“Oupwe achocho le angang, nge ousap chipwang. Oupwe angang ngeni ewe Samol ren unusen letipemi.”​—ROM 12:11.

1. Pwata ekkewe chon Israel ra föri ekkewe asorun man me pwal ekkoch asor?

 JIOWA a aücheani ekkewe asor nöün kewe chon angang ra föri seni wenecharen letiper a pwäratä ar tong ngeni me älleasochisi letipan. Lon fansoun loom, a etiwa sokkopaten asorun man me pwal ekkoch asor. Chon Israel ra föri ekkeei me ren pwüngün ewe Allükün Moses pwe repwe küna omusomusen ar tipis me pwäratä ar kilisou. Lon ewe mwichefelin chon Kraist, Jiowa ese kütta senikich ach sipwe eäni ekkena sokkun asor. Iwe nge, lon nöün Paul we taropwe ngeni chon Kraist lon Rom lon sopwun 12, a äiti ngenikich pwe Kot a chüen kütta senikich ach sipwe eäni asor. Sipwe nengeni ifa usun.

Eü Asor mi Manau

2. Met sokkun manau ekkewe chon Kraist repwe eäni me met a kapachelong lon?

² Älleani Rom 12:1, 2. Le poputään nöün Paul we taropwe, a affata pwe ekkewe chon Kraist mi kepit, iir chon Jus are Jentail, ra küna pwüng mwen mesen Kot ren ar lükü nge esap ren ar föfför. (Rom 1:16; 3:20-24) Lon sopwun 12, Paul a äweweei pwe ekkewe chon Kraist repwe pwäratä ar kilisou ren ar eäni eü manau mi pennüküolo pwisin ar mochen. Ren ach föri ena, mi lamot sipwe siwili ach ekiek. Pokiten sise unusöch, sia nom fän nemenien “ewe allük mi afisätä tipis me mäla.” (Rom 8:2) Ina minne, mi lamot ‘letipach me ekiekich epwe fokkun söfösefäl,’ ren ach föri watte siwil lon pwisin letipach. (Ef. 4:23) Ena siwil mi unus a chök tongeni fis ren än Kot älillis me an ngün mi fel. A pwal lamot ach sipwe achocho le äeä ach tufichin ekiek. A wewe ngeni ach sipwe föri ükükün ach tufich pwe sisap “apirü pomwen fanüfan” ren pworoingawan, me ekkewe minen apwapwa mi ngaw me ekiek mi limengaw.​—Ef. 2:1-3.

3. Pwata sia föfföri än chon Kraist kewe angang?

³ Paul a pwal pesekich ach sipwe äeä ach tufichin ekiek pwe sipwe ännetatä ngeni pwisin kich “met mi mürina me unusöch, pwal met mi apwapwai i [Kot].” Pwata sia kan älleani Paipel iteiten rän, ekilonei met sia älleani, iotek, fiti mwich, me fiti ewe angangen afalafal? Pokiten chök än ekkewe elter pesekich ach sipwe föri? Pwüngün pwe sia kilisou ren än ekkewe elter minen ächchem ngenikich. Nge sia fiti än chon Kraist keei angang pokiten än Kot ngün mi fel a amwökütükich ach sipwe pwäratä ach tong mi alollool ngeni Jiowa. Pwal och, sia wesewesen lükü pwe ach apwönüetä an kewe angang, ina letipan. (Sek. 4:6; Ef. 5:10) A fokkun watte ach pwapwa me menemenöch ren ach mirititi pwe ren ach manaueni manauen chon Kraist mi enlet, Kot epwe pwapwa rech.

Sokkopaten Tufich

4, 5. Ifa usun ekkewe elter chon Kraist ra äeä ar kewe tufich?

