“Ach Kot a ngenikem pwora pwe aipwe aiti ngenikemi ewe Pworausen Manau.”​—1 TES. 2:2.

1. Pwata a fokkun mürinnö ewe kapas allim ussun ewe Mwu?

 SIA pwapwa le rongorong pworaus allim! Iwe, iei ewe pworaus mi mürinnö seni meinisin, ewe kapas allim ussun än Kot we Mwu. A anükünükü ngenikich pwe epwe sopwolo riäfföü, semwen, metek, letipeta, me mälo. A suuki ewe al ngeni manau esemuch, affata än Kot kokkot, me äiti ngenikich ifa ussun sipwe tongeni ririöch ngeni Kot. Itä ürürün aramas meinisin repwe pwapwaiti ei pworaus Jises a äiti ngeniir. Iwe nge, mi alolilen pwe esap ina ussun.

2. Äweweei mwo alon Jises: “Üa feito ai üpwe atipefeseni aramas.”

² Jises a ereni nöün kewe chon käeö: “Ousap ekieki pwe üa feito pwe üpwe uwato kinamwe won fanüfan. Apwi, üsap feito pwe üpwe uwato kinamwe, pwe ketilas. Pun ngang üa feito ai üpwe atipefeseni aramas: Ekewe alüal repwe ü ngeni semer kewe, ekewe föpwül repwe ü ngeni iner kewe, pwülüen nöür alüal repwe ü ngeni inen pwülüer kewe, nge ekewe chon oputok repwe seni püsin chon om famili.” (Mt. 10:34-36) Lap ngeni aramas rese etiwa ewe kapas allim, nge ra pöpööni. Ekkoch ra oput chokkewe mi arongafeili ewe kapas allim, inaamwo ika iir chon ar famili.

3. Met a lamot fän iten ach sipwe apwönüetä wisach le afalafal?

³ Sia afalafala ekkewe chök pworaus mi  enlet Jises a afalafala, iwe, lupwen aramas ra rongorong, ra ussun chök ekkewe aramas lon ränin Jises we. Ina popun, sise mäirü. Iei alon Jises ngeni nöün kewe chon käeö: “Esap wor eman chon angang a lap seni an masta. Are ra ariaföüüei, repwe pwal ariaföüükemi.” (Jon 15:20) Lon chommong fönü, aramas rese eriäfföüükich, nge chommong ra oput are rese mochen etiwa ach afalafal. Ina pwata, a lamot sipwe apöchökkülatä ach lükü pwe sisap niuokkus nge sipwe pwora me likiitü lon ach angangen afalafala ewe kapas allim.​—Älleani 2 Piter 1:5-8.

4. Pwata a lamot ngeni Paul an epwe pwora le afalafal?

⁴ Neman, fän ekkoch ka meefi pwe a weires om fiffiti ewe angangen afalafal, are ka pireir le föri och sokkun angangen afalafal. Ika ina, esap chök en, nge a wor chienom kewe mi tuppwöl ra pwal meefi ina ussun. Äwewe chök, ewe aposel Paul, i emön mi pwora le afalafal, me a silefichi ewe enlet, nge fän ekkoch, ese mecheres ngeni an epwe afalafal. Iei alon ngeni ekkewe Chon Kraist lon Tesalonika: “Ämi oua silei pwe aia fen küna riaföü me itengau lon Filipai me mwen äm feito remi lon Tesalonika. Inamwo ika a wor chomong chon ü ngenikem, nge ach Kot a ngenikem pwora pwe aipwe aiti ngenikemi ewe Pworausen Manau mi feito seni i.” (1 Tes. 2:2) Lon Filipai, ekkewe sounfiu ra awata Paul me chienan we Sailas, otururelong lon imwen fötek, me anükü pecher lefilen irä mi chou. (Fof. 16:16-24) Nge ‘Kot a ngeni Paul me Sailas pwora’ pwe repwe sopwelo le afalafal. Ifa ussun sipwe ussun chök iir? Ren pölüwan, sipwe käeö met a atufichi nöün Kot kewe chon angang me loom ar repwe pwora le affata ewe enlet ussun Jiowa, me ifa ussun sipwe tongeni äkkäppirüür.

