“Iei manau esemüch: Ar repwe silei en, ewe eman chök Kot mi let.”​—Jon 17:3.

IFA EWE MINEN EPPET? Ekkoch ra apasa pwe esor emön Kot. Pwal ekkoch ra erä pwe Kot esap wesewesen emön, a ussun chök och manaman. Nge ren ekkewe mi lükü pwe mi wesewesen wor emön Kot, a sokkofesen äitier ussun I me napanapan kewe.

IFA USSUN KOPWE PWÄKINI EWE MINEN EPPET? Kopwe alapalo om silei ussun Kot ren om nennengeni förian kewe. Ewe aposel Paul a apasa: “Aramas ra tongeni silei usun Kot ren ekewe mettoch i a föri. Pun seni ewe fansoun Kot a föri fanüfan ra fokun tongeni weweiti pwe an manaman a nom tori feilfeilachök, pwe i wesewesen Kot.” (Rom 1:20) Ika kopwe attolaöchü förien Kot kewe, ka tongeni käeö chommong mettoch ussun tipatchemen me manamanen ewe Chon Förikich.​—Kölfel 104:24; Aisea 40:26.

 Iwe nge, ren ach alapalo ach sile ussun napanapen Kot, mi lamot emön me emön leich epwe pwisin käeö me ätittina ewe Paipel. Kosap mut ngeni ekkoch repwe anapanapa ekiekum nge kopwe fen apwönüetä än ewe Paipel pesepes: “Ousap apirü pomwen fanüfan, nge oupwe mwüt ngeni Kot pwe epwe awilikemi o asöföla unusen letipemi. Mürin oupwe tongeni silei letipen Kot, ren met mi mürina me unusöch, pwal met mi apwapwai i.” (Rom 12:2) Äwewe chök, ekieki ekkeei pworaus ewe Paipel a pwäratä ussun Kot.

Mi pwisin wor iten Kot. Lon ekkewe popun Paipel iten Kot a mak fän fitu ngeröü. Chommong kapiin Paipel ra walong iten Kot we lon Ekistos 6:3, “Ua fen pwa ngeni Abraham, Isaac me Jacob ussun God Mi Manaman, nge use pwarieino ngenir ren itei we mi pin, Yahweh [Jiowa].”​—Ewe  Kapasen God.

Jiowa Kot a tongeni meefi pwapwa are meefi letipechou ren föfförün aramas. Mwirin än Jiowa angasalo chon Israel mi eolo lon Isip, fän chommong ra tunalo an emmwen mi tipatchem. Ar föfförün ü ngeni a “achouu” me a “asonga Ewe mi Pin me lon Israel.”​—Kölfel 78:40, 41.

Jiowa a tongei emön me emön leich. Iei alon Jises ngeni nöün kewe chon käeö: “Ifa usun, aramas resap amömöla ruoman nichok ren eföü chök kapa? Sap mwo nge eman nichok epwe turutiu lepwül lükün tipen Sememi. Nge meten möküremi kewe mwo nge ra lea meinisin. Iei mine ousap niuokus, ämi oua aüchea seni chomong nichok!”​—Mattu 10:29-31.

Kot ese lifilifil aramas. Ewe aposel Paul a ereni ekkewe chon Krik lon Atens pwe Kot “a föri sokun aramas meinisin, pwe repwe nonom won unusen fanüfan.” A pwal apasa pwe Kot “esap wesewesen toau seni eman me eman leich.” (Fofor 17:26, 27) Ewe aposel Piter a apasa: “Kot esap lifilifil aramas, nge a etiwa aramas mi niuokusiti i o föri mine a pwüng seni ekewe mwü meinisin.”​—Fofor 10:34, 35.

IFA EWE FEIÖCH? Ekkoch aramas ra “fokun tiliken le angang ngeni Kot, nge ar tiliken le angang esap longolong won ar silei usun mine a let.” (Rom 10:2) Ika ka silei met wesewesen äitien ewe Paipel ussun Kot, kosap tongeni tupulo nge kopwe tufichin “arap ngeni Kot.”​—Jemes 4:8.

Ren pwal ekkoch pworaus, nengeni ewe puk, Sile Mi Emmwen Ngeni Manau Esemuch, sopwun 3, itelapan “Io Ewe Kot Mi Enlet?” a

[Footnote]

[Sasing lon pekin taropwe 6]

Kopwe alapalo om sile ussun Kot ren om nennengeni förian kewe