“En ka aüselinga iotek. Aramas meinisin repwe feito reöm.”​—KÖLF. 65:2.

1, 2. Met popun nöün Jiowa kewe chon angang repwe tongeni iotek ngeni fän lükülük?

 JIOWA ese kan tunalo iotekin nöün kewe chon angang mi tuppwöl. Sia tongeni lükülük pwe epwe akkaüseling ngenikich. Inaamwo ika fite million Chon Pwäratä Jiowa ra iotekippök, nge Jiowa esap etiwalo iotekin emön leir.

² Ewe sou makkeei kölfel Tafit a lükülük pwe Kot a kan akkaüseling ngeni an kewe tingor, ina pwata a kölü: “Pun en ka aüselinga iotek. Aramas meinisin repwe feito reöm.” (Kölf. 65:2) A pölü än Tafit kewe iotek pun a tuppwöl le fel ngeni Jiowa. Sipwe pwisin eisinikich: ‘Ai kewe iotek ra pwäri pwe ua lükülük woon Jiowa me ua akkomwa fel mi limelimöch? Met ai kewe iotek ra affata usi?’

Ikkiotek ngeni Jiowa Fän Tipetekison

3, 4. (a) Epwe fen ifa ekiekich atun sia iotek ngeni Kot? (b) Met sipwe föri ika ‘ekiekin letipach’ a mengiringir pokiten sia tipis?

³ Ren an epwe pölü ach kewe iotek, sipwe tipetekison le ikkiotek ngeni Kot. (Kölf. 138:6) Sipwe tingorei Jiowa an epwe etittinakich, pun a ina usun Tafit lupwen a apasa: “Ai Kot, kopwe atittinaei o silei letipei. Kopwe sotuniei o silei ai ekiek. Kopwe pi ika mi wor och mi ingau lon manauei, nge kopwe emweniei won ewe al esemüch.” (Kölf. 139:23, 24) Sisap chök iotek nge sipwe pwal mut ngeni Kot an epwe etittinakich me pwal fönökich ren an we Kapas. Jiowa a tongeni emmwenikich “won ewe al esemüch,” weween, epwe älisikich le feffetäl woon ewe al ngeni manau esemuch.

⁴ Met sipwe föri ika ‘ekiekin letipach’ a weires ren ach mengiringiriiti och tipisich? (Älleani Kölfel 32:1-5.) Mengiringir a tongeni akükkünalo ach pöchökkül usun chök efoch irä a pwäselo ren pwichikkaren ewe akkar. Tafit ese chüen pwapwa pokiten a föri tipis, iwe, eli a semwen ren. Nge a ifa me watteen ngasetään atun a pwäri tipisin ngeni Kot! Anchangei pwapwaan Tafit lupwen a meefi pwe “an pupungau a musala” me ren Jiowa. Atun emön a pwäratä tipisin ngeni Kot, epwe meefi kinamwe, me ekkewe Chon Kraist elter repwe pwal tongeni älisi an epwe pöchökkülsefäl.​—SalF. 28:13; Jem. 5:13-16.

Siö ngeni Kot me Kilisou ngeni

5. Met weween ach sipwe siö ngeni Jiowa?

⁵ Ika a watte ach aürek, sipwe apwönüetä än Paul fön, a erä: “Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou.” (Fil. 4:6) “Siö” a wewe ngeni ach sipwe “tingormaü ngeni Kot fän tipetekison.” Sipwe siö ngeni Jiowa ren an älillis me emmwen, äkkäeüin atun fansoun efeiengaw are eriäfföü.

6, 7. Met popun sipwe apasa ach kilisou lon ach kewe iotek?

⁶ Iwe nge, ika sia chök iotek atun a wor osupwangach, met epwe affata usun ach riri ngeni Jiowa? Paul a apasa pwe sipwe esile ngeni Kot ach kewe tingor “fän kilisou.” Mei wor popun sipwe pwäri ach kilisou ngeni Jiowa usun chök met Tafit a erä: “Ai Samol mi Lapalap, en ewe mi tekia me manaman me  ling me pwora me iteföüla. Pun meinisin mine a nom lon läng me pwal won fanüfan om. Ai Samol mi Lapalap, om chök ewe mwü, en ka tekia o nemeni meinisin. . . . Iei äm aia kilisou ngonuk, äm Kot, aia pwal mwareiti itom mi ling.”​—1 Kron. 29:11-13.

