönüfan, ach echik me kaka fän iten minne mi pwüng epwe unusen pwäk lupwen sipwe küna manau esemuch woon fönüfan fän pwüng. Iwe, lon ei fansoun sipwe tipeppos le manaueni ewe manau mi tipeeü ngeni än Jiowa we allük. Jises a apasa: “Oupwe chök ekieki lon letipemi ewe Mwün Kot me pwüngün.” (Mt. 6:33) Ika sipwe föri ena epwe wor chommong sokkun angang sipwe tongeni eäni lon ach fel ngeni Kot me epwe atoto rech pwapwa mi enlet.​—1 Kor. 15:58.

Met Popun Ekkewe “Mi Umoumoch” Ra Pwapwa

14, 15. Ifa ussun sipwe pwäratä ümöümöch me met popun ekkewe “mi umoumoch” ra pwapwa?

¹⁴ “Ra feioch, ir mi umoumoch, pun repwe kuna umoumoch.” (Mt. 5:7, TF) Chokkewe ra pwäratä ümöümöch pokiten ar tong ngeni aramas. Ren än Jises föri manaman, a angasalo chommong seni ar riäfföü pokiten an tonger. (Mt. 14:14) Ümöümöch a pwälo lupwen aramas ra omusalo ekkewe chon tipis ngeniir, ussun chök Jiowa a ümöümöch me omusalo tipisin ekkewe mi aier. (Eks. 34:6, 7; Kölf. 103:10) Sia tongeni pwäratä ümöümöch lon ena napanap pwal ren ach kapasen kirekiröch me föfför mi akinamweei iir kewe ra osupwang. Sia pwal ümöümöch lupwen sia afalafala aramas ussun ewe enlet lon Paipel. Ussun chök Jises, a fokun tongei eü mwichen aramas, iwe a “popuetä le afalafala chomong mettoch.”​—Mark 6:34.

¹⁵ Mei wor popun ach sipwe tipeeü ngeni alon Jises: “Ra feioch, ir mi umoumoch, pun repwe kuna umoumoch.” Ika sia ümöümöch ngeni ekkoch, iwe, iir repwe pwal ümöümöch ngenikich. Lupwen Jiowa epwe apwüngükich epwe pwäratä ümöümöch me neman esap achou an kapwüng ngenikich pun sia fen ümöümöch ngeni ekkewe ekkoch. (Jem. 2:13) Ina minne, ekkewe chon ümöümöch chök repwe küna omusomusen ar tipis me manau esemuch.​—Mt. 6:15.

 Pwata Ekkewe “Chon Limöch Leluker” Ra Pwapwa

16. Met weween än emön epwe “limöch lelukan,” me ifa ussun iir kewe ra eäni ena napanap repwe “küna Kot”?

¹⁶ “Ra feiöch chon limöch leluker, pun ir repwe küna Kot.” (Mt. 5:8) ‘Limöchün lelukach’ epwe pwäpwälo ren minne sia aücheani, minne sia tipeni me ekkewe popun sia föfföri mettoch. Sipwe pwäratä “chen mi pop seni eu leluk mi limöch.” (1 Tim. 1:5) Ika mi limelimöch lelukach, sipwe “küna Kot.” Esap weween pwe sipwe küna Kot ren wesewesen mesach pun ‘esap wor eman epwe manau ika epwe küna won mesan [Kot].’ (Eks. 33:20) Iwe nge, lupwen Jises a apasa: “Iö a künaei, a küna Semei,” Jises a awewe pwe repwe tongeni “küna Kot” ren ar nennengeni Jises pun i a unusen äppirü napanapen Seman. (Jon 14:7-9) Ekkewe chon fel ngeni Jiowa woon fönüfan repwe pwal tongeni “küna Kot’’ ren ar nennengeni föfförün kewe fän äsengesiir. (Hiop 42:5) Nge, ekkewe chon Kraist mi kepit lupwen repwe manausefäl lon ngün repwe wesewesen küna Semer we lon läng.​—1 Jon 3:2.

17. Epwe ifa ussun manauach ika a limöch lelukach?

¹⁷ Emön mi limöch lelukan, a pwal limöch manauan me a achocho an epwe üöch mwen Jiowa, i ese ekkekieki ekkewe mettoch mi limengaü me ren Jiowa. (1 Kron. 28:9; Ais. 52:11) Ika a limöch lelukach, ach fos me föfför meinisin repwe pwal limöch me esor och likotuputup lon ach angang ngeni Jiowa.

“Chon Afisatä Kinamwe” Repwe Wiliti Nöün Kot Kewe

18, 19. Ifa föfförün ekkewe “chon afisätä kinamwe”?

¹⁸ “Ra feiöch chon afisätä kinamwe, pun ir repwe iteni nöün Kot.” (Mt. 5:9) Sia esilla ekkewe “chon afisätä kinamwe” ren ar kewe föfför. Ika kich emön lein ekkewe aramas Jises a kapas ussun, iwe kich sipwe chon efisatä kinamwe me sisap liwini ingaü ngeni emön an ingaü. Nge ‘fansoun meinisin sipwe achocho le föri mine a mürina . . . ngeni aramas meinisin.’​—1 Tes. 5:15.

