JAMES a määritä lon eü tö Malaita lon Solomon Islands. Seni le kükkünün a fen käeö an epwe pinini me kütta älillis seni ekkewe ngün. A apasa: “Usap tongeni tingorei ekkewe ngün ar repwe efeiengaüa aramas, nge me rei use tongeni pwapwa ika use äeä ewe rarafono [och eöreni le tingor älillis seni ekkewe ngün], pwe epwe tümünüei seni feiengaü.”

Ussun ekkewe chon Solomon Islands, chommong aramas lon ekkoch fönü ra pwal eäni ewe ekiek pwe ekkewe ngün mi tongeni älisi are efeiengaüa emön. Ina popun, chommong chon Melanesia ra lükü pwe mei wor ekkewe ngün mi mürinnö, ra fen tonger nge rese niueitiir.

Än aramas lükü angangen ekkewe ngün ra pwälo lon sokkopaten napanap. Ren chök äwewe, le kükkünün James, ekkewe fefin lon sopwun we lupwen ra rongorong tikitikin ewe matchang itan korokoro ra mwittir lukiialong nöür kewe semirit lon imwer. Pwata? Pun me rer, tikitikin ena matchang eü esissil pwe feiengaü epwele tori emön.

Ekkoch chon ekkewe sopw ra watä penasamen imwer eföü faü mi pwechepwech mi kkolo aüchean. Ina met James a föri pwe a lükü pwe ewe faü epwe tümünü i seni ekkewe ngün mi efeiengaü. Lupwen James a möngöön leolowas lon an leenien angang, a kan ioni lusun anan kewe me isenalong lon eü chotä pwe epwap pöütalo mwirin. A föri ei pun a lolilen ika emön epwe föriörü lusun kewe me asemmweni i.

Inaamwo ika ekkeei eöreni rese fiffis lon leeniom nge ussun chök James ka meefi pwe mi lamot om kopwe föri eörenien fönüom pwe kopwe küna tümün seni ekkewe ngün mi ngaü. Pun ika kese föri ekkeei eöreni, ka lükü pwe epwe toruk feiengaü.

Ika ka süföliti ewe Paipel, eli kopwe mochen silei pölüwen ekkeei kapas eis: (1) Ifa ussun ekkewe ngün mi ngaü repwe tongeni efeiengaüok? (2) Om föri ekkewe eöreni epwe anomuk fän etipetipaen ekkewe timon? (3) Ifa ussun kopwe wesewesen tümünuk seni ekkewe ngün mi ngaü me küna pwapwa?

 Ifa Ussun Ekkewe Ngün mi Ngaü ra Efeiengaüa Aramas

Ewe Paipel a affata pwe ekkewe ngün mi ngaü esap iir ngünün ekkewe mi mälo. Iei alon Paipel: “Pun ekewe chon manau ra silei pwe repwe mäla. Nge ekewe sotup resap silei och mettoch.” (Än Salomon Afalafal 9:5) Ren enletin, ekkewe ngün mi ngaü iir chonläng mi ü ngeni Kot me ra fiti Setan lon an angangen otupu aramas.​—Pwarata 12:9.

Ewe Paipel a affata lamoten ach sipwe tümünü seni ekkewe ngün mi ngaü. Ewe aposel Paul a makkeei ngeni ekkewe chon Kraist lon Efisus: “Pun saminne sipwe maun ngeni fituk me cha, pwe ngeni . . . ekkewe chommong sokkun ngun ingau lon lang.” Ewe aposel Piter a äweweei pwe Setan, ewe samolun meinisin ekkewe ngün mi ngaü a ussun chök “eman laion mi wörüwör, nge a kütta iö epwe oromala.”​—Efisus 6:12, TF; 1 Piter 5:8.

