LON mwachkkan, met epwe fis ngeni ekkewe chon fel ngeni Jiowa Kot me ekkewe rese fel ngeni? Met epwe fis ngeni Setan me nöün kewe timon? Ikkefa ekkewe feiöch ekkewe mi älleasochis repwe küna atun än Jises Nemenem ükükün Engeröü Ier? Pölüwen ekkeei kapas eis mi lamot ra ffatolo lon Pwarata 13:1–22:21. a Ekkeei sopwun ra masou ren ekkewe 9 amuchüloon me lein ekkewe 16 längipwi ewe aposel Jon a angei orun ewe ier 96.

Jon a makkei: “A feiöch eman mi aleani ei puk, ra pwal feiöch chokewe mi rongorong ngeni ekei kapasen pwärätä o aleasochis ngeni mine a mak lon.” (Pwar. 1:3; 22:7) Ach älleani me apwönüetä minne sia käeö seni ewe puken Pwäratä epwe achchüngü letipach pwe sipwe angang ngeni Kot, apöchökkülatä ach lükü Kot me Nöün we, Jises Kraist, me awora ngenikich eü äpilükülük allim fän iten mwachkkan. b​—Ipru 4:12.

NINITIUEN EKKEWE FISU SEPI MI UR REN ÄN KOT LINGERINGER WOON FANÜFAN

(Pwär. 13:1–16:21)

Pwarata 11:18, TF, a apasa: “Chon ekkewe mu ra song, nge [än Kot] we song a feito, o fansoun . . . [an epwe] atai ekkewe chon atailo fonufan.” Ewe awalüen längipwi a affata met popun än Kot lingeringer a feito ren an apworausa ussun föfförün “eman manmwacho . . . a wor engol mächän me fisu möküran.”​—Pwar. 13:1.

Lon ewe etiuen längipwi, Jon a küna “ewe Lam a ukkuta won ewe Chuk Saion” me “ipuku-faik-me-ruanu ngerou aramas ra eti i.” Ra “amomoto seni lein aramas.” (Pwar. 14:1, 4, TF) Mwirin, ekkoch chonläng ra uwawu pworaus. Iwe, lon ewe längipwi mwirin, Jon a küna “fumon chonlang ra akamwochu fisu minen eriaffou.” Eli Jiowa a pwisin allükü ngeni ekkena chonläng ar repwe niinatiu “ekkewe fisu sepien songen Kot.” Ekkewe sepi ra masou ren kapasen öüröür ussun än Kot kewe kapwüng. (Pwar. 15:1; 16:1, TF) Ekkeei ruu längipwi ra titchiki pworausen pwal ekkoch än ewe Mwu kapwüng mi riri ngeni ewe aülüngätin riäfföü me än ewe afümönün chonläng ettiki nöün we rappwa.​—Pwar. 11:14, 15, TF.

Pölüwen Kapas Eis Ussun Ekkeei Wokisin:

13:8​—Met ewe “puken manau . . . puken ewe Lam”? Ina eü puk lon chök kapas monomon mi mak iten ekkewe repwe eti Jises Kraist lon an we Mwu lon läng. A kapachelong iten ekkewe Chon Kraist mi kepit mi chüen nom woon fönüfan, ra äpilükülükü ar repwe küna manau lon läng.

13:11-13​—Ifa ussun ewe manmwocho mi wor ruuofoch mechän a ussun chök emön traikon me a föri pwe ekkei epwe feitiu seni läng? Pokiten ewe manmwocho mi wor ruuofoch mechän mi liosuetä nemenien England me Merika, nge an kapas a ussun än emön traikon kapas, a pwäratä pwe a eäni kapasen aniuokkus, echchimw, me föfförün akkachofesä pwe epwe eriäni aramas ar repwe nom fän nemenian. A föri pwe ekkei epwe feitiu seni läng ren an tipin wiseni ewe wis soufos, a erä pwe a pworaiti ekkewe mi ngaü lon ekkewe ruu maunen fönüfan me ewe mwuun Komunis.

 16:17​—Met weween ewe “asepwäl” masouen ewe efisuen sepi a ninitiu lon? “Ewe asepwäl” a liosuetä ekiekin Setan, “ewe ngün [are, napanapen ekiek] mi nemeni ekewe aramas mi aleasolap ngeni Kot iei.” Iir meinisin mi fiti än Setan otot ra ngasangaseri ena äsepwäl mi poison.​—Ef. 2:2.