⁴ Älleani Rom 12:6-8, 11. Paul a äweweei pwe a wor rech “ekewe sokopaten tufich Kot a lifang ngenikich lon aükükün an ümöümöch.” Ekkoch me lein ekkewe tufich Paul a menlapei, ewe tufichin apöchökkül me emmwen, ra äkkäeüin weneiti ekkewe chon Kraist elter, iir kewe repwe “achocho le angang” lon wiser le awora emmwen.

⁵ Me ren Paul, ekkewe sou emmwen repwe pwal achocho lupwen ra eäni wiser kewe chon asukul me chon “angang lon mwichefel,” ewe  Paul a eita ngeni “eu chök inis.” (Rom 12:4, 5) Ena angang a usun chök met ekkewe aposel ra apasa lon Fofor 6:4, TF: “Nge am aupwe pwisin achocho le iotek, o pwal lon am angang ren ewe kapas.” Met a kapachelong lon ena sokkun angang? Ekkewe elter chon Kraist ra äeä tufichiir le apöchökkülatä chon ewe mwichefel. Ra pwäratä pwe ra apwönüetä ei “angang” lupwen ra tinikken le awora emmwen me käit ngeni ewe mwichefel seni än Kot Kapas ren ar kütta än Jiowa emmwen ren iotek mwen repwe käeö, küttafichi pworaus, asukula chon ewe mwichefel me apöchökküla ekkewe ekkoch. Ekkewe elter ra achocho le äeä tufichir kewe le tümünü ekkewe siip ‘fän pwapwan letiper.’​—Rom 12:7, 8; 1 Pit. 5:1-3.

6. Ifa usun sipwe apwönüetä ewe kapasen emmwen lon Rom 12:11, ewe menlapen wokisin lon ei lesen?

⁶ Paul a pwal apasa: “Oupwe achocho le angang nge ousap chipwang. Oupwe angang ngeni ewe Samol ren unusen letipemi.” Ika sia meefi pwe sia uwopwangapwang lon ach angang, eli mi lamot sipwe siwili ach kokkotun käeö me alapalo ach ikkiotek me tittingor än Jiowa ngün mi fel mi tongeni älisikich le fiu ngeni tenechepwäk me sia tongeni achochosefäl. (Luk 11:9, 13; Pwar. 2:4; 3:14, 15, 19) Ewe ngün mi fel a apöchökküla ekkewe chon Kraist loom ar repwe apworausa “usun ekewe mettoch mi amwarar Kot a föri.” (Fof. 2:4, 11) Pwal ina chök usun, a tongeni amwökütükich ach sipwe tinikken me “achocho le angang.”

Tipetekison me Ekiek Tekison

7. Pwata sipwe angang ngeni Kot fän tipetekison me ekiek tekison?

⁷ Älleani Rom 12:3, 16. Ekkewe tufich sia eäni a nom rech “pokiten än Kot lifangen ümöümöch.” Paul a pwal erä: “Äm lipwäköch a pop seni Kot.” (2 Kor. 3:5) Ina minne, sisap pwisin elingakichelo. Sipwe tipetekison le mirititi pwe sopwöchün ach angang a feito seni Kot nge esap seni pwisin ach lipwäköch. (1 Kor. 3:6, 7) Ei mettoch a tipeeü ngeni alon Paul ei: “Üpwe ürenikemi meinisin: Ousap ekiekin tipetekia seni mine a fichitikemi.” A pwal lamot ach sipwe meefi pwe kich mi aüchea me küna pwapwa me menemenöch lon ach angang ngeni Kot. Iwe nge, ach silei pwe ach tufich mi aükük epwe tümünükich pwe sisap pöchöü woon pwisin meefiach. Nge, sia mochen ‘tipetekison lon ach ekiek.’