Setan a äkkäeüin efeiengaüa aramas ren an otupur ar repwe föri ekkewe föfför mi asonga Kot. Ewe Paipel a erä pwe Setan “a püsin siwili lapalapan usun itä nge i eman chon längin saram.” (2 Korint 11:14) A tipin awilalo ngeni emön ngün mi mürinnö nge ren enletin an ekiek mi fokkun ngaü. Setan a achunalo letipen ekkewe aramas pwe resap esilla pwe i mi wesewesen ngaü me resap pwal küna ewe enlet ussun Kot. (2 Korint 4:4) Met popun Setan a kan otupu aramas?

Setan a mocheniaiti än aramas repwe fel ngeni ese lifilifil ika ra meefi pwe ra fel ngeni are rese. Lupwen Nöün Kot we, Jises a nom woon ei fönüfan, Setan a mochen an epwe ‘chapetiu mwan o fel ngeni.’ Nge Jises a apasa: “Kopwe sü seniei Satan! Pun a mak lon ekewe Toropwe mi Pin, ‘Kopwe fel ngeni ewe Samol om Kot o angang ngeni i chök.’” (Mattu 4:9, 10) Jises a fokkun pönseni ekkewe föfför meinisin mi tongeni wewe ngeni pwe a fel ngeni Setan.

Jiowa ewe mi manaman chapur seni ekkewe ngün meinisin esap mut ngeni nöün kewe mi älleasochis ar repwe küna feiengaü fochofoch. (Kol Fel 83:18; Rom 16:20) Nge ika sipwe apwapwaai Jiowa ussun chök Jises, mi lamot ach sipwe ti senikich föfför meinisin mi anomukich fän nemenien Setan me nöün kewe timon. Ina popun, a lamot ach sipwe esilla ekkewe eörenien fönüach mi weneiti pin ngeni ekkewe ngün mi ngaü. Ifa ussun sipwe föri ei?

Esilla Ekkewe Eöreni mi Äletipengaüa Kot

Jiowa Kot a öüröüra ekkewe chon Israel loom ar resap äppirü ekkoch eörenien chon ekkewe fönü ünükür. A apasa: “Esap wor eman me leimi epwe . . . soupwe, are eman souasisil, are eman souwo, are eman sourong, are eman soupöüt.” Iei alon ewe Paipel ussur: “Pun chokewe mi föri ekei sokun föför ra anioput me ren ewe Samol mi Lapalap.”​—Tuteronomi 18:10-12.

Ina minne, lupwen ka ätittina eörenien leeniom, ekieki ussun ekkeei kapas eis: Ei eöreni mi apöchökküla lükülük lon roongen esissil? Chon fiti ena eöreni ra lükü pwe mei wor ekkoch pisek mi manaman repwe tümünüür seni feiengaü? A pwal kapachelong föfförün pöüt are eppet seni manamanen angangen pöüt? A fiti och föfför mi anomuk fän nemenien emön ngün me lükün Jiowa me nöün we mi kefilitä, Jises?​—Rom 14:11; Filipai 2:9, 10.

A lamot ach sipwe pöönalo ekkewe eöreni mi apöchökküla ekkena sokkun föfför. Pwata? Ewe aposel Paul a makkeei: “Ouse pwal tongeni mongo seni chepelin ewe Samol me chepelin ekkewe timon.” A öüröürer pwe iir kewe ra sotun apwapwai Kot pwal ekkewe ngün mi ngaü ra ‘fori minne ach Samol a lolowo ren.’ (1 Korint 10:20-22, TF) Jiowa a kütta seni aramas ar repwe fel ngeni I chök me ina met a fich ngeni.​—Ekistos 20:4, 5.

