“Kraist a . . . likiti ngenikemi eu lenien apirü, pwe oupwe tapwela mürin lon ipwan.”​—1 PET. 2:21.

1. (a) Met wisen Nöün Kot we lon ewe angangen föratä mettoch meinisin? (b) Met meefien Jises ussun aramas?

 ATUN Kot a föratä läng me fönüfan, a nom ren nöün we mwänichi, “eman sousile angang.” Kot me Nöün we ra pwal angangfengen lupwen Jiowa a anapanapa me föratä chommong sokkopaten man me irä le ammolnatä ewe Paratis fän iten aramas mi fför lon napanapan. Nöün Kot we, ewe a iteni Jises mwirin an a feitiu me läng, a fokkun tongei me “pwapwa ren ekewe aramasen fanüfan.”​—SalF. 8:27-31; Ken. 1:26, 27.

2. (a) Met Jiowa a awora ngeni aramas rese unusöch? (b) Paipel a awora kapasen emmwen fän iten iö kewe?

² Mwirin än Atam me If tipis, Jiowa a akkota pwe epwe angasalo aramas mi tipis ren an awora än Kraist möön kepich. (Rom 5:8) Pwal eü, Jiowa a awora an we Kapas, ewe Paipel, pwe epwe emmweni aramas rese unusöch pwe repwe sopwöch. (Kölf. 119:105) Lon an we Kapas, Jiowa a awora kapasen emmwen fän iten feiöchün me pwapwaan ekkewe famili. Ren pwüpwülü, ewe puken Keneses a apasa pwe ewe mwän epwe “pache ngeni  pwülüan, nge ekewe ruoman repwe wiliti eu chök inis.”​—Ken. 2:24.

3. (a) Met Jises a apasa ussun pwüpwülü? (b) Met sipwe käeö lon ei lesen?

³ Jises a afalafal pwe itä ürürün, aramas repwe pwüpwülü tori mälo. A awora emmwen mi älisi chon ekkewe famili pwe resap eäni ekiek me föfför mi tongeni aingaüa ar pwüpwülü are atai pwapwaan ar famili. (Mt. 5:27-37; 7:12) Lon ei lesen, sipwe käeö ifa ussun ewe leenien äppirü Jises a isetiu ren an kapas me föfför epwe älisi mwän pwüpwülü, fin pwüpwülü, sam me in, me semirit pwe repwe pwapwa me manauöch.

Ifa Ussun Emön Mwän Pwüpwülü Epwe Asamolu Pwülüwan

4. Ifa ussun wisen Jises me wisen mwän pwüpwülü ra löllöfengen?

⁴ Kot a awisa ngeni ewe mwän pwüpwülü pwe epwe möküren ewe famili, ussun chök Jises möküren ewe mwichefel. Ewe chon künö Paul a apasa: “Pun eman mwän möküren pwülüan usun Kraist möküren mwichefel. Kraist ewe Chon Amanauen mwichefel, nge mwichefel iei inisin Kraist. Ämi mwän kana oupwe echeni pwülüemi usun Kraist a echeni mwichefel o fangala manauan fän itan.” (Ef. 5:23, 25) Lon ar föfför ngeni pwülüwer kewe, ekkewe mwän Chon Kraist repwe äppirü napanapen än Jises föfför ngeni nöün kewe chon käeö. Iei sipwele ekieki ifa ussun Jises a äeä an tufichin nemenem seni Kot.

5. Ifa ussun Jises a anganga an nemenem woon nöün kewe chon käeö?

⁵ Jises a “lukpwetete o tipetekison.” (Mt. 11:29) Ese akkachopwa le föri angang mi lamot. A pwisin akkapwönüetä wisan kewe. (Mark 6:34; Jon 2:14-17) Fän kirekiröch, a akkawora fön ngeni nöün kewe chon käeö. (Mt. 20:21-28; Mark 9:33-37; Luk 22:24-27) Iwe nge, ese esiiter are äsäüer, ese pwal ämmeef ngeniir pwe ese tonger are rese tufichin föri minne a äiti ngeniir. A pwäri an pwapwaitiir, me a achchüngüür pwe repwe föri minne mi pwüng. (Luk 10:17-21) Ina popun nöün kewe chon käeö ra süföliti Jises pun a pwäratä tong me kirekiröch ngeniir!

