“Kot a anomu ekewe sokopaten kifet won inisich usun met mochenin letipan.”​—1 KOR. 12:18.

1, 2. (a) Met a affata pwe meinisin lon ach mwicheich ra tongeni wiseni eü wis mi aüchea? (b) Ikkefa ekkewe kapas eis epwe pölü lon ei lesen?

 POPUTÄ seni fansoun Israel loom, Jiowa a kan akkamöngööni me ekkemmweni nöün kewe aramas ren an äeä eü kokkotun mwichfengen. Äwewe chök, mwirin än chon Israel akkufu ewe telinimwen Ai, Josua “a aleani kapasen ewe allük meinisin, kapasen ewe feiöch me kapasen ewe anümamau, usun meinisin mine a mak lon ewe puken allük . . . fän mesen unusen ewe mwichen chon Israel.”​—Jos. 8:34, 35.

² Iwe, le manauen ekkewe aposel, ewe chon künö Paul a ereni Timoti, emön elter, pwe ewe mwichefelin Chon Kraist, ina “chon le imwen Kot” me “uralapen o pwal longolongun ewe enlet.” (1 Tim. 3:15, TF) Ikenäi, ewe “imwen Kot” a wewe ngeni ewe mwicheichen pwipwi Chon Kraist woon unusen fönüfan. Lon 1 Korint sopwun 12, Paul a apöpö ewe mwichefel ngeni eü inis. A apasa pwe inaamwo ika emön me emön a wor en me wisan, nge meinisin ra aüchea. Paul a makkeei: “Kot a anomu ekewe sokopaten kifet won inisich usun met mochenin letipan.” A pwal mwo nge erä pwe “ekewe kifet sia ekieki pwe esap wor aüchear, sia fokun achocho ngeni ach sipwe kütta met repwe aüchea ren.” (1 Kor. 12:18, 23) Ina popun, lon än Kot mwicheich, a sokkofesen wisen emön me emön, nge sap weween pwe eü wis a öch are ngaw seni pwal eü. Iwe, ifa usun sipwe tongeni mirititi ika met wisach lon än Kot kokkot me aücheani ena wis? Ifa longolongun ach sipwe tongeni wisen och wis lon ewe mwicheich? Iwe, ifa usun ‘ach fefeita epwe pwapwalo ngeni aramas meinisin’?​—1 Tim. 4:15.

Ifa Usun Sipwe Aücheani Wisach?

3. Ifa eü mettoch a pwäri pwe sia weweiti me aücheani wisach lon ach mwicheich?

³ Sia tongeni silei ifa wisach me aücheani ena wis ren ach tipemecheres le älleasochisi ewe mwich mi kepit, weween, “ewe chon angang mi allükülük o tipachem” me pwal ewe Mwichen Sou Pwüngüpwüng mi tupuni. (Älleani Mattu 24:45-47.) Sipwe etittina  meefiach usun ekkewe kapasen emmwen ena mwich a esile ngenikich. Äwewe chök, ren fitu ier, a awora emmwen ren üfach, limelimöchüch, minen apwapwa, me äeämwäällin ewe Internet. Sia äkkälleasochisi ekkena kapasen fön mi mürinnö pwe epwe tümünü ach riri ngeni Jiowa? Sia lechüni ewe fön pwe epwe wor än ach famili kokkotun fel ngeni Jiowa iteiten wiik? Ika sia lipich, sia fen akkota fansoun fän iten ach pwisin käkkäeö Paipel? Jiowa epwe efeiöchü emön me emön me pwal ach kewe famili ika sipwe älleasochisi emmwenien ewe mwichen chon angang.

4. Met sipwe äfänni atun a wor filiach?

⁴ Eli ekkoch ra ekieki pwe pwisin filiach met sipwe üföüf, ffichin mökürach, ika sipwe raisö are sisap, me met sokkun minen apwapwa sipwe eäni. Iwe nge, Chon Kraist mi aücheani wiser lon mwichefel resap akkomwa pwisin mocheniir atun a wor ar kefil. Repwe äkkäeüin ekieki met Paipel a affata usun ekiekin Jiowa. An Kapas, ina ‘eü lamp ren pechech, o pwal saramen ach al.’ (Kölf. 119:105, TF) Sia pwal mirit ika sipwe äfänni ifa usun filiach epwe kküü ach angangen afalafal me pwal aramas lon me lükün ewe mwichefel.​—Älleani 2 Korint 6:3, 4.

