Ika ka fokkun osupwangen älillis nge esor emön mi wesewesen weweiti om kewe osukosuk, ka kan meefi pwe ka chök äläemön? Are, inaamwo ika ekkoch ra silei om kewe weires, nge ka chök meefi pwe rese wesewesen äfännuk.

IKA a piitä ekkewe osukosuk lon manauach, a ussun itä eü mölümöl a fis nge esap tongeni kaülo. Fan ekkoch sia pwal ekieki pwe met sia kükküna lon manauach a fokkun ngaü me weires nge sise tongeni engilo ngeni. A ina ussun meefiach ika sia weires ren tatakkisin letipach, letipechou, och feiengaü mi apwangapwangaalo inisich, samau fansoun langattam, are pwal ekkoch ussun chök ekkeei. Eli sia meefi pwe ese ki rech ekkewe osukosuk mi watte me sia äpilükülüküngaü pun sise silei ia sipwe küna aurur me ia. Nge met, mi wor emön mi wesewesen tongekich?

Ewe “Koten Sokkun Aururu Meinisin” mi Tongekich

Ewe Paipel a äweweei pwe Kot “I mi Semen umoumoch, o Koten sokkun aururu meinisin.” (2 Korint 1:3, TF) Ach we Kot Jiowa a silei pwe sia osupwang ren aurur. Ewe kapas ‘aurur’ a fen mak lon Paipel fän fitepükü lon sokkopaten napanap. Ren ei, a affata ngenikich pwe Jiowa ese chök weweiti ach kewe riäfföü nge a pwal fokkun mochen aururukich. A alükülüküükich pwe inaamwo ika ese wor emön a silei me weweiti nonnomuch are ach riäfföü, nge Jiowa mi fen küna.

Ewe Paipel a affata pwe Jiowa a tongei emön me emön leich. Iei alon: “Ewe Samol mi Lapalap a küna mine a fis ekis meinisin, a ouwasacha ekewe chon föföringau me chon pwüng.” (Än Salomon Fos 15:3) A pwal ina ussun met Hiop 34:21 a apasa: “Mesen Kot a afota alen ekewe aramas, a nengeni feffetälin pecher.” Jiowa a küna föfförüch meinisin, mi öch are ngaü me a sile nonnomuch, ina minne a tongeni föri met a ekieki pwe a fich ngenikich. Ewe soufos Hanani a affata ei mettoch lupwen a fos ngeni Asa, ewe Kingen Juta: “Ewe Samol mi Lapalap a nenengeni unusen fanüfan, pwe epwe apöchöküla chokewe mi fang ngeni unusen letiper.”​—2 Kronika 16:7, 9.

Mei pwal wor eü popun Jiowa a tüttümünükich. Jises a äweweei: “Esap wor eman a tongeni feito rei are ewe Sam mi tinieito esap panato rei.” (Jon 6:44) Jiowa a afaani aramas ren an ätittina letipan ika a mochen arap ngeni. Ika ina, Jiowa epwe emmwenato ren eü napanap mi amwarar. Ren chök äwewe, lon Dominican Republic, emön fefin a lüing pwe epwe reirei ren an semwenin kanser. A siö ngeni Kot pwe epwe älisi i le küna ewe lamalam mi enlet. Lon chök ena atun, pwülüwan we a wato eü puk itelapan Met Kot A Kutta Senikich? a a angei seni emön Chon Pwäratä Jiowa a chuuri i lon imwan we lon ena sossorün. Ewe fefin a älleani ewe puk, iwe a küna pwe iei pölüwen an we iotek ngeni Kot. A käeö Paipel ren Chon Pwäratä, me kis seni wonu maram, a fangolo manauan ngeni Kot me papatais.