Ra Pwora Atun Ra Küna Koput

5. Pwata a lamot ngeni meinisin mi tuppwöl ngeni Jiowa ar repwe pwora?

⁵ Pwüngün pwe Jises Kraist, ewe leenien äppirü mi lapalap ren an pwora. Iwe nge, seni le poputään uruwoon aramas, a lamot ngeni meinisin mi tuppwöl ngeni Jiowa ar repwe pwora. Pwata? Mwirin än ekkewe popun aramas ü ngeni Jiowa lon Ichen, a oesini pwe epwe wor oput lefilen chokkewe mi angang ngeni Kot me chokkewe mi angang ngeni Setan. (Ken. 3:15) Oput a mwittir pwälo lupwen Epel, emön mi pwüng, a ninnilo ren pwiin we. Inok a pwal küna koput, nge i emön mi tuppwöl a manau me mwen ewe Noter. A oesini pwe Kot fitifengen me Nöün kewe chonläng mi fel repwe apwüngü ekkewe mi ngaü. (Juta 14, 15) Aramas ra oput ena pworaus, ra pwal oput Inok. Neman repwe nielo Inok ika Jiowa ese amwocha manauan. Inok a fokkun pwora!​—Ken. 5:21-24.

6. Pwata a lamot ngeni Moses pwora atun a fos ngeni Farao?

⁶ Ekieki ussun än Moses pwora atun a fos ngeni Farao, ätewe chon Isip ra ekieki pwe ese chök tupuni ekkewe kot, nge fen i emön kot, nöün ewe koten akkar itan Ra. Eli a fel ngeni pwisin liosun ussun chök ekkewe ekkoch Farao. Meinisin minne Farao a apasa a wiliti allük. Ese eöreni an epwe föri alon emön, nge a fokkun lamalam tekia, pöchökkül an nemenem, me tipeförea. Ina ewe sokkun mwän ewe chon mäsen siip mi tipetekison, Moses, a chuchchuuri nge ese ketiw. Iwe, met Moses a oesini? Chommong riäfföü watte. Met a ereni Farao? Epwe mutatä fite million nöün kewe slave ar repwe towu seni fönüan. A lamot ngeni Moses pwora? Fokkun ewer!​—Num. 12:3; Ipru 11:27.

7, 8. (a) Met sokkun sossot a tori ekkewe chon lükü loom loom mwen fansoun Kraist? (b) Met a älisi chokkana ar repwe pwora le apöchökkülatä fel mi enlet?

⁷ Lon ekkewe fitepükü ier mwirin, ekkewe soufos me nöün Kot kewe chon angang ra pwora me nüküchar fän iten fel mi enlet. Än Setan otot a fokkun eriäfföür. Paul a apasa: “Ra mäla ren ar monei ngeniir fau, ren ar  ngerefeseni inisiir, pwal ar niirela ren ketilas. Ra fetalfeil fän üfer seni ünüchen sip ika kuuch, ra mwelele, aramas ra ariaföüür o aweiresiir.” (Ipru 11:37) Met a älisi ekkena chon angangen Kot ar repwe nüküchar? Fitu wokisin me mwan, Paul a affata met a atufichi Epel, Eperiam, Sara, me iö kana ar repwe likiitü. A apasa: “Rese mo angei feiochun ekkewe pwon, nge [ren lükü] ra nengeni seni leenier mi touau, o ra [etiwer].” (Ipru 11:13, TF) Ese mwääl, ekkewe soufos ussun choweän Ilaisö, Jeremaia, me ekkewe ekkoch chon lükü mi manau mwen Kraist ra pwora me likiitü fän iten fel mi enlet ren ar afota ekiekiir woon pwönütään än Jiowa kewe pwon.​—Tait. 1:2.

