Mut Ngeni Än Jises Kewe Kapas Ar Repwe Anapanapa Ekiekich Me Föfförüch
“Ewe eman Kot a tinato a apasatä än Kot kewe kapas.”—JON 3:34.
1, 2. Än Jises kewe kapas lon än we Afalafal woon Chuuk a ussun chök met, nge pwata kich mi tongeni erä pwe ra longolong woon “än Kot kewe kapas”?
EÜ ME lein ekkewe taimon a kon watte seni meinisin faü aüchea, itan Star of Africa. Enlet, a fokkun aüchea ena faü. Iwe nge, än Jises kewe kapas lon än we Afalafal woon Chuuk a fen kon lululo aücheaan lap seni ena taimon. Sise mäirü pun met Jises a apasa a pop seni Jiowa! Iei alon Paipel ussun Jises: “Ewe eman Kot a tinato a apasatä än Kot kewe kapas.”—Jon 3:34-36.
2 Inaamwo ika ttaman ewe Afalafal woon Chuuk a kis seni esopw aua chök nge a nöünöü 21 wokisin seni ekkewe walü puk lon Puken Ipru. Ina popun, a lükülük pun a longolong woon “än Kot kewe kapas.” Iwe, sipwe nengeni ifa ussun sipwe apwönüetä ekkoch me lein ekkewe kapasen emmwen mi aüchea lon ewe afalafal mi fokkun amwarar Jises a eäni.
Akkomw “Kopwe Achä Ngonuk Pwiüm”
3. Mwirin än Jises kapasen öüröür ngeni nöün kewe chon käeö ussun efeiengaüen songottam, ifa ewe kapasen emmwen Jises a eäni?
3 Pokiten ewe ngün mi fel a nom ren chon Kraist ina popun sia meefi pwapwa me kinamwe pun ikkena ruu me lein uwaan ewe ngün mi fel. (Kal. 5:22, 23) Jises ese mochen epwe pöüt seni nöün kewe chon käeö pwapwa me kinamwe, ina popun a öüröürer ussun efeiengaüen än emön amwöchü ttamei an song, pun mi tongeni efisi an mälo. (Älleani Mattu 5:21, 22) Mwirin a apasa: “Iei mine are kopwe wätä om asor ngeni Kot won ewe rongen asor, o ikenan ka chechemeni pwe pwiüm a chou ngonuk, kopwe likiti om we asor mwen ewe rongen asor o liwinla, pwe kopwe achä ngonuk pwiüm. Mürin kopwe liwinto o wätä om we asor won ewe rongen asor.”—Mt. 5:23, 24.
4, 5. (a) Ifa ewe “asor” Jises a kapas ussun lon Mattu 5:23, 24? (b) Ifa lamoten än emön epwe chä ngeni pwiin we mi chou ren?
4 Jises a kapas ussun ekkewe “asor” ra asoresini lon ewe imwen fel lon Jerusalem. Ren chök awewe, ekkewe asorun maan ra lamot pun ina kinikinin än nöün Jiowa kewe aramas fel ngeni. Iwe nge, Jises a menlapei pwe a äkkäeüin lamot än emön chä ngeni pwin we mi chou ren mwen epwe asor ngeni Kot.
5 Ifa ewe lesen sipwe tongeni käeö seni än Jises afalafal? Föfförüch ngeni ekkewe ekkoch a kküü ach ririöch ngeni Jiowa. (1 Jon 4:20) Pwüngün pwe lon fansoun loom esor lamotan än emön eäni asor ngeni Kot ika a kirikiringaü ngeni aramas.—Älleani Mika 6:6-8.
A Lamot Tipetekison
6, 7. Met popun mi lamot tipetekison lupwen sia mochen chäsefäl ngeni pwiich we mi chou rech?
