“Iwe, ren mettoch meinisin a wor ar fansoun. A pwal wor fansoun iteiten angang won fanüfan,” iei alon ewe Paipel. Chon makkeei ei puk, King Salomon ewe mi tipatchem, a sopwelo le apasa pwe mei wor fansoun uputiu pwal fansoun mälo, a wor fansoun aüetä, a wor fansoun ataielo, a wor fansoun tong pwal fansoun oput. Le muchuloon a erä: “Met sokun feiöch eman epwe angei seni an angang weires?”​—Än Salomon Afalafal 3:1-9.

ME REN ekkeei kapas, chommong aramas ra apwüngalo pwe iei äitien Paipel pwe meinisin minne a fis lon manauach a fen kokkotolo. Nge mei pwüng ena ekiek? Pwüngün pwe äitien Paipel pwe sisap tongeni sü seni minne epwe fis lon manauach pwe mi fen kkotolo me mwan? Pokiten “kapasen lon ekewe Toropwe mi Pin meinisin ra pop seni Ngünün Kot,” met sia älleani lon eü kinikinin Paipel mi lamot epwe pwal tipeeü ngeni ekkoch wokisin lon Paipel. Ina minne, sipwe ppii met ekkewe pwal ekkoch wokisin lon Paipel a apasa ussun ei mettoch.​—2 Timoti 3:16.

Fansoun Seröch me Serengaü Epwe Kküü Aramas Meinisin

Lon puken Än Salomon Afalafal, Salomon a pwal makkeei: “Ua pwan sinei ew mettoch pwe won ei fonufan ekkewe mi muttir ne ssä rese win non ar kewe kitir o ekkewe mi pwora rese pwan win non maun fansoun meinisin. Ekkewe aramas mi mirit rese angei ar tufich me ekkewe mi tipachem rese pisekisek o ekkewe aramas mi nipwaköch rese angei wiser kewe mi tekia fansoun meinisin.” Pwata? A äweweei, pun “Feiengaw a tori aramas meinisin.”​—Än Salomon Afalafal 9:11, EWE KAPASEN GOD.

Salomon ese apasa pwe meinisin minne a fis lon manauach a fen kkotolo me mwan, nge a äweweei pwe aramas rese tongeni silei met epwe fis ngeniir mwiriloon ar achocho, pokiten “feiengaw a tori aramas meinisin.” Fän chommong, a fis och mettoch mi seröch ika serengaü ngeni emön.

Ren chök äwewe ewe wokisin a apasa pwe “ekkewe mi muttir ne ssä rese win non ar kewe kitir.” Neman ka fen silei are älleani ewe pworaus mi iteföülo me amwarar ussun ewe Olympics lon Merika a fis lon 1984 ussun än ekkewe fefin kitir, 3,000 meter. Emön a tupuni Britain, emön Merika, iir me rüüemön ra ekiekin winneni ewe kolt. Iwe nge, lukanapen ewe kitir ra purefengen. Emön a turulo me ese chüen ssä, nge ewe emön a fokkun letipeta pwe a äwesi ewe kitir nge a nampa fisu.

Minne a fis ngeni ekkewe chon kitir a fen kkotolo me mwan? Iwe, ekkoch ra lükü pwe Ewer. Nge a ffat pwe iir me rüüemön ra lus pokiten ra purefengen, eü akseten esor epwe tongeni silei pwe epwe fis. Nge ekkoch aramas ra ekieki pwe ar purefengen a fen kkotolo me mwan. Nge ekkewe chon apioni ewe kitir ra erä pwe ewe akseten a fis pokiten iir me rüüemön ra sipeöch me lipwäköch me ra ammüchü ükükün ar pöchökkül pwe repwe angei winner. Ussun met ewe Paipel a  apasa, “feiengaw a tori aramas meinisin.” Inaamwo ika sia fokkun mmolnöchütä nge epwe tongeni wor och mettoch mi weiweitä epwe kküü sopwöchün are sopwongaüen ach achocho, nge esap pokiten minne a fen kkotolo me läng.

Iwe nge, met weween alon ewe Paipel lupwen a erä: “Ren mettoch meinisin a wor ar fansoun”? Kich mi tongeni nemeni minne epwe fis lon manauach?

Ewe Fansoun mi Mürinnö Fän Iten Eü me Eü Angang

Ewe chon makkeei Paipel ese fos ussun met epwe fis ngeni manauen emön me emön iei, are lon mwachkkan, nge a kapas ussun än Kot kokkot me ifa ussun epwe kküü aramas. Met popun sia silei ei mettoch? Popun pwe ekkewe äpwipwiin wokisin a älisikich le weweiti. Salomon a akkomw apasa pwe ekkewe mettoch “a wor ar fansoun” mi fich an epwe fis. Mwirin a makkeei: “Iwe, üa kuna ewe angang weires Kot a awisa ngeni aramas. Meinisin mine Kot a föri a unusen mürina lon ar fansoun.”​—Än Salomon Afalafal 3:10, 11.