Ekiekifichi pwal ei kapas eis: Ena eöreni a apöchökküla ewe ekiek pwe emönnewe esap küna chappen an föfför pwe esap tipisin? Ren  chök äwewe, än emön lisowu ngeni emön esap pwisin pwülüwan are lisowu mwen pwüpwülü mi äsäü me ren chommong aramas, me a mmen änioput me ren Paipel. (1 Korint 6:9, 10) Nge me ren ekkoch eöreni lon Pacific, esor ngaüen än emön nengngin kon ren emön ät pokiten a oo ren an säfeini. a

Iwe nge, ewe Paipel a äiti ngenikich pwe Kot epwe apwüngükich ren ach kewe föfför meinisin. (Rom 14:12; Kalesia 6:7) Äwewe chök, ewe äemönün fefin If a meefi pwe Setan a otupu i pwe epwe älleasolapa Kot. A erä: “Ewe serepenit a atupuei, iei mine üa mongö.” Iwe nge, Jiowa a apwüngü föfförun If. (Keneses 3:13, 16, 19) Epwe pwal ina ussun, Kot epwe apwüngü ach kewe föfför meinisin.​—Ipru 4:13.

Met Kopwe Itä Föri?

Ika ka mochen apwapwaai Kot me apwönuetä an kewe kapasen emmwen, mi lamot kopwe föri ükükün om tufich le tümünü seni Setan me nöün kewe timon. Ekkewe chon Efisus mi letipwenechar lon fansoun ekkewe aposel ra isetiu eü leenien äppirü mi mürinnö. Ren ar repwe imulo seni etipetipaen ekkewe ngün mi ngaü ra ionfengeni nöür kewe puken rong me “keniirela mwen mesen ekewe aramas meinisin.”​—Fofor 19:19.

Me mwen ar keni ekkewe puk, ra akkomw “pwärätä ar kewe föför mi ngau mwen mesen ekewe aramas.” (Fofor 19:18) Än Paul afalafal ussun Kraist a achüngü letiper le kenalo nöür kewe puken rong. Ra pwal siwili ar ekiek me memmeef ussun eörenien fönüer.

Pwüngün, pwe esap mecheres än emön pöütalo eörenien fönüan. James, ewe sia pworaus ussun akkomw, a küna ekkeei sokkun sossot. A poputä le käeö ren Chon Pwäratä Jiowa me a pwapwaiti met a käeö. Iwe nge, a chök chüen föfföri rarafono. Lupwen a ätittina pwisin meefian ussun ekkeei eöreni, a meefi pwe inaamwo ika a lükü än Jiowa kewe pwon ussun mwach kan, nge a chüen meefi pwe mi lamot an epwe föfföri ekkewe eöreni pwe epwe eppeti seni feiengaü.

Met a älisi James an epwe siwili an ekiek? A apasa: “Ua iotek ngeni Jiowa pwe epwe tümünüei me älisiei le eäni lükülük woon. Pwal och, ua ükütiu le föri eörenien fönüei we.” Iwe, a feiengaü? James a erä: “Aapw, fen iei met a fis. A lapolo ai lükülük woon Jiowa me a fen pöchökkülelo ai ririöch ngeni ussun emön chiechiei.” Iwe iei, James a fen fiti ewe angangen pioneer lon ükükün fisu ier me a älisi ekkoch le käeö äitien ewe Paipel.

Pwata kese äppirü met James a föri? Ätittina eörenien fönüom we, äeä tufichin om ekiek pwe kopwe tongeni esilla ika iir mi tipeeü ngeni “met mi apwapwai i [Kot].” (Rom 12:2) Mwirin kopwe pwora le äimukulo seni ekkewe eöreni mi u ngeni Paipel. Ika ka föri ena, ka tongeni lükülük pwe Jiowa epwe ‘etiwok’ me tümünuk. (2 Korint 6:16-18) Ussun chök James, kopwe pwal küna pwönüetään än ewe Paipel pwon mi erä: “Iten ewe Samol mi Lapalap a usun chök eu imw tekia mi pöchökül, ewe chon pwüng a sälong lon o küna manau.”​—Än Salomon Fos 18:10.

[Footnote]

[Sasing lon pekin taropwe 21]

“Korokoro”

[Credit Line]

Courtesy of Dr. Bakshi Jehangir

[Sasing lon pekin taropwe 21]

Emön nengngin a ioni ekkewe pippiin möngö pwe ete wor epwe föriörü