5. Pwata sipwe tümünü pwe sisap ekiekin pwisin nemeni manauach?

⁵ Ekiekin fönüfan “mi nemeni ekewe aramas mi aleasolap ngeni Kot iei” a fokkun chöüfetäl pwe a usun chök ewe äsepwäl sia ngaseri. (Ef. 2:2) A tongeni ämmeef ngenikich pwe esor lamoten emmwenien än Jiowa we mwicheich. Sisap usun Tiotrefes, ewe ‘esap aüseling ngeni met [ewe aposel Jon] a apasa.’ (3 Jon 9, 10) Sisap ekiekin pwisin nemeni manauach. Sipwe tümünü pwe site süfölüngaweiti are älleasolapa än Jiowa mwicheich ren ach kapas are föfför. (Num. 16:1-3) Nge sipwe aücheani wisach le angang fän emmwenien ekkewe mi kepit. Sipwe pwal älleasochis me tipemecheres ngeni ekkewe elter mi ekkemmweni ach kewe mwichefel.​—Älleani Ipru 13:7, 17.

6. Pwata sipwe etittina nonnomun manauach?

⁶ Sia pwal tongeni pwäratä ach aücheani wisach lon än Kot mwicheich ren ach etittina nonnomun manauach me akkachocho le ‘alapala ach angangen afalafal’ me elingalo Jiowa. (Rom 11:13) Ekkoch ra tongeni regular pioneer. Pwal ekkoch ra wisen misineri, elter mi chuchchuuri ekkewe mwichefel, me chon angang lon ekkewe keangen ofesilap (Bethel) woon unusen fönüfan. Chommong ra älisi kaütään ekkewe Kingdom Hall. Lape ngeni nöün Jiowa kewe aramas ra  achocho le älisi ar kewe famili le pacheöch ngeni Jiowa me afalafal iteiten wiik. (Älleani Kolose 3:23.) Ika sia akkangang ngeni Jiowa ren unusen letipach, sia tongeni lükülük pwe epwe chök wokor wisach lon än Kot kokkot.

Longolongun Wisach kewe

7. Äweweei ifa usun nonnomun manauach epwe tongeni kküü met sokkun wis sipwe eäni lon ewe mwichefel.

⁷ Wisach lon ewe mwichefel a alongolong woon met sia tufichin föri. Äwewe chök, wisen ekkewe brother ra sokko seni wisen ekkewe sister. Ierich, pöchökkülen inisich, me pwal ekkoch mettoch ra nemeni met sia tufichin föri lon ach angang ngeni Jiowa. Än Salomon Fos 20:29 a apasa: “Aramas ra ingeiti pochokulen alual o meniniti ekewe mi pwechepwech mokurer.” Ekkewe säräfö ra tongeni angang weires pun ra pöchökkül, me ekkewe mi mwukolo ra tongeni älisi ewe mwichefel ren ar tipatchem me äsimaü. Sipwe chechchemeni pwe mettoch meinisin sia tongeni föri lon än Jiowa mwicheich a alongolong woon an ümöümöch.​—Fof. 14:26; Rom 12:6-8.

8. Ifa ükükün mochenich a nemeni met sia föfföri lon ewe mwichefel?

⁸ Wisach lon ewe mwichefel a alongolong woon pwal eü mettoch, iwe, ei kapas äwewe usun ekkeei rüüemön pwipwi nengngin a menlapei ena mettoch. Iir me rüüemön ra sochungio. Nonnomur a wewe chök. Semer kewe me iner ra peseer ar repwe pioneer. Iwe, mwirin ar sochungio, emön a poputä le pioneer, nge ewe emön a angangen moni. Pwata ra sokkofesen? A alongolong woon pwisin mocheniir. Ra en me föri pwisin mochenin. Esap ina usuch meinisin? Sipwe fen ekilonei met sia mochen föri lon ach fel ngeni Kot. Iwe, sisap tongeni alapalo ach angang ngeni ika sipwe siwili ach kokkot?​—2 Kor. 9:7.

9, 10. Met sipwe föri ika sise kon lien mochen alapalo ach angang ngeni Jiowa?