⁷ Jises a kilisou ngeni Kot iteiten ar möngö, a pwal kilisou ren ewe pret me wain atun ewe Fääfen ach Samol. (Mt. 15:36; Mark 14:22, 23) Sipwe äppirü Jises me “kilisou ngeni Jiowa” ren “an kewe föför mi amwarar ngeni chon fanüfan,” an “kewe allük mi pwüng,” me an we kapas mi kawor lon ewe Paipel.​—Kölf. 107:15; 119:62, 105.

Ioteki ekkewe Ekkoch

8, 9. Pwata sipwe ioteki chiechiach kewe Chon Kraist?

⁸ Sia kan iotek fän äsengesin pwisin kich, nge sipwe pwal ioteki ekkewe ekkoch, pwal mwo nge Chon Kraist sise sissileer. Inaamwo ika ewe aposel Paul ese sissilei meinisin ekkewe chon lükü lon Kolose, nge a makkeei: “Äm aia kilisou ngeni Kot Semen ach Samol Jesus Kraist fansoun meinisin lupwen aia iotek fänäsengesimi. Pun aia rongorong usun ämi lükü Kraist Jesus, pwal usun ämi echeni ekewe chon pin meinisin.” (Kol. 1:3, 4) Paul a pwal ioteki Chon Kraist lon Tesalonika. (2 Tes. 1:11, 12) Ena sokkun iotek a affata masouen letipach me ach ekiek usun chiechiach kewe chon lükü.

⁹ Ach ioteki ekkewe Chon Kraist mi kepit me chiechier kewe “pwal ekkoch siip” a änneta ach chchüngü än Kot mwicheich. (Jon 10:16) Paul a tingorei chiechian kewe chon lükü ar repwe iotek pwe ‘Kot epwe aiti ngeni ekewe kapas epwe apasa pwe epwe asile ngeni aramas monomonen ewe Pworausen Manau.’ (Ef. 6:17-20) Sia kan ioteki chiechiach kewe?

10. Met epwe tongeni fis ika sia ioteki ekkewe ekkoch?

¹⁰ Ach ioteki aramas a tongeni siwili ekiekich usur. Ika sise kon lien sani emön nge sia ioteki, eli sisap chüen oput nge sipwele sani. (1 Jon 4:20, 21) Ei sokkun iotek a apöchökkülakichetä me alapalo tipeeü lefilach me pwiich kewe. Pwal eü, a pwäratä pwe sia eäni än Kraist tong. (Jon 13:34, 35) Tong, ina eü kinikinin uwaan än Kot we ngün mi fel. Sia kan tittingorei Jiowa an we ngün mi fel pwe sipwe napanapeni tong, pwapwa, kinamwe, mosonoson, kirekiröch, lipwäköch, lükü, tipefesir, me förfichi? (Luk 11:13; Kal. 5:22, 23, TF) Ika ina, ach kapas me föfför repwe pwäri pwe ewe ngün mi fel a ekkemmweni me nennemeni manauach.​—Älleani Kalesia 5:16, 25.

11. Pwata mi fich ach sipwe tingorei pwiich kewe ar repwe iotekikich?

¹¹ Ika sia rong pwe nöüch kewe ra küna sossotun ar repwe kapi lon sukul, sipwe iotekiir me nöünöü Paipel le älisiir pwe repwe wenechar nge resap föri minne mi mwääl. Paul a  ereni Chon Kraist lon Korint: “Aia tüngor ngeni Kot pwe ousap föri mine a mwäl.” (2 Kor. 13:7) Ena sokkun iotek mi fiti tipetekison a apwapwaai Jiowa me pwäri napanapöchüch. (Älleani Än Salomon Fos 15:8.) Sia tongeni tingorei pwiich kewe pwe repwe iotekikich usun chök ewe aposel Paul. A makkeei: “Oupwe sopwela le iotek fän item. Sia silei, pwe mwelien letipem a limelimöch, pun sia fokun mochen föri mine a pwüng fansoun meinisin.”​—Ipru 13:18.

Pwal Ekkoch Mettoch Ach kewe Iotek Ra Pwäralo Usuch

12. Met sipwe akkomwa lon ach kewe iotek?

¹² Iwe, ach kewe iotek ra kan affata pwe kich Chon Pwäratä Jiowa mi pwapwa me tinikken? Sia kan akkomwa ach föfföri letipen Kot, ach afalafala ewe Mwu, ach apöchökkülatä än Jiowa nemenem, me ach epinalo itan we lon ach kewe iotek? Sipwe akkomwa ekkena mettoch lon ach kewe iotek, pun Jises a poputääni an iotek ren an apasa: “Semem lon läng. Itom epwe pin, mwum epwe war, letipom epwe fis won fanüfan usun chök lon läng.”​—Mt. 6:9, 10.

