“Ai Kot, ai ekipwichi imwom mi pin a küküri leüti usun eu ekkei.”​—JON 2:17.

1, 2. Met Jises a föri lon ewe imwenfel lon ewe ier 30, iwe, pwata?

 EKIEKI mwo met a fis. A tori ewe Pasofer lon ewe ier 30. Jises a poputääni an angangen afalafal wonu maram me mwan. Iei a feilo Jerusalem. Ikewe ie lon pwalangewun ewe imwenfel, Jises “a küna ekewe mwän mi amömö kow, sip me lisom, pwal ätekewe mi mot ngeni chepel o akasiwili moni.” A piti efoch säl seni lul me äeä le atowu meinisin ekkewe man, iwe, ekkewe chon amömö ra pwal towu. Jises a pwal atoropasa ekkewe föün moni, nöün ekkewe chon siwili moni me oturalo ar kewe chepel. A allükü ngeni ekkewe chon amömö lisom pwe repwe angei minne ar, me towu.​—Jon 2:13-16.

² Än Jises kana föfför ra riri ngeni meefian ussun ewe imwenfel. A apasa: “Ousap fori ngeni imwen Semei imwen amomo.” Atun nöün Jises kewe chon käeö ra nengeni minne a fis, ra chechemeni makkeien Tafit fitepükü ier me mwan: “Ai ekitekite ngeni imwom epwe chok fisieilo.”​—Jon 2:16, 17, TF; Kölf. 69:9.

3. (a) Met weween tinikken? (b) Ifa ewe kapas eis sia tongeni pwisin eisinikich?

³ Än Jises kewe föfför ra popu seni an tinikken me chchüngü imwen Kot we. Tinikken a wewe ngeni “än emön mwasangasang me ekipwichi eü mettoch.” Lon ach ei fansoun, lap seni fisu million Chon Kraist ra tinikken fän iten imwen Kot we. Emön me emön leich epwe tongeni pwisin eisini, “Ifa ussun ua tongeni alapalo ai tinikken fän iten imwen Jiowa we?” Ren ach sipwe pölüweni ena kapas eis, sipwe akkomw ppii met weween imwen Kot we ikenäi. Mwirin, sipwe käeö pworausen aramas mi tuppwöl ra pwäratä ar achocho fän iten imwen Kot. Pworauser a mak lon Paipel “fän iten ach sipwe kaiö seni,” iwe, ra tongeni amwökütükich le alapalo ach achocho.​—Rom 15:4.

Imwen Kot​—Me Loom me Ikenäi

4. Ifa populapen än Salomon aüetä ewe imwenfel?

⁴ Lon Israel loom loom, ewe imwenfel lon Jerusalem a pwal iteni ewe imwen Kot. Pwüngün pwe Jiowa ese wesewesen nonnom ikewe ie. A apasa: “Läng ai lenien mot, nge fanüfan lenien puun pechei. Met sokun imw oupwe aüetä fän itei are ifa lenien ai asösö?” (Ais. 66:1) Iwe nge, ewe imwenfel Salomon a aüetä, ina ewe äkkäeüin leenien fel ngeni Jiowa, iwe, nöün kewe chon fel ra kan ikkiotek ie.​—1 King 8:27-30.

5. Än Salomon imwenfel a liosuetä menni kokkotun fel ikenäi?

⁵ Ikenäi, imwen Jiowa we esap wesewesen eü imw lon Jerusalem are pwal eü fönü. Nge, a wewe ngeni ewe kokkot fän iten ach sipwe tongeni arap ngeni me fel ngeni Kot, ewe mi alongolong woon än Kraist möön kepich. Meinisin nöün Kot kewe chon angang mi tuppwöl woon fönüfan ra tipeeüfengen lon ar fel ngeni Jiowa fän ena kokkot.​—Ais. 60:4, 8, 13; Fof. 17:24; Ipru 8:5; 9:24.

6. Iö kewe kingen Juta ra fokkun achocho fän iten fel mi enlet?

⁶ Mwirin än ewe mwuun Israel kinikinfesen 997 ier mwen fansoun Jises, fömön me lein ekkewe 19 king mi nemeni ewe mwuun Juta öörün Israel ra fokkun achocho fän iten  ewe fel mi enlet. Iter Asa, Jehosafat, Hesekaia, me Josaia. Ikkefa ekkewe lesen mi lamot sipwe käeö seni ar kewe leenien äppirü?

Angang Ren Unusen Letipach A Atoto Feiöch

7, 8. (a) Met sokkun angang Jiowa a kan efeiöchü? (b) Ifa ussun pworausen King Asa a öüröürakich?