⁸ Ekkena chon lükü loom loom ra äpilükülükü ekkewe feiöch repwe küna lon fansoun epwe feito. Lupwen repwe manausefäl, repwe unusöchülo me “ngasala seni ar ngauala me tala” ren angangen Jises Kraist, ewe Samolfel mi Lapalap, me ekkewe 144,000 mi kepit repwe eti i lon ewe wis samolfel. (Rom 8:21) Pwal eü, Jeremaia me ekkewe ekkoch chon lükü loom ra pwora pun Jiowa a alükülükü ngeniir minne a pwonei ngeni Jeremaia: “Repwe maun ngonuk, nge resap tongeni akufuk, pun ngang üa etuk pwe üpwe tümwünük. Ngang ewe Samol mi Lapalap üa kapas.” (Jer. 1:19) Ikenäi, sia pöchökkületä atun sia ekkekieki ussun än Kot kewe pwon fän iten mwachkkan me an anükünükü ngenikich an tümün seni met a tongeni aingaüa ach chiechi ngeni.​—SalF. 2:7; älleani 2 Korint 4:17, 18.

Tong A Amwökütü Jises pwe Epwe Pwora le Afalafal

9, 10. Ifa ussun Jises a pwäratä pwora mwen mesen (a) ekkewe nouwisen lamalam, (b) eü mwichen sounfiu, (c) ewe samolfel mi lap, (d) Pilatus?

⁹ Ach we pisekin nengeni, Jises, a pwäratä an pwora lon sokkopaten napanap. Äwewe chök, inaamwo ika ekkewe meilap me sou nemenem ra oput Jises, nge I ese ekisikisaalo manamanen ekkewe pworaus Kot a mochen aramas repwe silei. Ese niuokkus an epwe affata likotuputupun ekkewe nouwisen lamalam me ar kewe afalafal chofona. Jises a fokkun affata ngeniir pwe repwe küna kapwüng. Fän eü, iei alon ngeniir: “Feiengauemi, ämi Sensen Allük me Farisi! Ämi chon likatuputup! Oua usun chök ekewe peias mi peinitipwech ra lingöch me lükün, nge lon ra ur ren chün aramas me machen somä. Iei usun pwal ämi: Oua pwä ngeni aramas lon lapalapen aramas mi pwüng, nge lon letipemi oua ur ren likatuputup me tipis.”​—Mt. 23:27, 28.

¹⁰ Jises a pwora le affata pwe I ätewe ekkewe sounfiu ra kütta lon ewe mälämälen Ketsemeni. (Jon 18:3-8) Mwirin ra etekinalo Jises lon ewe imwen kapwüng, iwe, ewe samolfel mi lap a kapas eis ngeni. Inaamwo ika Jises a silei pwe ewe samolfel mi lap a kütta popun ar repwe nielo i, nge Jises a pwora le affata pwe I ewe Kraist, Nöün Kot we. A pwal affata pwe repwe küna an epwe “mot lepelifichin ewe mi Unusen Manaman, epwe feito won ekewe kuchun läng.” (Mark 14:53, 57-65) Ekiselo mwirin, ra föti Jises me etekinalo mwen mesen Pilatus, ewe mi tongeni omusalo. Nge Jises a chök fanafanelo, nge ese  pölüweni ar kewe tipimwääl. (Mark 15:1-5) A lamot epwe pwora fän ekkena sossot meinisin.

11. Ifa ussun pwora me tong ra ririfengen?

¹¹ Iwe nge, Jises a fos ngeni Pilatus, a ereni: “Popun ai uputiu o tolong lon ei fanüfan, pwe üpwe pwärätä mine a let.” (Jon 18:37) Jiowa a awisa ngeni Jises an epwe afalafala ewe kapas allim, iwe, Jises a pwapwa le föri ena pun a tongei Seman we lon läng. (Luk 4:18, 19) Jises a pwal tongei aramas. A silei pwe nonnomun manauer a weires. Ach akkafalafal fän pwora a alongolong woon ach tongei Kot me chon oruch kewe.​—Mt. 22:36-40.