Ikkeei Ekkoch Lesen Fän Itach:

13:1-4, 18. “Emon manmwocho” mi liosuetä ekkewe mwuun fönüfan a feitä “me lon ewe matau,” weween, seni me lein chon ekkewe mwu mi fiffitikokokkis. (Ais. 17:12, 13; Tan. 7:2-8, 17) Ena manmwocho a angei an manaman seni Setan pun i efisien Setan, iwe, nampaan 666 a wewe ngeni ükükün tottowauan seni unusöch. Ika sia wewefichiti met ena manmwocho a wewe ngeni, epwe älisikich ach sisap ingeiti are fel ngeni ena manmwocho ussun chök lap ngeni aramas ra föri.​—Jon 12:31; 15:19.

13:16, 17. Inaamwo ika sipwe küna weiresin nonnomun manauach, awewe chök, ren ach tufichin ‘kamö are amömö,’ nge sisap mut ngeni ewe manmwocho an epwe nemenikich. Ika epwe nom ‘asisilen ewe manmwocho won pöüifichich ika won chamwach,’ epwe ussun itä nge sia mut ngeni ewe manmwocho an epwe nemeni föfförüch are ekiekich.

14:6, 7. Alon ewe chonläng a äiti ngenikich pwe mi atapwalapwal ach sipwe arongafeili ewe kapas allim pwe a fen poputä nemenien ewe Mwuun Kot. Sipwe fokkun älisi nöüch kewe chon käeö pwe repwe asamolu me mwareiti Kot.

14:14-20. Lupwen epwe wes “rasin fonufan,” weween, ioifengenin chokkewe repwe küna amanau, epwe tori fansoun ewe chonläng epwe oturalong ‘“ekkewe uwan krep won fonufan . . . lon ewe leenien pupu uwan krep mi lap, ewe mi wewe ngeni ewe songen Kot.” Ena irään krep, än Setan ototen mwuun fönüfan mi ngaü fengen me uwaan kewe mi ngaü, epwe unusen tafocholo. Sipwe tipeppos pwe ena irään krep woon fönüfan esap etipetipakich.

16:13-16. “Ngunun ekkewe timon” [kapas mi limengaü seni ekkewe timon, NW] a liosuetä än ekkewe timon kapasen angngaü ngeni ekkewe kingen fönüfan pwe ninitiuen ekkewe fisu sepien än Kot song esap etipetiper, nge repwe tupulo pwe repwe ü ngeni Jiowa.”​—Mat. 24:42, 44.

16:21. Mwen chök sopwoloon ei otot, epwe kapachelong lon än Jiowa kapwüng woon än Setan otot mi ngaü ekkoch pworaus mi fokkun pöchökkül, iwe, ra liosutiu ren üt faü mi fokkun chou. Iwe nge, lape ngeni aramas repwe chüen chök esiita Kot.

EWE KING MI PWORACHO A NEMENEM

(Pwar. 17:1–22:21)

“Papilon mi Lapalap,” ewe mwicheichen lamalam chofona meinisin, eü kinikinin än Setan otot mi fokkun änioput. Ewe aengol-me-eüin längipwi a aliosu neminnewe ussun emön “fin-lisowu mi lapalap,” emön fefin mi limengaü manauan, a “momot won eman manmwacho mi par.” Ekkewe “engol mechan” ewe manmwocho mi ukkuwei neminnewe repwe unusen ataielo. (Pwar. 17:1, 3, 5, 16) Ewe längipwi mwirin a apöpöfengeni ewe fin lisowu me “eü telinimw mi lap,” iwe, a apasa pwe a turutiu, iwe, a öüröüra nöün Kot kewe aramas ar repwe “tou seni neminewe.” Chommong ra kechiueiti taloon ena telinimw mi lap. Iwe nge, chon läng ra pwapwa pokiten än “ewe Lam apwüpwülü.” (Pwar. 18:4, 9, 10, 15-19; 19:7) Lon ewe aengol-me-aülüngätin längipwi, ewe mi wawa “eman oris mi pwechepwech” a lo maun ngeni ekkewe mwu. A asopwalo än Setan otot mi ngaü.​—Pwar. 19:11-16.

Met epwe fis ngeni “ewe serepenitin lom mi iteni Tefil are Satan”? Ineet epwe “koturulong lon ewe nomun ekkei”? Ena pworaus a kapachelong lon ewe aengol-me-arüänüün längipwi. (Pwar. 20:2, 10) Ekkewe ruu säingoon längipwi ra ekis pwär ngenikich ussun napanapen aramas lon ewe Engeröü Ier. Atun a muchulo ewe “pwarata,” Jon a kuna ‘ewe chanpupun konikin  manau a pupulo lukanapen alen ewe telinim,’ iwe, a wor eü kapasen etiwetiw mi mürinnö ngeni “iö mi kaka.”​—Pwar. 1:1; 22:1, 2, 17.