13, 14. Met ach kewe iotek ra pwäratä usuch?

¹³ Ach kewe iotek ngeni Kot ra pwäri ekiekin letipach, mochenich kewe, me met sia chchüngü. Än Salomon Fos 17:3 a apasa: “Silifer me kolt ra limelim lon ewe lenien ketel, nge ewe Samol mi Lapalap a sotuni leluken aramas.” Kot a küna masouen letipach. (1 Sam. 16:7) A silei meefiach usun ach kewe mwich, ach angangen afalafal, me chiechiach kewe chon lükü. Jiowa a silei meefiach usun “pwiin Jises kewe.” (Mt. 25:40) A silei ika sia wesewesen tipeni met sia ioteki are sia chök eöreni le epinipini ekkoch kapas. Jises a apasa: “Iwe, fansoun ami iotek, ousap apiapini usun chok ekkewe re Jentail, pun ra ekieki epwe auselinga ir pokiten ar kapas chommong.”​—Mt. 6:7, TF.

¹⁴ Masouen ach kewe iotek ra pwäratä ükükün ach lükülük woon Kot. Tafit a apasa: “Pun en [Jiowa] ai lenien op, ka tümwünüöchüei seni ekewe chon oputaei. Kopwe mwüt ngeniei pwe üpwe nom lon imwom mi pin lon unusen manauei, pwe üpwe kinamwe le op fän poum.” (Kölf. 61:3, 4) Lupwen Kot epwe mut ngenikich ach sipwe ‘nom lon imwan we imw mangaku,’ sipwe nükünüköch fän an tümün. (Pwar. 7:15) Ach arap ngeni Jiowa lon iotek a aururukich pwe epwe ‘penikich’ atun sia kükküna sossotun ach lükü!​—Älleani Kölfel 118:5-9.

15, 16. Met ach kewe iotek repwe tongeni älisikich le weweiti usun ach mochen wiseni ekkoch wis?

 ¹⁵ Ach iotek seni wenecharen letipach epwe tongeni älisikich le esilla enletin ekiekin letipach. Ren chök äwewe, ach achocho ngeni ewe wis elter a wesewesen popu seni ach mochen älisi äfeffeitään chon ewe mwichefel me ewe angangen afalafal? Are, a popu seni ach mochen ach sipwe “lap” me lein aramas are fen nemeni aramas? Ürürün esap ina usun lefilen nöün Jiowa kewe aramas. (Älleani 3 Jon 9, 10; Luk 22:24-27) Ika a wor ach kewe mocheniaingaw, nge sia iotek seni wenecharen letipach, Jiowa Kot epwe pwäriirelo pwe sipwe tongeni mwittir urusarou.

¹⁶ Eli ekkoch fefin Chon Kraist ra mochen pwe pwülüwer kewe repwe wisen ministerial servant, me mwirin, elter. Nemin kana repwe tongeni etipeeüfengeni föfförür ngeni ar kewe iotek ren ar napanapöch. A lamot ena pun föfförün än ekkena mwän famili repwe tongeni kküü ekiekin chon ewe mwichefel usun ekkena mwän.

Tupuni Chon Mwich lon Iotek

17. Pwata epwe öch ach sipwe äläemönülo le iotek?

¹⁷ Fän ekkoch, Jises a kan imu seni mwichen aramas pwe epwe äläemönülo le iotek ngeni Seman we. (Mt. 14:13; Luk 5:16; 6:12) Epwe pwal ina usuch. Atun sia pwisin iotek lon eü leeni mi kinamwe, eli met sipwe fiffilatä epwe apwapwaai Jiowa me akkapöchökkülatä ach fel ngeni i. Iwe nge, Jises a pwal wisen tupuni aramas lon iotek, iwe, a mürinnö sipwe ekieki ifa usun sipwe eäni ena sokkun iotek.

