Met epwe sopwolo?

Nöün Jises kewe chon käeö ra eisini: “Kopwe pwäri ngenikem asisilen fansoun om wareto me ewe fansoun sopolan, [ototen ei fönüfan, NW].” (Mattu 24:3) Lupwen Jises a pölüweni ar kapas eis, ese apasa pwe wesewesen ei fönüfan epwe talo. Jises a fen fos ussun “ototen ei fönüfan” me a nöünöü ena mwuten kapas pwe epwe weneiti unusen ototen sopai, lamalam me mwuun aramas mi nom fän nemenien Setan. (Mattu 13:22, 40, 49, NW) Ina ewe otot epwe sopwolo Jises a ekieki ussun lupwen a apasa: “A ina sopolon.”​—Mattu 24:14, TF.

Ifa ussun Jises a äweweei ewe sopwoloon?

A eü “kapas allim” pwe ei otot mi ngaü epwe sopwolo. Jises a erä: “Iwe, ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.” Iei ussun Jises a äweweei taloon ototen ei fönüfan: “Pun lon ewe fansoun epwe fis riaffou lapalap, usun chok esaamo fis seni le poputan fonufan tori ikenai, o esap pwal usun chok mwirin. Iwe, ika esap mochomochelo ekkewe ran, esor emon epwe manau.”​—Mattu 24:14, 21, 22, TF.

Iö kewe repwe ninniilo?

Chokkewe rese tongei me angang ngeni Jiowa me Jises iir repwe ninniilo. Ekkena aramas rese aüseling ngeni Kot. Jises a apasa: “Ewe fansoun waren Nöün Aramas epwe usun chök met a fis lon fansoun Noa. Lon ekewe rän mwen ewe noter, . . . resap silei mine epwe fis tori ewe noter a war o niirela meinisin.” (Mattu 24:36-39) Jises a apasa pwe  chommong ra aleni ewe al mi emmwen ngeni kitetter. Iwe nge, a alükülüküükich pwe mei wor efoch al mi “chökükün ewe al mi ale ngeni manau esemuch.”​—Mattu 7:13, 14.

Ineet epwe sopwolo ototen ei fönüfan?

Lupwen ra eis ussun esissillen an nonnom me “fansoun sopolan [ototen ei fönüfan, NW],” Jises a pölüweni: “Fanü me fanü repwe fiufengen o mwü me mwü repwe maunfengen. Epwe wor lengita me chechechin fanü . . . pokiten a wattela föföringau, epwe patapatala ewe chen lefilen aramas.” (Mattu 24:3-12) Ina minne, meinisin ekkewe pworaus mi alolilen ikenäi a eü minen apöchökkül ngenikich pun ekiselo chök än Kot we Mwu epwe atoto kinamwe ngeni chokkewe mi älleasochis. Jises a apasa: “Lupwen oupwe küna pwe ekei mettoch repwe le fis, oupwe silei pwe Mwün Kot a arapoto.”​—Luk 21:31.

Met kopwe itä föri?

Jises a erä pwe Kot “a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Jon 3:16) Ren om kopwe anganga om lükü ngeni Kot me Nöün we, mi lamot om kopwe silefichi ussur. Ina minne, Jises a apasa: “Iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.”​—Jon 17:3.

Tümünü pwe weires me osukosuk rete eppetuk seni om ämääraatä om pwäralo tong ngeni Kot. Jises a apasa: “Oupwe afälikemi, pwe lelukemi esap chouchou ren . . . öürekin manauen ikenai, pwe ewe rän esap muttiritikemi usun eu sär . . . epwe tori aramas meinisin won unusen fanüfan.” Ika ka älleäsochisi än Jises kapasen öüröür, kopwe “tongeni sü seni ekei mettoch meinisin lupwen repwe fisitä.”​—Luk 21:34-36.

Ren pwal ekkoch pworaus, nengeni ewe puk, Sile mi Emmwen Ngeni Manau Esemuch, a sopwun 11, “Ikkeei Ekkewe Ranin Le Sopwoloon.”

[Footnote]