6 Ach tipemecheresin chäsefäl ngeni pwiich we mi chou rech epwe pwäratä ika kich mi tipetekison. Ekkewe aramas mi tipetekison resap änini ngeni chiener chon lükü ika iön leir mi pwüng. Ena sokkun napanap epwe atai ewe ririin tipeeü me kinamwe ussun chök met a fis lein ekkewe Chon Kraist lon Korint loom. Paul a fönör ussun ei osukosuk me älisiir ar repwe ekieki ei mettoch: “Ämi uwala lon kapwüng fitikoko lefilemi a pwärätä pwe oua kuf lon ämi souläng. Ifa usun, esap fen öch än eman epwe föri mine a mwäl ngenikemi? Esap fen öch än eman epwe soläni pisekimi?”—1 Kor. 6:7.
7 Jises ese apasa pwe sipwe chuuri pwiich we fän iten an epwe änneta pwe kich mi fen pwüng nge i mi mwääl. Nge popun ach chuuri pwe sipwe chäsefäl me kinamwefengen ngeni pwiich. Ren ach sipwe kütta kinamwe mi lamot ach sipwe uwawu enletin meefiach. Sipwe pwal apasa ngeni pwe sia weweiti meefian pwe a metek letipan. Nge ika fen tipisich, iwe sipwe mochen omusomus ngeni fän tipetekison.
“Are Peliefichin Mesom a Etipisuk”
8. Ifa alon Jises kewe lon Mattu 5:29, 30?
8 Lon än Jises we Afalafal woon Chuuk, Jises a awora och kapasen emmwen ussun met mi pwüng me met mi mwääl. A silei pwe kifetin inisich ese unusöch mi tongeni emmweningaü ngenikich. Ina minne, Jises a erä: “Iwe, are peliefichin mesom a etipisuk, kopwe onusalo o oturu sonuk. Pun mi murinno ngonuk are eu kinikinin inisum ese nom lap seni an inisum meinisin turulong lon Keena. O are peliefichin poum a etipisuk, kopwe pokulo o oturu sonuk. Pun mi murinno ngonuk are eu kinikinin inisum ese nom lap seni an inisum meinisin feilong lon Keena.”—Mt. 5:29, 30, TF.
9. Ifa ussun ‘mesach’ are ‘pöüch’ epwe tongeni ‘etipisikich’?
9 Ewe ‘mas’ Jises a kapas ussun a liosuetä ach tufichin nefotofot ngeni künaen mesach me ewe ‘pau’ a weneiti ekkewe angang sia föri ren pöüch. Nge ika sia tümününgaü, ekkeei kifetin inisich epwe tongeni ‘etipisikich’ me atai ach “chiechifengen me Kot.” (Ken. 5:22; 6:9) Ika a torikich sossotun ach sipwe älleasolapa Jiowa, iwe, sipwe mwittir mwökütüküt fän tipepwora, ussun itä ach onusalo me oturu senikich mesach are pöküolo pöüch.
10, 11. Met epwe tongeni älisikich ach sipwe ti senikich lisowu mwääl?
10 Ifa ussun sipwe tümünü mesach pwe resap nennengeni ekkewe mettoch mi limengaü? Iei alon Hiop, emön chon niuokkusiti Kot: “Üa föri eu pwon ngeni mesei pwe üsap nenengeni eman föpwül fän mocheisou.” (Hiop 31:1) Hiop emön mwän mi pwüpwülü me a apposa letipan an esap atai än Kot kewe allük ussun limöchün manauan. Pwal ina chök itä ach ekiek ese lifilifil ika kich mi pwüpwülü are lipich. Ren ach sipwe ti senikich lisowu mwääl, mi lamot än Kot ngün mi fel epwe emmwenikich, ewe mi uwaani ewe napanap engilo fän iten iir kewe mi tongei Kot.—Kal. 5:22-25.
