FÖFFÖR mi ngaw me riäfföü ra chöüfetäl ekis meinisin. Ekkewe maun rese chök nielo ekkewe sounfiu nge pwal aramas ese lifilifil. Atai allük me mwänesol a fis lon sokkopaten leeni. Eli lon pwisin manauom ka küna föfför ese pwüng are aapap. Lupwen ka küna ekkeei mettoch pwal met a pwisin fis ngonuk, eli kopwe eis, ‘Pwata Kot a mutatä föfföringaw?’

Chommong ra pwal eäni ena kapas eis. Lon 3,600 som ier loom, emön chon angangen Kot mi tuppwöl itan Hiop a eis: “Pwota ekewe aramasangau ra manau o tori chinlap, nge ar nemenem a wattela?” (Hiop 21:7) Ewe soufos Jeremaia a meefi riäfföü ren föfföringawen chon leenian we 2,600 ier loom me a eis: “Pwota ekewe aramasangau ra pisekisekila? Pwota chokewe meinisin resap allükülük ra fefeitä?” (Jeremaia 12:1) Hiop me Jeremaia ra silei pwe Kot mi pwüng nge ra osukosuk ika pwata a kon watte föfföringaw. Eli ka pwal eäni ena sokkun osukosuk.

Ekkoch aramas ra tipi ngeni Kot pwe a efisatä föfföringaw me riäfföü. Ekkoch ra eis: ‘Ika Kot a fokkun manaman, pwüng, me tongei aramas, pwata ese chök äwesalo minne mi ngaw me weires? Pwata a mutatä föfföringaw an epwe sopwosopwolo tori ach ei fansoun?’ Ewe lesen mwirin ei epwe äweweei pölüwen ekkena kapas eis me pwal ekkoch kapas eis mi lamot.

[Credit Line]

AP Photo/​Adam Butler