⁷ Jiowa a awisa ngeni ekkoch soufos pwe repwe emmweniöchü An we mwu woon ewe alen pwüng atun nemenemen King Asa. Äwewe chök, ewe Paipel a erenikich pwe Asa a aüseling ngeni ewe soufos Asaraia, nöün Otet. (Älleani 2 Kronika 15:1-8.) Än Asa amoielo fel mi chofona a atipeeüfengeni chon ewe mwuun Juta me chommong seni ewe mwuun Israel, chokkewe ra feito fiti eü mwichelap lon Jerusalem. Iir meinisin ra pwärawu ar mochen fel ngeni Jiowa fän tuppwöl. Sia älleani: “Ra pwon fän akapel ngeni ewe Samol mi Lapalap fän mwelier mi leüömong, fän akapwas, pwal ren tikin rappwa me säwi. Chon Juta meinisin ra meseik pokiten ewe pwon fän akapel ra eäni ren unusen leluker. Ra pwal fel ngeni Kot ren wesewesen mochenin letiper. Iwe, ewe Samol mi Lapalap a etiweer o fang ngeniir kinamwe seni ekewe mwü mi nom ünükür.” (2 Kron. 15:9-15) Jiowa epwe pwal efeiöchükich ika sia angang ngeni ren unusen letipach.​—Mark 12:30.

⁸ Solapan, pun mwirin och fansoun, Asa a oputa än Hanani apwüngü. (2 Kron. 16:7-10) Met meefiach lupwen Jiowa a ngenikich emmwen ren ekkewe Chon Kraist elter? Sia mwittir lefareni ar kewe kapasen fön seni Paipel me tümünükich seni tipemaras?

9. Ifa ewe minen efeiengaü a tori Jehosafat me chon Juta, iwe, ra fet?

⁹ Loom loom, Jehosafat a wisen kingen Juta. Ekkewe sounfiun Amon, Moap, me Seir ra feito maun ngeni ewe mwuun Juta. Inaamwo ika Jehosafat a niuokkus, nge met a föri? Iir me ekkewe re Juta fengen me pwülüwer kewe me nöür kewe ra mwichfengen lon imwen Jiowa we pwe repwe iotek. (Älleani 2 Kronika 20:3-6.) Än Jehosafat tingormaü a tipeeü ngeni alon Salomon le atun efinünen ewe imwenfel, a erä: “En äm Kot, kopwe apwüngüür. Pun esap wor äm pöchökül ngeni ei mwichemongun aramas mi feito o maun ngenikem. Äm aisap silei mine aipwe föri, nge äm aia chök nenengenuk pwe kopwe alisikem.” (2 Kron. 20:12, 13) Mwirin än Jehosafat iotek, “lukanapen ewe mwich,” än Jiowa we ngün mi fel a amwökütü Jaasiel, emön re Lifai, an epwe apöchökküla ekkewe aramas ren kapasen aurur.​—Älleani 2 Kronika 20:14-17.

10. (a)  Jehosafat me ewe mwuun Juta ra angei emmwen seni iö? (b) Ifa ussun sipwe pwäratä ach kilisou ren än Jiowa emmwenikich ikenäi?

¹⁰ Iwe, lon ena atun, Jehosafat me ewe mwuun Juta ra angei emmwen seni Jiowa me ren Jaasiel. Ikenäi, sia angei aurur me emmwen me ren ewe chon angang mi alükülük me tipatchem. Pwüngün pwe fansoun meinisin, sipwe angangfengen me süföliti ekkewe elter mi kefilitä, chokkewe mi akkachocho le mammasakich me apwönüetä ekkewe emmwen seni “ewe chon angang mi allükülük o tipachem.”​—Mt. 24:45; 1 Tes. 5:12, 13.

11, 12. Ifa ewe lesen sia käeö seni minne a fis ngeni Jehosafat me chon Juta?

¹¹ Jehosafat me chon ewe mwu ra mwichfengen me tingor emmwen seni Jiowa, iwe, sipwe äppirüür ren ach sisap etiwalo ach kewe mwich. Ika sise silei met sipwe föri fän och osukosuk watte, sipwe äppirü Jehosafat me chon Juta le ikkiotek ngeni Jiowa fän lükülüköch. (SalF. 3:5, 6; Fil. 4:6, 7) Pwal mwo nge ika sipwe towau seni pwiich kewe, nge ach ikkiotek ngeni Jiowa epwe ämmeef ngenikich pwe sise äläemön, nge sia kan pwipwifengen me ‘pwich kewe woon unusen fönüfan.’​—1 Pit. 5:9.