8. Ifa usun sipwe tümünü seni ach ‘ekieki pwe sia tipatchem’ seni ekkewe ekkoch?

⁸ Ach einga sopwöchün ach angang ina eü föfförün tiparoch, pun “Kot echök ewe mi aüchea, pun a amärätä.” (1 Kor. 3:7) Paul a erä pwe Kot a liffang ngeni emön me emön chon ewe mwichefel “ewe aükükün lükülük.” Sisap ekieki pwe sia lap, nge sipwe fen alamota föfförün ekkewe ekkoch me ren ewe aükükün lükülük mi nom rer. Paul a pwal apasa: “Oupwe tipeeüfengen lefilemi.” Lon nöün we pwal echö taropwe, Paul a erä: “Ousap föri föförün apangau are föri och ekiekin sikesik, nge oupwe tipetekisonfengen lefilemi, ousap ekieki pwe oua mürina seni ekewe ekoch.” (Fil. 2:3) A lamot tipetekison mi enlet me achocho le mirititi pwe emön me emön pwiich kewe ra mürinnö lap seni kich lon och napanap. Tipetekison epwe pwal tümünükich pwe sisap ‘ekieki pwe sia tipatchem’ seni ekkewe ekkoch. Eli än ekkoch wiseni ekkewe wis mi kkolo aüchean epwe efisi än aramas ingeitiir, nge kich meinisin sipwe küna pwapwa mi alölöön lon ach “föri angang mi tekisosson,” ekkewe sokkun angang aramas rese kan äfänni.​—1 Pit. 5:5.

Tipeeüfengen lon ewe Mwichefel

9. Pwata Paul a alöllöi ekkewe chon Kraist mi kepit ngeni ekkewe kifetin inis?

⁹ Älleani Rom 12:4, 5, 9, 10. Paul a alöllöfengeni ekkewe chon Kraist mi kepit ngeni kifetin eü inis mi tipeeüfengen lon ar angang fän emmwenien Mökürer we, Kraist. (Kol. 1:18) A ächema ngeni ekkewe chon Kraist mi kepit pwe ewe inis a chommong kifetin nge mi sokkopat ar angang, me ‘inamwo ika iir chomong sokun aramas, nge ra eu chök inis lon Kraist.’ Pwal och, Paul a pesei ekkewe mi kepit lon Efisus:  “Fän tong sipwe fokun mämäritä lon mettoch meinisin ngeni Kraist, i ewe möküren mwichefel. Fän an nemenem ekewe sokopaten kifetin ewe inis meinisin ra masfengen, nge unusen ewe inis a kochufengen ren ekewe kirupun lekupukup meinisin mi wor ren. Iei usun lupwen eu me eu kewe kifetin inis a föri wisan, unusen ewe inis epwe mämäritä o püsin pöchökületä ren tong.”​—Ef. 4:15, 16.

10. Ekkewe “ekkoch siip” repwe nom fän nemenien iö?

¹⁰ Inaamwo ika ekkewe “ekkoch siip” esap iir kifetin ewe inisin Kraist, nge ra tongeni käeö chommong mettoch seni ei kapas äwewe. (Jon 10:16, TF) Paul a apasa pwe Jiowa “a anomu mettoch meinisin fän nemenien Kraist. A awisa i pwe epwe möküren mwichefel o nemeni mettoch meinisin.” (Ef. 1:22) Ikenäi ekkewe ekkoch siip iir kinikinin ekkewe “mettoch meinisin” Jiowa a anomu fän tümünün Nöün we. Pwal iir ra kapachelong lein “mettochun meinisin” ekkewe Jises a awisa ngeni “ewe chon angang mi allükülük o tipachem.” (Mt. 24:45-47) Mi lamot pwe ekkewe ra äpilükülükün manau woon fönüfan repwe mirititi pwe mökürer Kraist, me repwe älleasochisi ewe chon angang mi allükülük o tipachem me an we Mwichen Sou Pwüngüpwüng me ekkewe mwän ra seikitä ar repwe wisen emmweni ewe mwichefel. (Ipru 13:7, 17) Ei mettoch epwe älisatä ewe tipeeüfengen lon ewe mwichefel.