11 Ren ach sipwe tümünükich seni lisowu mwääl, sipwe pwisin eisinikich: ‘Ua mut ngeni mesei an epwe alapalo ai mocheniaiti ekkewe mettoch mi limengaü ren ai katol ekkewe puk, TV are Internet?’ Sipwe pwal chemeni alon Jemes we: “Nge eman me eman aramas a tori sosotun ren püsin an mochenia mi atekini o pani letipan. Iwe, are än eman mochenia a liapeni letipan, a fis an tipis, nge are an tipis a unusela, a fis an mäla.” (Jem. 1:14, 15) Ika emön mi fen fangolo manauan ngeni Kot nge a “nenengeni eman” fän mocheisou, a lamot an epwe mwittir mwökütüküt fän tipepwora, ussun än emön onusau me oturawu mesan.—Älleani Mattu 5:27, 28.
12. Ifa än Paul kapasen fön mi älisikich le fiu ngeni mocheniaingaü?
12 Angangangaüen pöüch a tongeni emmwenikich ach sipwe atai än Jiowa kewe allük, ina minne, sipwe apposa letipach pwe sipwe amwöchü limöchün manauach. Ina popun, sipwe aüselinga än Paul we kapasen fön: “Iei mine oupwe amäloi ekewe mochenian fanüfan mi nom remi: sokopaten föförun lisowu, lüangau, mocheisou, mocheniangau me tipemong. (Pun tipemong och sokun angang ngeni anümwäl.)” (Kol. 3:5) Ewe kapas “amäloi” a ammeef ngenikich ükükün pöchökkülan ach fiu ngeni mocheniaingaü.
13, 14. Pwata mi lamot ach sipwe ti senikich ekkewe ekiek me föfför mi limengaü?
13 Ren än emön epwe manau, epwe tipeeü ngeni an epwe tünü pechen are pöün. Ewe kapas awewe ussun ‘oturu seni’ mesach me pöüch a lamot pwe sipwe sü seni ekiekingaü me föfför mi limengaü mi tongeni atai ach ririöch ngeni Kot. Ika sipwe limöch lon ach ekiek, manauach me ach fel ngeni Kot, iwe, epwe tümünükich pwe sisap koturulong lon Keena, weween mäfochofoch.
14 Pokiten sia älemwiri tipis me apwangapwang, a weires ach sipwe föri minne mi limöch lon manauach iteitan. Paul a apasa: “Üa fokun pöchökül ngeni inisi o anomu fän nemeniei, pwe üsap afalafala ekoch, nge püsin ngang üa lipwäkingau.” (1 Kor. 9:27) Ina minne, sipwe tipeppos le apwönüetä än Jises kapasen fön ussun manau mi limöch, me sisap fokkun eäni ekkewe föfför mi pwäratä pwe sia alamotongaüa än Jises möön kepich.—Mt. 20:28; Ipru 6:4-6.
Oupwe Fangafangöch
15, 16. (a) Ifa ussun Jises a isetiu eü leenien äppirü ren an fangafangöch me kisäseü? (b) Met weween alon Jises we lon Luk 6:38?
15 Än Jises kewe kapas me leenien äppirü mi fokkun mürinnö ra apöchökküla ewe angangen fangolo. Lupwen Jises a feitiu fönüfan fän äsengesin aramas mi tipis a pwäratä pwe a fokkun kisäseü. (Älleani 2 Korint 8:9.) Jises a tipemecheres le likitalo lingan we lon läng pwe epwe wiliti emön aramas me fangolo manauan fän iten chon fönüfan mi tipis, ekkoch me leir repwe wöüöch lon läng pun repwe eti Kraist le nemenem lon ewe Mwu. (Rom 8:16, 17) Jises a fokkun pesekich pwe sipwe fangafangöch ren an apasa:
16 “Oupwe kisasew ngeni aramas, pun God epwe kisasew ngeni kemi. Ennet, oupwe angei ew niwin mi ukuköch, ew niwin mi wachemuk oupwe angei non poumi, ukukun oupwe tongeni kömwoch. Ewe minen köük oua nounou ngeni aramas, God epwe pwan nounou ngeni kemi.” (Luk 6:38, EWE KAPASEN GOD.) Ewe kapas “angei non poumi” lon pwal ekkoch Paipel a nöünöü ewe kapas “fangolong lon afomi.” Ei itiitin kapas a weneiti än chon loom eöreni ren ewe chon amömö amasoualong lepwülün üfan ewe chon kamö ren minne a mööni ussun chök an chotä. Mwiriloon ach fangafangöch sipwe tongeni angei eü liwin mi üküköch, neman atun sia osupwang.—SalAf. 11:2.
