“Chokewe meinisin mi anomu ar apilükülük won [Jiowa] repwe meseik, repwe köl fän pwapwa fansoun meinisin.”​—KÖLF. 5:11.

1, 2. (a) Ikkefa ekkoch mettoch ra efisatä watteen riäfföü ikenäi? (b) Me lukun ekkewe riäfföü mi tori aramas meinisin, met Chon Kraist ra pwal likiitü fan?

 A FIFFIS ngeni Chon Pwäratä Jiowa ekkewe chök sokkun riäfföü a tori aramas meinisin. Chommong me leir ra fen küna feiengaw seni atai allük, maun, me ekkoch pwüngüngaw. Mwelele, samau, mälo, taifun, chechchechin fönü, me met kkan ra efisatä riäfföü. Ewe aposel Paul a makkeei: “Pun sia silei pwe tori ikenai förien Kot kewe meinisin ra ngüngü fän cheuch usun cheuchen fam.” (Rom 8:22) Sia pwal küna chappen ach föfförmwääl pun sise unusöch. Sia tongeni aloni alon King Tafit ei: “Pun ai kewe fofor mi ingau ra fen pwoluelo mokurei; ra chok chounieitiu usun chok och mettoch ese ki rei.”​—Kölf. 38:4, TF.

² Me lukun ekkena riäfföü ra kan fiffis ngeni aramas meinisin, Chon Kraist mi enlet ra mwärei pwisin ar irään ninni, lon kapas monomon. (Luk 14:27) Ewer, nöün Jises kewe chon käeö ra küna koput me riäfföü mwääl usun chök i. (Mt. 10:22, 23; Jon 15:20; 16:2) Ina popun, tattapwelo mwirin Kraist a wewe ngeni ach ötüres me likiitü atun sia witiwiti feiöchün ewe fönüfan sefö.​—Mt. 7:13, 14; Luk 13:24.

3. Pwata sia silei pwe Kot ese mochen pwe manauach epwe ur ren letipechou me riäfföü?

³ A itä wewe ngeni pwe manauen Chon Kraist mi enlet esap pwapwa? Itä weween  pwe manauach epwe chök letipechou me riäfföü tori ewe sopwoloon? A ffat pwe Jiowa a mochen sipwe pwapwa atun sia witiwiti pwönütään an kewe pwon. Fän chommong, ewe Paipel a apasa pwe chon fel mi enlet ra pwapwa. (Älleani Aisea 65:13, 14.) Kölfel 5:11 a apasa, “Chokewe meinisin mi anomu ar apilükülük womw repwe meseik, repwe köl fän pwapwa fansoun meinisin.” Pwüngün, sipwe tongeni küna watteen pwapwa, kinamween letip, me menemenöch inaamwo ika sia nonnom fän riäfföü. Iwe, sipwe ppii ifa usun Paipel a tongeni älisikich le akkamwöchü ach pwapwa lon fansoun osukosuk.

Jiowa Emön Kot mi Pwapwa

4. Met meefien Jiowa lupwen ekkoch ra ü ngeni an nemenem?

⁴ Ekieki mwo Jiowa, ewe mi tekia lon unuselapen läng me fönüfan. Ese osupwang ren och mettoch, ese pwal lamot pwe emön epwe älisi. Inaamwo ika a amwarar an manaman nge ese mwääl a lichippüng lupwen emön chonläng a ü ngeni me wiliti Setan. Mwirin, Kot a pwal letipengaw lupwen ekkoch nöün kewe chonläng ra fiti Setan le ü ngeni. Pwal ekieki mwo metekin letipan lupwen Atam me If ra säpe seni, nge iir förian kewe mi sokkolo aücheaar. Seni ena atun, lape ngeni aramas meinisin ra ü ngeni än Jiowa nemenem.​—Rom 3:23.

5. Met a äkkäeüin ämeteki letipen Jiowa?

⁵ A chüen sopwosopwolo än Setan ü ngeni än Jiowa nemenem. Ren ükükün 6,000 som ier, Jiowa a küna än aramas fel ngeni ululun, mwänesol, nimanau, me sikepwach. (Ken. 6:5, 6, 11, 12) Pwal och, a rongorong kapas mi fokkun chofona me kapasen esiit. Pwal mwo nge ekkoch chon fel ngeni Jiowa ra eletipengawa i. Iei alon Paipel usun än chon Israel föri ena: “Fän chommong ra ü ngeni i me lon ewe fanüapö o achouu me lon ewe fanüpwas. Ra sotuni Kot fän chomong o asonga Ewe mi Pin me lon Israel.” (Kölf. 78:40, 41) A mmen metek letipen Jiowa lupwen nöün kewe aramas ra ü ngeni. (Jer. 3:1-10) A ffat pwe Jiowa a meefi letipechou lupwen a kan fiffis mettoch mi ngaw.​—Älleani Aisea 63:9, 10.