 Lon ewe puken Kölfel, epwe chüng letipach ika sia älleani meefien ekkewe sou makkeei köl fel ussun chök King Tafit. Pun ra äweweei ussun än Jiowa tüttümünü nöün kewe chon angang fän tong. Lon Kölfel 56:8, King Tafit a tingor ngeni Jiowa: “Kopwe osupwalong chönün mesei lon om rume. Ifa usun, kosap aleaniir?” Ren ei kapas äwewe, Tafit a weweiti pwe Jiowa ese chök küna ekkewe osukosuk a tori nge a pwal silei riäfföün letipan. Jiowa a küna weiresin Tafit me chechchemeni pwe a fen nom fän ewe sokkun riäfföün letip mi efisatä an kechiu. Ewer, ewe Chon Förikich a tüttümünü meinisin mi achocho le föri letipan me “chokewe mi fang ngeni unusen letiper.”

Kölfel 23 a pwal äweweei än Kot tong. Ewe kapasen le poputään a affata pwe Kot a ussun emön chon masen siip mi tong: “Ewe Samol mi Lapalap ai chon mas, üsap osupwang ren och mettoch.” Lon ekkewe fönü ia ewe Paipel a mak ie, emön chon masen siip a tüttümünü me eita emön me emön nöün kewe siip. Iteiten rän a pwäratä an tonger, ren an kökköri emön me emön leir me totofi inisin me nengenifichi ika a wor feiengaüan. Ika a küna och, a epiti pwe epwe mwittir molo. Nge ika ewe sip a semwen, ewe chon mas epwe amwöchü awan me aünü säfei me ekietä pwe esap kokkoon pun ete mälo. A ifa me mürinnöön ei kapas äwewe mi aliosuetä ükükün än Jiowa tong ngeni ekkewe mi kökköri i.

Iotek me ewe Manausefäl, Pisekin Ännet Pwe Kot a Tongekich

Ekkeei köl mi mak asan me pwal ekkoch köl mi fel mi amwarar rese chök mak lon Paipel  pwe sipwe älleani me pwapwaiti. Nge, ra pwal äiti ngenikich ifa ussun nöün Jiowa kewe chon angang mi tuppwöl loom, ra uwawu masouen letiper me tingormaü än älillis, me pwäratä ar kilisou ren an emmweniir me efeiöchur. Ekkeei pworaus ra pwäratä pwe nöün Kot kewe chon angang loom ra lükülük pwe Kot a fokkun tonger. Ach äkkälleani me ekilonei ekkeei kapas mi feito seni letiper, epwe tongeni älisikich ach sipwe pwal lükü pwe Kot a tongekich. A ifa me watteen ewe pisekin pwäratä pwe Kot a tongekich, pun a mut ngenikich ach sipwe iotek ngeni.

Iwe nge fän ekkoch, pokiten sia choutiu ren ach kewe osukosuk, sise sile met sipwe apasa lon ach kewe iotek. Ren ei wewe a eppeti Jiowa pwe esap silei ach kewe weires? Rom 8:26 a pölüweni: “Ewe Ngünmifel epwe alisikich lon ach apwangapwang. Pun sisap silei mine sipwe eäni iotek, nge püsin Ngünmifel a tüngor ngeni Kot fän itach ren sokun ngüngü esap wor eman a tongeni apasatä lon kapas.” Ei wokisin a äiti ngenikich pwe iotekin nöün Jiowa kewe chon angang me loom mi mak lon Paipel ra pwal ussun chök meefiach kewe. Ina minne, Jiowa, ewe chon “aüselinga iotek” a pwal etiwa ekkena iotek ussun itä sia fen pwisin eäni ena iotek.​—Kölfel 65:2.

Ewe äpilükülükün manausefäl ina pwal ewe pisekin pwäratä pwe Kot mi tongei emön me emön leich. Jises Kraist a apasa: “Pun epwe war ewe fansoun lupwen ekewe sotup meinisin repwe rong mwelian [Jises] o towu seni peiaser.” (Jon 5:28, 29) Ewe itiitin kapas lon kapasen Krik a aföüni ‘peias’ mi wewe ngeni “peiasen ächechchem.” A äiti ngenikich pwe Kot a chechchemeni napanapen emön lupwen a manau.