17. Ifa ussun Jiowa a äkkäeüin isetiu eü leenien äppirü mi lap lon an fang me met sokkun fang epwe atoto rech pwapwa?
17 Jiowa a tongei me efeiöchü chokkana mi pwapwaiti fangolo. Jiowa a äkkäeüin isetiu ewe leenien äppirü mi lap pwe a fangolo Nöün me äläemön “pwe meinisin mi lükü i resap pöütmwälila, pwe repwe eäni manau esemüch.” (Jon 3:16) Paul a makkei: “Fotan eman a somwosomwöch, kinian epwe pwal somwosomwöch. Oupwe fang en me usun mefien letipan. Ousap fangürüfituk ika fang fän echimw. Pun Kot a echeni eman mi pwapwa le lifang.” (2 Kor. 9:6, 7) Ach fangolo ach fansoun, pöchökkül me pisek fän iten kälisitään ewe fel mi enlet epwe atoto rech pwapwa me wöüöch.—Älleani Än Salomon Fos 19:17; Luk 16:9.
“Öüsap Ettiki Rappwa”
18. Ren menni föfför ika napanap sisap “angei och liwin” seni Semach lon läng?
18 “Oupwe tümwünüfichi, pwe ousap föri ämi föförün pwüng mwen mesen aramas pwe repwe küna mine oua föri. Pun are oupwe föri iei usun, ousap angei och liwin seni Sememi mi nom läng.” (Mt. 6:1) Me ren Jises ewe kapas “pwüng” a wewe ngeni ekkewe föfför mi tipeeü ngeni letipen Kot. Nge Jises a pwal apasa pwe epwe wor atun ach sipwe pwäralo föfförüch mi mürinnö mwen aramas pun a fen allükü ngeni nöün kewe chon künö: “Iei usun ämi saram epwe tittin mwen ekewe aramas.” Nge sisap “angei och liwin” seni Semach lon läng ika sia föri mettoch mwen mesen aramas ‘pwe repwe küna minne sia föri,’ me ingeitikich, ussun chök ekkewe chon sipai ra pwomweni mwen mesen aramas. Ika ina chök ewe popun sipwe föri minne mi mürinnö, sisap tongeni chiechiöch me Kot are pwapwaiti ekkewe feiöch fochofoch fän nemenien ewe Mwu.
19, 20. (a) Met weween alon Jises we ach sisap “ettiki rappwa” lupwen sipwe fang ngeni chon wöüngaü? (b) Ifa ussun sisap esile ngeni pöüimöngüch minne pöüifichich a föfföri?
