Ifa ewe ekiek mi pwüng usun pwüpwülü mi älisatä pwapwaan ekkewe famili?

Pwüpwülü, ina eü riri mi pin. Lupwen emön a eisini Jises ika mi mumutä än pwüpwülü repwe mufesen, a pölüweni: “Ousap aleani mine a mak lon ekewe Taropwe mi Pin, pwe seni lepoputän ewe mi föri aramas a föri mwän me fefin? Iwe, Kot a apasa, ‘Iei mine eman aramas epwe likitala saman me inan o pach ngeni pwülüan, iwe, ekewe ruoman repwe wiliti eu chök inis.’ Iei mine resap chüen ruoman, pwe eman chök. Mine Kot a rifengeni esap wor eman aramas epwe mwütifeseni. . . . Are eman mwän a mwü seni pwülüan fän iten och popun, nge esap fän iten an kirikiringau ngeni, ätewe a lisowu are a pwülüenisefäli pwal eman fefin.” (Mattu 19:4-6, 9) Lupwen eü pean pwüpwülü a älleasochisi än Jises kapasen fön me tuppwölfengen lefiler, iwe, meinisin chon ewe famili repwe meefi lükülüköch me pwapwa.

Pwata än ekkewe famili tongei Kot a atufichi ar pwapwa?

Jises a erä: “Kopwe echeni ewe Samol om Kot ren unusen lelukom, ren unusen ngünum pwal ren unusen ekiekum. Iei ewe allük mi lap me aüchea seni meinisin.” Nge, ifa ewe oruuan? Jises a apasa: “Kopwe echeni chon arum [kapachelong om famili] usun chök püsin om echenuk.” (Mattu 22:37-39) Ina popun, kiien pwapwa lon famili, ina ach ririöch ngeni Kot pun ach tongei Kot a amwökütükich le pwäratä tong lefilach.

 Ifa usun mwän pwüpwülü me fin pwüpwülü ra tongeni apwapwaai pwülüwer?

Mwän pwüpwülü ra apwapwaai pwülüwer kewe lupwen ra äppirü Jises. Fän tong, Jises a pennüküolo pwisin letipan fän iten ewe mwichefel, pwülüwan we lon kapas monomon. (Efisus 5:25) Jises a apasa: “Nöün Aramas esap feito pwe aramas repwe angang ngeni, nge a feito an epwe angang ngeniir.” (Mattu 20:28) Jises ese kirikiringaw are äweiresi nöün kewe chon käeö nge a kirekiröch ngeniir. (Mattu 11:28) Ina popun, mwän pwüpwülü repwe kirekiröch le apwönüetä wiser, möküren famili, me efeiöchü unusen ar famili.

Fin pwüpwülü ra pwal tongeni käeö seni än Jises leenien äppirü. Iei alon ewe Paipel: “Kot möküren Kraist.” Iwe, a pwal erä pwe “mwän möküren fefin.” (1 Korint 11:3) Jises ese oput an epwe nom fän nemenien Kot. A fokkun süföliti Seman we. Iwe, iei alon: “Üa föri mine a pwapwa ren fansoun meinisin.” (Jon 8:29) Emön fin pwüpwülü epwe alapalo pwapwaan an famili ren an älleasochisi möküran we pokiten i a tongei me süföliti Kot.

Met ekkewe sam me in repwe käeö seni föfförün Jises ngeni ekkewe semirit?

Jises a awora fansoun fän iten ekkewe semirit me äfänni ar ekiek me memmeef. Iei alon Paipel: “Jesus a körato ekewe semirit ren o a apasa, ‘Oupwe mwüt ngeni ekewe semirit pwe repwe feito rei.’” (Luk 18:15, 16) Lon eü fansoun, aramas ra esiita ekkoch ät mi püpüchör le mwareiti Jises. Jises a apünga ekkewe ät, iwe, iei alon ngeni ekkewe chon esiiter: “Nge ouse mo anneani ei uwokisin non pukepin? ‘Ekkewe semirit me ekkewe mönukon repwe fakkun mwareituk.’”​—Mattu 21:15, 16, Ewe Kapasen God.

Met semirit ra tongeni käeö seni Jises?

Jises a isetiw eü leenien äppirü lon an pwapwaiti le käeö usun Kot. Lupwen a 12 ierin, a nonnom lon ewe imwenfel me “mot lein ekewe sense, a aüseling ngeniir o kapas ais ngeniir.” Iwe, met mwiriloon? “Iwe, ir meinisin mi rongorong ngeni ewe ät ra mwar ren an weweöch me an silelap le pölüeni ekewe kapas ais.” (Luk 2:42, 46, 47) Jises ese lamalam tekia inaamwo ika a silelap, nge a süföliti seman me inan. Iei alon ewe Paipel: “A aleasochis ngeniir.”​—Luk 2:51.

Ren pwal ekkoch pworaus, nengeni ewe puk Met ewe Paipel A Wesewesen Apasa? a

[Footnote]