Ekieki mwo pwe me mwen än Kot amanauatä emön, mi lamot an epwe silefichi ena emön, kapachelong mesemesan, unusen napanapan me masouen tupwuan meinisin! (Mark 10:27) Jiowa mi chök chechchemeni ena emön inaamwo ika a fen mälo fitu ngeröü ier loom. (Hiop 14:13-15; Luk 20:38) Ina minne ren ekkewe fite billion aramas ra fen mälo, Jiowa mi chök fokkun chechchemeniir, iei ewe pisekin ännet pwe Kot a tongei emön me emön leich!

Jiowa Ewe mi Efeiöchükich

Met sipwe föri ika sia mochen angei än Jiowa tong me tümün? Äkkäeüin, sipwe pwäratä ach lükülük woon me älleasochisi i. Ewe aposel Paul a äiti ngenikich ewe riri lefilen än emön epwe lükü me an pwapwaiti än Jiowa tong. A makkeei: “Esap wor eman a tongeni apwapwai Kot are esap wor an lükü. Pun iö a feito ren Kot epwe fokun lükü pwe mi wor Kot, nge epwe ngeni chokewe mi kütta i liwiniir.”​—Ipru 11:6.

Ekieki pwe ewe sokkun lükü a apwapwaai Kot a kapachelong ruu mettoch. Äeüin, sipwe “lükü pwe mi wor Kot,” weween pwe i wesewesen emön me ach we Sou Nemenem mi Tekia Seni Meinisin mi fich ngeni ach sipwe älleasochisi me fel ngeni. Oruuan, sipwe lükü pwe epwe “ngeni chokewe mi kütta i liwiniir.” Ewe lükü mi enlet a alükülükü pwe Kot a afaani nonnomun me efeiöchü chokkewe mi mochen föri letipan. Ren om käkkäeö ewe Kapasen Kot me chiechi ngeni chokkewe mi älleasochisi i, kopwe pwal eäni ewe sokkun lükü mi atufichuk om kopwe küna än Kot feiöch, tümün me tong.

Chommong aramas ikenäi ra lükü pwe Kot ese ekieki nonnomun manauen aramas. Nge sia fen küna pwe ewe Paipel a affata ngenikich pwe Kot a fokkun tongei chokkewe mi pwäratä ar enletin lükü i. Ina popun, inaamwo ika manauen aramas ikenäi a ur ren riäfföü, osukosuk, lichippüng me metek, nge sisap kon äpilükülüküngaü, pun Jiowa Kot mi fokkun tongekich. Ren enletin an tong, a etiwa kich ach sipwe kun ngeni me kütta an älillis. Iei alon ewe sou makkeei köl fel: “Kopwe monätä won ewe Samol mi Lapalap om weires, pwe i epwe tümwünuk. Esap fokun mwütätä pwe ewe chon pwüng epwe kuf.”​—Kölfel 55:22.

[Footnote]

[Pwoor/​Sasing lon pekin taropwe 21]

Ekkewe Wokisin mi Apöchökküla om Lükü pwe Kot a Tüttümünük fän Tong

“Pun ewe Samol mi Lapalap a nenengeni unusen fanüfan, pwe epwe apöchöküla chokewe mi fang ngeni unusen letiper.”​—2 KRONIKA 16:9

“Kopwe osupwalong chönün mesei lon om rume. Ifa usun, kosap aleaniir?”​—KÖLFEL 56:8

“Ewe Samol mi Lapalap ai chon mas, üsap osupwang ren och mettoch.”​—KÖLFEL 23:1

“Pun en ka aüselinga iotek. Aramas meinisin repwe feito reöm.”​—KÖLFEL 65:2

“En kopwe köriei, nge ngang üpwe pälüenuk. En kopwe positiei, ngang ätewe poum a föri.”​—HIOP 14:15

“Iö a feito ren Kot epwe fokun lükü pwe mi wor Kot, nge epwe ngeni chokewe mi kütta i liwiniir.”​—IPRU 11:6

“Kopwe monätä won ewe Samol mi Lapalap om weires, pwe i epwe tümwünuk. Esap fokun mwütätä pwe ewe chon pwüng epwe kuf.”​—KÖLFEL 55:22