¹² Jehosafat me nöün kewe aramas ra älleasochisi ewe emmwen seni Kot me ren Jaasiel. Iwe, ifa mwiriloon? Ra winneni ewe maun  me liwiniti Jerusalem “fän pwapwa” me “fän tikin kitar me ükülele.” (2 Kron. 20:27, 28) Sia pwal süföliti än Jiowa emmwen me ren ewe chon angang mi alükülük me tipatchem me fiti Nöün kewe aramas le mwareiti I.

Sipwe Tümünüfichi Ach kewe Leenien Mwich

13. Ifa ewe angang Hesekaia a poputääni le poputään an nemenem?

¹³ Lon ewe äeüin maramen an Hesekaia nemenem, a pwäralo an achocho fän iten an fel ngeni Jiowa ren an suukisefäli ewe imwenfel me förisefäli minne a ta me woon. A akkota pwe ekkewe samolfel me chon Lifai repwe limeti imwen Kot we. Ra äwesalo ena angang lon ükükün 16 rän. (Älleani 2 Kronika 29:16-18.) Ena pworaus a ächema ngenikich ussun ewe angangen tüttümünü ach kewe leenien mwich pwe repwe pwäratä ach achocho le fel ngeni Jiowa. Kese fen rongorong pworausen ekkoch aramas mi ingeiti pwiich kewe pokiten ar achocho le föri ena sokkun angang? Ar angang a fokkun elingalo Jiowa.

14, 15. Ikenäi, ifa eü angang a mwareiti Jiowa? Äweweei mwo.

¹⁴ Emön mwän lon England ese tipeeü ngeni förisefälin ewe Kingdom Hall ünükün fönüan we. Pokiten pwiich kewe ra küna pwe a ta ewe tit lefilen ewe Kingdom Hall me fönüen ewe mwän, fän kirekiröch ra ereni ewe mwän pwe repwe försefäli ewe tit nge esap kamö. Ra angang weires le försefäli met a ta me woon, me ra pwal senisefälietä arapakkan unusen ewe tit. Iwe, pokiten ar kirekiröch me föfföröch, ewe mwän a siwili meefian. Iei a mammasa leenien ewe Kingdom Hall.

¹⁵ Nöün Jiowa kewe aramas ra föri angangen kaütään Kingdom Hall, leenien mwichelap, me imwen Bethel lon chommong fönü. Chon wiliposun ekkena fönü ra angangfengen me ekkewe chon ekis ra feilo älisiir. Sam me Ruth ra fen säi ngeni ekkoch fönüen Iurop me Afrika pwe repwe fiti ena angang. Lon ekkena fönü meinisin, ra pwal pwapwaesini ar fiti chon ewe mwichefel le afalafal. Sam a äweweei met popun a fiti ena angang lon chommong fönü, a erä: “Ekkoch chon angang lon Bethel ikeei ie me lon pwal ekkoch fönü ra apöchökkülaei. Ai küna ar achocho me pwapwa a achchüngüei pwe upwe mochen fiti ei angang.”

Älleasochisi Än Kot Emmwen

16, 17. Ifa ewe angang mi sokkolo aücheaan Nöün Kot kewe aramas ra föri? Ifa mwiriloon?

¹⁶ Lükün ewe angangen förisefäli ewe imwenfel, Hesekaia a akkota pwe aramas repwe poputäsefäli ewe Pasofer Jiowa a fen allükü ngeniir. (Älleani 2 Kronika 30:1, 4, 5.) Hesekaia me chon Jerusalem ra etiwa unusen ewe mwu, pwal mwo nge chon ewe mwuun ennefen. Chon künö ra feilo unusen Israel me Juta fän ekkewe taropween etiwetiw.​—2 Kron. 30:6-9.

¹⁷ Lon ekkewe ier mi kkanoto, sia pwal fiti ena esin angang. Sia eineti taropween etiwetiw ngeni aramas lon sopwuch kewe pwe repwe etikich le fiti ewe Fääfen Ach Samol, ewe Jises a allükü ngenikich. (Luk 22:19, 20) Mwirin ach angei kapasen emmwen seni ach kewe Service Meeting, sia tinikken le föri ena angang, iwe, Jiowa a efeiöchü ach achocho! Lon ewe ier, sia arapakkan fisu million le eineti ekkewe taropween etiwetiw, iwe, ükükün 17,790,631 aramas ra fiti!

18. Pwata a lamot ngonuk om kopwe tinikken fän iten fel mi enlet?

 ¹⁸ Iei pworausen Hesekaia: “A lükü ewe Samol mi Lapalap ewe Koten Israel. Esap wor eman king usun i me lein ekewe kingen Juta ra akom mwan ika tapweto mürin. Pun Hiskia a kamwöchünük won ewe Samol mi Lapalap, esap fokun aleasolap ngeni, nge a apwönüetä ekewe allük meinisin ewe Samol mi Lapalap a allük ngeni Moses.” (2 King 18:5, 6) Iwe, amwo sipwe äppirü i. Ach tinikken fän iten imwen Kot we epwe älisikich le ‘kamwöchünnük woon Jiowa’ fän ewe äpilükülükün manau esemuch.​—Tut. 30:16.