19 Ika sia eäni ekiek mi mürinnö, iwe, sipwe apwönüetä än Jises we fön: “Iei minne, lupwen öüpwe fangelo och ngeni chon osupwang, öüsap ettiki rappwa me mwemi usun minne ekkena chon pwomweni chök pwomwan ra föfföri me lon ekkewe sinakok pwal me won ekkewe aal pün ren ar mochen kütta linger meren aramas. Enlet Ngang üpwe fokkun üreni kemi pwe ra fen wes le angei liwinir.” (Mt. 6:2, PAIPEL ÄN KOT KAPAS TESTAMENT SÖFÖ.) Jises me nöün kewe aposel ra kan isoni och moni pwe repwe älisi chon osupwang. (Jon 12:5-8; 13:29) Sap minne sipwe ettiki rappwa iteitan sipwe fang ngeni chon wöüngaü nge Jises a chök kapas awewe woon ach sisap esilefetälei ach föfförün asor ussun ekkewe Farisi. Jises a eita ngeniir chon likotuputup pun ra esilesil lupwen ra fangolo och ngeni chon osupwang “lon ekkewe sinakok pwal me won ekkewe aal.” Ekkena mi likotuputup “ra fen wes le angei liwinir” ren än aramas ingeitiir, pwal eli ar mommot ren ekkewe rappai mi föülo lon sinakok. Jiowa esap chüen liwini ngeniir och pun ra fen angei. (Mt. 23:6) Nge, epwe ifa föfförün nöün Jises kewe chon käeö? Iei alon Jises ngeni nöün kewe pwal kich ikenäi:
20 “Nge fansoun kopwe fori om angangen umoumoch, kete esinei ngeni peliemongun poum minne peliefichin poum a fori; pwe om we liffangen umoumoch epwe monomonelo. Iwe, Semom mi nengeni le monomon epwe liwini ngonuk.” (Mt. 6:3, 4, TF) Pöüch kewe ra kan angangfengen. Ina minne, ach sisap esile ngeni pöüimöngüch minne pöüifichich a föfföri a wewe ngeni ach sisap esilefetälei ach angangen ümöümöch, pwal mwo ngeni chiechiach kewe mi fokkun kkan ngenikich.
21. Met a kapachelong lon liwinich seni ewe Emön “mi nengeni le monomon”?
21 Ika sise einga ach liffang ngeni chon osupwang, iwe, ach “liffangen umoumoch” epwe monomonolo. Iwe, Semach, ewe “mi nengeni le monomon,” epwe liwini ngenikich. Kot a “monomon” mwen aramas meinisin pokiten I a nonnom läng me sise tongeni küna ren mesach. (Jon 1:18) Jiowa ewe emön “mi nengeni le monomon” epwe liwini ngenikich ekkeei mettoch, epwe arap me chiechiöch ngenikich, omusalo ach kewe tipis me awora ewe manau esemuch. (SalF. 3:32; Jon 17:3; Ef. 1:7) A ifa me watteen öchün ena liwin lap seni än aramas mwareitikich!
Sipwe Aücheani Ekkewe Kapasen Emmwen mi Lamot
22, 23. Pwata sipwe aücheani än Jises kewe kapas?
22 Ewe Afalafal woon Chuuk a ussun ekkewe faü mi aüchea me mälefelef. A masou ren sokkopaten kapasen emmwen mi aüchea mi tongeni atoto rech pwapwa pwal mwo nge lon ei fönüfan mi fitikoko. Ewer, sipwe pwapwa ika sia aücheani än Jises kewe kapas me mut ngeni an epwe anapanapa ekiekich, föfförüch me napanapen manauach.
23 Iir kewe mi “rongorong” o “aleasochis” ngeni äitien Jises kewe repwe feiöch. (Älleani Mattu 7:24, 25.) Ina minne, sipwe apposa letipach le apwönüetä än Jises kewe kapasen emmwen. Lon ewe lesen epwe tapwoto mwirin ei, sipwe nengeni pwal ekkoch kapasen emmwen lon än we Afalafal woon Chuuk.
Ifa Ussun Kopwe Pölüweni?
• Ifa lamoten än emön epwe chä ngeni pwiin we mi chou ren?
• Ifa ussun sipwe tümünü pwe ‘peliefichin mesach’ esap etipisikich?
• Epwe itä ifa ach ekiek ussun ewe angangen liffang?
[Ekkewe Kapas Eis fan Iten ewe Lesen]
[Sasing lon pekin taropwe 15]
A ifa öchün ach sipwe “achä ngenikich” pwiich we mi chou rech!
[Sasing lon pekin taropwe 17]
Jiowa a efeiöchü iir kewe mi pwapwaiti fangolo