Ekistos 3:1-10

“A PIN, a pin, a pin ewe Samol mi Unusen Manaman.” (Aisea 6:3) Ekkeei kapas seni Kot a pwäratä pwe Jiowa Kot mi unusen limelimöch lap seni meinisin. Nge neman kopwe tongeni eis: ‘Pokiten Kot a fokkun pin, a tongeni äfänni aramas? Emön Kot mi pin epwe tongeei, nge ngang emön chon tipis mi kan mwäälilo iteitan?’ Sipwe nengeni än Kot kapasen alükülük ngeni Moses mi mak lon Ekistos 3:1-10.

Lupwen Moses a tümünü ekkewe sip a küna eü mettoch mi amwarar, efoch irä mi ngetenget nge “esap karala.” (Wokisin 2) Iwe, Moses a mäirü me kine ngeni an epwe nengenifichi. Ren emön chonläng, Jiowa a fosowu me lukanapen ena irä mi ngetenget ngeni Moses: “Kosap arapoto. Kopwe pwilitawu ipwom sus, pun ei leni ka ütä won a pin.” (Wokisin 5) Ekieki mwo, pokiten Kot ewe mi pin a nonnom lon ena leeni, ewe ppwul a wiliti eü leeni mi pin!

Mei wor popun Kot a mochen fos ngeni Moses. Kot a erä: “Üa küna riaföün nei aramas mi nonom Isip o rongorong ar siö pokiten än chon Isip nemenemengau ngeniir, üa pwal silei ar weires meinisin.” (Wokisin 7) Kot a silei riäfföün nöün kewe aramas me pwal rongorong ar kewe tingor. Ekkewe riäfföü chon Israel ra küna, ussun itä Jiowa a pwal eäni. Nengeni met Kot a apasa: “Üa pwal silei ar weires meinisin.” Ren ekkeei kapas “Üa pwal silei,” iei met eü puk a erä, “A wewe ngeni än emön meefi meefien emön, mi fiti tong me ümöümöch.” Än Kot kewe kapas ngeni Moses a pwäratä pwe Jiowa emön Kot mi äfänni me tongei aramas.

Iwe, met Kot epwe föri? Ese chök nennengeni me rongorong ar siö me tonger nge a pwal mwökütüküt le älisiir. Jiowa a akkota an epwe angasalo nöün kewe aramas seni Isip me emmweniirelong lon “eu fanü mi pwülüöch o fanüeräs.” (Wokisin 8) Ren an epwe amanauer, Jiowa a awisa ngeni Moses: “Kopwe emwenawu nei kewe . . . seni lon Isip.” (Wokisin 10) Moses a apwönüetä wisan we fän tuppwöl me emmwenawu chon Israel seni Isip 3,500 ier som loom.

Jiowa ese siwil. Ina minne, nöün kewe aramas ikenäi repwe tongeni lükülük pwe Jiowa a silei ar kewe weires me rongorong ar tingormaü fän iten an älillis. A fokkun silei riäfföün letiper. Ese chök meefi meefien nöün kewe chon angang mi tuppwöl, nge ewe Kot mi tong a pwal mwökütüküt pwe epwe älisiir ‘pun i a ekieki met repwe feiöch ren.’​—1 Piter 5:7.

Än Kot ümöümöch a awora äpilükülüköch ngenikich. Ren an älillis, kich chon tipis sipwe tongeni achocho le manaueni ewe manau mi pwüng me limelimöch me ren Kot me apwapwaai I. (1 Piter 1:15, 16) Emön fin Kraist mi semwenin letipechou a küna aurur seni pworausen Moses atun Kot a fosowu me lon ewe iräfölüföl. Iwe, ewe fefin a apasa: “Ika Jiowa a tongeni epinalo ewe leeni mi limengaü ussun ewe ppwul, iwe eli upwe pwal tongeni limöch me ren Kot inaamwo ika ngang emön chon tipis mi limengaü. Ei sokkun ekiek a fokkun älisiei.”

A fen chchüng letipom le alapalo om silei ussun Jiowa Kot ewe mi pin? Mi tufich ach sipwe chiechiöch ngeni Jiowa “pun a silei sokosokuch, a chemeni pwe kich pwül echök.”​—Kölfel 103:14.