11. Ach tipeeüfengen a longolong woon met me pwal ifa ewe eü kapasen emmwen Paul a eäni?

¹¹ Ena sokkun tipeeüfengen a longolong woon ewe tong mi “pilüküfengeni ekei mettoch meinisin, pwe ra unusöch lon ar chufengen.” (Kol. 3:14) Lon Rom sopwun 12, Paul a menlapei ei mettoch, ren an erä pwe ach tong “epwe fokun wenechar,” me mi lamot ewe “tongen pwipwi” ‘epwe pwichikar lefilach.’ Ei mettoch epwe älisatä ach sipwe süfölfengen lefilach. Ewe aposel a erä: “Oupwe fokun asamolufengenikemi lefilemi.” Nge ren ach tunalo än ekkewe ekkoch föfförmwääl esap ina eü alen tong. Sipwe föri ükükün ach tufich le tümünü limöchün ewe mwichefel. Lupwen a awora ewe kapasen emmwen usun tong, Paul a sopwelo: “Oupwe oput mine a ngau o kamwöchünük won mine a mürina.”

Etiwaöchü Ekkewe Wasöla

12. Ren ach sipwe älisi aramas, met sipwe tongeni käeö seni ekkewe chon Kraist lon Masetonia?

¹² Älleani Rom 12:13. Ach tong epwe amwökütükich le ‘alisi pwiich kewe souläng mi osupwang,’ me ren ükükün ach tufich. Inaamwo ika sise pisekisek, nge sia chüen tongeni fangolo minne mi nom rech. Iei alon Paul usun ekkewe chon Kraist lon Masetonia: “Ra küna watten sosot ren ekewe riaföü a toriir. Nge ar pwapwa a fokun lapalap, pwe ra fokun fangafangöch lon ar lifang, inamwo ika ra fokun wöüngau. Üa pwäri ngenikemi, pwe ra lifang  won ükükün ar tongeni, nge pwal lap seni ar tongeni. Seni püsin mochenin letiper ra fokun tütüngor ngenikem, pwe repwe pachelong lon ewe angangen alilis fän iten ekewe chon pin lon Jutea.” (2 Kor. 8:2-4) Inaamwo ika ekkewe chon Kraist lon Masetonia ra pwal osupwang nge ra fokkun fangafangöch. Ra meefi pwe ina eü wis mi aüchea ar repwe älisi pwiir kewe mi osupwang lon Jutea.

13. Met weween ach sipwe “etiwaöchü ekewe wasöla”?

¹³ Ewe mwuten kapas “oupwe etiwaöchü ekewe wasöla” mi afföü lon fosun Krik a wewe ngeni än emön pwisin ekiekietä an epwe awasölaöch. The New Jerusalem Bible a afföü ei mwuten kapas ngeni “oupwe kükkütta iö kewe oupwe awasölaöchür.” Fän ekkoch, sia awasölaöchü aramas ren ach etiwer le möngöfengen, nge ena föfför a fokkun mürinnö ika sia föri ren tong. Nge ika sia ekiekiöchü, iwe sipwe pwal küna sokkopaten alen ach sipwe awasölaöchü aramas. Äwewe chök, ika sise tufich le amöngöniir, eli sia tongeni etiwer le ün kofi are tea me akkasos, iwe pwal ina eü alen awasölaöch.

14. (a) Ewe kapasen Krik mi afföüni ewe kapas “etiwaöchü” a feito seni menni kapas? (b) Ifa usun sipwe pwäratä ach tongei ekkewe chon ekis lon ewe angangen afalafal?