Kot a ngeni aramas chommong angang me Salomon a fen eiteita ekkoch me leir. Kot a pwal ngeniir ar pwüngün filatä ren met repwe mochen föri. Iwe nge, mi wor fansoun mi fich ren ar repwe föri iteiten angang meinisin pwe epwe sopwöch me uwaaöch ewe angang. Äwewe chök, lon Än Salomon Afalafal 3:2, a erä, “a wor fansoun fotukätiu pwal fansoun wietä.” Ewe chon atake mi silei pwe iteiten irä meinisin a wor en me an fansoun mi fich an epwe fotuki. Nge epwe ifa, ika ewe chon atake a fotuki ese lifilifil ineet me esap pwal lon ewe fansoun mi fich? Ika ese uwaaöch nge a fen angang  weires lon an we atake, iwe epwe tipi ngeni pwe ina otaen läng pwe a uwangaü? Aapwi! Ewe chon atake a tongeni sopwöch ika a chök fiti än ewe Chon Föratä kokkot woon mettoch meinisin.

Ina minne, ewe chon makkeei Paipel a fos ussun än Kot isetiu ekkewe kokkot pwe epwe emmweni aramas le eäni och sokkun angang mi tipeeü ngeni letipen Kot, nge ese apasa pwe minne a fis ngeni emön me emön a fen kkotolo me mwan. Ren än aramas repwe sopwöch, mi lamot repwe weweiti pwe mi wor än Kot kokkotun fansoun ren ineet atun epwe öch le föri eü me eü angang, me mwirin repwe fiti ena kokkot. Met Kot a fen akkota me mwan, aramas resap tongeni siwili nge ra tongeni nemeni woon met epwe fis lon pwisin manauer. Me ren Aisea, Jiowa a erä: “Iei usun ai kapas esap liwinto rei fän pön, pwe epwe afisätä mine üa tipeni o apwönüetä mine üa akünöü ngeni.”​—Aisea 55:11.

Iwe, ifa än Kot “kapas,” are än we kokkot fän iten fönüfan me aramas, ewe Kot epwe “apwönüetä” lon mwachkkan?

Weweöchün än Kot Kokkot le Apwönüetä Letipan

Mwirin än Salomon apasa pwe: “Meinisin mine Kot a föri a unusen mürina lon ar fansoun,” a sopwelo le apasa “a pwal atolonga ekiekin fansoun esemwüch lon letipen aramas, nge resap tongeni weweiti mine Kot a föri seni lepopun tori lesopolan.”​—Än Salomon Afalafal 3:11.

A tepetep pworausen äweween ei wokisin. Nge, mi pwüng pwe kich meinisin sia fen ekieki met popun sia manau me met epwe fis ngenikich lon mwachkkan. Seni loom tori ikenäi, mi weires än aramas repwe weweiti pwe lon änein manauach sipwe chök angang weires, lo, lo, lo, iwe mälo. Aramas mi sokkolo seni man pun sise chök ekieki ussun manauach iei, nge sia pwal ekieki ussun met epwe fis ngenikich lon mwachkkan. Sia pwal mwo nge äneän pwe amwo sipwe manau tori feilfeilo. Met popun? Pun ussun met ewe wokisin a äweweei, Kot a fen “atolonga ekiekin fansoun esemwüch lon letipen aramas.”

Aramas ra fen ekieki met epwe fis ngeniir mwirin ar mälo. Ekkoch ra fen apwüngalo pwe mei wor och mettoch a towu seni inisin emön lupwen a mälo. Ekkoch ra lükü pwe a chök rokopwäl manauer, weween, mei wor manauer ra piin manaueni akkomw, mwirin ar mälo repwe pwal eäni eü manau. Nge pwal ekkoch ra lükü pwe sise tongeni nemeni met a fis lon manauach pun a fen kkotolo me mwan. Iwe sia lichippüng pun meinisin ekkeei lükü resap awora pölüwan sipwe unusen menemenöch ren. Popun pun ewe Paipel a apasa pwe inaamwo ika aramas ra  kütta pölüwan lon pwisin ar achocho “resap tongeni weweiti mine Kot a föri seni lepopun tori lesopolan.”

Seni loom tori ikenäi ekkewe sou silelap me sou ääk ra osukosuk ren ar fokkun mochen küna pölüwan, nge rese tongeni küna. Iwe nge, pokiten Kot a fen atolonga lon ekiekin aramas ar mochen repwe manau tori feilfeilo, itä esap pwal awora ar tufichin küna pwönüetään ena mochen? Ewe Paipel a kapas ussun Jiowa: “Ka suki poum o ngeni ekewe mönümanau meinisin mine repwe menemenöch ren.” (Kölfel 145:16) Ren ach käkkäeö ewe Paipel, sipwe tongeni küna ekkewe äwewe mi ämenemenöchükich ussun manau me mälo, me ussun än Kot kokkot fän iten fönüfan me aramas.​—Efisus 3:11.

[Ekis Pworous lon pekin taropwe 5]

“Eman mi müttir le kitir esap tongeni win fansoun meinisin.”​—Än Salomon Afalafal 9:11

[Ekis Pworous lon pekin taropwe 6]

Ika ewe chon atake ese fotuki ewe irä lon fansoun mi fich, iwe epwe tipi ngeni pwe ina otaen läng pwe a uwangaü?

[Ekis Pworous lon pekin taropwe 7]

Sia ekieki ussun manau me mälo pokiten Kot a “atolonga ekiekin fansoun esemuch lon letipen aramas”