¹⁹ Ika sipwe emön me lein ekkewe chon efisatä kinamwe mi lamot sipwe kükkütta kinamwe. Chokkana resap föri och mettoch ar repwe “aimwüfeseni chokewe mi fokun pwipwifengen.” (SalF. 16:28) Pokiten kich chon efisatä kinamwe sipwe ‘achocho ngeni ach sipwe kinamwefengen me aramas meinisin.’​—Ipru 12:14.

20. Iei mwo, iö kewe ‘nöün Kot,’ me pwal iö kewe repwe wiliti nöün Kot lon mwach kan?

²⁰ Ekkewe chon kütta kinamwe ra pwapwa “pun ir repwe iteni nöün Kot.” Jiowa a fen mwuti ekkewe Chon Kraist mi kepit me tuppwöl pwe repwe nöün. Ra fen ririöch ngeni Jiowa ussun nöün kewe pokiten ra anganga ar lükü Kraist me seni lon unusen letiper ra fel ngeni ‘ewe Kot mi echenir o ngenir kinamwe.’ (2 Kor. 13:11; Jon 1:12) Nge ifa ussun nöün Jises kewe ‘ekoch sip,’ pwal iir chon kütta kinamwe? Jises epwe ‘Semer mi nom tori feilfeilochök’ atun an nemenem ükükün engeröü ier. Lesopwoloon an nemenem, Jises epwe pwisin anomu i fän nemenien Kot me repwe wesewesen wiliti nöün Kot kewe.​—Jon 10:16; Ais. 9:6; Rom 8:21; 1 Kor. 15:27, 28.

21. Epwe ifa föfförüch ika sia manau fän emmwenien ewe ngün mi fel?

²¹ Ika sia manau fan emmwenien ewe ngün mi fel, epwe mwittir pwäpwälo ngeni aramas pwe kich chon efisatä kinamwe. Sisap “akuffengenikich” are “asongafengenikich.” (Kal. 5:22-26, New International Version) Nge sipwe fen achocho le “kinamwefengen me aramas meinisin.”​—Rom 12:18.

 Ra Pwapwa Inaamwo Ika Ra Küna Riäfföü Mwääl!

22-24. (a) Ikkefa ekkewe popun ra pwapwa iir kewe ra küna riäfföü mwääl pokiten ar föri minne mi pwüng? (b) Met sipwe käeö lon ekkewe ruu pworaus mwirin ei?

²² “Ra feiöch chon küna riaföü pokiten ar föri mine a pwüng me mwen mesen Kot, pun ir repwe mwüni Mwün Läng.” (Mt. 5:10) Jises a pwal aweweeilo ussun ei mettoch me a erä: “Oua feiöch lupwen aramas ra aitengauakemi o ariaföüükemi o apasa sokopaten kapas chofona mi ngau usumi pokiten oua tapweto müri. Oupwe pwapwa o mwanek, pun liwinimi epwe watte lon läng. Iei usun ra pwal ariaföüü ekewe soufos mi akom mwemi.”​—Mt. 5:11, 12.

²³ Ussun chök nöün Kot kewe soufos loom, Chon Kraist repwe pwal küna itengaü, riäfföü, me kapas chofona mi ingaü meinisin ussur pokiten ar “föri mine a pwüng.” Ren ach amwöchü ach tuppwöl me likiitü fan ekkeei sossot, sipwe pwapwa le silei pwe sia apwapwaai me alingalo Jiowa. (1 Pit. 2:19-21) Ach kewe riäfföü resap tongeni ekisikisaalo ach pwapwa le angang ngeni Jiowa iei pwal lon mwach kan. Resap pwal tongeni akükkünalo ewe pwapwaan eti Kraist le nemenem lon Mwuun we lon läng are küna manau esemuch woon fönüfan fän nemenien ena mwu. Ekkena sokkun feiöch ra pwäratä än Kot chen, kirekiröch me kisäseü.

²⁴ A mmen chommong ekkewe lesen sipwe tongeni käeö seni än Jises we Afalafal woon Chuuk. Ekkewe ruu pworaus epwe tapwoto mwirin ei epwe pwal aweweei pwal ekkoch lesen. Sipwe ppi ifa ussun sipwe tongeni apwönüetä än Jises Kraist kewe afalafal.

Ifa Ussun Kopwe Pölüweni?

• Met popun iir kewe ‘chon silei pwe ra wöüngaü lon pekin ngün’ ra pwapwa?

• Pwata ekkewe “chon tipetekison” ra pwapwa?

• Pwata ekkewe chon Kraist ra chüen pwapwa inaamwo ika ra küna riäfföü mwääl?

• Menni lein ekkewe tiu pwapwa Jises a pworaus ussun a kon achchünguk?

[Kapas Eis fán Iten ewe Lesen]

[Sasing lón pekin taropwe 10]

Ekkewe tiu pwapwa Jises a menlapei ra atoto feiöch ngeni aramas loom pwal ikenäi

[Sasing lón pekin taropwe 12]

Sipwe pwäratä ümöümöch ren ach afalafala aramas ussun ewe enlet lon Paipel

[Footnote]