SONIA a uputiw lon Spein. Seni le kükkünün a kan fiti inan we le lo ngeni ekkewe mwich, än Chon Pwäratä Jiowa. Nge lupwen a watte, a mwöküt ngeni London, England me a poputä le angang lon eü kompeni, a kan wisen älisi aramas le kütta alen an epwe wattelo manauan nöür moni.

Sonia a fokkun pwapwaiti an angang. A watte peioffun me a kan tümünü me anganga chommong moni, nöün ekkewe customer. A mmen ämmeseik me sopwöch manauan. Sonia a angang 18 awa iteiten rän me fän ekkoch a chök annut ükükün ruu ika ülüngät awa. An angang ina ewe nampa eü lon manauan. Nge mwittir chök, a fis watte siwil pun a stroke, eli pokiten a kon äweires, me eppekus manauan. I a chök 30 ierin lon ena atun.

A pelo epek inisin me ekkewe tokter rese silei ika epwe pwal chüen tongeni fos. Inan we a mwittir säi ngeni England an epwe tümünü. Lupwen Sonia a poputäsefäl le fetäl, inan we a ereni, “Upwe lo fiti ai mwich lon ewe Kingdom Hall, nge kopwe fitiei pun use tongeni likitukolo en chök lon ei imw.” Sonia a tipeeü ngeni. Nge met mwiriloon?

Sonia a apworausa, “Meinisin ekkewe afalafal ua rongorong usun itä mi enlet. A mmen amwarar. Ua pwapwa le etiwa ai upwe käeö ren emön lein ekkewe ra kapong ngeniei lupwen ua äkkäeüin fiti mwich. Chienei kewe me loom rese chüen ekketto chuuriei, nge chienei kewe minefö lon mwichefel ra tongeei me tümünüei.”

Lo, lo, lo, Sonia a tongeni fos sefäl. A mwittir feffeitä lon an käkkäeö Paipel me esaamwo tori eü ier, a papataiselo. Sonia a küna pwe chommong chienan kewe minefö, iir chon afalafal full time, ra fokkun pwapwa. A ekieki: “Ua pwal mochen usur. Ua mochen fang ngeni Jiowa ükükün ai tufich.” Iwe iei, Sonia a wiliti emön chon afalafal full time.

Met Sonia a käeö seni met a fis lon manauan? Iei alon: “Inaamwo ika a watte peiofui nge use pwapwa me iteitan ua lolilen pokiten weiresin me lükülüküngawen ai angang. Ua kerän mirititi pwe ai ririöch ngeni Jiowa, Semei lon läng, ina ewe mi lamot seni meinisin lon manauei. Iei, ua wesewesen pwapwa.”

Aposel Paul a makkeei: “Pun mochenian moni iei popun sokopaten ngau meinisin. Ekoch mi ekieki ar repwe pisekisek ra mwalech seni ar lükülük o ra püsin aworato wor chomong riaföü mi fokun aweires.” (1 Timoti 6:10) Sonia a wesewesen küna pwüngün enletin ei wokisin.