Pölüwen Kapas Eis Ussun Ekkeei Wokisin:

17:16; 18:9, 10​—Pwata “ekkewe kingen fönüfan” repwe kechiueiti ewe mettoch ra pwisin ataielo? Ra letipeta pokiten ra chök tongei pwisin iir. Mwirin taloon Papilon mi Lapalap, neman, kingen fönüfan repwe esilla aücheaan neminnewe ngeniir. Ussun itä nge neminnewe a apwüngalo ar kewe föfföringaü. Papilon mi Lapalap a pwal älisiir ren ar pesei ekkewe säräfö ar repwe fiti maun. Pwal eü, a wor wisan ren än aramas repwe nonnom fän nemenien ekkewe mwu.

19:12​—Pwata esor emön a silei pwal iten Jises we eü pwe i chök? Eli ena it a weneiti wisen Jises kewe a eäni lon ewe ränin ach Samol, awewe chök ekkewe mi mak lon Aisea 9:6. Esor emön a silei ena it pwe i chök pun wisan kewe ra sokkolo aücheaar, iwe, i chök a weweiti aücheaan an epwe wiseni ena wis tekia. Iwe nge, Jises a ngeni ewe mwich mi wewe ngeni pwülüwan we ekkoch wis aüchea, iwe, a ina ussun an a ‘makkei woor itan we mi fö.’​—Pwar. 3:12.

19:14​—Iö kewe repwe tapwelo mwirin Jises woon oris lon Armaketon? Lein ‘ekkewe mwichen sounfiu seni läng’ mi fiti Jises lon än Kot we maun, epwe kapachelong ekkewe chonläng me pwal ekkewe mi kepit mi pworacho le angei liwiniir lon läng.​—Mt. 25:31, 32; Pwar. 2:26, 27.

20:11-15​—Iten iö kewe ra mak lon “ewe puken manau”? Ina ewe puk mi mak iten chokkewe meinisin repwe küna manau esemuch, ekkewe Chon Kraist mi kepit, chon ewe mwich mi lapalap, me nöün Kot kewe chon angang mi tuppwöl repwe fiti ‘manausefälin ekkewe mi pwüng.’ (Fof. 24:15; Pwar. 2:10; 7:9) Epwe mak iten ‘ekkewe rese pung’ repwe manausefäl lon “ewe puken manau” ika pwe repwe älleasochisi “minne a mak lon ekkewe puk,” kapasen emmwen repwe suuk le atun ewe Engeröü Ier. Iwe nge, iter epwe tongeni töl ika resap älleasochis. Nge iten ekkewe mi kepit resap tongeni töl pun ra pwäratä ar tuppwöl tori mälo. (Pwar. 3:5) Iten chokkewe repwe küna manau woon fönüfan resap molo lupwen repwe pässini ewe säingoon sossot le sopwoloon ekkewe engeröü ier.​—Pwar. 20:7, 8.

Ikkeei Ekkoch Lesen Fän Itach:

17:3, 5, 7, 16. “Ewe tipatchem seni woon” a älisikich le weweiti “ewe monomon usun ewe fefin me ewe manmwacho [mi par] mi uwei neminewe.” (Jem. 3:17) Ena manmwocho lon kapas monomon a poputä ren ewe League of Nations me mwirin an a fförsefäl, a wiliti ewe United Nations. Ach weweiti ei kapas monomon epwe amwökütükich pwe sipwe achocho le afalafala ewe kapas allim ussun Mwuun Kot me esilefeili ränin än Jiowa kapwüng.

21:1-6. Sipwe unusen lükülük pwe ekkewe feiöch mi fen oesini repwe kawor fän nemenien ewe Mwu. Pwata? Pun a apasa: “A fen fis!”

22:1, 17. Ewe “chanpupun kolukun manau” a liosuetä minne Jiowa a awora ngeni aramas mi älleasochis fän iten ar repwe ngaselo seni tipis me mälo. Och ena konik a kawor iei. Amwo sipwe ngüüri ewe kapasen etiwetiw pwe sipwe feito me “angefatei chok ewe konikin manau” fän kilisou, nge sipwe pwal etiwa ekkewe ekkoch!

[Footnote]

[Sasing lon pekin taropwe 9]

A ifa me watteen amwararen ekkewe feiöch aramas mi älleasochis repwe küna fän nemenien ewe Mwu!