6. Ifa usun Kot a pworacho ngeni ekkewe mettoch a eletipengawa?

⁶ Inaamwo ika Jiowa a meefi letipechou me lichippüng, nge a chüen tongeni mwökütüküt. Lupwen a piitä osukosuk, Jiowa  a mwittir akükkünalo pwününgawan me akkota ifa usun epwe asopwalo fän iten an epwe pwönütä an kokkot. Pokiten föfförün mi pwüng, a pwapwa le nenneloi fansoun epwe letelo pwüngün an nemenem me ekkewe feiöch repwe toto ngeni nöün kewe chon angang mi tuppwöl. (Kölf. 104:31) Pwüngün, inaamwo ika a watte än Jiowa küna tipimwääl, nge a chüen akkamwöchü an pwapwa.​—1 Tim. 1:11; Kölf. 16:11.

7, 8. Ifa usun sipwe äppirü Jiowa atun a fis osukosuk mi weiweitä?

⁷ Pwüngün, sise tongeni apöpökich ngeni Jiowa ren ach tufichin pwäkini ach kewe osukosuk. Iwe nge, sipwe tongeni äppirü i lupwen sia ataweei ach kewe weires. Pwüngün, sia lichippüng ika a fis osukosuk, nge esap weween pwe sipwe chök ikina usun fansoun meinisin. Nge pokiten sia fför lon napanapen Jiowa, a wor ach tufichin ekiek me mirit mi atufichikich le etittina ach kewe osukosuk me ataweer fän tipatchem.

⁸ Mi lamot ach sipwe esilla pwe mei wor ekkoch osukosuk sise tongeni pwäkiniir. Ika sia kon letipengaw ren ena sokkun osukosuk, iwe epwe pöüt senikich ach pwapwa lon ewe fel mi enlet. Mwirin ach achocho ükükün ach tufich le ataweei eü osukosuk, epwe öch sipwe ükütiw le kon ekilapei nge fen afota ekiekich woon minne sia tufichin achocho ngeni. Ekkeei pworaus seni Paipel repwe äweweei ei mettoch.

Mi Lamot Mirit

9. Ifa usun Hana a pwäri mirit?

⁹ Ekieki pworausen Hana, ewe a wiliti inen ewe soufos Samuel. Me mwan, a fokkun letipechou pun ese tongeni nöünöü, me a küna esiit me turunufas. Fän ekkoch, a fokkun lolilen, iwe, a chök kekkechiw me ese mwon anan. (1 Sam. 1:2-7) Lon eü fansoun, a fokkun “weires lon letipen Hana, a fakun iotek nge kechü ngeni ewe Samol mi Lapalap” lon ewe imwenfel. (1 Sam. 1:10) Mwirin än Hana siöngaw ngeni Jiowa, ewe samol fel mi lap Eli a ereni: “Kopwe feila fän kinamwe, ewe Koten Israel epwe ngonuk pälüen om tüngor.” (1 Sam. 1:17) Lon ena atun, Hana a mirititi pwe a fen achocho ükükün an tufich, nge an na osukosuk esap tongeni pwäk ren pwisin i. A pwäri mirit, iwe, “a feila o mongö, nge won mesan esap chüen wololilen.”​—1 Sam. 1:18.

10. Met sokkun ekiek mi pwüng Paul a pwäri atun ese tongeni pwäkini an osukosuk?

¹⁰ Ewe aposel Paul a pwal mirit lupwen a küna weires. A fokkun osukosuk ren an samau, iwe, a meefi pwe usun itä nge ‘efoch fölun ira lon fitukan.’ (2 Kor. 12:7, TF) Ese ffat met sokkun an na semwen, nge Paul a föri met epwe chikar ren ükükün an tufich me a pwal tingor än Jiowa älillis. Fän fitu Paul a tingormaü ngeni Jiowa usun ei mettoch? Fän ülüngät. Mwirin an aülüngätin tingor, Kot a pwär ngeni Paul pwe esap föri manaman le amoielo ewe ‘fölun ira lon fitukan.’ Paul a chök tipemecheres, iwe, a afota ekiekin woon an angang ngeni Jiowa.​—Älleani 2 Korint 12:8-10.