Mwittir Apwönüetä Kapasen Emmwen

19. Met chon ewe mwichefel ra achocho ngeni lon ekkewe wiik me mwen ewe Ächechchem?

¹⁹ Atun Josaia a wisen king, a pwal ammolnafichi pwe epwe fis ewe Pasofer lon Juta. (2 King 23:21-23; 2 Kron. 35:1-19) Iwe, sia pwal mmolnefich fän iten ekkewe mwichelap me ewe Ächechchem. Lon ekkoch fönü, pwiich kewe ra fiti ächechemenien mäloon Jises inaamwo ika repwe tongeni feiengaü are mälo. Ekkewe elter ra achocho le älisi chon ewe mwichefel meinisin, me akkota pwe ekkewe mi chinnap me apwangapwang repwe tongeni fiti ewe ächechchem.

20. (a) Met a fis atun King Josaia a nemenem, iwe, a fet? (b) Ifa ewe lesen sipwe lefareni?

²⁰ Atun King Josaia a akkota an epwe fförsefäl ewe fel mi enlet, ewe Samolfel mi Lapalap Hilkaia “a küna ewe puken allük än [Jiowa], ekewe allük Kot a ngeni Moses.” A ngeni Safan, nöün ewe king seketeri, iwe, a älleani masouan ngeni Josaia. (Älleani 2 Kronika 34:14-18.) Ifa mwiriloon? Ewe king a kamwei üfan fän an letipeta me a allük ngeni ekkewe mwän pwe repwe kütta pworaus seni Jiowa. Me ren ewe soufos fefin itan Hulta, Kot a pwäratä mwäälin ekkoch än chon Juta kewe föfförün fel. Pokiten Josaia a achocho le aükatiu fel ngeni ululun, a chüen nonnom fän än Jiowa we chen, inaamwo ika a katowu kapasen apwüng ngeni ewe mwu. (2 Kron. 34:19-28) Met sia tongeni käeö seni ei pworaus? Enlet, meefiach a ussun chök meefien Josaia. Sia mochen mwittir apwönüetä än Jiowa we emmwen, me lefareni ewe kapasen öüröür ussun met epwe tongeni fis ika sia mut ngeni chon tokolo ar repwe aingaüa ach  fel. Iwe, sia tongeni lükülük pwe Jiowa epwe pwapwa ren ach achocho fän iten fel mi enlet, ussun chök an a pwapwaiti Josaia.

21, 22. (a) Pwata sipwe tinikken fän iten imwen Jiowa we? (b) Met sipwe käeö lon ewe lesen mwirin ei?

²¹ Ekkena fömön kingen Juta, iter Asa, Jehosafat, Hesekaia me Josaia, ra isetiu mwach leenien äppirü mi mürinnö ren ar tinikken fän iten imwen Kot we me ar fel. Pwal ina chök ussuch, ach tinikken epwe amwökütükich le eäni lükülük woon Jiowa me achocho le fel ngeni. Iei ewe alen tipatchem me ewe al ngeni pwapwa ach sipwe älleasochisi än Kot emmwen me etiwa tümün me apwüng seni ewe mwichefel me ekkewe elter.

²² Ewe lesen mwirin ei epwe menlapei ach achocho lon ewe angangen afalafal me apöchökküla ekkewe säräfö pwe repwe tinikken le angang ngeni Semach we mi tong. Sipwe pwal käeö ifa ussun sipwe tümünükich seni eü me lein än Setan kewe minen otuputup mi fokkun efeiengaü. Atun sia achocho le apwönüetä meinisin än Jiowa kana kapasen ächechem, sipwe äppirü Nöün Jiowa we, Jises, pun iei alon: “Ai achocho ngeni limelimochun imwom a fen anieilo.”​—Kölf. 69:9, TF; 119:111, 129; 1 Pit. 2:21.

Ka Chechemeni?

• Met sokkun angang Jiowa a kan efeiöchü, iwe, pwata?

• Ifa ussun sipwe pwäratä ach lükülük woon Jiowa?

• Ifa ussun ach tinikken epwe amwökütükich le älleasochisi än Kot emmwen?

[Ekkewe Kapas Eis fan Iten ewe Lesen]

[Sasing lon pekin taropwe 15]

Ifa ussun Asa, Jehosafat, Hesekaia, me Josaia ra pwäratä ar tinikken fän iten imwen Jiowa we?