¹⁴ Ach etiwaöchü aramas a kapachelong ekiekich me meefiach usur. Ewe kapasen Krik mi afföüni ewe kapas “etiwaöchü” a feito seni ekkeei ruu kapas, “tong” me “aramas sise sissilei.” Met meefiach usun ekkewe aramas sise sissileer are ekkewe chon ekis? Ekkewe chon Kraist ra käeö pwal eü fosun fönü pwe repwe afalafala ewe kapas allim ngeni ekkewe chon ekis ra mwöküt ngeni leenier, iir ra pwal etiwaöchü aramas. Pwüngün pwe chommong me leich sise tufichin käeö pwal eü fos. Nge sia chüen tongeni älisi ekkewe chon ekis ren ach nöünöü ewe puk itelapan, Good News for People of All Nations. Lon ena puk a mak eü afalafal seni Paipel lon sokkopaten fos. Ka fen küna sopwöchün om nöünöü ei puk lon ewe angangen afalafal?

Meefieni Meefien Ekkewe Ekkoch

15. Ifa usun Jises a isetiw eü leenien äppirü ren ewe kapasen fön lon Rom 12:15?

¹⁵ Älleani Rom 12:15. Än Paul kapasen fön lon ei wokisin a menlapei pwe sipwe meefieni meefien ekkewe ekkoch. Weween mi lamot ach sipwe weweiti me meefieni meefier, ese  lifilifil ika ra pwapwa are letipechou. Ren manamanen än Jiowa ngün mi fel a tongeni amwökütükich le pwäralo ach tonger are etiir le pwapwa. Lupwen ekkewe 70 chon künö ra liwin seni ar angangen afalafal fän pwapwa me apworausa sopwöchün ar angang, Jises a pwal “uren pwapwa.” (Luk 10:17-21) A pwal etiir lon ar pwapwa. Nge pwal lon eü fansoun, Jises a “eti chokewe mi kechü le kechü” lupwen chienan we Lasarus a mälo.​—Jon 11:32-35.

16. Ifa usun sipwe meefieni meefien ekkewe ekkoch, me äkkäeüin iö kewe repwe föri ei?

¹⁶ Sia mochen äppirü än Jises leenien äppirü ren an meefi meefien ekkewe ekkoch. Lupwen emön pwiich a pwapwa sipwe eti lon an pwapwa. Nge lupwen pwiich kewe ra letipechou, sipwe pwal mwittir meefi weiresin me metekin letiper. Fän chommong, sipwe tongeni aururu pwiich kewe mi riäfföü ren ach awora fansoun le aüseling ngeniir fän tong. Sipwe pwal fitiir, fän ekkoch, lon ar kechiu pokiten a wesewesen chüng letipach me sia tonger. (1 Pit. 1:22) Äkkäeüin ekkewe elter repwe apwönüetä än Paul ei kapasen öüröür ren ar meefieni meefien ekkewe ekkoch.

17. Met sia fen käeö seni Rom sopwun 12 me met sipwe pwal käeö lon en lesen mwirin?

¹⁷ Ekkewe wokisin sia fen pworaus usun lon Rom sopwun 12 ra ngenikich kapasen emmwen sipwe tongeni apwönüetä lon pwisin manauach chon Kraist me ach riri ngeni pwich kewe. Lon en lesen mwirin ei sipwe etittina ekkewe lusun wokisin lon ei sopwun 12. Epwe äiti ngenikich ifa usun ach ekiek me föfför ngeni ekkewe chon lükün, kapachelong ekkewe chon oput me ü ngenikich.

Sipwe Enniwili

• Ifa usun sipwe pwäratä pwe sia “achocho le angang”?

• Pwata sipwe angang ngeni Kot fän tipetekison me ekiek tekison?

• Ifa usun sipwe pwäratä ach tong ngeni pwiich kewe me meefieni meefier?

[Ekkewe Kapas Eis fan Iten ewe Lesen]

[Sasing lon pekin taropwe 15]

Pwata sia föfföri än chon Kraist keei angang?

[Sasing lon pekin taropwe 16]

Ifa usun kich meinisin sipwe älisi ekkewe chon ekis le silei usun Mwuun Kot?