“Me loom ua kan älleani ewe Paipel mwen ai upwe annut. Ua ällea pun ua silei pwe Paipel seni Kot inaamwo ika use kon pwapwaiti le älleani nge ua chök mochen silei kapasen Kot. Ua fen ekiekin älleani unusan. Le poputään a mecheres, nge mwirin ua tori ekkoch kinikin mi weires ngeniei, iwe ua kaülo le ällea.” Iei alon emön fefin itan Ninfa seni Italy.

KA FEN piin eäni ei sokkun osukosuk a tori Ninfa? Chommong ra fen küna ei sokkun osukosuk. Nge, sia fen silei lon ewe pworaus akkomw pwe Jiowa Kot, ewe Chon Awora Paipel, a mochen kopwe weweiti an Kapas. Nge ifa ussun kopwe weweiti? Äeüin, tingor än Kot älillis.

Nöün Jises kewe aposel ra sillelo pun iir “aramas kisikis” pokiten rese fiti sukulen lamalam. (Fofor 4:13, TF) Iwe nge, Jises a alükülükü ngeniir pwe iir mi tongeni weweiti Kapasen Kot. Ifa ussun? Jises a äweweei: “Nge ewe Soualilis, ewe Ngünmifel, Semei epwe tinato fän itei, epwe aiti ngenikemi ekei mettoch meinisin.” (Jon 14:26) Kot a äeä ewe ngün mi fel are an manaman le föratä ewe fönüfan me masouan kewe mi manau meinisin. (Keneses 1:2) A pwal äeä le amwökütü 40 mwän le makketiu an ekiek lon ewe Paipel. (2 Piter 1:20, 21) Pwal ina chök ussun, ewe ngün mi fel a kawor ngeni ekkewe mi mochen weweiti ewe Paipel.

Ifa ussun kopwe angei än Kot ngün mi fel? Kopwe tingor ren lükü. Ren enletin, epwe pwal lamot om kopwe tittingor iteitan. Iei alon Jises: “Oupwe tütüngor, iwe, oupwe angei . . . Oua silei ämi oupwe fang ngeni nöümi lifang mi mürina, epwe fen ifa me watten än Sememi lon läng fangela Ngünmifel ngeni chokewe mi tüngorei!” (Luk 11:9, 13) Jiowa epwe wesewesen fangolo ngün mi fel ngeni iir mi tingorei fiti letip wenechar. Än Kot manaman epwe tongeni älisuk om kopwe weweiti weween ekkewe kapas mi fen mak lon Paipel fitu ngeröü ier loom. Än Kot ngün mi fel epwe tongeni ngonuk tipatchem pwe kopwe apwönüetä alon Paipel mi manaman lon manauom.​—Ipru 4:12; Jemes 1:5, 6.

Iteitan kopwe motiu me älleani ewe Paipel, kopwe iotek ngeni Kot, tingorei än ngün mi fel pwe epwe älisuk le weweiti än Kapas.