11. Ifa usun ach iotek me tingor repwe tongeni älisikich le likiitü fän ach kewe osukosuk?

¹¹ Esap weween pwe sisap chüen ikkiotek ngeni Jiowa usun ach kewe osukosuk. (Kölf. 86:7) Iwe nge, ewe Kapasen Kot a pesekich: “Ousap aurek ren och mettoch, pwe ren mettoch meinisin oupwe chok esinei ngeni Kot ami mochen ren iotek o tingor o pwal eti kilisou.” Ifa usun Kot epwe pölüweni ekkeei sokkun tingor me iotek? Ewe Paipel a pwal apasa: “Iwe, än Kot kinamwe mi tekia seni ach tongeni weweiti epwe tümwünü lelukemi me ekiekimi lon Kraist Jesus.” (Fil. 4:6, 7) Pwüngün, eli Jiowa esap amoielo ach kewe osukosuk, nge epwe pölüweni ach kewe iotek ren an mammasa me akinamwei ekiekich. Mwirin ach iotek, neman sipwe  mirititi mwiringawen ach aüreki ach kewe riäfföü.

Pwapwaiti Om Föri Letipen Kot

12. Pwata sipwe tongeni feiengaw ika sia chök äkkäpilükülüküngaw?

¹² Än Salomon Fos 24:10 a affata pwe “Are ka apilükingau lon fansoun riaföü, om pöchökül a kisikis.” Pwal eü mwiitün a apasa: “Eman mi letipeta a wololilen.” (SalF. 15:13) Pokiten ekkoch Chon Kraist ra kon letipeta, iwe, rese chüen äkkälleani me ekilonei Paipel. Ra tinikkop le iotek, me ra imu seni chiechier kewe chon lükü. A ffat pwe sia tongeni feiengaw ika sia chök äkkäpilükülüküngaw.​—SalF. 18:1, 14.

13. Met sokkun föfför ra tongeni ekisaalo ach letipechou me atoto pwapwa?

¹³ Iwe nge, ekieköch epwe älisikich le afota ekiekich woon ekkewe mettoch sipwe tongeni küna pwapwa ren lon manauach. Tafit a makkeei: “Üa pwapwa le föri letipom, ai Kot.” (Kölf. 40:8) Ika a fis osukosuk mi weiweitä lon manauach, sisap fokkun ükütiw le föri eöreniach lon pekin lükü. Pwüngün, a tongeni kükkünütiw ach letipechou ika sia föri ekkewe mettoch epwe atoto rech pwapwa. Jiowa a erenikich pwe sipwe tongeni küna pwapwa ren ach äkkälleani me käkkäeö an we Kapas iteitan. (Kölf. 1:1, 2; Jem. 1:25) Sia akkangei “kapas pwetete” seni Paipel me ach kewe mwich mi apöchökkülakich me apwapwaai letipach.​—SalF. 12:25; 16:24.

14. Ifa än Jiowa we pwon mi atoto rech pwapwa iei?

¹⁴ Kot a awora ngenikich chommong popun sipwe pwapwa. An pwonen amanau, ina eü popun sipwe fokkun pwapwa. (Kölf. 13:5) Sia silei pwe ese lifilifil met a fis ngenikich iei, nge Kot epwe efeiöchü chokkewe mi kükkütta i lon mwachkkan. (Älleani Än Salomon Afalafal 8:12.) Ewe soufos Apakuk a affata lon makkeian ei pwe ina an äpilükülük: “Inamwo ika ewe irä fiik esap sot, esap pwal wor ua won ekewe irän wain, inamwo ika ewe irä olif esap ua, esap pwal wor mongö seni ekewe tanipi, inamwo ika ekewe sip repwe ärela seni ewe lenien sip, esap pwal wor kow lon lenier,  nge ngang üpwe chök meseik ren ewe Samol mi Lapalap, üpwe pwapwa ren Kot ai Chon Amanau.”​—Ap. 3:17, 18.

‘Ekkewe Aramas mi Eäni [Jiowa] Ar Kot Repwe Pwapwa!’

15, 16. Eiteita ekkoch än Kot kewe liffang sia tongeni pwapwaiti atun sia witiwiti feiöchüch lon mwachkkan.