⁹ Met sipwe föri ika sia tufichin alapalo ach angang ngeni Jiowa, nge sia chipwang me sise achocho ngeni? Lon nöün we taropwe ngeni chon Filipai, Paul a apasa: “Kot ewe a angang lomi, epwe afisätä ämi mochen me ämi tufichin apwönüetä letipan.” Pwüngün pwe Kot a tongeni angang looch me achchüngü letipach are mochenich.​—Fil. 2:13; 4:13.

¹⁰ Pwata sise tingorei Jiowa epwe achchüngü letipach pwe sipwe mochen föri letipan? King Tafit lon Israel loom a föri ena mettoch. A iotek: “Kopwe aiti ngeniei om kewe al o aitöchüür ngeniei. Kopwe emweniei lon om let o aiöüei, pun en ewe Kot mi amanauaei, üa apilükülükuk fansoun meinisin.” (Kölf. 25:4, 5) Sipwe äppirü Tafit ren ach tingorei Jiowa an epwe emmwenikich pwe sipwe mochen apwapwaai letipan. Iwe, atun sia ekieki watteen än Jiowa Kot me Nöün we äfänni ach angang fän iter, letipach epwe ur ren kilisou ngeniir. (Mt. 26:6-10; Luk 21:1-4) Ach meefi kilisou epwe achchüngükich pwe sipwe tingor än Jiowa älillis le mochen alapalo ach angang ngeni. Ewe soufos Aisea a isetiw eü leenien äppirü mi mürinnö fän itach. Lupwen a rong än Jiowa kapas eis: “Iö üpwe tini, nge iö epwe ach chon künö?” ewe soufos a pölüweni, “Ngang üa mochen, kopwe tiniei.”​—Ais. 6:8.

Ifa Usun Sipwe Feffeitä?

11. (a) Pwata a lamot ekkewe brother repwe achocho ngeni ekkewe wis lon ach mwicheich? (b) Ifa usun repwe tufichin wiseni ekkena wis?

¹¹ Lon 2008, a wor 289,678 aramas ra papatais woon unusen fönüfan, ina popun, sia osupwangen brother mi tongeni wiseni wisen sou emmwen. Ifa usun ekkewe brother repwe ataweei ena osupwang? Repwe achocho le eäni ekkewe tufich fän iten ekkewe wis ministerial servant me elter me ren  ewe Paipel. (1 Tim. 3:1-10, 12, 13; Tait. 1:5-9) Ifa usun emön brother epwe eäni ekkena tufich? Ren an akkafalafal, tümünüfichi wisan kewe lon an mwichefel, lipwäköchülo le uwawu meefian lon mwich, me chchüngü chienan kewe chon lükü. Epwe ina usun pwäpwäloon an aücheani wisan lon än Kot mwicheich.

12. Ifa usun ekkewe ät me alüwöl ra tongeni pwäri ar tinikken fän iten ewe enlet?

¹² Nge met ekkewe ät me alüwöl ra tongeni föri pwe repwe feffeitä lon ewe mwicheich? Ra tongeni achocho le käeöfichi Kapasen Kot me uwawu meefier lon mwich pwe repwe “unusen mirit me weweöchiti” ewe Paipel. (Kol. 1:9) Ekkewe alüwöl ra pwal tongeni tinikken pwe repwe tufichin tolong lon “eu asam lap ngeni angang mi lamot,” weween, pioneer, misineri, chon angang lon Bethel, me metakkan. (1 Kor. 16:9, TF) Ach eäni ekkena angang epwe atoto rech pwapwa me feiöch watte.​—Älleani Än Salomon Afalafal 12:1.

13, 14. Ifa usun ekkewe sister ra pwäri pwe ra aücheani wiser lon ewe mwichefel?

¹³ Ekkewe sister ra pwal tongeni pwäri ar aücheani wiser ren ar pwisin apwönüetä Kölfel 68:11, a apasa: “[Jiowa] a atowu ewe kapas. A fokun lapalap ewe mwichen fefin mi arongafeili ewe pworausen win.” Ekkewe sister ra tongeni pwäri ar kilisou ren wiser lon ach mwicheich ren ar fiffiti ewe angangen föralo chon käeö. (Mt. 28:19, 20) Ren ar achocho le akkafalafal me pennüküolo pwisin mocheniir fän iten ena angang, ra ännetatä pwe ra aücheani wiser lon än Kot mwicheich.