Ngün mi Fel A Apöchökkülakich pwe Sipwe Pwora le Afalafal

12. Met a efisi pwapwaan ekkewe popun chon käeö?

¹² Lon ekkewe wiik mwirin mäloon Jises, ekkewe chon käeö ra pwapwa pwe Jiowa a pwal apacha ngeniir ekkoch minefö chon käeö. Mwa met, lon chök eü rän, ra papataiselo 3,000 chon Jus me chon ekis mi fiti lamalamen Jus seni chommong fönü nge ra nom lon Jerusalem pwe repwe fiti ewe ränin Pentikos! Eli, a chöüfetäl ena pworaus lon Jerusalem. Ewe Paipel a apasa: “Iwe, iteiter meinisin ra niuokus, o ekkewe chon kuno ra fori chommong sokkun minen amwarar me esisin.”​—Fof. 2:41, 43.

13. Pwata ekkewe chon Kraist ra iotek fän iten pwora, me ifa mwiriloon?

¹³ Ekkewe nöüwisen lamalam ra fokkun song, iwe, ra aresini Piter me Jon me ereniir pwe resap fos ussun Jises. Atun Piter me Jon ra musowu, ra esile ngeni chiechier kewe met a fis. Meinisin ra iotek ussun ar kewe sossot, iwe, ra tingor: “Äm Samol [Jiowa], . . . atufichi noumw kei chon angang pwe repwe afalafala om kapas fän pwora.” Ifa mwiriloon? “Ir meinisin ra urela ren Ngünmifel o ra popuetä le asilefeili än Kot kapas fän pwora.”​—Fof. 4:24-31.

14. Ifa ussun ewe ngün mi fel a äkkälisikich lon ach we angangen afalafal?

¹⁴ Nengeni pwe än Jiowa we ngün mi fel mi pöchökkül a älisi ekkewe chon käeö pwe repwe apasa än Kot kapas fän pwora. Pworaach le kapas ussun ewe enlet ngeni aramas, pwal mwo nge chokkewe mi ü ngeni ewe kapas allim, ese alongolong wooch nge woon Jiowa. I a tongeni ngenikich an we ngün mi fel ika sia tingorei. Ren än Jiowa älillis, sia pwal tongeni pwora fän iten sipwe likitü fän sossot ese lifilifil.​—Älleani Kölfel 138:3.

Chon Kraist Ikenäi Ra Afalafal Fän Pwora

15. Ifa ussun ewe enlet a äimufeseni aramas ikenäi?

¹⁵ Lon ach ei fansoun, ussun chök me loom, a sopwosopwolo än ewe enlet äimufeseni aramas. Ekkoch ra etiwa, nge ekkoch rese weweiti are süföliti napanapen ach fel. Ekkoch ra esiitakich, turunufasekich, are fen oputakich, ussun Jises a fen oesini. (Mt. 10:22) Fän ekkoch, ekkewe minen apworausa pworausen fönüfan ra achöüfetälei pworaus ese pwüng ussuch are ra eitengaüakich. (Kölf. 109:1-3) Iwe nge, nöün Jiowa kewe aramas ra pwora le esilefeili ewe kapas allim woon unusen fönüfan.