¹⁵ Atun sia witiwiti pwönütään ewe pwon mi amwarar lon mwachkkan, Jiowa a mochen sipwe pwapwaiti ekkewe mettoch mi mürinnö a liffang ngenikich. Ewe Paipel a apasa: “Iwe, üa silei pwe esap wor och a mürina lap seni än eman epwe pwapwa o föri mine a mürina lon fansoun manauan. Nge üa pwal silei pwe aramas meinisin repwe mongö o ün, repwe pwal pwapwa lon ar angang weires. Pwal iei eu lifang me ren Kot.” (SalAf. 3:12, 13) “Föri mine a mürina” a pwal weneiti föfföröch ngeni aramas. Jises a apasa pwe pwapwaan liffang mi lap seni pwapwaan angei. Föfförün kirekiröch ngeni pwülüwach, nöüch kewe, semach me inach , me märärich kewe a kan atoto pwapwa. (SalF. 3:27) Ach tipepwetete, awasolaöch, me omusalo tipisin pwiich kewe a pwal atoto chengel me apwapwaai Jiowa. (Kal. 6:10; Kol. 3:12-14; 1 Pit. 4:8, 9) Iwe, ach pennüküolo manauach le apwönüetä ach angangen afalafal a pwal enletin efeiöchükich.

¹⁶ Ena pworaus asan lon Än Salomon Afalafal a kapas usun met sia kan pwapwaiti iteitan, choweän anach me ünümach. Pwal mwo nge lon fansoun weires, sia tongeni küna pwapwa seni än Jiowa kewe liffang lon pekin aion. Pwal och, sia ingeiti me pwapwaiti lingöchün mwiritup me ekkewe chuuk, än ekkewe appanen man kunoufengen, me pwal chommong mettochun fönüfan mi amwarar nge rese kamö. Ika sia ekieki ekkena mettoch, ach tong ngeni Jiowa epwe mämmääritä, pun i ewe Chon Liffangoto mettoch mi mürinnö meinisin.

17. Met epwe unusen angasakichelo seni osukosuken manauach? Met a kan aururukich atun sia witiwiti ena fansoun?

¹⁷ Lon mwachkkan, ach tong ngeni Kot, älleasochisi an kewe allük, me lükü ewe möön kepich repwe emmwen ngeni pwapwa esemuch me unusen angasakichelo seni osukosuken manauach ese unusöch. (1 Jon 5:3) Iwe, atun sia witiwiti ena fansoun, a kan aururukich ach weweiti pwe Jiowa a silei usun ach kewe weires. Tafit a makkeei: “Üpwe mwänek o pwapwa ren om tong ellet, pun ka küna ai riaföü o silei ai kewe weires.” (Kölf. 31:7) Pokiten Jiowa a tongekich, epwe angasakichelo seni ekkewe riäfföü.​—Kölf. 34:19.

18. Pwata nöün Kot kewe aramas ra kon sillelo ren pwapwa?

¹⁸ Sipwe äppirü Jiowa, ewe Koten pwapwa, atun sia witiwiti pwönüetään än kewe pwon. Amwo sipwe ti senikich ekiek ese pwüng mi pinei ach angang ngeni Jiowa. Lupwen osukosuk a piitä, amwo ach tufichin ekiek me mirit epwe emmwenikich. Jiowa epwe älisikich le tümünü meefiach pwe sipwe tongeni föri met epwe akükkünalo pwününgawen ekkewe osukosuk. Amwo sipwe küna pwapwa seni ekkewe mettoch meinisin mi mürinnö Jiowa a awora lon pekin aion me lükü. Ren ach fitipachei Kot, sipwe chengel pun ‘Ekkewe aramas mi eäni [Jiowa] ar Kot repwe pwapwa!’​—Kölf. 144:15, TF.

Met Ka Fen Käeö?

• Atun sia nom fän weires, ifa usun sipwe tongeni äppirü Jiowa?

• Ifa usun mirit epwe älisikich le likitü fän osukosuk?

• Lon fansoun riäfföü, ifa usun sipwe küna pwapwa lon ach föri letipen Kot?

[Ekkewe Kapas Eis fan Iten ewe Lesen]

[Sasing lon pekin taropwe 16]

Jiowa a meefi letipechou ren ekkewe mettoch mi ngaw meinisin ra fiffis

[Credit Line]

© G.M.B. Akash/​Panos Pictures

[Sasing lon pekin taropwe 18]

Jiowa a awora ach tufichin akkamwöchü ach pwapwa