Ka fen Akkota Fansoun fän iten Käeöön Paipel?
LON ewe ier, ewe Mwichen Sou Pwüngüpwüng a siwili kokkotun mwich pwe epwe alapalo fansoun än ewe famili käeöfengen ewe Paipel. Ika en möküren om famili, kopwe piiöchü pwe ämi famili käeö epwe fiffis iteitan me epwe weneiti met mi lamot ngenikemi. Ekkewe pwüpwülü rese nöünöü repwe pwal käeöfengen ewe Paipel, me ekkewe lipich repwe pwisin käeö.
Chommong ra fen pwäri ar kilisou ren ewe kokkotun Än ewe Famili Fel. Äwewe chök, emön elter itan Kevin a makkeei: “Chon äm we mwichefel aua fokkun kilisou ren ena kokkot. Äm me ekkewe elter aua fosfengen ifa usun aupwe apwönüetä met ewe Mwichen Sou Pwüngüpwüng a pese ngenikich, weween, aupwe käeöfengen me äm kewe famili.”
Jodi, pwülüwen emön elter a makkeei: “Mei wor ülümön nöüm nengngin, ieriir 15, 11, me 2. Aua kerän mwöküt ngeni ewe mwichefelin ekkewe mi aüekö me selingepüng. Aua awora watteen fansoun le ammolnatä fän iten ekkewe mwich meinisin. Iei, a wor pwal eü pwin aupwe tongeni käeöfengen lon!”
John me JoAnn, iir pwüpwülü, ra regular pioneer, iwe, iei makkeier: “Me mwan, äm famili käeö ese kan fiffis iteitan, nge aua chök akuchaalong lefilen pwal ekkoch angang. Ei mineföön kokkot, ina eü liffang me ren Jiowa mi apöchökküla äm riri ngeni ika aua äeäfichi ena fansoun.”
Tony, emön lipich rüwe som ierin, a pwisin käeö iteiten pwinin Oruu. A ammolnatä fän iten ekkewe mwich lon pwal ekkoch fansoun. Iwe, Tony a apasa: “Ua fokkun mwötöresiti pwinin Oruu, pun ina atun ai chiechi ngeni Jiowa. Orun ruu awa, ua käeö met a apöchökküla ai riri ngeni Jiowa. Pokiten a wattelo ai fansoun käeö, ua ekilonei ekkewe wokisin lon Paipel. Iwe, än Jiowa emmwen a fotolong lon letipei lap seni me loom. Äwewe chök, lon eü puk, (Insight on the Scriptures) ua älleani usun än Tafit me Jonatan pwipwiöch. Ua käeö usun än Jonatan pennükü pwisin mochenin me a affata napanapen emön chiechi mi enlet. Ua mwötöres le käeö pwal ekkoch pworaus mi aüchea lon pwinin Oruu!”
Meinisin nöün Jiowa kewe chon angang repwe küna feiöch watte seni ar äeäöchü ewe fansoun mi fen kawor iei fän iten käeöön Paipel me än ewe Famili Fel.