6. (a) Met mwän pwüpwülü ra tongeni käeö seni napanapen än Jises föfför ngeni nöün kewe chon käeö? (b) Met Piter a pesei mwän pwüpwülü ar repwe föri?

⁶ Jises a äiti ngeni mwän pwüpwülü Chon Kraist pwe resap nemenemengaü, nge repwe süföliti me pennükü mocheniir kewe fän iten pwülüwer. Ewe aposel Piter a peseer ar repwe äkkäppirü napanapen Jises kewe ren ar “nonnom ngeni [pwülüwer kewe] fän mirit” me “asamolu ir.” (Älleani 1 Piter 3:7, TF.) Iwe, ifa ussun emön mwän pwüpwülü epwe apwönüetä wisan me ren Kot, wisen möküren ewe famili, me pwal asamolu pwülüwan we?

7. Ifa ussun ewe mwän pwüpwülü epwe tongeni asamolu pwülüwan we? Äweweei.

⁷ Ewe mwän pwüpwülü a tongeni asamolu pwülüwan we ren an äfänni ekiekin me meefian me mwen an epwe filatä kokkotun  ewe famili. Äwewe chök, sipwe erä pwe a ekiekin amwökütü ewe famili ngeni pwal eü leeni, are siwili an angang, are säi, are akükkünalo ewe moni towu atun a lapolo osupwang. Pokiten ewe kefil epwe kküü unusen ewe famili, ewe mwän pwüpwülü epwe kirekiröch ika a äfänni ekiekin pwülüwan we, pun epwe älisi an epwe filiöch me emecheresi än pwülüwan tipeeü ngeni. (SalF. 15:22) Ekkewe mwän pwüpwülü mi asamolu pwülüwer kewe resap chök küna tong me süföl seni neminkewe, nge repwe pwal küna än Jiowa chen.​—Ef. 5:28, 29.

Ifa Ussun Emön Fin Pwüpwülü A Pwäratä Süföl ngeni Pwülüwan we

8. Pwata sisap äppirü If?

⁸ Ren an süföliti nemenem, Jises a isetiu eü leenien äppirü mi unusöch fän iten fin pwüpwülü Chon Kraist. A fokkun sokkolo ekiekin Jises seni ekiekin ewe äemönün fin pwüpwülü. Än If leenien äppirü ese fokkun pwüng. Kot a awisa ngeni möküran we pwe epwe akkawora pworaus ngeni. Iwe nge, If ese süföliti ena kokkot. Ese älleasochisi ewe pworaus seni Kot Atam a esile ngeni. (Ken. 2:16, 17; 3:3; 1 Kor. 11:3) Pwüngün pwe If a tupulo, nge ürürün, epwe akkomw tingor emmwen seni pwülüwan we me mwen an epwe lükü möngüngüün emönnewe mi itä ereni met “Kot a silei.” Iwe nge, a lamalam tekia le ereni pwülüwan we met epwe föri.​—Ken. 3:5, 6; 1 Tim. 2:14.

9. Ifa ewe leenien äppirü mi mürinnö Jises a isetiu ren an etekisona pwisin i?

⁹ Jises a fokkun sokkolo, a unusen anomu i fän nemenien Möküran we. Napanapen manauan a affata pwe “ese mo ekieki pwe ren an pochokun epwe ne anönnö pwisin i ngeni [Kot].” Iwe nge, a “pönuku mettoch meinisin, iwe, a angei napanapen emon chon angang.” (Fil. 2:5-7, Ewe Kapasen God) Ikenäi, Jises a eäni ena chök ekiek lon wisan we, wisen King. A tipetekison fän nemenien Seman we lon mettoch meinisin, me a peppeni nemenien Möküran we.​—Mt. 20:23; Jon 5:30; 1 Kor. 15:28.

10. Ifa ussun ewe fin pwüpwülü epwe tongeni peppeni nemenien pwülüwan we?

¹⁰ Fin pwüpwülü Chon Kraist ra äppirü Jises ren ar peppeni nemenien pwülüwer kewe. (Älleani 1 Piter 2:21; 3:1, 2.) Äwewe chök, sipwe erä pwe emön ät a tingorei inan we ika epwe mut ngeni an epwe föri och mettoch, nge itä ürürün epwe pwal angei mumutä seni seman we. Pokiten seman me inan resaamwo pworausfengen woon, epwe öch ika ewe in epwe eisini nöün we ät, “Ka fen tingorei Papa?” Ika ese mwo, ewe in epwe loom kapas ngeni ewe sam me mwen an epwe mutatä. Ewe fin pwüpwülü Chon Kraist esap änini are appölüwa pwülüwan we mwen mesen nöür kewe. Ika ese tipeeü ngeni pwülüwan we  woon och mettoch, epwe öch an epwe fos ngeni nge epwe chök iir.​—Ef. 6:4.