18. Met ekkewe brother repwe chechchemeni atun repwe tupuni eü mwichefel lon iotek?

¹⁸ Lon ach kewe mwich, ekkoch mwän mi tuppwöl ra kan tupuni ewe mwichefel le iotek. (1 Tim. 2:8) Epwe fich pwe chiechier kewe repwe tongeni apasa “amen,” weween “fokkun ina,” le muchuloon ena sokkun iotek. Iwe nge, repwe tongeni apasa “amen” ika repwe tipeeü ngeni ewe iotek. Esor kapas mi ämäirü are pöchökkül lon ewe iotek Jises a äiti ngeni nöün kewe chon käeö. (Luk 11:2-4) Jises ese pwal eiteita meinisin osupwangen are osukosuken emön me emön mi aüseling ngeni an iotek. Mi öch aramas repwe pwisin ioteki en me an osukosuk, nge ese fich atun emön a tupuni eü mwichen aramas lon iotek. Iwe, esap pwal akkaffat pworaus monomon.

19. Sipwe fet atun emön a tupunikich lon iotek?

¹⁹ Atun emön a iotek fän itach, mi fich ach sipwe pwäratä süföl fän “niuokkusun Kot.” (1 Pit. 2:17) Eli, a wor ekkoch föfför esor ngawer, nge rese fich atun Chon Kraist ra mwichfengen. (SalAf. 3:1) Äwewe chök, sipwe erä pwe emön a mochen pwe meinisin repwe ätäpöüfengen are kamwöchüpöü atun iotek. Eli ena föfför epwe aosukosuka are erikalo ekiekin chokkewe mi kerän fiti mwich, nge rese mwo tipeeü ngeni ach lükü. Ese ngaw ika ekkoch pwüpwülü ra kamwöchüpöü atun emön a tupuni ewe mwichefel lon iotek, nge ika ra foropach, eli ekkoch repwe chepetek pokiten ra meefi pwe ekkena pwüpwülü rese akkomw ekieki ar fel ngeni Jiowa, nge fen ar tongfengen. Ina popun, ren ach süföliti Jiowa, sipwe “föri meinisin pwe Kot epwe ling ren,”nge sisap föri met aramas repwe osukosuk, nenneiruk, are chepetek ren.​—1 Kor. 10:31, 32; 2 Kor. 6:3.

 Met Sipwe Ioteki?

20. Ifa usun kopwe äweweei Rom 8:26, 27?

²⁰ Fän ekkoch, sise silei met sipwe apasa lon pwisin ach kewe iotek. Paul a makkeei: “Pun sisap silei mine sipwe eäni iotek, nge püsin Ngünmifel a tüngor ngeni Kot fän itach ren sokun ngüngü esap wor eman a tongeni apasatä lon kapas. Nge Kot, ewe mi küna lon letipach, a silei ekiekin ewe Ngünmifel.” (Rom 8:26, 27) Fän emmwenien Jiowa, a mak chommong iotek lon Paipel. A etiwa ekkena iotek pwe usun itä nge pwisin ach tingor, iwe, a apwönüretä. Kot a silekich, a pwal silei weween met ekkewe sou mak ra makkeei fän emmwenien ewe ngün mi fel. Jiowa a kan pölüweni ach kewe iotek lupwen ewe ngün a “tüngor” fän itach. Nge atun a lapolo ach silefichi Kapasen Kot, epwe mwittir chemeto met sipwe tingor.

21. Met sipwe etittina lon ewe lesen mwirin?

²¹ Sia fen käeö pwe ach kewe iotek ra pwäri masouen letipach. Äwewe chök, ra tongeni affata ifa ükükün ach arap ngeni Jiowa me ach weweöchüti an we Kapas. (Jem. 4:8) Lon ewe lesen mwirin ei, sipwe etittina ekkoch iotek mi mak lon ewe Paipel. Ifa usun ena sokkun etittin epwe tongeni amürinnölo ach iotek ngeni Kot?

Ifa Pölüwen Ekkeei Kapas Eis?

• Epwe fen ifa ekiekich atun sia iotek ngeni Jiowa?

• Pwata sipwe iotek fän iten chiechiach kewe chon lükü?

• Met ach kewe iotek repwe tongeni pwäri usuch me pwal ekiekin letipach?

• Epwe fen ifa föfförüch atun emön a tupunikich lon iotek?

[Ekkewe Kapas Eis fan Iten ewe Lesen]

[Sasing lon pekin taropwe 9]

Ka mwareiti Jiowa me apasa om kilisou ngeni iteitan?

[Sasing lon pekin taropwe 10]

Itä ürürün, napanapach atun emön a tupunikich lon iotek epwe fen asamolu Jiowa fansoun meinisin