¹⁴ Iei alon Paul ngeni Taitos: “Kopwe aiti ngeni ekewe chinlap fefin ar repwe usun ekewe fefin mi manaueni eu manau mi pin. . . . Repwe fokun asukula mine a mürina lon ar aiti ngeni ekewe föpwül usun ar repwe echeni pwülüer me nöür kana, . . . repwe nemeni püsin inisiir o eäni eu letip mi limöch, . . . repwe sipeöch le angang lon imw, repwe eäni kirikiröch o aleasochis ngeni pwülüer, pwe esap wor eman epwe kapas ingau usun än Kot kapas.” (Tait. 2:3-5) A ifa me öchün än ekkewe sister mi äsimaü älisatä ewe mwichefel! Ra isetiw eü leenien äppirü mi mürinnö me pwäratä ar aücheani wiser lon ewe mwichefel ren ar süföliti ekkewe sou emmwen me pwal ren ar filiöchü üfer me fouter me ekkewe minen apwapwa repwe eäni.

15. Met ekkewe sister mi lipich repwe tongeni föri ika ra tipitipingaw?

¹⁵ Fän ekkoch, a weires ngeni sister mi lipich ar repwe weweiti ika ifa wiser lon ewe mwichefel. Iei alon emön sister mi lipich: “Fän ekkoch, ua tipitipingaw.” Met a kan älisi? A apasa: “Ai ikkiotek me käkkäeö a älisiei le weweiti wisei. Ua käeö ekiekin Jiowa usi. Mwirin, ua achocho le älisi chon ewe mwichefel me ekieki usur lap seni ai pwisin ekiekiei.” Me ren Kölfel 32:8, Jiowa a ereni Tafit: “Mesei epwe nonnom wom lupwen ua afalafalok.” Jiowa a fokkun chchüngü meinisin nöün kewe chon angang, pachelong ekkewe sister mi lipich, iwe, epwe älisi meinisin ar repwe mirititi wiser lon an we mwicheich.

 Likiitü lon Wisom!

16, 17. (a) Pwata ach choni än Jiowa we mwicheich, iei ewe nampa eü mettoch sipwe filatä? (b) Ifa usun sipwe tongeni likiitü lon wisach lon än Jiowa mwicheich?

¹⁶ Jiowa a lukeato nöün kewe chon angang pwe repwe riri ngeni i. Jises a apasa: “Esap wor eman a tongeni feito rei are ewe Sam mi tinieito esap panato rei.” (Jon 6:44) Jiowa a lukikich me lein ekkewe fitu billion aramas woon fönüfan pwe sipwe choni an we mwicheich ikenäi. Ach filatä pwe sipwe fiti an mwicheich, iei ewe kefil mi nampa eü pun a ngenikich popun me weween manauach. Sia pwapwa me nükünüköch pun a wor wisach lon än Kot mwicheich!

¹⁷ Ewe sou makkeei kölfel a apasa ngeni Jiowa: “Ua aucheani leenien imwom.” A pwal kölü: “Pechei a uta won pwul mi sonosonoch; upwe mwareiti [Jiowa] lon ewe mwich mi lap.” (Kölf. 26:8, 12) Ewe Kot mi enlet a awisa ngeni meinisin en me wisan lon an we mwicheich. Ren ach älleasochisi än Kot emmwen me chofo le angang ngeni, sipwe tongeni likiitü lon wisach lon än Jiowa kokkot.

Ka Chechchemeni?

• Pwata a pwüng ach ekieki pwe Chon Kraist meinisin a wor en me wisan lon ewe mwichefel?

• Ifa usun sia kan pwäri pwe sia aücheani wisach lon än Kot mwicheich?

• Wisach lon ewe mwichefel a alongolong woon met?

• Ifa usun ekkewe Chon Kraist säräfö me ekkewe mi mwukolo ra tongeni pwäri pwe ra aücheani wiser lon än Kot kokkot?

[Ekkewe Kapas Eis fan Iten ewe Lesen]

[Sasing lon pekin taropwe 17]

Ifa usun ekkewe sister ra tongeni pwäri pwe ra aücheani wiser lon än Kot mwicheich?

[Sasing lon pekin taropwe 18]

Ifa usun ekkewe brother repwe achocho le wiseni ekkewe wis lon än Kot mwicheich?