Än Jises Leenien Äppirü fän iten Sam me In

11. Ifa än Jises leenien äppirü ngeni sam me in?

¹¹ Inaamwo ika Jises ese pwüpwülü are nöünöü, nge an leenien äppirü a fokkun mürinnö fän iten ekkewe sam me in. Ifa ussun? Ren an kapas me föfför, a emiriti nöün kewe chon käeö fän tong me mosonottam. A eppii ngeniir ifa ussun repwe apwönüetä ewe wis a awisa ngeniir. (Luk 8:1) Ren napanapan me föfförün, Jises a äiti ngeniir pwe repwe pwal ina ussun lefiler.​—Älleani Jon 13:14-17.

12, 13. Met sam me in repwe fokkun föri pwe nöür kewe repwe süföliti Jiowa?

¹² Semirit ra kan nikäppirü semer kewe me iner, ese lifilifil ika a öch are ngaü. Iwe, ämi kana sam me in, pwisin eisinikemi: ‘Ifa ewe leenien äppirü sia isetiu ngeni nöüch kewe ika sia apöpöfengeni ükükün ewe fansoun sia kakkatol TV me ükükün ewe fansoun sia käeö Paipel me afalafal? Met ach famili a wesewesen akkomwa? Sia isetiu eü leenien äppirü mi mürinnö ren ach akkomwa fel mi enlet lon met sia filatä lon manauach?’ Än Kot allük epwe akkomw nom lon leluken sam me in ika repwe ämääriöchü nöür kewe pwe repwe niuokkusiti me süföliti Kot.​—Tut. 6:6.

¹³ Ika sam me in ra achocho le apwönüetä kapasen Paipel lon manauer iteiten rän, nöür kewe repwe küna. Iwe, repwe äfänni me eteneki alon semer kewe me iner. Iwe nge, ika ra küna pwe semer kewe me iner rese pwisin apwönüetä minne ra ereniir, eli ekkewe nau repwe meefi pwe ese kon lien lamot ekkewe kapasen emmwen lon Paipel. Ika ina, neman ekkewe nau repwe kkuf lupwen epwe toriir sossot.

14, 15. Met sam me in repwe älisi ngeni nöür kewe ar repwe aücheani? Ifa ussun repwe tongeni föri ena?

¹⁴ Sam me in Chon Kraist ra weweiti pwe resap chök awora tufichin nöür kewe lon pekin aion. Ina popun, ese fokkun pwüng ar repwe pesei nöür kewe pwe repwe chök achocho ngeni pisek me moni. (SalAf. 7:12) Jises a pesei nöün kewe chon käeö pwe repwe küttafichi loom än Kot mwu me an pwüng. (Mt. 6:33) Ina popun, sam me in repwe äppirü Jises ren ar achocho le fotukalong lon letipen nöür kewe ar mochen achocho le angang ngeni Kot.

¹⁵ Sam me in ra tongeni föri ena ren ar atufichi än nöür kewe repwe chiechi ngeni ekkewe pioneer, elter me pwülüwer kewe mi chuchchuuri ekkewe mwichefel, misineri, chon angang lon Bethel, me chon kaü leenien mwich seni ekkoch fönü. Chokkana ra tongeni mwasangasang le apworausa pworaus mi apwapwa ussun ar angang ngeni Jiowa. Ar pennükü pwisin mocheniir, eü leenien äppirü mi tongeni älisi noum kewe pwe repwe filiöch,  akkota met repwe achocho ngeni lon ar fel ngeni Kot, me käeö lon sukul met epwe atufichi manauer fän iten ar repwe äppirü chokkana lon ar kewe angang.

Ämi kana Semirit, Met Epwe Älisikemi le Äppirü Jises?