16. Ifa ewe pworaus a änneta pwe pwora a tongeni siwili ekiekin chokkewe sia afalafaler?

¹⁶ Eli ach pwora epwe efisi än aramas siwili ekiekiir ussun pworausen ewe Mwu. Emön sister lon Kyrgyzstan a apworausa pwe “Atun ua lo afalafal, emön chon imw a ereniei: ‘Ngang ua lükü Kot nge use lükü ewe Kot ekkewe lamalamen Kraist ra fel ngeni. Ika kopwe liwinsefälito ngeni ei ttit, upwe echiichi ngonuk nei ei konak pwe epwe kuuk!’ Lükünüppen a wor emön watteen konak mi föfö. Iwe nge, atun anöünöün ewe Kingdom News Nampa 37, ‘Sopwoloon Lamalam Chofona A Arapoto!,’ ua filatä ai upwe liwiniti ewe chök imw, nge ua äneänei pwe usap chuuri ewe mwän pwe emön chon an we famili. Iwe nge,  pwal ewe chök mwän a suuki ewe asam. Ua mwittir iotek ngeni Jiowa, iwe mwirin, ua apasa ngeni ewe mwän: ‘Rän allim, ua chechemeni ach pworausfengen ülüngät rän a lo, me ua pwal chechemeni noum we konak. Nge ua chök mochen wato noum ei taropwe, pun ua chök ussum, ua pwal lükü ewe emön chök Kot mi enlet, nge use lükü met chommong lamalam ra eäni afalafal ussun Kot. Arapakkan chök, Kot epwele apwüngü ekkewe lamalam mi süfölüngaüeiti i. Ka tongeni älleani ei taropwe pwe kopwe alapalo om silei ena pworaus.’ Iwe, ua fokkun mäirü pwe ewe mwän a nöüni ewe taropwe. Iwe, ua lo ngeni pwal eü imw. Fitu minich mwirin, ewe mwän a cheei fän ewe taropwe. A erä, ‘Ua älleani. Met upwe föri pwe Kot esap songeitiei?’” A poputä än ewe mwän käeö me fiffiti än Chon Kraist kewe mwich.

17. Ifa ussun pworaan emön sister a apöchökkülatä nöün we chon käeö mi niuokkus?

¹⁷ Pworaach a tongeni achchüngü ekkewe ekkoch pwe repwe pwal pwora. Atun emön fin Kraist lon Rusia a fiti pas, a sotun anöünöü eü puk ngeni emön fefin mi pwal fiti ewe pas. Iwe, emön mwän a mweteri ewe puk seni ewe chon afalafal, kunumi, me monetiw. A okkouna ewe sister, eisini an address, me öüröüra pwe esap fokkun afalafal lon sopwun we. Ewe sister a iotek ngeni Jiowa ren an älillis me a chemeni alon Jises, a erä: “Ousap niuokusiti ätekewe mi niela inis.” (Mt. 10:28) Fän mosonoson, a ütä me apasa ngeni ewe mwän, “Usap eronuk ai address, me upwe sopwelo le afalafal lon ei sopw.” Iwe, a tötiw me woon ewe pas. Ewe sister ese silei pwe emön nöün chon käeö a pwal fiti ewe pas. Neminnewe ese fiffiti än chon Kraist kewe mwich pokiten an niuokkusiti aramas. Iwe nge, mwirin an a küna pworaan ewe sister, ewe chon käeö a filatä pwe epwe poputä le fiffiti mwich.

18. Met epwe älisuk pwe kopwe pwora le afalafal, ussun chök Jises?

¹⁸ Lon ei otot mi towau seni Kot, sipwe pwora le afalafal ussun chök Jises. Met epwe älisuk le föri ena? Afota ekiekum ngeni mwachkkan. Tümünü pöchökkülen om tongei Kot me aramas. Tittingorei Jiowa pwe epwe apworok. Chechemeni pwe kese chök äläemön, pun Jises a nonnom reom. (Mt. 28:20) Ngün mi fel epwe apöchökkülok. Jiowa epwe efeiöchuk me älisuk. Ina popun, sipwe pwora me apasa: “Ewe Samol i ai Soualilis, üsap fokun niuokus, met aramas repwe tongeni föri ngeniei?”​—Ipru 13:6.

Ifa Ussun Kopwe Pölüweni?

• Pwata a lamot nöün Kot kewe chon angang repwe pwora?

• Ren pwora, met sia käeö seni . . .

ekkewe chon lükü mi manau mwen fansoun Kraist?

Jises Kraist?

ekkewe popun Chon Kraist?

chienach kewe Chon Kraist ikenäi?

[Kapas Eis fán Iten ewe Lesen]

[Sasing lón pekin taropwe 29]

Jises a pwora le pwäratä mwäälin ekkewe nöüwisen lamalam

[Sasing lón pekin taropwe 31]

Jiowa a älisikich pwe sipwe pwora le afalafal