Ia a pop me ie ei afalafal mi mwääl? Eü puken äwewe a apasa: “Ekkoch Chon Kraist sou ääk ra poputä le eäni ekiekin chon Kris pwe a wor ngünün aramas ese tongeni mälo. Ra ekieki pwe Kot a föratä ewe ngün me usalong lon inisin aramas atun än iner koluesiniir.”​—The New Encyclopædia Britannica (1988), Puk 11, pekin taropwe 25.

Met ewe Paipel a apasa? “Lupwen ra mäla, ra liwiniti pwül. Lon ewe chök rän ar kewe akot meinisin ra tala.”​—Kölfel 146:4.

Ewe Paipel a pwal apasa pwe “resap silei och mettoch,” esap chüen wor ar tong me ar oput, me “esap wor och angang, ekiek, silelap ika tipachem lon lenien sotup.” (Än Salomon Afalafal 9:5, 6, 10) Sia tongeni mälo, iwe, esor och mettoch mi manau mwirin mälooch. Manauach a usun ngeten efoch kantel. Lupwen a kunulo, ese feilo ekis. A chök morolo.

A piitä ekkoch kapas eis usun ewe afalafal pwe a wor och ngün mi manau mwirin mäloon ewe inis. Itä ia ekkewe ngün ra lo ie mwirin mäloon aramas? Met a fis ngeni aramas mi ngaw lupwen ra mälo? Atun ekkewe tipitipin Chon Kraist ra poputä le lükü ewe afalafal mi mwääl pwe a wor och mettoch mi manau mwirin mälooch, a emmwen ngeni ar repwe lükü pwal eü afalafal mi mwääl, ewe afalafalen ekkein ell.

Apöpö ngeni ekkeei wokisin: Än Salomon Afalafal 3:19; 20; Keneses 3:19

PWORAUS MI ENLET:

Esor ngünün aramas mi manau mwirin mäloon ewe inis

[Pwoor lon pekin taropwe 4]

Achocho mi Lus Mwääl

Lon November 9, 1949, James Kidd, emön sou küt ewe mecha kapa, 70 ierin, a morukolo lon chuukun Arizona, U.S.A. Mwirin fitu ier emön sou kapwüng a apwungalo pwe a mälo, iwe, a pwä echö nöün taropween emwirimwir, pwisin makkeian, fengen me ekkoch taropween minne kä an, nge aücheaar, fitepükü ngeröü chala. Lon nöün Kidd we taropween emwirimwir, a affata pwe nöün moni epwe katowu fän iten än aramas kütta “pisekin ännet pwe a wor ngünün aramas a towu seni inisiir atun ra mälo.”

Ekiselo mwirin, lap seni 100 sou käeö me sou tipatchem ra amasoua taropween mumutään nöünöün ena moni le föri ena angang. Iwe, a fis chommong mwich lon imwen kapwüng, me fite ngeröü ra apasa pwe ra tongeni änneta pwe a wor ngünün aramas mi monomon. Iwe mwirin, ewe sou kapwüng a filatä pwe ruu mwicheich repwe nöünöü ewe moni. Nge mwirin 50 som ier, rese künökün “pisekin ännet pwe a wor ngünün aramas a towu seni ewe inis atun mälo.”