Sia Tongeni Weweiti ewe Paipel?
“Iteiten Räninfel chon ai we famili ra kan älleani ewe Paipel. Nge use fokkun pwapwaiti. Ua lükü pwe ewe Paipel ina än Kot Kapas nge lap ngeni met ua älleani a mmen weires ngeniei ai upwe weweiti.”—Steven, Britain.
“Ua sotun le älleani ewe Paipel lupwen a 17 ieri, nge a mmen weires ai upwe weweiti. Iwe, ua chök fangetä.”—Valvanera, Spain.
“Ua älleani ewe Paipel fän eü pun ua meefi pwe ina wisei pokiten ngang emön Katolik. Ua äwesi le älleani lon ülüngät ier! Nge use fokkun weweiti met ua fen älleani.”—Jo-Anne, Australia.
SENI loom tori ikenäi, ewe Paipel ina eü puk mi chüen iteföülo seni puk meinisin woon unusen fönüfan. Chommong aramas ra mööni ewe Paipel lap seni ekkewe puk meinisin. Ewe Paipel mi kawor iei ngeni chommong aramas lon sokkopaten fos me lon fitu sokkun napanap lap seni me loom, äwewe chök lon kaset, CD me DVD. Nge, chommong me leir mi fen nöüni ewe Paipel a weires ar repwe weweiti. A pwal ina ussun meefiom?
Kot a Mochen ach Sipwe Weweiti An Kapas?
Iei alon ewe Paipel: “Kapasen lon ekewe Toropwe mi Pin meinisin ra pop seni Ngünün Kot.” (2 Timoti 3:16) Ewer, Jiowa Kot a ngenikich ewe Paipel. Nge ifa ussun, a mochen ach sipwe weweiti? Nge met, Kot a föri ewe Paipel pwe epwe weires ngeni aramas ar repwe weweiti chilon chök chokkewe mi fil ussun chök ekkewe nöüwisen lamalam me sou tipatchemen Paipel?
Ekieki mwo ekkeei ekkoch wokisin lon ewe Paipel:
“Pun ei allük üa allük ngenikemi ikenai esap kon förea ngenikemi, esap pwal toweires ngenikemi.”—Tuteronomi 30:11.
“Lupwen a suk ngenikem masouen om kewe kapas, a wor saram, a ngeni ekewe chon wewemang tipachem.”—Kölfel 119:130.
“Lon ewe chok klok, [Jises] a pwapwa ren Ngun mi Fel, o a apasa, Ua kilisou ngonuk, Semei, Samolun lang me fonufan, pwe ka amonalo ekkeei mettoch seni chon tipatchem me chon wewe, nge ka pwarirelo ngeni monukol.”—Luk 10:21, TF.
Ekkena wokisin ra ännetatä pwe Kot a fokkun mochen om kopwe weweiti an we Kapas! Iwe nge, mi wor chommong aramas mi letip wenechar ikenäi rese kon weweiti Paipel. Met epwe tongeni älisiir? Ekkewe pworaus mwirin ei repwe menlapei ülüngät kapasen pesepes mi älillisöch ngonuk le weweiti ewe Paipel.