16. Ifa ussun Jises a asamolu seman me inan woon fönüfan me Seman we lon läng?

¹⁶ Ämi kana semirit, Jises a pwal isetiu remi eü leenien äppirü mi mürinnö. Jises a nom fän tümünüen Josef me Meri, me a älleasochisiir. (Älleani Luk 2:51.) A weweiti pwe Kot a awisa ngeniir ar repwe ämääriöchü inaamwo ika rese unusöch. Ina minne, Jises a asamoluur. (Tut. 5:16; Mt. 15:4) Atun a wattetä, fansoun meinisin a föri met Seman we lon läng a pwapwa ren. A wewe ngeni pwe epwe üppos fän sossot meinisin. (Mt. 4:1-10) Iwe, fän ekkoch, ämi kana nau, oupwe küna sossotun ämi ekiekin älleasolapa sememi kewe me inemi. Iwe, met epwe älisikemi le äppirü Jises?

17, 18. (a) Met sokkun sossot nöüch kewe ra kükküna lon sukul? (b) Met epwe tongeni älisi nöüch kewe ar repwe üppos fän sossot?

¹⁷ Neman, lap ngeni chienemi kewe chon sukul rese süföliti allükün Paipel. Eli, repwe asonakolo pwe kopwe fitiir le föri minne mi ingaü, me takiruk ika kesap fitiir. Chienom kewe chon sukul ra fen ngäruk pokiten kese mochen etiir? Ika ina, kopwe fet? Ka silei pwe ika kopwe kkuf me fitiir, kopwe alichippüngü semom kewe me inom me Jiowa. Met epwe fis ngonuk ika kopwe äppirü chienom kewe chon sukul? Eli ka fen akkota pwe kopwe achocho ngeni ekkoch angang, äwewe chök, pioneer, ministerial servant, afalafal lon eü leeni a osupwangen chon afalafal ie, are angang lon Bethel. Itä om fitipachei chienom kewe chon sukul epwe älisuk le tikeri met ka akkota?

¹⁸ Ämi kana semirit me säräfö lon ewe mwichefel, oua fen küna sossotun ämi lükü? Oua fet? Ekieki än Jises leenien äppirü. Ese fangetä fän sossot, nge a üppos fän iten minne mi pwüng. Ämi chechemeni ena epwe apöchökkülakemi pwe oupwe tongeni affata ngeni chienemi kewe chon sukul pwe ouse mochen fitiir lon ar kewe föfföringaü. Oupwe äppirü Jises le afota ekiekimi woon ämi äpilükülükün angang ngeni me älleasochisi Jiowa lon unusen ränin manauemi.​—Ipru 12:2.

Longolongun Pwapwaan Famili

19. Met epwe emmwen ngeni pwapwa enlet?

¹⁹ Jiowa Kot me Jises Kraist ra fokkun mochen aramas repwe feiöch. Inaamwo ika sise unusöch, nge sia tufichin küna pwapwa. (Ais. 48:17, 18; Mt. 5:3) Jises a äiti ngeni nöün kewe chon käeö kapasen fel mi enlet, ina longolongun pwapwaan famili, nge esap ina chök met a äiti ngeniir. A pwal äiti ngeniir met sokkun manau a mürinnö seni meinisin. Nge lap seni ena, a isetiu eü leenien äppirü ren napanapen manauan mi pwüng me miritin ekiekin. Ese lifilifil wisach lon famili, nge sia tongeni küna feiöch seni ach äkkäppirü Jises. Iwe, ämi kana mwän pwüpwülü, fin pwüpwülü, sam me in, me nau, oupwe äppirü Jises! Ach lechüni äitien Jises kewe me äkkäppirü manauan, ina longolongun pwapwaan famili.

Ifa Pölüwen Ekkeei Kapas Eis?

• Ifa ussun mwän pwüpwülü repwe apwönüetä wiser we, wisen möküren famili?

• Ifa ussun ewe fin pwüpwülü epwe tongeni äppirü Jises?

• Met sam me in repwe käeö seni napanapen än Jises föfför ngeni nöün kewe chon käeö?

• Met nöüch kewe repwe tongeni käkkäeö seni än Jises leenien äppirü?

[Ekkewe Kapas Eis fan Iten ewe Lesen]

[Sasing lon pekin taropwe 16]

Met emön mwän pwüpwülü mi tongei an famili epwe föri ika a wor och kefil mi kküü unusen ewe famili?

[Sasing lon pekin taropwe 17]

Lon menni fansoun emön fin pwüpwülü epwe tongeni pwäratä an peni nemenien möküran we?

[Sasing lon pekin taropwe 18]

Ekkewe nau ra kan äkkäppirü napanapöchün semer kewe me iner